Timbá i̱yi̱i̱ʼ rí na̱jkha̱ inuu timoteo 1:1-20
1 I̱yi̱i̱ʼ rígi̱ niʼnirámáʼ Pablo, apóstol ndrígóo Cristo Jesús xó má nindoo Dios bi̱ naʼni káwáanʼlu ga̱jma̱a̱ náa Cristo Jesús, bi̱ náa rígá dí kua̱ʼthi̱i̱n,
2 mu maʼga inuu Timoteo,* bi̱ gajkhun nindxu̱u̱ a̱ʼdióʼ náa fe:
Garigá náa ikháán rí májánʼ wéñuuʼ a̱jkiu̱u̱n, rí nagáwiinʼ a̱jkiu̱u̱n, ga̱jma̱a̱ dí tsímáá ndrígóo Anu̱lú Dios ma̱ngaa ndrígóo Cristo Jesús bi̱ nindxu̱u̱ Tátá ndrígúlú.
3 Índo̱ inu maʼgá náa Macedonia, ninda̱ʼa̱a̱ʼ dí maguanáaʼ náa Éfeso, xúʼko̱ má xúgi̱ na̱nda̱ʼa̱a̱ʼ rí maratañájúúnʼ tikhuun xa̱bu̱ rí xúsngáa i̱mba̱ kiʼsngáa,
4 ni má xúgíʼ edxu̱ún mudxawíín cuento dí minduwaʼ ni má rí xóo kaʼnii niguwáʼ rakúwá xa̱bu̱.* Rígi̱ nda̱a̱ rí eyambáá naʼni itháan rí xákru̱ʼu̱u̱n raʼkháa dí maʼni maguaʼdáá fe náa Dios.
5 Rí phú nandoʼ marigá náa kiʼtáñajunʼ rígi̱, dí maʼndún kuyamijná ga̱jma̱a̱ mbá a̱jkiu̱ún kaʼwu, mbá ku̱ma̱ májánʼ ga̱jma̱a̱ mbá fe dí ragíʼdoo a̱jma̱ inuu.
6 Ga̱jma̱a̱ numuu rí niniña̱a̱ʼ rígi̱, niʼni rí tikhuun magi̱ʼdu̱u̱n ga̱jma̱a̱ mbá dí ragíʼdoo numuu.
7 Nandún mani̱ndxu̱ún bi̱ nusngáa xtángoo, mú asndu má ikhiin tsíkru̱ʼu̱u̱n dí nuthi ga̱jma̱a̱ rí nunda̱ʼa̱ má xúʼko̱ rí maguma.
8 Ikháanʼlu nduʼyáá rí Xtángoo nindxu̱u̱ májánʼ á mu nagumambaníí xóo phú kaʼyoo,
9 nakujmaa dí xtángoo na̱nguá nirígá mu munimbaníí xa̱bu̱ jmbiin, nirígá mu munimbaníí bi̱ nanújngurámúnʼ xtángoo, bi̱ tsénimbu̱ún, bi̱ nuni̱ dí ra̱májánʼ, xa̱bu̱ aʼkhá, bi̱ nuniñu̱u̱nʼ eʼwíinʼ,* bi̱ nuni̱ tsagáá rí kaʼwu, bi̱ nuradíin anu̱ún ga̱jma̱a̱ bi̱ nuradíin rudún ma̱ngaa bi̱ nuradíin xa̱bu̱,
10 xa̱bu̱ bi̱ nubúúnʼ xkawiʼ kayuuʼ gajmiún eʼwíinʼ,* xa̱bekha bi̱ nubúúnʼ kaníkhi̱ín, bi̱ nuni̱ kuʼwíinʼ xa̱bu̱, bi̱ nuni̱ nduwaʼ, bi̱ nuxudamíjna̱ mbá rí muni̱ mú tsénimbaníí, xó má náa xúgíʼ rí na̱nguá e̱ʼkha̱ náa kiʼsngáa rí májánʼ,*
11 dí kuajtuminaʼ ga̱jma̱a̱ ajngáa májánʼ rí mitsaanʼ wéñuuʼ rí nijuixnaxu̱ʼ dí na̱ʼkha̱ náa Dios gagi.
