Timbá i̱yi̱i̱ʼ rí na̱jkha̱ inuu timoteo 3:1-16
3 Rí na̱tha̱ rígi̱ nindxu̱u̱ gajkhun: Á mu mbáa xa̱bu̱ naʼni tsiakimínáʼ mu mani̱ndxu̱u̱ mbáa bi̱ kayá edxu̱u̱, nandoo maʼni mbá ñajunʼ májánʼ.
2 Ikha jngóo bi̱ nandoo mbayá edxu̱u̱, ragíʼmaa magiʼdoo aʼkhúun mu xútanúmáá, gíʼmaa mani̱ndxu̱u̱ mbáa xa̱biya̱ bi̱ gíʼdaa mbáwíí a̱ʼgiu̱u̱, gíʼmaa mañewu̱u̱n rí naʼni ga̱jma̱a̱ mandxaʼwáminaʼ májánʼ, gíʼmaa mani̱ndxu̱u̱ gamajkhuii,* magruiguíin májánʼ eʼwíinʼ ga̱jma̱a̱ majmañuu maʼsngáa.
3 Xáʼyóoʼ mani̱ndxu̱u̱ mbáa xa̱bu̱ najnga̱a̱, ni má mbáa xa̱bu̱ najmangu̱u̱ʼ,* gíʼmaa mani̱ndxu̱u̱ mbáa xa̱bu̱ bi̱ nakro̱ʼo̱o̱ maratha̱a̱n. Raʼkháa mbáa bi̱ naʼni marigá xkujndu ni má mbáa bi̱ nanigu̱u̱ʼ mbújkha̱a̱.
4 Gíʼmaa mani̱ndxu̱u̱ mbáa xa̱bu̱ bi̱ naxná ikhúún májánʼ bi̱ kúwá náa goʼwóo, ga̱jma̱a̱ rí e̱ji̱i̱n nunimbu̱ún kuyáá ga̱jma̱a̱ gamajkhu
5 (numuu rí á mu mbáa xa̱bu̱ tséjmaa gáxná ikhúún májánʼ bi̱ kúwíin náa goʼwóo, xú káʼnii gándoo gáñewu̱u̱n bi̱ nuni̱ ñajuunʼ Dios xá.)
6 Xándoo mani̱ndxu̱u̱ mbáa xa̱bu̱ bi̱ ndiʼkhú egíʼdu̱u̱ mani̱ndxu̱u̱ xa̱bi̱i̱ Jesús, mu xúʼko̱ xáʼnimbamínaʼ ga̱jma̱a̱ mixtanda̱ʼa̱a̱ cuenta xó má Gixa̱a̱.
7 Ma̱ngaa gíʼmaa majmaʼniiʼ rí nindxu̱u̱ mbáa májáanʼ xa̱bu̱ náa inún bi̱ na̱nguá ni̱ndxu̱ún xa̱bi̱i̱ Jesús, mu xúʼko̱ xárígá nimbá rí mutanumáá ga̱jma̱a̱ xáxpátriguíi náa mbá tsáʼkhá ndrígóo Gixa̱a̱.
8 Xúʼko̱ má siervos ministeriales* ndayóoʼ mani̱ndxu̱ún xa̱bu̱ gamajkuiin, xáʼyóoʼ muninduwaʼ, ni má rí muwa̱a̱n wéñuuʼ vino, ni má rí magua̱ʼa̱ maguaʼdáá wéñuuʼ,
9 gíʼmaa murajtun jxa̱ʼ ngu̱ʼwa̱ rí mitsúʼkháan ndrígóo fe* ga̱jma̱a̱ mbá ku̱ma̱ mikaʼwu.
10 Ma̱ngaa ginii gíʼmaa mbiʼyáá á mu kiniʼratiin májánʼ, á mu nda̱a̱ aʼkhúún mu majuiʼthá numún, ikhú ma̱ndoo muñambáá.
11 Xúʼko̱ má gu̱ʼu̱, gíʼmaa mani̱ndxu̱ún gamajkuiin ga̱jma̱a̱ xúni̱ nduwaʼ. Gíʼmaa muñewa̱a̱n rí muni̱ ga̱jma̱a̱ guni̱ má xúʼko̱ rí jmbu.
12 Bi̱ nindxu̱u̱ siervo ministerial gíʼmaa magiʼdaa mbáwíí a̱ʼgiu̱u̱, maxná ikhúún májánʼ e̱ji̱i̱n ga̱jma̱a̱ bi̱ kúwíin náa goʼwóo.
13 Numuu rí xa̱bu̱ bi̱ nuni̱ májánʼ ñajunʼ ndrígu̱ún najuiʼthá rí májánʼ ga̱jma̱a̱ numún ma̱ngaa nda̱a̱ dí erikhún mu muthi ga̱jma̱a̱ numuu fe rí guáʼdáá náa Cristo Jesús.
14 Maski má gúʼthu̱u̱n rí nacha̱ maʼgá gáyáaʼ, mú naniraʼmáʼ rígi̱ inaaʼ
15 mu, maʼníí á mu mbajyúʼ, ikháán ma̱ta̱ya̱a̱ xóo matani̱ rí nindxa̱a̱ʼ mbáa bi̱ kúwíin náa goʼwóo Dios, rí nindxu̱u̱ náa nagimbíi̱n xa̱bi̱i̱ Dios bi̱ ndaʼya, rí nambáyúu ga̱jma̱a̱ wíji̱ kayóo rí gajkhun.
16 Gajkhun nindxu̱u̱, ngu̱ʼwa̱ rí mitsúʼkháan nindxu̱u̱ mba̱a̱ xóo rí maguajún jmbu náa Dios: ‹Jesús ninindxu̱u̱ mbáa xa̱bu̱ numbaaʼ, Dios niʼthí rí nindxu̱u̱ jmbii índo̱ niʼni̱i̱ rí mani̱ndxu̱u̱ espíritu* mbu̱júu̱, nikujmaa náa inún ángeles, nijuiʼthá ga̱jma̱a̱ numuu ikhaa náa xa̱bu̱ numbaaʼ, xa̱bu̱ numbaaʼ ninimbu̱u̱n kuyáá ga̱jma̱a̱ nixtriguíi mekhuíí ma̱ngaa niguma mba̱a̱›.
Mbaʼa nota
^ O “ordenado”.
^ O “bi̱ naxnún a̱ngui̱i̱n”.
^ O “bi̱ nuñambáá”.
^ Rígi̱ nindxu̱u̱ xúgíʼ rí niʼsngáa Cristo.
^ O “xi̱ʼ”.
