Timbá i̱yi̱i̱ʼ rí na̱jkha̱ inuu timoteo 5:1-25
5 Xátri̱yíí mbáa xa̱bu̱ nikhi̱i̱, araxnáá consejo xóo ana̱a̱ʼ, bi̱ jiámá xóo a̱ngia̱a̱nʼ,
2 atañún xóo rudáaʼ gu̱ʼu̱ bi̱ itháan wanii, bi̱ waʼxááʼ* xóo gua̱ʼtia̱a̱nʼ ga̱jma̱a̱ atie̱wa̱a̱n rí xóo natani̱ gajmiáanʼ ma̱ngaa ganindxu̱u̱ mikaʼwu náa xúgíʼ rí natani̱.
3 A̱tie̱wu̱u̱n* bi̱ gajkhun ni̱ndxu̱ún gu̱ʼú xuáʼa̱.*
4 Á mu mbáa a̱ʼgú xuáʼa̱ gíʼdiin e̱ji̱i̱n o ejín xíñíinʼ, ikhiin ginii gíʼmaa musngajma náa guʼwún rí nuni̱ ñajuunʼ Dios ga̱jma̱a̱ rí muni̱ numi̱ín anu̱ún ga̱jma̱a̱ xiʼñúúnʼ rí ikhiin gíʼmiin, numuu dí rígi̱ nindxu̱u̱ májánʼ náa iduu Dios.
5 Ikha jngóo a̱ʼgu̱ bi̱ gajkhun nindxu̱u̱ a̱ʼgú xuáʼa̱ ga̱jma̱a̱ nándáa rí gíʼdoo,* naku̱mu̱u̱ kaʼyoo Dios, tséniñuuʼ raʼtákháñuu ma̱ngaa naʼtájkháan* mbiʼíí mbruʼun.
6 Mú, a̱ʼgú xuáʼa̱ bi̱ naʼni i̱ndó rí nandoo ikhaa,* nikháñuu má maski ajndu xóó xtáa ndaʼya.
7 Mú ikháán araxná má xúʼko̱ kiʼtáñajunʼ rígi̱, mu xúʼko̱ xútha numún.
8 Numuu rí á mu mbáa tséxnún rí nda̱ñúunʼ bi̱ kaʼñún, itháan bi̱ kúwá náa goʼwóo, naʼni gaʼduunʼ fe ga̱jma̱a̱ nindxu̱u̱ itháan ra̱májáanʼ ki xóo xa̱bu̱ bi̱ ragíʼdoo fe.
9 A̱ʼgú xuáʼa̱ bi̱ ma̱gumaraʼmáʼ mbiʼyuu náa i̱yi̱i̱ʼ gíʼmaa magiʼdoo 60 tsiguuʼ ga̱jma̱a̱ rí káaʼ mbáwíí xa̱bu̱ ndiyáa,
10 ga̱jma̱a̱ majmaʼniiʼ rí niʼni májánʼ ñajunʼ, xóo niʼnimbanuu e̱ji̱i̱n, nigruiguíin májánʼ eʼwíinʼ, niʼjñáa rajkúún bi̱ Dios niraʼwíin,* nimbáñún bi̱ nimíníiʼ ga̱jma̱a̱ rí nixnáximínáʼ maʼni xúgíʼ enii ñajunʼ rí májánʼ.
11 Mú, gu̱ʼú xuáʼa̱ bi̱ na̱nguá guanii xádrámáʼ mbiʼñún náa i̱yi̱i̱ʼ, numuu rí índo̱ nagua̱ʼa̱ mubúúnʼ gajmiún xa̱bu̱, narikhúún rí muni̱ ñajuunʼ Cristo, nandún matangi̱ín munuju̱u̱nʼ.
12 Ikhiin má eyáʼ rí mumíniiʼ numuu rí nuniña̱a̱ʼ runi̱ dí nixudamíjna̱ muni̱ nákha ginii.*
13 Ikhú má naguʼún magún mámbá guʼwá ga̱jma̱a̱ nda̱a̱ rí eni̱, mú raʼkháa i̱ndó nda̱a̱ rí eni̱, ma̱ngaa nuni̱ xtujtaa ga̱jma̱a̱ nuxudamíjna̱ náa dí rakáʼñún ma̱ngaa jngruigu̱u̱n ruthi dí rakáʼñún muthi.
14 Ikha jngóo nandoʼ rí gu̱ʼú xuáʼa̱ bi̱ na̱nguá guanii, gunuju̱u̱nʼ, gaguáʼdiin e̱jñu̱ún ga̱jma̱a̱ guyáá rí ndayóoʼ náa guʼwún, mu xúʼko̱ xa̱bu̱ sia̱nʼ xágiʼdoo mbá rí maʼtá numulú.
