Timbá libro rí niʼnirámáʼ Samuel 4:1-22
4 Ajngóo Samuel niguánú nidxawíín xúgíinʼ xa̱bu̱ Israel.
Nákha mbiʼi rúʼko̱ israelitas nigájnún gúxmijná gajmiún filisteos. Bi̱ israelitas nigi̱ʼi̱i̱n náa níjniúu xuajin Ebenézer, ga̱jma̱a̱ filisteos nigi̱ʼi̱i̱n náa xuajin Afec.
2 Filisteos niguájun xawii mu muxmijná gajmiún israelitas. Dí nigiʼdu̱u̱n niʼni itháan gakhi̱i̱, israelitas táʼngu̱u̱n gúxmijná gajmiún filisteos. Niradíin náa xanáá mbá 4,000 xa̱bekha.
3 Índo̱ soldado nitangiín náa gíi̱nʼ, ikhú bi̱ kuya̱ edxu̱u̱ náa Israel nithi: “Náá numuu dí Jeobá niʼni dí táʼngulú* gúxmijná gajmiúlú filisteos xúgi̱ rá. Guríyáʼ arca* dí nimbánuu ndrígóo Jeobá náa Siló, ga̱jma̱a̱ guʼgua̱ kuʼyúlú mu ikhaa maʼni káwáánʼlú náa ñawúúnʼ xa̱bu̱ sia̱nʼ ndrígúlú”.
4 Ikhú nixuʼmiin xa̱bu̱ náa Siló, ga̱jma̱a̱ ikhiin nigún kuñu̱u̱n arca dí nimbánuu ndrígóo Jeobá bi̱ naʼtáñajúúnʼ ángeles, bi̱ gíʼ náa xíliu̱u̱* náa tsu̱du̱ún* querubines. Ma̱ngaa nigún a̱jmi̱i̱n e̱ji̱i̱n Elí, Hofní ga̱jma̱a̱ Finehás náa ni̱jkha̱ arca dí nimbánuu ndrígóo Dios bi̱ gajkhun.
5 Índo̱ nikríʼiin kuñu̱u̱n arca dí nimbánuu ndrígóo Jeobá náa gríguiin, ikhú mbá xúgíinʼ israelitas nigi̱ʼdi̱i̱ nindxa̱ʼwa̱, ra̱ʼkhá tháán gakhi̱i̱ nindxa̱ʼwa̱ dí asndu niʼxma.
6 Índo̱ filisteos nidxawíín dí nawáán endxa̱ʼwa̱, nithi: “Ndíjkha dí nundxa̱ʼwa̱ hebreos náa gríguiin rá.” Índo̱ nidxawíín dí Arca ndrígóo Jeobá ni̱ʼkha̱nú náa gríguiin,
7 ra̱ʼkhá tháán nimíñúún filisteos. Nithi: “¡Dios ni̱ʼkha̱nú náa gríguiin!”. Ma̱ngaa nithi: “¡Nándáa dí mu̱ʼni̱! ¡Nimbá miʼtsú tárígá xóo rígi̱!
8 ¡Nándáa dí mu̱ʼni̱! Tsáa lá gáʼni káwáánʼlú náa ñawúunʼ Dios bi̱ ra̱ʼkhá tháán mba̱a̱ bugi̱ rá. Ikhaa nindxu̱u̱ Dios bi̱ niʼni ngíníi xa̱bu̱ Egipto náa ku̱ba̱ʼ mijxooʼ* náa mbá xúgíʼ dí niradímíjná.
9 Xámiñalaʼ filisteos, gu̱ni̱ xóo eni̱ xa̱bekha. Raʼkháa gáʼni dí mu̱nila ñajúúnʼ hebreos xó má ikhiin nini̱ ñajuanla. ¡Gu̱ni̱ xóo eni̱ xa̱bekha ga̱jma̱a̱ gagajnála gúxmijná!”.
10 Ikha jngóo filisteos nigájnún gúxmijná, ga̱jma̱a̱ israelitas táʼngu̱u̱n, mámbáa ni̱jkha̱a̱ náa goʼwóo. Ra̱ʼkhá tháán mbaʼin nikháñún: Mbá 30,000 soldado israelitas nikháñún.
11 Filisteos nigún kuñu̱u̱n Arca ndrígóo Dios, ga̱jma̱a̱ mbá nájmi̱i̱n e̱ji̱i̱n Elí, Hofní ga̱jma̱a̱ Finehás nikháñún.
12 Mbáa xa̱biya̱ bi̱ na̱ʼkha̱ náa xuajin chíʼgíiʼ* ndrígóo Benjamín nigájnáa ragáyúu xanáá náa kúwá ruxmijná, ga̱jma̱a̱ ikhaa má mbiʼi rúʼko̱ ni̱jkha̱núu Siló, mbá nitu̱u̱ xtíñuu ga̱jma̱a̱ mbá ku̱ba̱áʼ edxu̱u̱.
