Timbá i̱yi̱i̱ʼ rí na̱jkha̱ inún Tesalonicenses 2:1-20
2 A̱ngui̱nʼ, ikháanʼ má ndu̱ya̱a̱la májánʼ rí tánindxu̱u̱ ndíí rí nijkuáxu gúya̱la.
2 Xó má eya̱a̱la, rí nimíníiʼxu ga̱jma̱a̱ niguma gínáanʼxu náa Filipos, mú ga̱jma̱a̱ numuu Dios ndrígúlú ndi̱ya̱a̱xu tsiakii mu mu̱tala ajngáa rí májánʼ ndrígóo Dios maski má xa̱bu̱ nikiʼníin wéñuuʼ.
3 Numuu rí nu̱taxu̱ na̱ʼkha̱ náa rí gajkhun tséʼkha̱ náa mitsaga ga̱jma̱a̱ na̱nguá nindxu̱u̱ minduwaʼ,
4 Dios niraʼwáanʼxu̱ ga̱jma̱a̱ nixnúxu̱ ajngáa rí májánʼ mu majuiʼtála, ikha jngóo tsétaxu̱ mu manigu̱u̱nʼ xa̱bu̱ nuni̱xu̱ mu manigu̱u̱ʼ Dios, bi̱ ndaʼyoo xóo nindxu̱u̱ a̱jkiu̱lú.
5 Ikháanʼ má nduya̱a̱la rí túninduwáʼxu̱ ga̱jma̱a̱ ajngáa mitsaanʼ, ni má túni̱í rí nindxu̱xu̱ májáanʼ xa̱bu̱ mu ikháanʼ marigá rí muxnuxu̱. ¡Dios má ndaʼyoo rígi̱!
6 Ni má na̱nguá ndiʼyáʼxu̱ rí xa̱bu̱ muxnuxu̱ gamajkhu, ni má ikháanʼla, ni má eʼwíinʼ, maski ajndu ma̱ndoo mundaʼala rí muninúmáá rí gáʼyuxu numuu rí ñajunxu apóstoles ndrígio̱o̱ Cristo.
7 Rí phú nini̱xu̱, ninduxu̱ kuya̱la wéñuuʼ, xóo eʼni mbáa a̱ʼgu̱ índo̱ naʼxúúnʼ ga̱jma̱a̱ nañewu̱u̱n májánʼ wéñuuʼ* e̱ji̱i̱n.
8 Numuu rí ikháan’xu nuñewa̱nla wéñuuʼ, ikha jngóo raʼkháa i̱ndó ni̱tala ajngáa rí májánʼ ndrígóo Dios ma̱ngaa rí asndu nikuwáanʼxu xawii makhañúxu̱ ga̱jma̱a̱ numala, numuu dí ra̱ʼkhá tháán eyuxu̱ kuya̱la.
9 A̱ngui̱nʼ, mbáa narmáʼáan má a̱jkia̱la, rí niñejunʼxu̱ gakhi̱i̱ wéñuuʼ ga̱jma̱a̱ rí ni̱ni̱ tsiakimíjnaxu̱ nákha nitaráʼala ajngáa rí májánʼ ndrígóo Dios náa ikháanʼla, niñejunʼxu̱ mbiʼíí mbruʼun mu xúʼko̱ xúndaʼaxu rí muninúmáála rí gáʼyuxu.
10 Ikháanʼ má nduya̱a̱la ma̱ngaa ndaʼyoo Dios rí ikháanʼ nini̱xu̱ rí májánʼ, nini̱xu̱ rí jmbu ga̱jma̱a̱ táguaʼdáá aʼkhúxu̱ náa ikháanʼla, bi̱ nindxa̱la xa̱bi̱i̱ Jesús.
