Timbá libro rí niʼnirámáʼ Samuel 9:1-27
-
Samuel naniniiʼ Saúl (1-27)
9 Nixtáa mbáa xa̱bu̱ bi̱ na̱ʼkha̱ náa xuajin chíʼgíiʼ* ndrígóo Benjamín, bi̱ mbiʼyuu Quis, nindxu̱u̱ a̱ʼdióo Abiel, a̱ʼdióo Zeror, a̱ʼdióo Becorat, a̱ʼdióo Afías. Benjaminita bigi̱ gíʼdoo wéñuuʼ.
2 Gíʼdaa mbáa a̱ʼdióo bi̱ mbiʼyuu Saúl, mbáa dxámá ga̱jma̱a̱ tsiʼyáa, nimbáa israelita na̱nguá tsiʼyáa xóo ikhaa. Mba̱yi̱i̱ʼ ga̱jma̱a̱ nimbáa tsénújngoo náa xpajpoo.
3 Mbá mbiʼi nindáti̱gi̱i̱n búrriu̱u̱ Quis, anu̱u̱* Saúl. Ga̱jma̱a̱ Quis niʼthúu̱n a̱ʼdióo bi̱ mbiʼyuu Saúl: “Mbá péñu, ayuʼ ga̱jma̱a̱ʼ bi̱ nambáyulú, ayuʼ gátaʼñíínʼ búrru”.
4 Ikhiin nigún náa kúbá Efraín ga̱jma̱a̱ náa ku̱ba̱ʼ Salisá, mú na̱nguá nixkami̱ín ikhí búrru. Ninújngún náa ku̱ba̱ʼ Saalim, mú ndawi̱i̱n má ikhí ma̱ngaa. Nigún náa mbá xúgíʼ ku̱bu̱únʼ benjaminitas, na̱nguá kujmaa tsújún.
5 Índo̱ niguánú náa ku̱ba̱ʼ Zuf, Saúl niʼthúu̱n bi̱ nambáyúu bi̱ na̱jkha̱ ga̱jma̱a̱: “Guʼgua̱áʼ, gutanga̱ánʼlú, raʼkháa gáʼni dí anu̱ʼ maxmiéjuunʼ kaʼyulú ikháánʼ ki xóo búrru”.
6 Mú bi̱ nambáyúu niʼthúu̱n: “Natayáá ráʼ, náa xuajin rúʼko̱ xtáa mbáa xa̱bi̱i̱ Dios, mbáa xa̱bu̱ bi̱ nduyamajkuíí. Xúgíʼ dí naʼthí nambánuu. Guʼgualú gúʼyáá. Mbáa ikhaa ma̱ndoo maʼthúlú náá gúʼgua̱”.
7 Saúl niʼthúu̱n bi̱ nambáyúu: “Á mu dí na̱jkua̱lú, ndiéjunʼ gúyéʼgua muxnáá. Nándáa pan náa amulú. Nda̱a̱ dí muyéʼgua muxnáá xa̱bi̱i̱ Dios bi̱ gajkhun. O rígá xóó dí naguanúu dxe̱ʼ.”
8 Bi̱ nambáyúu niʼni káñuu ga̱jma̱a̱ niʼthúu̱n Saúl: “Natayáá ráʼ, ka̱ya̱ mbá xuiʼtóo plata.* Guxnáálú ikhaa xa̱bi̱i̱ Dios bi̱ gajkhun, ga̱jma̱a̱ ikhaa maʼthúlú náá gúʼgua̱”.
9 (Nákha wajyúuʼ índo̱ mbáa na̱jkha̱ gárajxu̱u̱ Dios náa Israel, naʼthí: “Guʼgualú gúʼyáá vidente”.* Numuu dí nákha ginii videntes ethún profetas* bi̱ kúwá xúgi̱).
