Raga̱jma̱ libro ndrígóo Crónicas 12:1-16
12 Nda̱wa̱á, índo̱ rí naʼtáñajunʼ nigiʼdoo tsiaki̱i̱ ga̱jma̱a̱ ikhaa nigiʼdoo tsiaki̱i̱, Rehoboam niniñuuʼ Xtángoo ndrígóo Jeobá ga̱jma̱a̱ xúʼko̱ má nini̱ xúgíinʼ xa̱bu̱ Israel ma̱ngaa.
2 Dí maʼni witsu tsiguʼ rí xtáa raʼtáñajunʼ rey Rehoboam, rey Sisac bi na̱ʼkha̱ náa Egipto nitsimuu gáxmína̱ʼ náa Jerusalén, numuu dí táguájun jmbu náa Jeobá.
3 Ikhaa nigiʼdoo mbá 1,200 carros, 60,000 bi̱ nudrúwiin wáyú ga̱jma̱a̱ ra̱ʼkhá tháán mbaʼin soldado ni̱ʼkha̱ gajmíi̱n bi̱ naguwáʼ náa Egipto, libios, sukiyim ga̱jma̱a̱ etíopes.
4 Nigruigú xuajin dí kúgumaʼá dí rígá náa Judá ga̱jma̱a̱ nda̱wa̱á ni̱ʼkha̱nú náa Jerusalén.
5 Profeta* Semaya ni̱ʼkha̱ gáʼyoo Rehoboam ga̱jma̱a̱ príncipes bi̱ kúwá náa Judá, bi̱ nigimbíin náa Jerusalén numuu dí namíñún eʼni Sisac ga̱jma̱a̱ niʼthúún: “Rígi̱ dí naʼthí Jeobá: ‹Ikháanʼ niniʼñúʼla ikha jngóo niniʼñála mangúún náa ñawúunʼ Sisac›”.
6 Ikhú príncipes bi̱ kúwá náa Israel ga̱jma̱a̱ rey nixruigúmijná ga̱jma̱a̱ nithi: “Jeobá nindxu̱u̱ májáanʼ”.
7 Índo̱ Jeobá ndiʼyoo dí nuxruigúmijná. Semaya nigruigú ajngáa rígi̱ náa Jeobá: “Nixruigúmijná, xáni̱ gámbíin má ga̱jma̱a̱ xájyúuʼ má mba̱yu̱u̱ʼ dí ma̱ni̱ káwíin. Xáxidírámuuʼ dí nakásngañu̱ʼ náa Jerusalén, xániʼñuuʼ dí Sisac maʼni gámbáa.
8 Mú, maguánú mani̱ndxu̱ún xa̱bi̱i̱ ga̱jma̱a̱ xúʼko̱ maguánú mbuyáá dí mixtiʼkhu dí muni̱ ñajunʼ ikhúún ga̱jma̱a̱ dí muni̱ ñajúúnʼ reyes* bi̱ kúwá náa i̱ʼwáʼ xuajin”.
9 Rey Sisac bi̱ na̱ʼkha̱ náa Egipto nitsimuu gáxmína̱ʼ náa Jerusalén, ni̱jkha̱ kagu̱u̱ xúgíʼ dí gíʼdoo numuu dí rígá náa goʼwóo Jeobá ga̱jma̱a̱ dí gíʼdoo numuu dí rígá náa goʼwóo* rey, ni̱jkha̱ kagu̱u̱ xúgíʼ, asndu xúgíʼ escudo dí oro dí Salomón niʼni.
10 Ikha jngóo rey Rehoboam niʼni escudo dí cobre mu maxtiʼkuwíi ga̱jma̱a̱, nixnájxu̱u̱n bi̱ nuñewa̱a̱n, bi̱ kuya̱ edxu̱u̱ náa bi̱ nuyejngoo,* bi̱ nuñewa̱a̱n riejuun goʼwóo rey.
11 Mámbá dí rey na̱ʼkha̱ náa goʼwoo Jeobá, bi̱ nuyejngoo naguwáʼ kudúún escudo ga̱jma̱a̱ nda̱wa̱á natangiín kudúún náa cuarto dí kúwá bi̱ nuyejngoo.
12 Numuu dí rey nikruíguminaʼ, ikha jngóo dí nakásngañu̱u̱ʼ Jeobá niwi̱ji̱i̱ ga̱jma̱a̱ táʼni gámbíin mbá kayuuʼ, ma̱ngaa nirígá tikhuu dí májánʼ náa Judá.
13 Rey Rehoboam nigiʼdoo itháan tsiaki̱i̱ náa Jerusalén ga̱jma̱a̱ niʼtáñajunʼ má xúʼko̱, Rehoboam gíʼdoo 41 tsiguuʼ índo̱ ni̱jkha̱nú ninindxu̱u̱ rey ga̱jma̱a̱ niʼtáñajunʼ mbá 17 tsiguʼ náa Jerusalén, náa xuajin dí Jeobá niraʼwíí náa mbá xúgíʼ xuajin majkhaʼ* dí rígá náa Israel mu marigá mbiʼyuu ikhí. Ru̱dúu̱* rey mbiʼyuu Naamá, a̱ʼgú ammonita.
14 Ikhaa niʼni dí ra̱májánʼ numuu dí táʼkha̱ náa a̱jkiu̱u̱n dí mbayáaʼ Jeobá.
15 Dí naʼthí xóó itháan ga̱jma̱a̱ numuu Rehoboam, xúgíʼ dí niʼni, kiʼnirámáʼ náa i̱yi̱i̱ʼ náa naʼthí xóo niguwáʼ ragúu̱nʼ rakúwá náa ajngáa rí niʼthí profeta Semaya ga̱jma̱a̱ Idó, xa̱bu̱ bi̱ ndaʼyoo rí nawasngájmáá,* nixmínaʼ má xúʼko̱ Rehoboam ga̱jma̱a̱ Jeroboán.
16 Ikhú Rehoboam ndiyáa jxu̱u̱ʼ gajmíi̱n wajin xiʼñúuʼ ga̱jma̱a̱ nijuiʼdi̱i̱ náa Xuajñuu David. Ga̱jma̱a̱ a̱ʼdióo bi̱ mbiʼyuu Abías ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ O “gaʼyee, bi̱ naʼthí dí marigá”.
^ Náa ajngáa hebreo naʼthí, “xa̱bu̱ ñajunʼ”.
^ O “náa naʼtáñajunʼ”.
^ Náa ajngáa hebreo naʼthí, “bi̱ nagáñún”.
^ O “tribu”.
^ O “nánée”.
^ O “visión”.
