Raga̱jma̱ libro ndrígóo Crónicas 15:1-19
-
Asá nagrui̱ga̱ awan dí maguma (1-19)
15 Espíritu ndrígóo Dios nirígá náa Azarías a̱ʼdióo Oded.
2 Ikhú Azarías nigájnuu gátsijnuu Asá, ga̱jma̱a̱ niʼthúu̱n: “¡Asá, xúgiáanʼ xa̱bu̱ Judá ga̱jma̱a̱ xa̱bu̱ Benjamín! ¡Gudxawunʼla! Jeobá maxtáa ga̱jma̱á nindxa̱la á mu ikháanʼ kuwáanʼ gajmiála. Á mu nduʼyáaʼ, ikhaa maniñaminaʼ rí muxkamaa, mú, á mu nuniʼñáánʼ maniñala ma̱ngaa.
3 Mba̱yu̱u̱ʼ mbiʼi, xa̱bu̱ Israel tákúwá gajmiún Dios bi̱ gajkhun, ni má túguáʼdaa nimbáa ndxajkun bi̱ maʼsngúún ga̱jma̱a̱ túguáʼdáá xtángoo.
4 Mú, índo̱ nikúwá rumíniiʼ nitangiín náa Jeobá, Dios ndrígóo Israel, ndiyáaʼ ga̱jma̱a̱ ikhaa niniñaminaʼ rí muxkamaa.
5 Nákha mbiʼi rúʼko̱, nimbáa na̱nguá egájnuu maʼga tsímáá,* numuu dí mbá xúgíinʼ xa̱bu̱ xuajin namíñúún.
6 Xa̱bu̱ xuajin nuni̱ gámbámijná, xúʼko̱ má náa xuajin mba̱ʼu̱ ma̱ngaa. Dios naʼni rí xúyáá dí gúni̱ numuu dí nikuʼma xúgíʼ enii gamiéjunʼ.
7 Mú ikháanʼla gakhi̱i̱ a̱jkia̱la gúni̱ ga̱jma̱a̱ xúni̱ wabamijná,* numuu rí muda̱a̱ʼ ga̱jma̱a̱ numuu ñajunʼ rí nu̱nila”.
8 Índo̱ Asá niʼdxawuun ajngáa rígi̱ ga̱jma̱a̱ dí niʼtáriyaʼ profeta* Oded, ndiyáa tsiaki̱i̱ ga̱jma̱a̱ niʼni gámbíin xándú bi̱ xkawi̱i̱nʼ náa mbá xúgíʼ ku̱ba̱ʼ Judá, náa Benjamín ga̱jma̱a̱ náa mbá xúgíʼ xuajin dí ikhaa nigruigúu náa kúbá Efraín. Ma̱ngaa niʼni májáanʼ náa dí najuixnájxi̱ tsigijñaʼ náa inuu Jeobá dí rígá náa inuu corredor ndrígóo Jeobá.
9 Nigímbíin mbá xúgíinʼ xa̱bu̱ Judá, Benjamín ga̱jma̱a̱ xa̱bu̱ bi̱ naguwaáʼ náa Efraín, Manasés ga̱jma̱a̱ Simeón bi̱ kúwá náa majñu̱únʼ. Numuu dí mbaʼin dí ikhiin niniña̱a̱nʼ Israel ga̱jma̱a̱ nigúun kidxuuʼ Asá índo̱ ndiyáá dí Jeobá Dios ndrígóo xtáa ga̱jma̱a̱ ikhaa.
10 Nigimbíin náa Jerusalén índo̱ naʼni ajtsú igu̱nʼ dí naʼni má 15 tsiguʼ dí naʼtáñajunʼ Asá.
11 Mbiʼi rúʼko̱, nixnajxi̱i̱n mbá 700 xedi̱ xóo tsigijñaʼ gamajkhu náa inuu Jeobá ga̱jma̱a̱ mbá 7,000 mugu̱, bi̱ niguwáa̱nʼ kudiin náa nigún gúxmijná.
12 Ma̱ngaa rígá mbá dí nimbánúún náa nixna ajngún dí mbuyáaʼ Jeobá Dios ndrígu̱ún wajin xiʼñúúnʼ ga̱jma̱a̱ xúgíʼ a̱jkiu̱ún, ma̱ngaa ga̱jma̱a̱ xúgíʼ xóo nindxu̱ún.*
13 Asndu tsáá bi̱ xáyáa’ Jeobá, Dios ndrígóo Israel, mbaʼyóoʼ dí makhañúu. Tséʼniuu á mu chíʼgíiʼ* o nikhi̱i̱, xa̱biya̱ o a̱ʼgu̱.
14 Ikha jngóo nixna ajngún náa Jeobá ga̱jma̱a̱ mbá aʼwá gakhi̱i̱, nindxa̱ʼwa̱ dí nadxún ga̱jma̱a̱ nindiyííʼ trompeta ma̱ngaa chi̱ji̱ʼ.
15 Mbá xúgíinʼ xa̱bu̱ Judá ra̱ʼkhá tháán nidxúún ga̱jma̱a̱ numuu dí nixna ajngún, numuu dí nini̱ ga̱jma̱a̱ xúgíʼ a̱jkiu̱ún. Asndu nadxún ndiyáaʼ Jeobá ga̱jma̱a̱ ikhaa niniñaminaʼ dí muxkamaa, niʼni dí marigá tsímáá* náa mbájndi dí kúwá.
16 Rey Asá asndu nirígú káyúuʼ dí naʼtáñajunʼ xíñúuʼ bi̱ mbiʼyuu Maacá, numuu dí ikhaa niʼnii mbáa xándú xkawi̱i̱ʼ mu mbiʼyamajkuíí náa poste rí mitsúʼkháan.* Asá niʼni gámbáa xándú xkawi̱i̱ʼ, niʼni̱i̱ i̱ndó idiuuʼ ga̱jma̱a̱ nitsikháa náa mata* Cedrón.
17 Mú táguma gámbáa náa rí mitsídánʼ dí rígá náa Israel. Maski ajndu xúʼko̱, Asá niʼni ñajuunʼ Dios ga̱jma̱a̱ xúgíʼ a̱jkiu̱u̱n náa mbá xúgíʼ mbiʼi dí nixtáa.
18 Ni̱ʼkha̱ kagu̱u̱ náa goʼwóo Dios bi̱ gajkhun dí ikhaa ga̱jma̱a̱ anu̱u̱* nini̱ kaʼwi̱i̱: Xóo plata, oro ga̱jma̱a̱ mbaʼa dí najmaa.
19 Nánguá nixmijná asndu índo̱ niʼni 35 tsiguʼ rí naʼtáñajunʼ Asá.
Mbaʼa nota
^ Náa ajngáa hebreo naʼthí, “nda̱a̱ dí tsímáá náa bi̱ nagájnuu ni má náa bi̱ nato̱ʼo̱o̱”.
^ Náa ajngáa hebreo naʼthí, “xúniʼñáánʼ majngutígú ñawánla”.
^ O “gaʼyee, bi̱ naʼthí dí marigá”.
^ O “lajuíin”.
^ Náa ajngáa hebreo naʼthí, “niʼni dí mbuya̱a̱ jxu̱únʼ”.
^ O “bóo”.
^ O “tátée”.
