Timbá libro rí niʼnirámáʼ Samuel 7:1-17
7 Xa̱bu̱ Quiryat-Jearim niguwáʼ, ga̱jma̱a̱ nitsimún kuñu̱u̱n Arca* ndrígóo Jeobá náa goʼwóo Abinadab dí grígu náa bíjní. Nini̱ kaʼwi̱i̱ a̱ʼdióo Eleazar mu mañewu̱u̱n Arca ndrígóo Jeobá.
2 Ndijyúuʼ xóo mbá 20 tsiguʼ rí mbá xúgíʼ, asndu mbiʼi dí Arca ni̱jkha̱nú náa Quiryat-Jearim. Ga̱jma̱a̱ mbá xúgíinʼ xa̱bu̱ Israel nigíʼdi̱i̱ ndiyáaʼ Jeobá.
3 Samuel niʼthún xa̱bu̱ Israel: “Á mu dí natangáanʼla ga̱jma̱a̱ xúgíʼ a̱jkia̱la náa Jeobá, gu̱ni̱ gámbíin dioses bi̱ ragájkhun ga̱jma̱a̱ xtiʼkúún Astoret, guxnaximíjná ga̱jma̱a̱ xúgíʼ a̱jkia̱la náa Jeobá, gu̱ni̱ ñajuunʼ i̱ndó ikhaa. Ikhú ikhaa maʼni káwáanʼla náa ñawúúnʼ filisteos”.
4 Israelitas nini̱ gámbíin Baal ga̱jma̱a̱ xtiʼkúún Astoret, nigi̱ʼdi̱i̱ nini̱ ñajuunʼ mbáwíí Jeobá.
5 Samuel niʼthún: “Gagimbáanʼla náa Mizpá, ga̱jma̱a̱ ikhúún matakáñuu Jeobá ga̱jma̱a̱ numala”.
6 Ikha jngóo nigimbíin náa Mizpá. Niri̱ya̱ʼ iyaʼ ga̱jma̱a̱ nixidíí náa inuu Jeobá, na̱nguá nipiʼtsu mbiʼi rúʼko̱. Nithi: “Nixuʼdámíjnáxu̱ aʼkhá náa Jeobá”. Samuel nigíʼdúu niʼnimbánuu numún israelitas náa Mizpá.
7 Índo̱ filisteos nidxawíín dí israelitas nigimbúmíjná náa Mizpá, ikhú bi̱ nutañajúúnʼ filisteos nitsimún mu muxmijná gajmiún. Índo̱ israelitas nidxawíín, ra̱ʼkhá tháán nimíñúún kuñún filisteos.
8 Ikha jngóo israelitas nitháán Samuel: “Xátatsiʼñáánʼ ratanda̱ʼa̱a̱ Jeobá Dios ndrígúxu̱ dí mambáyuxuʼ ga̱jma̱a̱ dí maʼni káwáanʼxu náa ñawúúnʼ filisteos”.
9 Ikhú Samuel niguajtuwiin mbáa a̱ʼdá múgú ga̱jma̱a̱ nixnájxi̱i̱ náa inuu Jeobá xóo tsigijñaʼ dí nakarámáʼ. Samuel niʼtákáñuu Jeobá dí mambáñún israelitas, ga̱jma̱a̱ Jeobá niʼdxawuun.
10 Índo̱ Samuel xtáa raxnájxi̱ tsigijñaʼ dí nakarámáʼ, bi̱ filisteos nagún má xúʼko̱ mu muxnamijná gajmiún israelitas. Mbiʼi rúʼko̱ Jeobá niʼni dí asndu mekhuíí majmidá náa filisteos ga̱jma̱a̱ rúʼko̱ niʼni dí mamiñún, táʼngu̱u̱n gúxmijná gajmiún israelitas.
11 Ikhú israelitas nigájnún náa Mizpá, nigún ruxkúún ga̱jma̱a̱ niradíin filisteos asndu náa Bet-Car mbaaʼ dí naguanúu náa sur.
12 Nda̱wa̱á Samuel niyéjxi̱ mbá itsí, nigíʼ náa majñu̱u̱ʼ Mizpá ga̱jma̱a̱ Jesaná, nixná mbiʼyuu Ebenézer,* numuu dí niʼthí: “Asndu xúgi̱ Jeobá nimbáyulúʼ”.
13 Xúʼko̱ niʼni dí táʼngu̱u̱n filisteos. Nánguá nigún rudrigúu itháan mbañúúnʼ israelitas, ga̱jma̱a̱ ñawúunʼ Jeobá nixtáa raʼni ngíníi náa mbá xúgíʼ mbiʼi dí nixtáa Samuel.
14 Ga̱jma̱a̱ xuajin dí filisteos nidrigú káñúnʼ israelitas nitanga̱a̱ niʼni̱i̱ ndrígu̱ún ikhiin, dí nagi̱ʼdu̱u̱ náa Ecrón asndu náa Gat. Israelitas nindrigúu mbaaʼ dí rígá náa xuajin rúʼko̱ dí filisteos nidrigú káñún.
Ma̱ngaa israelitas nikúwá tsímáá gajmiún xa̱bu̱ amorreos.
15 Samuel niʼnimbánuu numún israelitas náa xúgíʼ mbiʼi dí xóó nixtáa.
16 Mámbá tsiguʼ natanga̱a̱ na̱jkha̱. Nagíʼdu̱u̱ náa Betel, Guilgal ga̱jma̱a̱ Mizpá, náa xúgíʼ xuajin rúʼko̱ naʼnimbánuu numún israelitas.
17 Nda̱wa̱á natanga̱a̱ Ramá, numuu dí ikhí rígá goʼwóo, ga̱jma̱a̱ ikhí ma̱ngaa naʼnimbánuu numún israelitas. Náa Ramá niʼni mbá náa mixnájxi̱ tsigijñaʼ náa inuu Jeobá.
