Raga̱jma̱ libro ndrígóo Crónicas 17:1-19
17 Ga̱jma̱a̱ Jehosafat bi̱ nindxu̱u̱ a̱ʼdióo ni̱jkha̱nú ninindxu̱u̱ nuxi̱i̱ʼ rey, ga̱jma̱a̱ nigiʼdoo tsiaki̱i̱ dí naʼtáñajunʼ náa Israel.
2 Nigruigi̱i̱n soldado* náa mbá xúgíʼ xuajin dí kúgumaʼá dí rígá náa Judá. Ma̱ngaa nigruigi̱i̱n soldado náa ku̱ba̱ʼ Judá, ga̱jma̱a̱ náa xuajin dí rígá náa Efraín, xuajin dí Asá bi̱ nindxu̱u̱ anu̱u̱* nigruigúu.
3 Jeobá nixtáa má xúʼko̱ ga̱jma̱a̱ Jehosafat, numuu dí niʼni xó má niʼni wajin xiʼñúuʼ David, bi̱ nixtáa nákha ginii ga̱jma̱a̱ na̱nguá ndiʼyamajkhún Baal.
4 Ikhaa ndiyáaʼ Dios ndrígóo anu̱u̱ ga̱jma̱a̱ niʼnimbánuu* kiʼtáñajunʼ ndrígóo, táʼni xó má nuni̱ xa̱bu̱ Israel.
5 Jeobá nimbáyúu Jehosafat, mu dí naʼtáñajunʼ magiʼdoo tsiaki̱i̱ ga̱jma̱a̱ mbá xúgíinʼ xa̱bu̱ Judá nixnáá má xúʼko̱ regalo Jehosafat, ikhaa nigiʼdoo ga̱jma̱a̱ ra̱ʼkhá tháán nikhánáá gamajkhu.
6 Niʼni gakhi̱i̱ a̱jkiu̱u̱n ga̱jma̱a̱ nijngruigo̱o̱ má xúʼko̱ náa kambo̱o̱ Jeobá, asndu niʼni gámbáa rí mitsídánʼ dí rígá náa Judá ga̱jma̱a̱ niʼni gámbáa poste rí mitsúʼkháan.*
7 Índo̱ naʼni má ajtsú tsiguʼ rí naʼtáñajunʼ, nikuʼma rí maguwáʼ kudiin príncipe, Ben-Hail, Abdías, Zacarías, Netanel ga̱jma̱a̱ Micaya, mu musngáa náa xuajin dí rígá náa Judá.
8 Kúwá gajmiún levitas bugi̱: Semaya, Netanías, Zebadías, Asahel, Semiramot, Jehonatán, Adonías, Tobiya ga̱jma̱a̱ Tob-Adonías. Kúwá gajmiún ndxajkun Elisamá ga̱jma̱a̱ Jehoram.
9 Nigíʼdi̱i̱ nisngáa náa Judá, kuya̱ nigún libro náa na̱ʼkha̱ Xtángoo ndrígóo Jeobá, nigún rusngúún xa̱bu̱ náa mbá xúgíʼ xuajin dí rígá náa Judá.
10 Ga̱jma̱a̱ mbá xúgíinʼ xa̱bu̱ ñajunʼ bi̱ kúwá náa mbájndi Judá nimíñúún kuyáá Jeobá ga̱jma̱a̱ túxmijná gajmiún Jehosafat.
11 Filisteos naguwáʼ kudúún náa Jehosafat regalo ga̱jma̱a̱ mbújkha̱a̱. Árabes naguwá’ kudiin 7,700 mugu̱ e̱jmba̱a̱, ga̱jma̱a̱ 7,700 chivátu.*
12 Jehosafat nigiʼdoo itháan tsiaki̱i̱, niʼni má xúʼko̱ xuajin dí kúgumaʼá, ga̱jma̱a̱ xuajin náa nagujxi̱i̱ dí gíʼdoo náa Judá.
13 Niʼni mbaʼa ñajunʼ dí mba̱ʼu̱ náa xuajin dí rígá náa Judá ga̱jma̱a̱ náa Jerusalén nigiʼdiin soldado bi̱ mixkujiinʼ.
14 Nikúwá mámbá grupo, xó má bi̱ naguwáʼ náa guʼwún anu̱ún. Bi̱ naguwáʼ náa Judá ikhí kúwá bi̱ kuya̱ edxu̱u̱ náa mil, bi̱ kayá edxu̱u̱ Adná nixtáa gajmíi̱n mbá 300,000 soldado bi̱ mixkujiinʼ.
15 Ikhaa naʼtáñajuunʼ bi̱ kayá edxu̱u̱ Jehohanán, ikhaa xtáa gajmíi̱n mbá 280,000.
16 Ma̱ngaa, naʼtáñajuunʼ Amasíah a̱ʼdióo Zicrí, bi̱ nixnájxi̱minaʼ má ikháá mu maʼni ñajuunʼ Jeobá, ikhaa xtáa gajmíi̱n mbá 200,000 soldado bi̱ mixkujiinʼ.
17 Ga̱jma̱a̱ bi̱ naguwáʼ náa Benjamín xtáa Eliadá, mbáa soldado mixkujiiʼ, ikhaa xtáa gajmíi̱n mbá 200,000 xa̱bekha bi̱ kuda xkamídá ga̱jma̱a̱ escudo.
18 Ikhaa naʼtáñajuunʼ Jehozabad, ikhaa xtáa gajmíi̱n mbá 180,000 xa̱bekha bi̱ kúwá xawii magún gúxmijná.
19 Bugi̱ nuni̱ ñajuunʼ rey, ma̱ngaa bi̱ rey nigruigi̱i̱n náa xuajin rí kúgumaʼá dí rígá náa mbá xúgíʼ Judá.
Mbaʼa nota
^ O “grupo soldado”.
^ O “tátée”.
^ Náa ajngáa hebreo naʼthí, “nijngruigo̱o̱ náa”.
^ O “tsu̱jtu e̱jmba̱a̱”.
