Raga̱jma̱ libro ndrígóo Crónicas 13:1-22
13 Abías ni̱jkha̱nú ninindxu̱u̱ rey náa Judá índo̱ naʼni má 18 tsiguʼ dí xtáa raʼtáñajunʼ rey Jeroboán.
2 Niʼtáñajunʼ mbá ajtsú tsiguʼ náa Jerusalén, ru̱dúu̱* mbiʼyuu Micaya wáxióo* Uriel bi̱ na̱ʼkha̱ náa Guibeá. Abías ga̱jma̱a̱ Jeroboán nixmijná má xúʼko̱.
3 Ikhú Abías ni̱jkha̱ gajmíi̱n mbá 400,000 soldado xkujiinʼ bi̱ kaxtaʼwíin mu maxmína̱ʼ. Jeroboán ni̱jkha̱ gajmíi̱n mbá 800,000 soldado xkujiinʼ bi̱ kaxtaʼwíin.
4 Ikhú Abías nifrigu náa inuu kúbá Zemaraim dí rígá náa mijngii kúbá Efraín, niʼthí: “¡Jeroboán, ga̱jma̱a̱ xúgiáanʼ ikháanʼ xa̱bu̱ Israel, gu̱dxa̱wunʼla!
5 Lá tséya̱a̱ dí Jeobá, Dios ndrígóo Israel nixnúu David dí maʼtáñajunʼ náa Israel asndu kámuu, ikhaa gajmíi̱n e̱ji̱i̱n índo̱ nimbánúún mbá rí mbajyúuʼ asndu kámuu ráʼ.*
6 Mú Jeroboán a̱ʼdióo Nebat, xa̱bi̱i̱ Salomón a̱ʼdióo David nitu̱jxu̱u̱ ga̱jma̱a̱ nikujximínáʼ náa inuu tátióo.
7 Ikhaa nambájxu̱u̱ gajmíi̱n xa̱bu̱ bi̱ nda̱a̱ dí eni̱ ga̱jma̱a̱ bi̱ raguáʼdáá numún. Itháan má niʼngu̱u̱n ikhiin ki xóo Rehoboam a̱ʼdióo Salomón bi̱ kaʼníí nindxu̱u̱ dxámá ga̱jma̱a̱ namíñuu, na̱nguá nigiʼdoo tsiaki̱i̱ maʼni gajmíi̱n.
8 Dí xúgi̱ nakumalaʼ dí kuaʼdáá tsiaki̱i̱ mu maʼngala mu̱ni̱ gajmiála xa̱bu̱ ñajunʼ ndrígóo Jeobá náa ñawúúnʼ e̱ji̱i̱n David numuu dí mbaʼáanʼ, ma̱ngaa numuu dí kuaʼdiin e̱jín xédí bi̱ nigumiin ga̱jma̱a̱ oro bi̱ Jeroboán niʼnii mu mani̱ndxu̱ún dioses ndrígala.
9 Lá raʼkháa ikháanʼ nixkawíin ndxajkun ndrígio̱o̱ Jeobá bi̱ naguwáʼ náa Aarón ga̱jma̱a̱ levitas ráʼ. Lá raʼkháa ikháanʼ má nindrigi̱i̱n ndxajkiala xó má eni̱ xa̱bu̱ náa i̱ʼwáʼ xuajin ráʼ. Asndu tsáá má bi̱ na̱ʼkha̱ kayáa mbáa a̱ʼdá xédí ga̱jma̱a̱ bi̱ na̱ʼkha̱ kagui̱i̱n mbá juwiin mugu̱ e̱jmba̱a̱ ma̱ndoo mani̱ndxu̱u̱ ndxajkun náa dioses bi̱ ragájkhun.
10 Mú ikháanʼxu̱, Jeobá nindxu̱u̱ Dios ndrígúxu̱ na̱nguá niniʼñáánʼxu̱, ndxajkun ndrígiuxu̱ bi̱ naguwáʼ náa Aarón kúwá runi̱ ñajuunʼ Jeobá ga̱jma̱a̱ levitas numbañún náa ñajunʼ dí nuni̱.
11 Mámbá miʼcha̱ ga̱jma̱a̱ mámbá wakíʼ nurkuní tsigijñaʼ gamajkhu dí nakarámáʼ náa inuu Jeobá ga̱jma̱a̱ tsigijñaʼ dí ndataun, ma̱ngaa pan karngujxi̱* dí jngútámáʼ náa mesa dí niguma ga̱jma̱a̱ mbawíí oro, ma̱ngaa mámbá wakíʼ nuskama̱a̱ candelabro dí oro ga̱jma̱a̱ lámparas ndrígóo. Ikháanʼxu̱ kuwáanʼ runimbáníí ñajunʼ dí kajkuáa ñawúnxu mu̱ni̱ náa Jeobá Dios ndrígúxu̱, mú ikháanʼla niniʼñáánʼ.
