Timbá libro rí niʼnirámáʼ Samuel 8:1-22
8 Índo̱ Samuel nikhi̱i̱ má, nigruigi̱i̱n e̱ji̱i̱n mu munimbaníí xkujndu ndrígu̱ún israelitas.
2 A̱ʼdióo bi̱ giʼnii nigumbiʼyuu Joel, bi̱ maʼni raga̱jmi̱i̱n nigumbiʼyuu Abías, mbá nájmi̱i̱n nunimbaníí xkujndu ndrígu̱ún xa̱bu̱ náa Beer-Seba.
3 Mú e̱ji̱i̱n na̱nguá nini̱ xóo niʼni ikhaa, i̱ndó nduyáʼ dí maguáʼdáá ikhiin, nudrigú regalo ga̱jma̱a̱ tsénimbáníí numún xa̱bu̱ xó má kaʼyoo.
4 Nda̱wa̱á mbá xúgíinʼ xa̱bu̱ bi̱ kuya̱ edxu̱u̱, nigimbúmíjná ga̱jma̱a̱ nigún gúyáá Samuel náa Ramá.
5 Nitháán: “Ikháán nikhi̱i̱n má, ga̱jma̱a̱ ejña̱a̱nʼ tséni̱ xó má ikháán nitani̱. Ikha jngóo atagíiʼ mbáa rey mu maʼtáñajunxu. Xó má náa i̱ʼwáʼ xuajin guáʼdaa mbáa rey”.
6 Mú Samuel tánigu̱u̱ʼ* rí nitháán: “Atagíiʼ mbáa rey mu maʼtáñajunxu̱”. Ikhú niʼtákáñuu Jeobá.
7 Jeobá niriʼñuu: “Atani̱ xúgíʼ rí xa̱bu̱ xuajin nitha̱nʼ, numuu dí raʼkháa ikháán tsíñún gúyáaʼ. Ikhúún tsíñún rí matañájúúnʼ.
8 Kúwá runi̱ xó má nini̱ nákhá mbiʼi rí nigúwíin náa Egipto. Nuniñuʼ má xúʼko̱ ga̱jma̱a̱ nduyamajkhún eʼwíinʼ dioses, rúʼko̱ nindxu̱u̱ rí kúwá ruñanʼ ikháán xúgi̱.
9 Atadxawún má, mú arathún mbájmbu dí muguáʼníí. Arathún dí rey bi̱ maʼtáñajúúnʼ, kaʼyoo maxiéjúúnʼ rí ikhaa ndaʼyoo rí májánʼ”.
10 Ikha jngóo Samuel niʼthúún xa̱bu̱ bi̱ kúwá runda̱ʼa̱a̱ mbáa rey. Ga̱jma̱a̱ niʼthún xúgíʼ rí Jeobá niʼthúu̱n.
11 Niʼthún: “Rígi̱ dí kaʼyoo maxiéjuanla mu̱ni̱ rey bi̱ maʼtáñajuanla. Maʼga kagui̱i̱n e̱jña̱la mu matrámiiʼ náa carro dí nuxmijná ga̱jma̱a̱. Ma̱ngaa náa wáyú, ga̱jma̱a̱ tikhun magún ragáñúún náa inuu carro dí nuxmijná ga̱jma̱a̱.
12 Eʼwíinʼ magruigi̱i̱n mu mbuya̱ edxu̱u̱ náa soldado ndrígóo. Bi̱ mbuya̱ edxu̱u̱ náa 1,000 ga̱jma̱a̱ bi̱ mbuya̱ edxu̱u̱ náa 50, mangiin eʼwíinʼ maʼni rí muxnáá xku̱bi̱, ga̱jma̱a̱ murajxi̱i̱ rí nijma̱a̱ náa mbayuuʼ.
13 Muni̱ ajua̱nʼ rí maxmínaʼ ga̱jma̱a̱, ma̱ngaa i̱ʼwáʼ dí majmaa náa carro dí nuxmijná ga̱jma̱a̱. Maʼga kagui̱i̱n waʼxiala mu muni̱ májáánʼ pomada,* muni̱ májáánʼ ganitsu ga̱jma̱a̱ muni̱ pan.
14 Maguanúu ga̱jma̱a̱ mbayala dí itháan májánʼ, náa rígá ixu̱u̱ uva, olivos, ga̱jma̱a̱ maxnún xa̱bi̱i̱ ikhaa.
15 Maguanúu ga̱jma̱a̱ nguéjma̱* dí gájma̱a̱ náa mbayala, náa kiʼdu trigo ga̱jma̱a̱ uvas ndrígala. Maxnún xa̱bu̱ bi̱ nuñajunʼ náa ikhaa ga̱jma̱a̱ xa̱bi̱i̱.
16 Maʼga kagui̱i̱n xa̱bekha ga̱jma̱a̱ gu̱ʼu̱ bi̱ numbayála, xujkiála bi̱ itháan míjíinʼ ga̱jma̱a̱ búrriala mu majmiuu muni̱ ñajuunʼ.
17 Maguanúu gajmíi̱n mbá nguéjmi̱i̱n xujkiála, ga̱jma̱a̱ ikháanʼla mani̱ndxa̱la xa̱bi̱i̱.
18 Maʼga̱nú mbiʼi rí ikháanʼla magáwíinʼ a̱jkia̱la ga̱jma̱a̱ numuu rey bi̱ ikháanʼla niraʼwi̱i̱la. Mú índo̱ gárígá rúʼko̱, Jeobá xáʼdxawanla”.
19 Xa̱bu̱ xuajin túdxawíín Samuel, ga̱jma̱a̱ nithi: “¡Tséʼniuu má! ¡Nandiuxu mbáa rey!
20 Xúʼko̱ mani̱ndxu̱xuʼ xó má i̱ʼwáʼ xuajin. Rey maʼtáñajunxu, maxnúxu̱ ikha, ga̱jma̱a̱ maxmínaʼ ga̱jma̱á numuxu”.
21 Nda̱wa̱á rí Samuel niʼdxawuun rí nithi xa̱bu̱ xuajin, ikhú niʼthúu̱n Jeobá.
22 Jeobá niʼthúu̱n Samuel: “Atadxawún ga̱jma̱a̱ atagíiʼ mbáa rey mu maʼtáñajúúnʼ”. Ikhú Samuel niʼthúún israelitas: “Mámbáa gáʼga̱a̱ náa xuajñuu”.
