Raga̱jma̱ libro ndrígóo Crónicas 1:1-17
1 Dí naʼtáñajunʼ Salomón a̱ʼdióo David, ni̱jkha̱ ragiʼdoo itháan tsiaki̱i̱, Jeobá Dios ndrígóo nixtáa ga̱jma̱a̱, ga̱jma̱a̱ ra̱ʼkhá tháán niʼni mba̱a̱.
2 Salomón nigímbíin mbá xúgíinʼ xa̱bu̱ Israel, bi̱ kuya̱ edxu̱u̱ náa mil ga̱jma̱a̱ náa cien, bi̱ nunimbaníí xkujndu, xúgíinʼ bi̱ kuya̱ edxu̱u̱ náa Israel ga̱jma̱a̱ bi̱ kuya̱ edxu̱u̱ náa mámbá guʼwíin xa̱bu̱.
3 Ikhú Salomón gajmíi̱n xúgíinʼ bi̱ nigimbíin nigún náa rí mitsídánʼ dí rígá náa Gabaón. Numuu dí ikhí nirígá guʼwá xtíin náa rí nagimbíi̱n ndrígóo Dios bi̱ gajkhun, dí Moisés xa̱bi̱i̱ Jeobá niʼni náa ku̱ba̱ʼ mijxooʼ.*
4 Ikha jngóo David nitsima̱a̱ kayóo Arca* ndrígóo Dios bi̱ gajkhun, ni̱ʼkha̱a̱ kayóo náa Quiryat-Jearim mu maʼga̱a̱ kayóo náa dí ikhaa niʼni mújúunʼ, niʼni mbá guʼwá xtíin náa Jerusalén.
5 Náa nakarámáʼ tsigijñaʼ dí niguma ga̱jma̱a̱ cobre dí niʼni Bezalel a̱ʼdióo Urí, a̱ʼdióo Hur, nigíʼ náa inuu guʼwá xtíin ndrígóo Jeobá, Salomón gajmíi̱n mbá xúgíinʼ xa̱bu̱ bi̱ nagimbíi̱n nutajkháan ikhí náa inuu dí nakarámáʼ tsigijñaʼ.
6 Ikhú Salomón nixnájxi̱ tsigijñaʼ ikhí, náa inuu Jeobá, nixnájxi̱ mbá 1,000 tsigijñaʼ dí nakarámáʼ náa dí niguma ga̱jma̱a̱ cobre dí rígá náa guʼwá xtíin rí nagimbíi̱n.
7 Mbruʼun rúʼko̱, Dios nisngájmaminaʼ náa Salomón ga̱jma̱a̱ niʼthúu̱n: “Atando̱ʼo̱ʼ asndu ndiéjúúnʼ má eyaaʼ”.
8 Salomón niriʼñuu Dios: “Ikháán nitasngájmáá ngajua rí tsétumuu* anu̱ʼ* David ga̱jma̱a̱ nitagiúunʼ xóo rey náa xtiʼkhuu ikhaa.
9 Tátá Jeobá, atani̱ dí mambanúu dí nitaxúdaminaʼ náa anu̱ʼ David, numuu dí nitagiúunʼ manindxu̱ʼ rey náa mbá xuajin dí ra̱ʼkhá tháán mbaʼin xa̱bu̱, xóo yujndaʼ dí rígá náa tsu̱du̱u̱ ku̱ba̱ʼ.
10 Araxnúʼ dí majmañuʼ ga̱jma̱a̱ rí magúʼdoo ku̱ma̱, mu xúʼko̱ ma̱ndoo maxnu̱u̱ ikha xuajin rígi̱, numuu dí tsáá gájmaa gáʼnimbánuu numún xa̱bu̱ xuajñaanʼ rígi̱ rá.”
11 Ikhú Dios niʼthúu̱n Salomón: “Numuu dí asndu náa a̱jkia̱a̱nʼ nigájnuu matanda̱ʼa̱ rúʼko̱, ga̱jma̱a̱ na̱nguá nitanda̱ʼa̱ rí maraʼdáá mbújkha̱a̱ ni má i̱ʼwáʼ dí maraʼdáá, ni má dí matadrigú gamajkhu, ni má dí makhañún bi̱ tsíñún gúyaaʼ, ni má dí maraxtaa mba̱yu̱u̱ʼ, ikháán nitanda̱ʼa̱ rí majmañaaʼ ga̱jma̱a̱ dí maraʼdáá ku̱ma̱, mu matanimbaníí numuu xuajñunʼ, dí náa ikhúún niʼgíinʼ manindxa̱a̱ʼ rey.
12 Makánaaʼ rí majmañaaʼ ga̱jma̱a̱ maraʼdáá ku̱ma̱, mú ma̱ngaa maxna̱a̱ʼ mbújkha̱a̱ ga̱jma̱a̱ i̱ʼwáʼ dí maraʼdáá ma̱ngaa makánaaʼ gamajkhu xóo dí tágiʼdoo nimbáa rey bi̱ nixtáa nákhá xóó ndawa̱a̱n ikháán, ni má xágiʼdoo imba̱a̱ bi̱ gáxtáa nda̱wa̱á dí ikháán”.
13 Salomón nitanga̱a̱ náa Jerusalén dí ni̱jkha̱ náa rí mitsídánʼ dí rígá náa Gabaón, náa inuu guʼwá xtíin dí nagimbíi̱n ga̱jma̱a̱ niʼtáñajunʼ náa Israel.
14 Salomón ni̱jkha̱ ragiʼdoo itháan carros ga̱jma̱a̱ wáyú,* ni̱jkha̱nú nigiʼdoo 1,400 carros ga̱jma̱a̱ 12,000 wáyú, guájun eʼni náa xuajin dí gíʼdoo cárriu̱u̱ náa Jerusalén, mijngii náa xtáa rey.
15 Rey niʼni dí náa Jerusalén marigá wéñuuʼ plata ga̱jma̱a̱ oro rí asndu xóo itsí, ga̱jma̱a̱ ixi̱ cedro marigá mbaʼa xóo sicómoros dí rígá náa Sefelá.
16 Wáyú bi̱ gíʼdiin Salomón na̱ʼkha̱ kiʼdiin náa Egipto, bi̱ nutsi̱ bi̱ gíʼdiin rey, mbájkúún etsi̱i̱n mbaʼin* wáyú, ga̱jma̱a̱ mbrígúú etsi̱i̱n ga̱jma̱a̱.
17 Mámbá carro dí na̱ʼkha̱ náa Egipto numuu juwan kilo* plata ga̱jma̱a̱ mámbáa wáyú numuu a̱jma̱ kilo* plata. Ga̱jma̱a̱ ikhú ikhiin nagún kudiin náa xúgíinʼ reyes ndrígu̱ún hititas ga̱jma̱a̱ reyes bi̱ kúwá náa Siria.
Mbaʼa nota
^ O “desierto”.
^ O “E̱jna̱”.
^ O “táteʼ”.
^ O “bi̱ nudrúwíin wáyú”.
^ O mbáa “náa Egipto ga̱jma̱a̱ náa Coa, bi̱ nutsi̱ bi̱ gíʼdiin rey, nutsi̱ náa Coa”, dí mbáa nandoo gáʼthúu̱n náa Cilicia.
^ Náa ajngáa hebreo naʼthí, “600 piezas plata”.
^ Náa ajngáa hebreo naʼthí, “150 piezas plata”.
