Raga̱jma̱ libro ndrígóo Crónicas 16:1-14
16 Índo̱ naʼni má 36 tsiguʼ dí xtáa raʼtáñajunʼ Asá, rey Baasá bi̱ xtáa náa Israel ni̱jkha̱ náa Judá, nigíʼdúu niʼni májáanʼ xuajin Ramá mu xúʼko̱ nimbáa xágájnuu náa mbayuuʼ rey Asá bi̱ xtáa náa Judá ni má xáto̱ʼo̱o̱ ikhí.
2 Ikhú Asá niguwíi plata ga̱jma̱a̱ oro dí kajti náa cuarto dí gíʼdoo numuu dí rígá náa goʼwóo Jeobá ga̱jma̱a̱ náa goʼwóo* rey, nikuʼma maʼga náa Ben-Hadad rey ndrígóo Siria bi̱ nixtáa náa Damasco. Niʼthúu̱n:
3 “Rígá mbá dí nimbánulú ga̱jma̱a̱ náa anu̱lú. Nakuʼmá plata ga̱jma̱a̱ oro xóo regalo náa ikháán. Atatsíñááʼ rambájxáaʼ ga̱jma̱a̱ʼ rey Baasá bi̱ xtáa náa Israel, mu xúʼko̱ matsíngu̱u̱nʼ náa ikhúún”.
4 Ben-Hadad niʼnimbo̱o̱ dí niʼthúu̱n rey Asá, nikuʼmiin bi̱ nutañajúúnʼ soldado ndrígóo mu muni̱ gámbáa xuajin dí rígá náa Israel, nitu̱ʼu̱u̱n náa Ijón, Dan, Abel-Maim ga̱jma̱a̱ mbá xúgíʼ náa nurajxi̱i̱ dí rígá náa xuajin Neftalí.
5 Índo̱ Baasá niʼdxawuun rígi̱, mbá nacha̱ niniñuuʼ raʼni májáanʼ Ramá, niniñuuʼ raʼni ñajunʼ.
6 Rey Asá ni̱jkha̱ kagui̱i̱n mbá xúgíinʼ xa̱bu̱ Judá, mu magún náa Ramá gúda̱a̱ itsí ga̱jma̱a̱ ixi̱ dí Baasá nijmuu mu maʼni májáanʼ ikhí, ikhaa rúʼko̱ nijmuu mu maʼni májáanʼ Gueba ga̱jma̱a̱ Mizpá.
7 Nákha ikhú vidente* Hananí ni̱jkha̱ gáʼyoo rey Asá náa Judá, niʼthúu̱n: “Ga̱jma̱a̱ numuu dí niku̱ma̱a̱ʼ xtayáá* rey ndrígóo Siria, táku̱ma̱a̱ʼ xtayáá* Jeobá Dios ndrígáaʼ, soldádiu̱u̱ rey Siria nigáñún náa ikháán.
8 Lá ragájkhun dí etíopes ga̱jma̱a̱ libios nindxu̱ún mbaʼin soldado, guáʼdáá mbaʼa carros ga̱jma̱a̱ guáʼdiin mbaʼin bi̱ nudrúwíin wáyú ráʼ. Ga̱jma̱a̱ numuu dí niku̱ma̱a̱ʼ xtayáá Jeobá ikhaa nixnájxi̱i̱n náa ñawáanʼ.
9 Numuu dí Jeobá xtáa rayejxi̱ náa xúgíʼ tsu̱du̱u̱ ku̱ba̱ʼ, mu mambáñún bi̱ nuni̱ ñajuunʼ ga̱jma̱a̱ xúgíʼ a̱jkiu̱ún. Mú dí xúgi̱ nitani̱ xóo mbáa xa̱bu̱ skágunʼ, ikha jngóo makuwá má xúʼko̱ bi̱ mataxmína̱ʼ gajmiáanʼ”.
10 Rígi̱ niʼni dí Asá makásngañu̱u̱ʼ, nikiʼnáa kaʼyoo vidente ga̱jma̱a̱ nikudaaʼ náa guʼwá ejua̱a̱nʼ.* Nákha mbiʼi rúʼko̱ Asá ma̱ngaa nigíʼdúu niʼni ngíníi tikhuun xa̱bu̱ bi̱ kúwá náa xuajin.
11 Dí naʼthí xóó ga̱jma̱a̱ numuu Asá, xúgíʼ dí niʼni, kiʼniraʼmáʼ náa Libro dí naʼthí ga̱jma̱a̱ numún Reyes bi̱ nikúwá náa Judá ga̱jma̱a̱ náa Israel.
12 Índo̱ naʼni má 39 tsiguʼ dí naʼtáñajunʼ, Asá ndiyóo mbá nandii náa rajkhúu ga̱jma̱a̱ niʼniuu gakhi̱i̱, índo̱ ikhaa nigiʼdoo nandii rígi̱ na̱nguá ndiyáaʼ Jeobá, ni̱jkha̱ gajmíi̱n xa̱bu̱ bi̱ nuni̱ thana.
13 Ikhú Asá ndiyáa jxu̱u̱ʼ gajmíi̱n wajin xiʼñúuʼ, nikháñúu índo̱ naʼni má 41 tsiguʼ dí naʼtáñajunʼ.
14 Nidi̱i̱ náa mbá iñá wajinʼ mba̱a̱ dí ikhaa má niʼndii náa Xuajñuu David. Nita̱ma̱a̱ʼ náa xiawoo dí gíʼdoo aceite rí ndataun ga̱jma̱a̱ dí mbaʼa rí kanda̱wo̱o̱ʼ. Ma̱ngaa nigi̱ʼ mbá aguʼ mba̱a̱ náa nidi̱i̱.*
Mbaʼa nota
^ O “náa naʼtáñajunʼ”.
^ Náa ajngáa hebreo naʼthí, “nitambáyuminaʼ náa”.
^ Náa ajngáa hebreo naʼthí, “na̱nguá nitambáyuminaʼ náa”.
^ Náa ajngáa hebreo naʼthí, “guʼwá náa rígá ixi̱ dí nuxuda̱ʼ rajkhúún ga̱jma̱a̱ ñawúúnʼ”.
^ Nigi̱ʼ aguʼ mu mutsikha rí ndataun, raʼkháa mu mutsikha̱a̱ Asá.
