Raga̱jma̱ libro ndrígóo Crónicas 14:1-15
14 Ikhú Abías ndiyáa jxu̱u̱ʼ gajmíi̱n wajin xiʼñúuʼ, nidi̱i̱ náa Xuajñuu David, ga̱jma̱a̱ a̱ʼdióo Asá ni̱jkha̱nú ninindxu̱u̱ nuxi̱i̱ʼ rey. Mbiʼi dí nixtáa nirígá dí tsímáá* mbá gu̱wa̱ʼ tsiguʼ.
2 Asá niʼni dí májánʼ ga̱jma̱a̱ dí jmbu náa iduu Jeobá Dios ndrígóo.
3 Niʼni gámbáa náa nuxnajxi̱ tsigijñaʼ náa inún dioses bi̱ ragájkhun ga̱jma̱a̱ náa rí mitsídánʼ, nijkumigu̱u̱ itsí rí mitsúʼkháan ga̱jma̱a̱ niʼni gámbáa poste rí mitsúʼkháan.*
4 Ma̱ngaa niʼthún xa̱bu̱ Judá dí mbuyáaʼ Jeobá, Dios ndrígu̱ún wajin xiʼñúúnʼ, dí munimbu̱u̱n Xtángoo ga̱jma̱a̱ kiʼtáñajunʼ ndrígóo.
5 Ikha jngóo niʼni gámbóo náa rí mitsídánʼ, ga̱jma̱a̱ náa nakarámáʼ tsigijñaʼ dí ndataun dí rígá náa mbá xúgíʼ xuajin Judá, nikúwá tsímáá xa̱bu̱ índo̱ ikhaa nixtáa raʼtáñajunʼ.
6 Niʼni xuajin dí kúgumaʼá náa Judá, nijmuu májánʼ mbiʼi índo̱ rígá dí tsímáá. Nánguá nixmijná gajmiún xúgíʼ tsiguʼ rúʼko̱, numuu dí Jeobá niʼni rí mbayáa jxu̱u̱ʼ.
7 Asá niʼthúu̱n Judá: “Mu̱ʼni̱lú xuajin rígi̱ ga̱jma̱a̱ muruguamáʼáan ga̱jma̱a̱ xtájtsí ma̱ngaa torre, xkrugua* ga̱jma̱a̱ dí jngútáʼa jngayuu. Mbá xúgíʼ xuajin kaʼníí rígá náa ñawúnlú, numuu rí ndiʼyáaʼ Jeobá Dios ndrígulú. Ndiʼyáaʼlú ga̱jma̱a̱ ikhaa niʼni rí xa̱bu̱ bi̱ kúwá náa xúgíʼ xuajin makuwá tsímáá”.* Xúgíʼ dí niʼni nigájnuu májánʼ.
8 Asá gíʼdiin mbá 300,000 soldado bi̱ nindxu̱ún xa̱bu̱ Judá, ikhiin kuda escudo rí mba̱ʼu̱, ga̱jma̱a̱ kudú.* Benjamín gíʼdiin mbá 280,000 soldado xkujiinʼ bi̱ kuda escudo rí majkhaʼ* ga̱jma̱a̱ xkamídá.*
9 Nguáthá mbiʼi nda̱wa̱á, Zérah xa̱bu̱ etíope ni̱ʼkha̱ gajmíi̱n mbá millón soldado ga̱jma̱a̱ mbá 300 carros mu maxmína̱ʼ gajmíi̱n. Índo̱ ni̱ʼkha̱nú náa Maresá,
10 Asá nigájnuu gáxmína̱ʼ ga̱jma̱a̱, niguájun xawii muxmijná náa mata* Zefata náa mijngii Maresá.
11 Ikhú Asá niʼtákáñuu Jeobá Dios ndrígóo ga̱jma̱a̱ niʼthúu̱n: “Tátá Jeobá, na̱nguá tayáá mixtiʼkhu ikháán dí matambáñún bi̱ mixkujiinʼ* ga̱jma̱a̱ bi̱ guabiinʼ. Atambáyuxu̱ Jeobá Dios ndrígúxu̱, numuu dí naku̱mu̱xu ku̱ya̱a̱ʼ* ikháán, ga̱jma̱a̱ numuu mbiʼyaaʼ ikháán dí nigúwaʼxu muxmíjná gajmiúxu xa̱bu̱ mbaʼin bugi̱. Jeobá, ikháán nindxa̱a̱ʼ Dios ndrígúxu̱, xátatsiʼñááʼ dí xa̱bu̱ú maʼngu̱u̱n muni̱ ga̱jma̱á nindxa̱a̱ʼ”.
12 Ikhú Jeobá niʼngo̱o̱ niʼni gajmíi̱n etíopes náa inuu Asá ga̱jma̱a̱ náa inún xa̱bu̱ Judá. Xa̱bu̱ etíopes ningujuíin ragáñúún náa ikhiin.
13 Asá gajmíi̱n xa̱bi̱i̱ nigún ruxkúún asndu náa Guerar, nigún ruradíin xa̱bu̱ etíopes rí asndu nimbáa tákríya̱a̱ʼ, numuu dí Jeobá gajmíi̱n soldádiu̱u̱ niradíin. Nda̱wa̱á xa̱bu̱ Judá nigúun kudúún mbá xúgíʼ dí niguanáa.
14 Ma̱ngaa nitu̱ʼu̱u̱n náa mbá xúgíʼ xuajin dí rígá náa mbájndi Guerar, ra̱ʼkhá tháán nimíñúún kuyáá Jeobá. Nirawíi mbá xúgíʼ dí rígá náa xuajin numuu dí ra̱ʼkhá tháán mbaʼa rígá dí murawíi ikhí.
15 Ma̱ngaa nitu̱ʼu̱u̱n náa guʼwá xtíin ndrígu̱ún bi̱ guáʼdiin xedi̱, niguanún gajmiún mbaʼin mugu̱ ga̱jma̱a̱ camellos, nda̱wa̱á nitangiín Jerusalén.
Mbaʼa nota
^ O “ku̱ba̱ʼ ndiyáa jxu̱u̱ʼ”.
^ Náa ajngáa hebreo naʼthí, “xkrugua dí krangujxi̱”.
^ Náa ajngáa hebreo naʼthí, “mbuya̱a̱ jxu̱únʼ”.
^ O “lanza”.
^ Nindxu̱u̱ escudo majkhaʼ dí najmún bi̱ kuda xkamídá.
^ Náa ajngáa hebreo naʼthí, “nujngapri̱gu̱u̱n xkamídá”.
^ O “bóo”.
^ Náa ajngáa hebreo naʼthí, “mbaʼin”.
^ Náa ajngáa hebreo naʼthí, “numbáyumíjnáxu náa”.
