Timbá i̱yi̱i̱ʼ rí na̱jkha̱ inuu timoteo 4:1-16
4 Náa ajngáa rí naʼthí espíritu* ndrígóo Dios nakujmaa kaʼwu, rí mbiʼi nda̱wa̱á, tikhuun munitsíngumi̱jna̱ náa fe ma̱ngaa mugíʼ edxúún mudxawíín ajngáa rí naʼthí espíritu nduwaaʼ ga̱jma̱a̱ náa kisngáa ndrígu̱ún xa̱bu̱ wéñiiʼ,
2 ga̱jma̱a̱ numún xa̱bu̱ bi̱ a̱jma̱ inún bi̱ nuni̱ nduwaʼ ga̱jma̱a̱ guáʼdáá mbá ku̱ma̱ dí nánguá ku̱mu̱u̱ rí nindxu̱u̱ xóo mbá xtá náa naguanúu tsinaʼ rí nakha ga̱jma̱a̱ mbá ajua̱nʼ.
3 Ikhiin nuthún xa̱bu̱ dí ragíʼmaa mudamijná ga̱jma̱a̱ nutañajúúnʼ xa̱bu̱ dí ragíʼmaa mu̱phu̱ ganitsu. Mú Dios niʼni ganitsu mu mu̱phu̱ bi̱ guáʼdáá fe ga̱jma̱a̱ bi̱ nuniʼnúuʼ kájxi̱ rí gajkhun ga̱jma̱a̱ muxna̱a̱ núma̱aʼ.
4 Numuu dí xúgíʼ rí Dios niʼniwíi nindxu̱u̱ májánʼ ga̱jma̱a̱ nimbá xáʼyóoʼ muni̱ gaʼduunʼ á mu nuxna̱a̱ núma̱aʼ índo̱ nundri̱gú,
5 numuu rí naguma kaʼwi̱i̱ ga̱jma̱a̱ ajngá rawuunʼ Dios ma̱ngaa rí najuiʼtájkáan.*
6 Índo̱ gáraxnu̱u̱n consejo rígi̱ a̱ngiu̱lú, manindxa̱a̱ʼ mbáa májáanʼ xa̱bu̱ bi̱ nambáyúu Cristo Jesús, maraʼdáá tsiakii ga̱jma̱a̱ ajngáa ndrígóo fe ga̱jma̱a̱ náa kisngáa májánʼ rí natanimbáníí má xúʼko̱.
7 Atani̱ gaʼduunʼ cuento rí minduwaʼ dí naʼthí raʼkhí ga̱jma̱a̱ numuu Dios, xóo rí nuthi gu̱ʼú wanii. Atani̱ rataminaʼ rí mbiyamajkuíí Dios xó má gíʼmaa.
8 Numuu rí matani̱ ejercicio* rígá rí nañambáá, mú rí mbiʼyamajkuíí Dios nañambáá itháan náa xúgíʼ, numuu rí naxnáruʼulú rí muguaʼthi̱i̱n xúgi̱ ga̱jma̱a̱ nda̱wa̱á.
9 Ajngáa rígi̱ nindxu̱u̱ gajkhun ga̱jma̱a̱ xánindxu̱u̱ ndíí rí muʼnimbulú.
10 Ikha jngóo kuwáánʼ ruñajunʼ wéñuuʼ ga̱jma̱a̱ nu̱ʼni̱ tsiakimíjna̱, numuu rí nakumulú kuʼyáá mbáa Dios bi̱ ndaʼya, bi̱ naʼni káwíin xúgíinʼ enii xa̱bu̱, bi̱ naguájun jmbu.
11 Araxná ga̱jma̱a̱ arasngáa má xúʼko̱ kiʼtáñajunʼ rígi̱.
12 Xátatsiʼñánʼ rí nimbáa xáʼyámajkuaaʼ numuu rí kaʼníí dxámá nindxa̱a̱ʼ. Ataniminaʼ rí mani̱ndxa̱a̱ʼ mbá xkri̱da náa bi̱ guájun jmbu, dí xóo naratá, rí natani̱, ngajua rí xtaʼdáá, fe ndrígáaʼ ga̱jma̱a̱ ganindxu̱u̱ kaʼwu rí gátani̱.
13 Nákha xóó tséjkhánú ataniminaʼ má xúʼko̱ rí matraxnuu náa inún mbaʼin xa̱bu̱, rí maraxna consejo* ma̱ngaa marasngáa.
14 Xátatsiʼñánʼ rí Dios nixnáaʼ ga̱jma̱a̱ rí nitandrígú náa mbá kiʼtáriyaʼ índo̱ mbá nguéjmi̱i̱n bi̱ kuya̱ edxu̱u̱ nixkrama̱a̱nʼ.
15 Atatsaʼwáminaʼ má xúʼko̱ ga̱jma̱a̱ numuu rígi̱, ataniminaʼ asndu xó má eʼnga̱a̱ʼ mu matanimbaníí, xúʼko̱ xúgíinʼ gúyáá rí nadxu̱ʼ ratani̱ itháan májánʼ.
16 Atiejxi̱i̱ tsumáá wéñuuʼ rí natani̱ ga̱jma̱a̱ dí narasngáa, xátatsiʼñánʼ ratani̱ rígi̱ numuu rí xúʼko̱ matanikríyaminaʼ ikháán ga̱jma̱a̱ bi̱ nudxawaanʼ.
