Timbá libro rí niʼnirámáʼ Samuel 6:1-21
-
Filisteos nuxnajxi̱i̱ Arca náa Israel (1-21)
6 Arca* ndrígóo Jeobá nirígá náa mbañúúnʼ filisteos mbá juwan igu̱nʼ.
2 Filisteos nindxa̱ʼwu̱u̱n ndxajkun ga̱jma̱a̱ xa̱bu̱ xawan, nirajxu̱u̱n: “Ndiéjunʼ gúʼni̱ ga̱jma̱a̱ Arca ndrígóo Jeobá rá. Gu̱tu̱xu xú káʼnii gúxuʼma̱a̱ maʼga̱a̱”.
3 Ikhiin niriʼña: “Á mu nuxuʼmaala maʼga̱a̱ arca dí nimbánuu ndrígóo Jeobá, Dios ndrígóo Israel. Xúxuʼmáa maʼga̱a̱ i̱ndó ikhaa. Guxuʼmáa maʼga̱a̱ ga̱jma̱a̱ mbá tsigijñaʼ dí nikiéʼkála.* Numuu dí i̱ndó xúʼko̱ maʼni̱i̱ a̱jkia̱la, ga̱jma̱a̱ mbiʼyáá náá numuu dí ñawúunʼ naʼni rí mumíniiʼla má xúʼko̱”.
4 Ga̱jma̱a̱ nirajxu̱u̱n: “Ndiéjunʼ gáʼyóoʼ muxuʼmáxu xóo tsigijñaʼ dí nikiéʼkuxu rá.” Ikhiin niriʼñúún: “Numuu dí witsiin bi̱ nutañajúúnʼ filisteos, guxuʼmá mbá witsu hemorroides dí oro ga̱jma̱a̱ mbá witsiin tsijní bi̱ nigumiin ga̱jma̱a̱ oro. Numuu dí mámbáa dí ikháanʼla ga̱jma̱a̱ xa̱bu̱ ñajunʼ ikháá má dí nimíniiʼla.
5 Gíʼmaa mu̱ni̱ xtiʼkhuu hemorroides ga̱jma̱a̱ xtiʼkúún tsijní bi̱ kúwá runi̱ gámbáa dí rígá náa mbayala. Gíʼmaa rí muxna̱a̱ gamajkhu Dios ndrígóo Israel. Mbáa xúʼko̱ maniñuuʼ raʼni mumíniiʼ ikháanʼla, Dios ndrígala ga̱jma̱a̱ mbayala.
6 Ndíjkha dí mu̱ni̱ gújkhúʼ a̱jkia̱la xó má nini̱ xa̱bu̱ Egipto ga̱jma̱a̱ faraón rá. Índo̱ Dios ndrígóo Israel niʼni rí mumíniiʼ, ikhú niniñu̱u̱nʼ israelitas dí magúun ga̱jma̱a̱ israelitas nigájni̱ín ikhí.
7 Gu̱ni̱la̱ mbá carreta ga̱jma̱a̱ guʼñíinʼla a̱jmi̱i̱n xedi̱ bi̱ guáʼdiin e̱jñu̱ún, bi̱ nditháan túda yoko, nda̱wa̱á guruʼwajmiin xedi̱ buʼko̱ náa carreta, mú gaʼgua̱a̱ʼla kudiin e̱jñu̱ún náa gúláa, náa xúñún rudún.
8 Gugíwánʼ náa carreta Arca ndrígóo Jeobá, ga̱jma̱a̱ gugíwánʼ náa mijngii Arca mbá caja náa kajti dí niguma ga̱jma̱a̱ oro dí gúxuʼmá maʼga náa ikhaa xóo tsigijñaʼ dí nikiéʼkala, nda̱wa̱á guniʼñááʼ rí maʼga̱a̱.
9 Ga̱jma̱a̱ gu̱ya̱a̱ xóo gáʼga̱a̱, á mu dí natsimuu xígií náa kamba̱a̱ dí na̱jkha̱ náa Bet-Semes, xígií náa ku̱ba̱ʼ rí ni̱ʼkha̱. Rúʼko̱ eyoo gáʼthúu̱n rí Dios ndrígóo Israel niʼni rí ma̱ʼkha̱ gamiéjunʼ mba̱a̱ rígi̱ náa ikháánʼlú. Mú, á mu tséjkha̱ ikhí, mbuʼyáá dí raʼkháa ñawúunʼ niʼni dí mumíniiʼlú, mbaʼ má nirígáá”.
10 Xa̱bu̱ nini̱ xó má nithúún, ndiñíinʼ a̱jmi̱i̱n xedi̱ bi̱ guáʼdiin e̱jñu̱ún ga̱jma̱a̱ niruʼwajmiin náa carreta. Ga̱jma̱a̱ e̱jñu̱ún niguáan kudiin náa gúláa.