11 Nduya̱a̱la má, rí ikháanʼ nini̱xu̱ xó má eʼni mbáa xa̱bu̱ nikhi̱i̱ gajmíi̱n e̱ji̱i̱n, nixnalaxu̱ consejo, ninixu rí maʼni̱i̱ a̱jkia̱la, nisngááxu̱ mámbáa rí ikháanʼla
12 mu makuwáanʼla má xúʼko̱ xó má nanigu̱u̱ʼ Dios, bi̱ xtáa randxaʼwála náa ikhaa Naʼtáñajunʼ* náa rígá xúgíʼ rí mitsaanʼ.
13 Ikha jngóo ikháanʼxu̱, nuxna̱a̱xu̱ má xúʼko̱ núma̱aʼ Dios numuu rí nákha ikháanʼla nindrígú ajngóo Dios, rí nidxawíínla náa ikháanʼxu̱, túndrígula xóo ajngúún xa̱bu̱ú, nidrígula xó má kaʼyoo, xóo ajngóo Dios, xtáa rambáyala ikháanʼ bi̱ nindxa̱la xa̱bi̱i̱ Jesús.
14 A̱ngui̱nʼ, ikháanʼ ndiyaridúúnla bi̱ nuni̱ ñajuunʼ Dios bi̱ nagimbíi̱n náa Judea, bi̱ kúwá mbóó jnduʼ gajmiún Cristo Jesús, numuu rí ikháanʼ kuwáanʼ rajmangínáanʼla náa ñawúúnʼ xa̱bu̱ xuajñala, xó má ikhiin kúwá rumíniiʼ náa ñawúúnʼ xa̱bu̱ judíos,
15 ikhiin nixiyáa Tátá Jesús, niradíin profetas* ga̱jma̱a̱ nini̱ gínáanʼxu̱. Ma̱ngaa ikhiin tséni rí nandoo Dios ga̱jma̱a̱ rí nuni̱ tsémbáyúu nimbáa,
16 numuu rí tséniñuxu̱ rí mutarúʼúunxu̱ xa̱bu̱ bi̱ na̱nguá ni̱ndxu̱ún judíos mu ma̱ndoo makáwíin, rí xóo nuni̱ naʼni rí maguaʼdáá itháan aʼkhúún. Mú rí nakiʼnáa Dios ni̱ʼkha̱nú má náa ikhiin.
17 A̱ngui̱nʼ, índo̱ ndiyóoʼ muniʼñámíjnalú mbá nguáthá mbiʼi (maski má xúʼko̱, kuwáanʼ má xúʼko̱ náa a̱jkiu̱xu̱), ra̱ʼkhá tháán ninduxu̱ rí matangáanʼxu̱ gúya̱la,* ikha jngóo ninixu̱ xó má eʼngo̱o̱, mu mata̱ngáanʼxu̱.
18 Ikha jngóo ninduxu̱ rí muʼguá gúyala, ikhúúnʼ mínuuʼ, Pablo, asndu a̱jma̱ nuthu niniminaʼ maʼgá, mú Gixa̱a̱* nirikuxu̱.
19 Ndiéjunʼ rí kuáʼthi̱i̱nxu̱, dí nindxu̱u̱ gagi ndríguxu̱, ga̱jma̱a̱ rí muda̱a̱ʼxu̱* rí maʼni mu̱ni̱ mbaʼumíjna̱xu náa inuu Tátá Jesús índo̱ gáʼkha̱a̱* rá. Lá raʼkháa ga̱jma̱a̱ numala ikháanʼ ráʼ.
20 Xúʼko̱, ikháanʼla nu̱ni̱ rí maʼdxuu a̱jkiu̱xu̱ ga̱jma̱a̱ rí makúwáanʼxu̱ gagi.
Mbaʼa nota
^ O “naxkajmiin tsumáá”, “naguriʼiin tsumáá wéñuuʼ e̱ji̱i̱n”.
^ O “Reino”.
^ O “gaʼyee”, “bi̱ nuthi dí marigá”.
^ Náa ajngáa griego naʼthí, “mbu̱ya̱a̱xu̱ inala”.
^ Náa ajngáa griego naʼthí, “corona”.
