Timbá i̱yi̱i̱ʼ rí na̱jkha̱ inún Tesalonicenses 5:1-28
5 Dí xúgi̱ rá a̱ngui̱nʼ, tséyóoʼ má majuiʼnirámáʼ náa inala ga̱jma̱a̱ numuu mbiʼi rí kaʼyoo,
2 numuu rí ikháanʼ má ndu̱ya̱a̱la májánʼ rí mbiʼi ndrígóo Jeobá* ma̱ʼkha̱ xóo mbáa kuʼwáʼ rí mbruʼun.
3 Índo̱ ikhiin gákúwá ruthi: “¡Kuwáanʼlú tsímáá ga̱jma̱a̱ nándáa rí gúgíʼníí!”, ikhú nda̱a̱ tsúma̱ ma̱ʼkha̱ rí maʼnigámbíin, xóo ga̱ʼkhu̱ rí naxnúu mbáa a̱ʼgu̱ bi̱ nacho̱o̱ magiʼdaa a̱ʼdióo, ga̱jma̱a̱ nda̱a̱ xóo muni̱káwúmijná.
4 Mú ikháanʼla a̱ngui̱nʼ, na̱nguá kuwáanʼ náa mikrína xóo kuʼwáʼ, mu mbiʼi rúʼko̱ nda̱a̱ tsúma̱ gáxkamáanʼla,
5 numuu rí xúgiáanʼla ikháanʼ nindxa̱la e̱ji̱i̱n aguʼ ga̱jma̱a̱ nindxa̱la e̱ji̱i̱n mbiʼi. Ikháanʼ na̱nguá kaʼyulú rí mbruʼun ni má náa rí mikrína.
6 Ikha jngóo xúʼnuʼlú xó má nuni̱ eʼwíinʼ. Gakuwáanʼlu xawii ga̱jma̱a̱ gundxaʼwamíjna̱ má xúʼko̱ rí májánʼ.
7 Bi̱ nunuʼ naguʼwún nunuʼ rí mbruʼun ga̱jma̱a̱ bi̱ najngi̱i̱n, najngi̱i̱n rí mbruʼun.
8 Mú ikháanʼ bi̱ kaʼyulú rí mbiʼi, gundxa̱ʼwa̱míjna̱lú má xúʼko̱ rí májánʼ ga̱jma̱a̱ guʼgíʼ ajua̱nʼ* rí mañewu̱u̱n tsuxtulú rí nindxu̱u̱ fe ga̱jma̱a̱ ngajua ma̱ngaa gugrígulú casco rí kua̱ʼthi̱i̱n makáwáánʼlú,
9 numuu rí Dios na̱nguá niraʼwáánʼlú mu mumíniiʼ índo̱ ikhaa gákásngáñu̱u̱ʼ. Niraʼwáánʼlú mu makáwáánʼ ga̱jma̱a̱ numuu Jesucristo bi̱ nindxu̱u̱ Tátá ndrígúlú.
10 Ikhaa bi̱ nikháñúu ga̱jma̱a̱ numulú, mu tséʼñuu á mu nuʼnuʼlú* o tséʼnuʼlú, makuwáánʼ mbóó jnduʼ gajmiúlú ikhaa.
11 Ikha jngóo guxnamíjnála tsiakii,* gumbáyumijnálá, xó má kuwáanʼ ru̱ni̱.
12 A̱ngui̱nʼ, nunda̱ʼa̱la rí mbuyamajkhún bi̱ nuñajunʼ gakhi̱i̱ náa ikháanʼla, nuxna ikhala* náa Tátá ga̱jma̱a̱ nuxnala consejo.
13 Gusngajmá rí nangajuala ku̱ñu̱u̱n ga̱jma̱a̱ gaʼndala kuñu̱u̱n ga̱jma̱a̱ ñajunʼ rí nuni̱. Ma̱ngaa gakuwáanʼla tsímáá.
14 I̱mba̱ rí nandoʼ ma̱tala a̱ngui̱nʼ, dí guxprígúún bi̱ tséni̱ rí májánʼ,* gu̱ni̱i̱ a̱jkiu̱ún bi̱ kúwá ngíná,* gúmbáñún bi̱ guabiinʼ ga̱jma̱a̱ gaʼngo̱o̱ a̱jkia̱la kuñu̱u̱n xúgíinʼ.
15 Gu̱ya̱a̱la májánʼ mu nimbáa xátanga̱a̱ maʼniuu dí ra̱májánʼ i̱mba̱a̱. Gu̱ni̱ tsiakimíjna̱ mu munimíjna̱la rí májánʼ ga̱jma̱a̱ guniu̱u̱n rí májánʼ eʼwíinʼ.
16 Gaʼdxala má xúʼko̱.
17 Gutájkháanla* má xúʼko̱.
18 Guxna̱a̱ núma̱aʼ ga̱jma̱a̱ numuu xúgíʼ. Rígi̱ rí nandoo Dios mu̱nila ikháanʼ náa Cristo Jesús.
19 Xúndijuíi̱ʼ agiuuʼ espíritu.*
20 Xúsngajmála rí tsémajkuala rí kiʼtáriyaʼ.
21 Gu̱ya̱a̱ á mu xúgíʼ nindxu̱u̱ gajkhun, ga̱jma̱a̱ gurajthunla rí májánʼ.
22 Xúni̱ nimbá dí ra̱májánʼ.
23 Dios bi̱ naxná rí tsímáá maʼnikaʼwáanʼla mu mu̱ni̱ ñajuunʼ. A̱ngui̱nʼ, ganindxu̱u̱ mikaʼwu rí nu̱nila,* a̱jkia̱la,* xuyala, asndu mbiʼi rí ma̱ʼkha̱a̱* Jesucristo bi̱ nindxu̱u̱ Tátá ndrígúlú.
24 Bi̱ nandxaʼwála nindxu̱u̱ jmbii ga̱jma̱a̱ maʼnimbánuu má tsiakii.
25 A̱ngui̱nʼ, gutájkháan má xúʼko̱ ga̱jma̱a̱ numuxu̱.
26 Gurajxi̱ín xúgíinʼ a̱ngiu̱lú ga̱jma̱a̱ beso.*
27 Natañájuanla náa mbiʼyuu Tátá, rí gagixnuu i̱yi̱i̱ʼ rígi̱ náa inún xúgíinʼ a̱ngiu̱lú.
28 Rí májánʼ wéñuuʼ a̱jkiu̱u̱n Jesucristo bi̱ nindxu̱u̱ Tátá ndrígúlú garigá náa ikháanʼla.
Mbaʼa nota
^ O “coraza”.
^ O “nikháñúlú”.
^ O “gu̱ni̱i̱ a̱jkia̱la”.
^ O “nduya̱ edxu̱u̱ náa ikháanʼla”.
^ Rígi̱ nandoo gáʼthí ga̱jma̱a̱ numún bi̱ tsénimbaníí ikha ndrígóo Dios.
^ Náa ajngáa griego naʼthí, “bi̱ ragákhii a̱jkiu̱ún”.
^ O “gu̱ni̱ tsajkuun”.
^ O “xi̱ʼ”.
^ Náa ajngáa griego naʼthí, “espíritu”.
^ Náa ajngáa griego naʼthí, “beso rí kaʼwu”. Beso rígi̱ nuxnamijná a̱ngiu̱lú bi̱ ndiʼkhún eniʼnumijná.