11 Ikhú nirajkua̱a̱ náa carreta Arca ndrígóo Jeobá ga̱jma̱a̱ caja náa kajtin tsijní bi̱ nigumiin ga̱jma̱a̱ oro ga̱jma̱a̱ xtiʼkhuu hemorroides.
12 Xedi̱ nigún mbájmbu̱ú náa kamba̱a̱ dí na̱jkha̱ Bet-Semes, xedi̱ nagún rundxa̱ʼwa̱ ga̱jma̱a̱ nditháan tségájnutiñu̱u̱nʼ, ni má náa ñawún májánʼ ni má náa ñawún xti̱ʼ. Ga̱jma̱a̱ bi̱ nutañajúúnʼ filisteos nigún tsu̱du̱ún asndu náa ndawaa Bet-Semes.
13 Xa̱bu̱ Bet-Semes kúwá rugimbo̱o̱ trigo náa xkua̱, índo̱ nixujxi̱i̱ edxu̱ún ndiyáá Arca, ikhú ra̱ʼkhá tháán nidxún.
14 Carreta nito̱ʼo̱o̱ náa mbayuuʼ Josué bi̱ betsemita ga̱jma̱a̱ ikhí má niwi̱ji̱, náa mijngii gíʼ itsí mba̱a̱. Ikhú ixu̱u̱ carreta nitsikha ga̱jma̱a̱ nixnajxi̱i̱n xedi̱ náa Jeobá xóo tsigijñaʼ dí nakarámáʼ.
15 Levita nirigúu Arca ndrígóo Jeobá ga̱jma̱a̱ caja náa kajti dí niguma ga̱jma̱a̱ oro, nisngutama̱ náa tsu̱du̱u̱ itsí mba̱a̱. Mbiʼi rúʼko̱ xa̱bu̱ Bet-Semes nixnajxi̱ náa Jeobá tsigijñaʼ dí nakarámáʼ ga̱jma̱a̱ i̱ʼwáʼ tsigijñaʼ.
16 Índo̱ ndiyáá rúʼko̱ bi̱ nutañajúúnʼ filisteos, nitangiín náa Ecrón mbiʼi má rúʼko̱.
17 Rígi̱ nindxu̱u̱ hemorroides dí oro, dí filisteos nixuʼma náa Jeobá xóo tsigijñaʼ dí nikiéʼkhún, mbá ga̱jma̱a̱ numuu Asdod, mbá ga̱jma̱a̱ numuu Gaza, mbá ga̱jma̱a̱ numuu Asquelón, mbá ga̱jma̱a̱ numuu Gat, i̱mba̱ ga̱jma̱a̱ numuu Ecrón.
18 Ga̱jma̱a̱ xúʼko̱ má mbaʼin tsijní bi̱ nigumiin ga̱jma̱a̱ oro, xó má mbaʼa xuajñún bi̱ nutañajúúnʼ filisteos (xuajin dí kúgumaʼá ga̱jma̱a̱ xuajin majkhaʼ dí rígá xanáá).
Ga̱jma̱a̱ itsí mba̱a̱ náa nitama̱ʼ Arca ndrígóo Jeobá niʼni ginuu dí nirígá asndu rí mbiʼi xúgi̱, náa mbayuuʼ Josué bi̱ betsemita.
19 Mú Dios nigudíin xa̱bu̱ Bet-Semes, numuu rí ndiyáá Arca ndrígóo Jeobá, nigudíin mbá 50,070* xa̱bu̱ xuajin. Ga̱jma̱a̱ xa̱bu̱ xuajin nigíʼdi̱i̱ nimbi̱ya̱ʼ ga̱jma̱a̱ numuu rí nikháñún a̱ngiu̱ún. Numuu rí Jeobá ra̱ʼkhá tháán mbaʼin nigudíin.
20 Xa̱bu̱ Bet-Semes nirajximíjna̱: “Tsáá gáʼngo̱o̱ gáwi̱ji̱ náa inuu Jeobá, Dios bi̱ kaʼwii bigi̱ rá. Náá gáʼga Dios índo̱ gágajnaa náa ikháánʼlú rá.”
21 Ikha jngóo nixuʼmiin bi̱ magún kuñu̱u̱n ajngáa náa xa̱bu̱ Quiryat-Jearim mu muthún: “Filisteo nixuʼma̱a̱ Arca ndrígóo Jeobá, aguajtáala gúʼyáaʼ ga̱jma̱a̱ guʼgua̱a̱ʼ ku̱ya̱la”.
Mbaʼa nota
^ O “E̱jna̱”.
^ O “nijngraʼáanʼla”.
^ Náa ajngáa hebreo naʼthí, “70 xa̱bu̱, 50,000 xa̱bu̱”.