15 Mú tikhun nijngutíguíin má, mu magún kidxuuʼ Gixa̱a̱.*
16 Á mu mbáa a̱ʼgu̱ bi̱ nindxu̱u̱ xa̱bi̱i̱ Jesús gíʼdiin a̱ngui̱i̱n bi̱ ni̱ndxu̱ún gu̱ʼú xuáʼa̱, gambáñún mu xúʼko̱ xúxnúún ñajunʼ muni̱ bi̱ nagimbíi̱n ga̱jma̱a̱ xúʼko̱ bi̱ nagimbíi̱n ma̱ndoo mumbañún bi̱ gajkhun ni̱ndxu̱ún gu̱ʼú xuáʼa̱.*
17 Bi̱ kuya̱ edxu̱u̱ bi̱ nuxna májánʼ ikha, kaʼñún dí mudrigú itháan gamajkhu numuu rí ikhiin nindxu̱ún bi̱ nuñajunʼ gakhi̱i̱ mu muthi ajngóo Dios ga̱jma̱a̱ musngáa.
18 Numuu rí mbá náa Kiʼniraʼmáʼ naʼthí: “Xátagídáʼ amaʼ rawuunʼ xedi̱ bi̱ nakujmbi̱i̱ tsígáʼ”. Ga̱jma̱a̱ imbo̱o̱ naʼthí: “Numuu rí xa̱bu̱ bi̱ nañejunʼ kaʼyoo mada̱a̱ʼ numuu”.
19 Á mu mbáwíí bi̱ nakrui̱ga̱a̱ mbáa xa̱bu̱ nikhi̱i̱ xátadxawíín, mú, á mu kúwá a̱jmi̱i̱n o ajtsíin bi̱ ndiyáá, ikhú ma̱ndoo matadxawíín ga̱jma̱a̱ numuu dí nuxrui̱ga̱a̱.
20 Ataxprígúún bi̱ nuni̱ aʼkhá náa inún xúgíinʼ, mu xúʼko̱ eʼwíinʼ mamiñún.
21 Natañéjuaanʼ náa inuu Dios ga̱jma̱a̱ náa Cristo Jesús ma̱ngaa náa ángeles bi̱ kaxtaʼwíin rí matanimba̱a̱ʼ ikha rígi̱, atayáá tsumáá wéñaaʼ nákhá xóó tsétraʼwíí mbá rí matani̱.
22 Xáʼcha̱a̱ʼ rí mataxkrámáanʼ mbáa xa̱bu̱,* xátiambáá náa aʼkhá ndrígu̱ún eʼwíinʼ, araxtaa má xúʼko̱ kaʼwu.
23 Ní xágíin i̱ndó iyaʼ, agi̱i̱n mbá chíʼgíiʼ* vino mu mambáyúu awáanʼ ma̱ngaa ga̱jma̱a̱ numuu rí nángi eʼni eʼniaaʼ nandii.
24 Aʼkhá ndrígu̱ún tikhun xa̱bu̱ nakujmaa pa̱jnu, ga̱jma̱a̱ na̱jkha̱ kiʼdiin mbá nacha̱ mu mambanúu numún, mú aʼkhá ndrígu̱ún eʼwíinʼ nakujmaa asndu nda̱wa̱á.
25 Xúʼko̱ má ñajunʼ rí májánʼ ma̱ngaa, nakujmaa pa̱jnu, ga̱jma̱a̱ dí na̱nguá kujmaa xándoo marigá ngu̱ʼwa̱.
Mbaʼa nota
^ O “i̱jín go̱ʼo̱”.
^ Náa ajngáa griego naʼthí, “gamajkhu”.
^ O “bi̱ gajkhun ndañúunʼ”. Xóo muʼthá, bi̱ nda̱wa̱a̱ tsáa mañewu̱u̱n.
^ O “ngínáa”.
^ O “raʼni tsajkuun”.
^ Mbáa bi̱ i̱ndó nandoo maʼni aʼkhá gajmíi̱n xa̱bu̱.
^ Náa ajngáa griego naʼthí, “bi̱ kaʼwiin”.
^ Náa ajngáa griego naʼthí, “timbá fe”.
^ O “bi̱ gajkhun ndañúunʼ”. Xóo muʼthá, bi̱ nda̱wa̱a̱ tsáa mañewu̱u̱n.
^ Xóo muʼthá, xáraxnaa mbá nacha̱ ñajunʼ maʼni mbáa.
^ O “lájuíin”.