10 Saúl niʼthúu̱n bi̱ nambáyúu: “Májánʼ má. Guʼgualú”. Ikhú nigún náa xuajin dí xtáa xa̱bi̱i̱ Dios bi̱ gajkhun.
11 Índo̱ kúwá rutsimún náa xuajin náa mitsídánʼ, ikhí nixkamiin wa̱ʼxa̱ʼ* bi̱ nagájnún gúrawíi iyaʼ, nirajxu̱u̱n: “Xtáa vidente gi̱i̱ ráʼ.”
12 Ikhiin niriʼña̱a̱n: “Aan. Xtáa wáa itháan kaníí ñuʼún. Aʼguala nacha̱. Ndiʼkhúú ni̱ʼkha̱nú náa xuajin, numuu dí xa̱bu̱ xuajin muxnajxi̱ mbá tsigijñaʼ náa mitsídánʼ.
13 Índo̱ gáta̱ʼa̱la náa xuajin muxkamaa. Aʼguala nacha̱, nákha xóó tsétsimuu gákuiʼtsu náa mitsídánʼ. Numuu dí xa̱bu̱ xóó má xúgíʼdi̱i̱ muphiʼtsu asndu índo̱ ikhaa gáʼga̱nú, ga̱jma̱a̱ maʼni tsajkurámuuʼ tsigijñaʼ. Muphiʼtsu bi̱ nigún índo̱ ikhaa gáʼga̱nú. Á mu dí natsimala má nacha̱, maʼngala muxkamaa”.
14 Ikhú nitsimún náa xuajin. Índo̱ kúwá ragún náa phú xuajin, ndiyáá Samuel dí na̱ʼkha̱ mu muraʼnumijná gajmiún índo̱ ikhaa xtáa ra̱ʼkha̱ mu maʼga náa mitsídánʼ.
15 Mbá mbiʼi wapháá nákha Saúl xóó tséjkha̱nú, Jeobá niʼthúu̱n* Samuel:
16 “Gájtsíí ikhaa má hora rígi̱, makuʼmaa mbáa xa̱bu̱ bi̱ na̱ʼkha̱ náa ku̱bu̱únʼ benjaminitas. Gíʼmaa dí matraʼwi̱i̱ mu ikhaa mbayá edxu̱u̱ náa xuajñunʼ Israel. Ikhaa maʼni kríya̱a̱ʼ xuajñunʼ náa ñawúúnʼ xa̱bu̱ filisteos. Numuu dí ndi̱yo̱o̱ xóo kúwá rumíniiʼ xa̱bu̱ xuajñunʼ, ga̱jma̱a̱ dí numbi̱ya̱ʼ ni̱ʼkha̱nú asndu náa ikhúún”.
17 Índo̱ Samuel ndiʼyoo Saúl, ikhú Jeobá niʼthúu̱n: “Gi̱i̱ xtáa xa̱bu̱ bi̱ nitha̱nʼ ‹Ikhaa nindxu̱u̱ bi̱ maʼtáñajúúnʼ xa̱bu̱ xuajñunʼ›”.
18 Ikhú Saúl nikuʼmaminaʼ náa wíji̱ Samuel náa ta̱pho̱o̱ xkrugoo xuajin, nirajxu̱u̱: “Mbá péñu, lá ma̱ndoo marathu̱nʼ náá guanúu goʼwóo vidente ráʼ.”
19 Samuel niriʼñuu Saúl: “Ikhúún nindxu̱ʼ vidente. Atatsimaaʼ giníí náa mitsídánʼ. Xúgi̱ muphiʼtsulú, miʼcha̱ gájtsíí gúʼgua̱a̱ʼla. Matha̱a̱n xúgíʼ dí nandaaʼ ma̱ta̱ya̱a̱.*
20 Xáxmiéjuaanʼ* ga̱jma̱a̱ numún búrru bi̱ nindáti̱gi̱i̱n nákha ragajtsú mbiʼi, numuu dí nikujmiin má. Ma̱ngaa, tsáá lá kaʼyoo xúgíʼ dí gíʼdoo numuu dí rígá náa Israel rá. Lá raʼkháa ndrígáaʼ ikháán ga̱jma̱a̱ bi̱ kúwá náa goʼwóo ana̱a̱ʼ* ráʼ.”
