Timbá libro rí niʼnirámáʼ Samuel 5:1-12
5 Índo̱ filisteos niʼngu̱u̱n nirigúu Arca* ndrígóo Dios bi̱ gajkhun nigájnún náa Ebenézer mu magún kuñu̱u̱n asndu náa Asdod.
2 Nda̱wa̱á filisteos nigún kuñu̱u̱n Arca ndrígóo Dios bi̱ gajkhun náa guʼwá rí nduyamajkuíí Dagón, ga̱jma̱a̱ nitsijii náa níjniúu xándú Dagón.
3 Xa̱bu̱ bi̱ kúwá náa Asdod miʼcha̱ nitujxu̱u̱n ga̱jma̱a̱ nixkama̱a̱ xándú Dagón kasmbri̱ga̱a̱ mbayííʼ. Nixpátujxi̱i̱ náa inuu Arca ndrígóo Jeobá. Ikha jngóo nixujxi̱i̱ ga̱jma̱a̱ nigri̱gui̱i̱ mbu̱júu̱.
4 Miʼcha̱ nitujxu̱u̱n mbu̱júu̱ nixka̱ma̱a̱ Dagón kasmbri̱ga̱a̱ mbayííʼ náa inuu Arca ndrígóo Jeobá, edxu̱u̱ Dagón ga̱jma̱a̱ a̱jma̱ ñawúunʼ niturígú, jngutíga̱ náa xkrugua, i̱ndó náa rí xóo e̱gi̱ʼ kaʼnii nda̱a̱ rí niʼniuu.
5 Ikha jngóo rí asndu mbiʼi xúgi̱, ni má ndxajkun ndrígóo Dagón ni má imba̱a̱ xa̱bu̱ bi̱ nato̱ʼo̱o̱ náa guʼwá rí nduyamajkuíí Dagón dí rígá náa Asdod tséjngupri̱ga̱ ikhí.
6 Ñawúunʼ Jeobá niʼni ngíníi xa̱bu̱ xuajin Asdod ga̱jma̱a̱ xuajin dí rígá mijngii. Niʼni ngíníi numuu rí nixnúún muda̱ nandii hemorroides.*
7 Índo̱ xa̱bu̱ Asdod ndiyáá dí xígi̱ kaʼnii eguáʼníí, nithi: “Arca ndrígóo Dios ndrígu̱ún xa̱bu̱ Israel ni xándoo marigá ga̱jma̱á nindxu̱lú, numuu dí ra̱ʼkhá tháán eʼni gínáánʼlú, ga̱jma̱a̱ Dagón dios ndrígulú”.
8 Ikha jngóo nigimbíin mbá xúgíinʼ bi̱ nutañajúúnʼ filisteos, ga̱jma̱a̱ nirajxu̱u̱n: “Ndiéjunʼ gúʼni̱ ga̱jma̱a̱ Arca ndrígóo Dios ndrígu̱ún xa̱bu̱ Israel rá.” Ikhiin niriʼñúún: “Ndayóoʼ rí mu̱ʼgua̱ kuʼyúlú Arca ndrígóo Dios ndrígu̱ún xa̱bu̱ Israel náa xuajin Gat”. Ikha jngóo nigún kuñu̱u̱n ikhí.
9 Nda̱wa̱á rí nigún kuñu̱u̱n Arca ikhí, Jeobá niʼni rí mumíniiʼ xa̱bu̱ xuajin. Xúʼko̱ niʼni rí mamiñún, niʼni rí mumíniiʼ xúgíinʼ xa̱bu̱ bi̱ kúwá náa xuajin rúʼko̱, e̱ji̱n ga̱jma̱a̱ xabuanii, xúgíinʼ niʼni rí muguaʼdáá nandii hemorroides.
10 Nigún kuñu̱u̱n Arca ndrígóo Dios bi̱ gajkhun náa xuajin Ecrón. Índo̱ Arca ni̱jkha̱nú ikhí, xa̱bu̱ Ecrón nigi̱ʼdi̱i̱ nindxa̱ʼwa̱: “¡Niguwáʼ kuñu̱u̱n Arca ndrígóo Dios ndrígu̱ún xa̱bu̱ Israel mu muradiáánʼlú ga̱jma̱a̱ xa̱bu̱ xuajñulú!”.
11 Ikhú nigimbíin mbá xúgíinʼ bi̱ nutañajúúnʼ filisteos, ga̱jma̱a̱ nithúún: “Guríyaaʼla gi̱i̱ Arca ndrígóo Dios ndrígu̱ún xa̱bu̱ Israel, guʼgua̱a̱ʼ kuyala mu xúʼko̱ xákáñuxu ikháanʼ, ni má xa̱bu̱ xuajñuxu”. Numuu rí xúgíinʼ xa̱bu̱ xuajin nimíñúún rí makhañún. Ñawúunʼ Dios bi̱ gajkhun niʼni rí mumíniiʼ wéñuuʼ:
12 Bi̱ na̱nguá nikháñún, nimíniiʼ ga̱jma̱a̱ nandii hemorroides. Xa̱bu̱ xuajin nundxa̱ʼwa̱ rí mixtambáñún ga̱jma̱a̱ aʼwúúnʼ ni̱jkha̱nú asndu mekhuíí.