13 Índo̱ xa̱bu̱ bugi̱ ni̱jkha̱núu, Elí gíʼ náa rawuunʼ kamba̱a̱. Gíʼthu̱u̱n, ra̱ʼkhá tháán exmiéjuunʼ eʼni Arca ndrígóo Dios bi̱ gajkhun. Índo̱ xa̱bu̱ bugi̱ nita̱ʼa̱a̱ náa xuajin ga̱jma̱a̱ niʼthí dí xtáa rarígá, mbá xúgíinʼ xa̱bu̱ xuajin nigi̱ʼdi̱i̱ nindxa̱ʼwa̱skhá.
14 Índo̱ Elí niʼdxawuun dí nundxa̱ʼwa̱ xa̱bu̱, ikhú niʼthí: “Náá numuu dí ra̱ʼkhá tháán numbi̱ya̱ʼ xa̱bu̱ rá.” Ikhú xa̱bu̱ ni̱jkha̱a̱ ragáyúu gáʼthúu̱n Elí dí xtáa rarígá.
15 (Elí gíʼdoo 98 tsiguuʼ. Mbóó náa eyejxi ga̱jma̱a̱ tséʼyoo nimbá).
16 Ikhú xa̱bu̱ niʼthúu̱n Elí: “¡Ikhúún nindxu̱ʼ bi̱ ndiʼkhúú ni̱ʼkha̱núu̱ xanáá náa nuxmijná! Xúgi̱ má nigájnáa ragayúʼ ikhí”. Índo̱ Elí niʼdxuun rígi̱ nirajxu̱u̱: “Ndiéjunʼ lá nirígá rá a̱ʼdióʼ.”
17 A̱ʼkhu̱ bi̱ ni̱jkha̱a̱ kayóo ajngáa niʼthúu̱n: “Israelitas nigáñún náa inún filisteos, mbaʼin xa̱bu̱ xuajin nikháñún. Ma̱ngaa nikháñún mbá a̱jmi̱i̱n e̱jña̱a̱ʼ, Hofní ga̱jma̱a̱ Finehás, ga̱jma̱a̱ filisteos nigún kuñu̱u̱n Arca ndrígóo Dios bi̱ gajkhun”.
18 Índo̱ xa̱bu̱ niʼthí ga̱jma̱a̱ numuu Arca ndrígóo Dios bi̱ gajkhun, Elí ni̱jkha̱ ga̱jma̱a̱ tsu̱du̱u̱, nixpátujxi̱i̱ ga̱jma̱a̱ xíliu̱u̱* náa níjniúu xkrugua. Nijmigu itsu̱ rexo̱o̱ ga̱jma̱a̱ nikháñúu, numuu dí nikhi̱i̱ má ga̱jma̱a̱ ra̱ʼkhá tháán kiwi̱i̱n. Ikhaa niʼnimbánuu numún xa̱bu̱ Israel mbá 40 tsiguʼ.
19 Guʼgiúunʼ Elí a̱ʼgiu̱u̱ Finehás, kaguewáan ada̱* ga̱jma̱a̱ inu má magiʼdaa a̱ʼdióo. Índo̱ niʼdxawuun dí nigún kuñu̱u̱n Arca ndrígóo Dios bi̱ gajkhun, ga̱jma̱a̱ dí nikháñúu jmégiu̱u̱ ma̱ngaa ajmbio̱o̱,* ikhú nismbáti̱go̱o̱ numuu dí mbá nacha̱ nixnúu ga̱ʼkhu̱ dí magiʼdaa ada̱, ikhú nixtáa a̱ʼdióo.
20 Numuu dí na̱jkha̱ rakáñuu, ikha jngóo gu̱ʼu̱ bi̱ wájun náa níjniúu nitháán: “Xámíñáaʼ niraʼdaa mbáa dxámá”. Mú ikhaa táriʼñún ga̱jma̱a̱ táʼniún kásu.
21 Ada̱ nixná mbiʼyuu Icabod,* numuu dí niʼthí: “Nándáa gamajkhu náa Israel, ni̱jkha̱ kiʼyá”. Niʼthí rígi̱, numuu dí nigún kuñu̱u̱n Arca ndrígóo Dios bi̱ gajkhun ga̱jma̱a̱ dí xóo nigíʼnuu jmégiu̱u̱ ma̱ngaa ajmbio̱o̱.
22 Niʼthí rígi̱: “Nándáa gamajkhu náa Israel, ni̱jkha̱ kiʼyá, numuu dí nigún kuñu̱u̱n Arca ndrígóo Dios bi̱ gajkhun”.
Mbaʼa nota
^ Náa ajngáa hebreo naʼthí, “Náá numuu dí Jeobá niʼni gámbáán rá.”
^ O “e̱jna̱”.
^ O “trono”.
^ O mbáa “náa majñu̱únʼ”.
^ O “desierto”.
^ O “tribu”.
^ O “skáñúu”.
^ O “niʼni endi̱i̱”.
^ O “jmba̱yi̱i̱”.
^ Rí nandoo gáʼthúu̱n, ‹náá ni̱jkha̱ gamajkhu rá.›