21 Índo̱ Saúl niʼdxuun rígi̱, niʼthí: “Lá raʼkháa ikhúún nindxu̱ʼ benjaminita, bi̱ itháan chíʼgíiʼ* náa xúgíʼ xuajin majkhaʼ dí rígá náa Israel ráʼ. Lá raʼkháa bi̱ kúwíi̱n náa goʼwóʼ na̱nguá guáʼdáá wéñuuʼ numún náa mbá xúgíinʼ bi̱ kúwíi̱n náa guʼwún bi̱ naguwáʼ náa xuajin chíʼgíiʼ ndrígóo Benjamín ráʼ. Ndíjkha dí ikhúún eratúnʼ xígi̱ rá.”
22 Ikhú Samuel ni̱jkha̱ kayáa Saúl ga̱jma̱a̱ bi̱ nambáyúu náa dí muphiʼtsu, nixnúún matri̱gi̱i̱n náa dí itháan gíʼdoo numuu náa tri̱gi̱i̱n bi̱ nigún. Ikhí tri̱gi̱i̱n xóo mbá 30 xa̱bekha.
23 Samuel niʼthúu̱n bi̱ naʼni mújúunʼ ganitsu: “Ayi̱ jcháaʼ xuwiʼ dí ni̱xna̱a̱ matiejxíi”.
24 Ikhú bi̱ naʼni mújúunʼ ganitsu ni̱ʼkha̱ kayóo mbá xtiyuu xujkhúʼ bi̱ nijuixnájxi̱i̱ náa tsigijñaʼ ga̱jma̱a̱ nisrigu mi̱khu̱ Saúl. Ikhú Samuel niʼthúu̱n Saúl: “Gi̱i̱ rígá dí nigijxi̱i̱ mu miʼtsu ikháán. Atsu, numuu dí nigijxi̱i̱ mu miʼtsu mbiʼi rígi̱, numuu dí ikhúún nitha̱ ‹Gúʼdiin bi̱ maguwáʼ›”. Mbiʼi rúʼko̱ Saúl nikuiʼtsu ga̱jma̱a̱ Samuel.
25 Nda̱wa̱á niguájtaán náa xuajin, Samuel niʼtámíjná má xúʼko̱ ga̱jma̱a̱ Saúl náa tsu̱du̱u̱ guʼwá.
26 Nákhíí miʼcha̱ dí i̱mba̱ néjtsuu niguájxu̱u̱n. Índo̱ na̱jkha̱ rajtsi* Samuel nindxa̱ʼóo Saúl, ikhaa niguanúu náa tsu̱du̱u̱ guʼwá, niʼthúu̱n: “Atani̱ rataminaʼ mu matangáwáaʼ”. Ikhú Saúl niʼni rataminaʼ ga̱jma̱a̱ mbá nájmi̱i̱n nigájnún rexa̱a̱.
27 Índo̱ kúwá ragájni̱ín náa xuajin, Samuel niʼthúu̱n Saúl: “Aratháán bi̱ nambáyaaʼ dí maʼga jka”. Ikhú bi̱ nambáyúu ni̱jkha̱a̱ ginii. “Mú ikháán, niʼthí xóó Samuel, aguanáaʼ gi̱i̱, numuu dí gúʼdoo mbá ajngóo Dios dí matha̱a̱n”.
Mbaʼa nota
^ O “tribu”.
^ O “tátée”.
^ O “gaʼyee, bi̱ nuthi dí marigá”.
^ O “i̱jín go̱ʼo̱”.
^ Náa ajngáa hebreo naʼthí, “nimbáʼtoo cháʼwuun”.
^ Náa ajngáa hebreo naʼthí, “xúgíʼ dí rígá náa a̱jkia̱a̱nʼ”.
^ O “maxáʼtá a̱jkia̱a̱nʼ”.
^ O “tátiáaʼ”.
^ O “lajuíin”.
^ O “rambiʼi”.