12 Naxna̱a̱ núma̱aʼ Cristo Jesús bi̱ nindxu̱u̱ Tátá ndrígúlú, bi̱ nixnúʼ tsiakii, numuu rí ikhaa ndiʼyoo dí ni̱ndxu̱ʼ mbáa xa̱bu̱ jmbii índo̱ nixnájxuʼ mbá ñajunʼ mitsúʼkháan,
13 maski ajndu nákha ginii ni̱tha̱ wéñúúnʼ, ni̱ni̱ gíníi xa̱bi̱i̱ ga̱jma̱a̱ tágúʼdoʼ gamajkuʼ. Mú ikhaa nigáwíinʼ a̱jkiu̱u̱n kaʼyoʼ numuu dí táyóo dí ni̱ni̱ ga̱jma̱a̱ táguʼdoo fe.
14 Mú rí májánʼ wéñuuʼ a̱jkiu̱u̱n Tátá ninindxu̱u̱ mba̱a̱ numuu rí ikhúúnʼ nigruígú fe ga̱jma̱a̱ ngajua náa Cristo Jesús.
15 Rí natha nindxu̱u̱ gajkhun ga̱jma̱a̱ ndayóoʼ dí munimbu̱ún: Cristo Jesús ni̱ʼkha̱ náa numbaaʼ gáʼni káwíin xa̱bu̱ aʼkhá, náa xúgíinʼ ikhiin ikhúúnʼ ni̱ndxu̱ʼ bi̱ itháán gíʼdoo aʼkhá.
16 Mú nisngájmuʼ dí nagáwíin a̱jkiu̱u̱n kaʼyoʼ maski ajndu ikhúúnʼ gúʼdoo itháan aʼkhúnʼ ki xóo eʼwíinʼ, mu ga̱jma̱a̱ numuʼ ikhúúnʼ masngájma Cristo Jesús dí naʼngo̱o̱ a̱jkiu̱u̱n, ikhúúnʼ nigiúúnʼ xóo mbá xkri̱da náa bi̱ maguaʼdáá fe náa ikhaa mu ma̱ndoo makuwá kámuu mbiʼi.
17 Gaʼga gamajkhu ga̱jma̱a̱ gaguma mba̱a̱ Rey bi̱ xtáa kámuu bi̱ xáʼga̱nú mambáa, bi̱ tsékujmaa, bi̱ nindxu̱u̱ mbáwíí Dios asndu kámuu mbiʼi. Xúʼko̱ gáʼni.*
18 Timoteo, a̱ʼdióʼ nindxa̱a̱ʼ, naxnaxáaʼ kiʼtáñajunʼ rígi̱ xó má nijuiʼtáriyaʼ ga̱jma̱a̱ numaaʼ, ikha jngóo ataxmína̱ʼ má xúʼko̱ ga̱jma̱a̱ mbá numuu májánʼ,
19 araʼdáá má xúʼko̱ fe ga̱jma̱a̱ mbá ku̱ma̱ májánʼ, numuu rí tikhuun ninigaʼduunʼ rígi̱, ga̱jma̱a̱ rúʼko̱ niʼni dí fe ndrígu̱ún magu̱ʼu̱ xóo mbá barco.
20 Tikhuun dí ikhiin nindxu̱ún Himeneo ga̱jma̱a̱ Alejandro, bi̱ nixnajxíin náa Gixa̱a̱* mu ga̱jma̱a̱ numuu dí nijuaxprígún majmañún dí ni xútha wéñiiʼ dí mitsúʼkháan.
Mbaʼa nota
^ Rí nandoo gáʼthí, ‹mbáa bi̱ naʼni mba̱a̱ Dios›.
^ O “lista náa na̱ʼkha̱ mbiʼñún bi̱ niguwáʼ rakúwá”.
^ Ma̱ngaa ma̱ndoo manindxu̱u̱ índo̱ nuniña̱a̱ʼ Dios ga̱jma̱a̱ rí xóo nduyamajkuíí.
^ O “rí nañambáá”.
^ O “Amén”.