12 ¡Ndu̱ya̱a̱la ráʼ! Dios bi̱ gajkhun xtáa ga̱jma̱á nindxu̱xu̱, ikhaa xtáa raxnúxu ikha, gajmíi̱n ndxajkiun ga̱jma̱a̱ trompetas rí mawáán mu mugíʼdi̱i̱ muxmíjná ga̱jma̱á nindxa̱la. Xa̱bu̱ Israel, xúxmijná gajmiála Jeobá Dios ndrígu̱ún wajin xiʼñála, numuu dí xáʼngala gúni̱ gajmiála”.
13 Jeroboán niʼniratiin bi̱ murkaʼwumijná mu magajnún muxmijná gajmiún náa kidxúúnʼ. Soldádiu̱u̱ guájun náa jmbuu eguwáʼ xa̱bu̱ Judá ga̱jma̱a̱ eʼwíinʼ nirkaʼwumijná náa kidxúúnʼ.
14 Índo̱ xa̱bu̱ Judá nitangañi̱ín, ndiyáá dí naguwáʼ bi̱ muxmijná gajmiún náa inún ga̱jma̱a̱ náa kidxúúnʼ. Ikhú nigi̱ʼdi̱i̱ nitakáñíí Jeobá índo̱ ndxajkun kúwá rundiyííʼ xígu trompeta.
15 Xa̱bu̱ Judá nindxa̱ʼwa̱ dí mugi̱ʼdi̱i̱ muxmijná. Índo̱ xa̱bu̱ Judá nindxa̱ʼwa̱ dí muxmijná, ikhú Dios bi̱ gajkhun niʼngo̱o̱ niʼni ga̱jma̱a̱ Jeroboán mangiin mbá xúgíinʼ xa̱bu̱ Israel náa inuu Abías ga̱jma̱a̱ náa inún xa̱bu̱ Judá.
16 Israelitas nigájnún ragáñúún náa xa̱bu̱ Judá ga̱jma̱a̱ Dios nixnájxi̱i̱n náa ñawúúnʼ.
17 Ra̱ʼkhá tháán mbaʼin xa̱bu̱ nigudíin Abías gajmíi̱n xa̱bi̱i̱, nikháñún mbá 500,000 xa̱bekha bi̱ kaxtaʼwíin bi̱ naguwáʼ náa Israel.
18 Xúʼko̱ kaʼnii niguma majti̱i̱nʼ xa̱bu̱ Israel mbiʼi rúʼko̱, mú xa̱bu̱ Judá niʼngu̱u̱n numuu dí nikumu̱ún kuyáá* Jeobá Dios ndrígu̱ún wajin xiʼñúúnʼ.
19 Abías ni̱jkha̱ raxkoo Jeroboán ga̱jma̱a̱ nigruigú káyúuʼ xuajin rígi̱: Betel ga̱jma̱a̱ xuajin dí rígá mijngii, Jesaná ga̱jma̱a̱ xuajin dí rígá mijngii, Efrén ga̱jma̱a̱ xuajin dí rígá mijngii.
20 Jeroboán nditháan tátanga̱a̱ magiʼdoo tsiaki̱i̱ náa xúgíʼ mbiʼi dí nixtáa Abías, ikhú Jeobá niʼni dí makhañúu.
21 Mú Abías ni̱jkha̱ ragiʼdoo tsiaki̱i̱. Nda̱wa̱á ni̱jkha̱nú nigiʼdiin mbá 14 gu̱ʼwi̱i̱, nigiʼdiin mbá 22 e̱ji̱i̱n jiámá ga̱jma̱a̱ 16 wa̱ʼxa̱ʼ.*
22 Dí naʼthí xóó itháan ga̱jma̱a̱ numuu Abías, dí niʼni ga̱jma̱a̱ dí niʼthí na̱ʼkha̱ náa i̱yi̱i̱ʼ dí niʼnirámáʼ profeta* Idó.
Mbaʼa nota
^ O “nánée”.
^ O “a̱ʼdée dxáʼgú”.
^ Náa ajngáa hebreo naʼthí, “mbá rí nambánuu dí idú”.
^ Xóo muʼthá, pan dí najuixnájxi̱.
^ Náa ajngáa hebreo naʼthí, “nimbayúmíjná”.
^ O “i̱jín go̱ʼo̱”.
^ O “gaʼyee, bi̱ naʼthí dí marigá”.
