Timbá i̱yi̱i̱ʼ rí na̱jkha̱ inún Tesalonicenses 3:1-13

  • Pablo nigi̱ʼthu̱u̱n náa Atenas rí asndu nixmiéjuunʼ (1-5)

  • Ajngáa májánʼ rí niʼkha̱a̱ kayóo Timoteo (6-10)

  • Pablo naʼtájkáan ga̱jma̱a̱ numún bi̱ tesalonicenses (11-13)

3  Ikha jngóo índo̱ nánguá niʼngu̱xu̱ itháan, nikumuxu̱ dí itháan májánʼ gáʼni dí maguanúxu̱ ndajkuáanʼxu náa Atenas, 2  nixuʼmáaxu̱ Timoteo ndxájuxu̱ bi̱ naʼni ñajuun’ Dios, bi̱ naʼtáraʼa ajngáa rí májánʼ ga̱jma̱a̱ numuu Cristo. Ni̱jkha̱ mu maxnála tsiakii ga̱jma̱a̱ maʼni̱i̱ a̱jkia̱la mu mambáyúu fe ndrígála, 3  mu xúʼko̱ nimbáa xákaguabaaʼ* ga̱jma̱a̱ numuu ga̱ʼkhu̱ rígi̱. Numuu rí ikháanʼla má ndu̱ya̱a̱ rí ndayóoʼ má mumíniiʼlú. 4  Índo̱ nikuwáanʼxu̱ ga̱jma̱á nindxa̱la, nithalaxu má wapháá rí ndayóoʼ mumíniiʼlú, xó má e̱ya̱a̱, xúʼko̱ má ni̱jkha̱nú nirígá. 5  Índo̱ nánguá niʼngo̱ʼ itháan, nikuʼmáa Timoteo mu mbaʼyoo á mu kuwáanʼla jmbu, raʼkháa gáʼni rí Gixa̱a̱ niʼngo̱o̱ niʼnirájáanʼla ga̱jma̱a̱ ñajunʼ rí nini̱xu̱ mani̱ndxu̱u̱ ndíí. 6  Timoteo nitanga̱a̱ má rí ni̱jkha̱ gáʼyala, niʼthúxu̱ rí májánʼ ga̱jma̱a̱ numala, rí kuwáanʼla má jmbu ga̱jma̱a̱ rí nandala kuyamíjna̱, ma̱ngaa niʼthúxu̱ rí ikháanʼla narmáʼáan má xúʼko̱ a̱jkia̱la kuyuxu̱ ga̱jma̱a̱ dí ra̱ʼkhá tháán eyala mbuyuxu̱ xó má ikháanʼ eyuxu̱ mbuyala. 7  Ikha jngóo a̱ngui̱nʼ, náa xúgíʼ ga̱ʼkhu̱ rí numíniiʼxu̱* ga̱jma̱a̱ rí xóo ikháanʼla kuwáanʼ jmbu, rúʼko̱ naʼni rí maʼni̱i̱ a̱jkiu̱xu̱. 8  Numuu rí nudáaxu̱ tsiakii* índo̱ nduya̱a̱xu̱ rí ikháanʼla kuwáanʼ jmbu náa Tátá. 9  Nuxna̱a̱xu wéñuuʼ núma̱a̱ Dios ga̱jma̱a̱ numala, numuu rí nu̱ni̱ rí makuwáanʼxu̱ gagi. 10  Mbiʼíí mbruʼun nutajkáan ga̱jma̱a̱ xúgíʼ a̱jkiu̱xu̱ mu ma̱ndoo mbu̱ya̱la,* ga̱jma̱a̱ muxnalaxu̱ rí ndayóoʼ náa fe ndrígála. 11  Muguáʼthi̱i̱nxu̱ rí Anu̱lú Dios ga̱jma̱a̱ Jesús bi̱ nindxu̱u̱ Tátá ndrígúlú mambáʼtóo kamba̱a̱ mu muʼguáxu̱ gúya̱la. 12  Tátá gáʼni rí mbajoo rí nandala kuyamíjna̱ ga̱jma̱a̱ náa eʼwíinʼ, xó má ikháanʼxu̱ nanduxu̱ kuya̱la wéñuuʼ, 13  mu ikhaa maʼni rí manindxu̱u̱ jmbu a̱jkia̱la, manindxa̱la kaʼwáanʼ ga̱jma̱a̱ xáguaʼdáá aʼkhála náa inuu Anu̱lú Dios índo̱ gáʼkha̱a̱* Tátá Jesús gajmíi̱n xa̱bi̱i̱ bi̱ ni̱ndxu̱ún kaʼwiin.

Mbaʼa nota

^ Náa ajngáa griego naʼthí, “xáʼga kiʼyáa”.
^ Náa ajngáa griego naʼthí, “náa xúgíʼ rí ndayúxu̱”.
^ Náa ajngáa griego naʼthí, “nakuwáanʼxu̱”.
^ Náa ajngáa griego naʼthí, “mbu̱ya̱a̱xu̱ inala”.
^ Atayáá glosario, presencia.
TRADUCCIÓN DEL NUEVO MUNDO DE LAS SANTAS ESCRITURAS
1 Tesalonicenses 3
me̱ʼpha̱a̱
Araxnuu Biblia náa Internet
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt