Raga̱jma̱ libro ndrígóo Crónicas 18:1-34
18 Maski ajndu Jehosafat nigiʼdoo mbújkha̱a̱ ga̱jma̱a̱ ra̱ʼkhá tháán nikhánáá gamajkhu, nimbánuu ga̱jma̱a̱ Acab dí mudamijná bi̱ kúwá náa guʼwún.
2 Nguáthá tsiguʼ nda̱wa̱á Jehosafat nigajtaa gáʼyoo Acab náa Samaria. Acab nixnájxi̱i̱n mbaʼin mugu̱ ga̱jma̱a̱ mbaʼin xedi̱ xóo tsigijñaʼ náa ikhaa ga̱jma̱a̱ náa xa̱bu̱ bi̱ xtáa gajmíi̱n. Ikhaa niʼni káñuu má xúʼko̱* Jehosafat dí maʼga gáxmína̱ʼ gajmíi̱n xa̱bu̱ Ramot-Galaad.
3 Ikhú Acab rey ndrígóo Israel niʼthúu̱n Jehosafat rey bi̱ xtáa náa Judá: “Mi̱dxu̱ʼ ga̱jma̱á nindxu̱ʼ mu̱ʼgua̱ náa Ramot-Galaad ráʼ.” Ikhaa niriʼñuu: “Ikhúún maʼgá ga̱jma̱á nindxa̱a̱ʼ, xa̱bu̱ xuajñunʼ magún gajmiún xa̱bu̱ xuajñaanʼ, ga̱jma̱a̱ mumbayáaʼ náa muxmijná”.
4 Mú Jehosafat niʼthúu̱n rey ndrígóo Israel: “Mbá péñu,* ginii atayáá ndiéjunʼ eʼthí Jeobá”.
5 Ikha jngóo rey ndrígóo Israel nigímbíin profetas,* xóo mbá 400 xa̱bekha ga̱jma̱a̱ nirajxu̱u̱n: “Mu̱ʼgua̱ gúxmijná gajmiúlú Ramot-Galaad ráʼ. O na̱nguá dxe̱ʼ.” Ikhiin nitháán: “Atatsimaa’, Dios bi̱ gajkhun maxnájxi̱ xuajin rúʼko̱ náa ñawúunʼ rey”.
6 Ikhú Jehosafat niʼthí: “Lá ndawa̱a̱ gi̱i̱ mbáa profeta ndrígóo Jeobá ráʼ. Gurajxi̱i̱ ma̱ngaa mu mbuʼyáá ndiéjunʼ eʼthí Dios”.
7 Rey ndrígóo Israel niriʼñuu Jehosafat: “Xtáa xóó mbáa xa̱bu̱ bi̱ ma̱ndoo murajxi̱i̱ mu mbuʼyáá dí eʼthí Jeobá, mú tsíyóʼ gáyóo, numuu dí mbawíí dí ra̱májánʼ eʼtáriyaʼ ga̱jma̱a̱ numuʼ, tséʼthí dí májánʼ. Ikhaa nindxu̱u̱ Micaya a̱ʼdióo Imlá”. Mú Jehosafat niʼthúu̱n: “Ragíʼmaa maʼthí xúʼko̱ mbáa rey”.
8 Ikha jngóo rey ndrígóo Israel nindxaʼóo mbáa bi̱ kayá edxu̱u̱ náa bi̱ nuñewa̱a̱n ga̱jma̱a̱ niʼthúu̱n: “Nacha̱, ayi̱ jcháa Micaya a̱ʼdióo Imlá”.
9 Rey ndrígóo Israel ga̱jma̱a̱ Jehosafat rey ndrígóo Judá, kúwíin náa mbaaʼ rí nuñejunʼ, náa riejuun xkrugoo xuajin Samaria. Mámbáa gíʼ náa xíliu̱u̱* rí naʼtáñajunʼ ga̱jma̱a̱ kugíʼ xtíin kiejunʼ. Ga̱jma̱a̱ mbá xúgíinʼ profeta kúwá rutariya̱ʼ náa inún.
10 Ikhú Sedequías a̱ʼdióo Kenaaná niʼni nguáthá chi̱ji̱ʼ ga̱jma̱a̱ hierro ga̱jma̱a̱ niʼthí: “Rígi̱ dí naʼthí Jeobá: ‹Ga̱jma̱a̱ chi̱ji̱ʼ rígi̱ mataxuʼdíngui̱i̱nʼ sirios asndu matani̱ gámbíin›”.
11 Xúgíinʼ profetas ikháá má dí etariya̱ʼ, nuthi: “Atatsimaaʼ náa Ramot-Galaad, maʼnga̱a̱ʼ má, Jeobá maxnájxi̱ xuajin rúʼko̱ náa ñawúunʼ rey”.
12 Bi̱ na̱jkha̱ kayóo ajngáa bi̱ ni̱jkha̱ gáyáa Micaya, niʼthúu̱n: “Májánʼ mbá xúgíʼ dí nutariya̱ʼ profetas ga̱jma̱a̱ numuu rey, mbá péñu, xó má ethi xúʼko̱ má gáratha̱ mangáán, aratáriya’ mbá dí májánʼ”.
13 Mú Micaya niʼthúu̱n: “Na̱xna̱ ajngóʼ ga̱jma̱a̱ numuu mbiʼyuu Jeobá rí ma̱ta̱ dí má gáʼthúnʼ Dios ndrígóʼ”.
14 Ikhú ni̱jkha̱ náa inuu rey, ga̱jma̱a̱ rey nirajxu̱u̱: “Micaya, muʼgua̱lú gúxmijná gajmiúlú Ramot-Galaad ráʼ. O xáʼgá dxe̱ʼ.” Mbá nacha̱ niriʼñuu: “Atatsimaaʼ, maʼnga̱a̱ʼ má, ikhiin mixnájxi̱i̱n náa ñawánla”.
15 Índo̱ rey niʼdxawun, niʼthúu̱n: “Nguáthá nuthu gáʼyóoʼ maña̱a̱ʼ dí maraxna̱ ajngáaʼ rí marathu̱nʼ i̱ndó dí gajkhun ga̱jma̱a̱ numuu mbiʼyuu Jeobá rá.”
16 Ikha jngóo niʼthí: “Nda̱ñu̱u̱n mbá xúgíinʼ israelitas, dí nigadríʼiin náa kúbá, xóo mugu̱ bi̱ ndawa̱a̱ baxtúu ndrígu̱ún. Jeobá naʼthí: ‹Ndawa̱a̱ bi̱ xujkiúu. Ga̱ʼga̱a̱ tsímáá goʼwóo mámbáa›”.
17 Ikhú rey ndrígóo Israel niʼthúu̱n Jehosafat: “Lá na̱nguá nitha̱nʼ dí ‹Ikhaa xáʼtáriyaʼ dí májánʼ ga̱jma̱a̱ numuʼ, i̱ndó dí ra̱májánʼ ráʼ.›”
18 Ikhú Micaya niʼthí: “Atadxawíín dí naʼthí Jeobá xúgi̱ rá, ndi̱yo̱o̱ Jeobá gíʼ náa xíliúu rí naʼtáñajunʼ, ga̱jma̱a̱ mbá xúgíinʼ ángeles bi̱ kúwá mekhuíí wájun náa ikhaa, náa níjñú mújúunʼ ga̱jma̱a̱ náa níjñú xti̱yu̱u̱ʼ.
19 Ikhú Jeobá niʼthí: ‹Tsáá gáʼni nduwaaʼ Acab rey ndrígóo Israel, mu matsimuu náa Ramot-Galaad ga̱jma̱a̱ makhañúu ikhí rá.› Mbá dí eʼthí mbáa ga̱jma̱a̱ i̱mba̱ dí eʼthí i̱mba̱a̱.
20 Ikhú mbáa ángel* nikuʼmaminaʼ ga̱jma̱a̱ niwi̱ji̱ náa inuu Jeobá, niʼthúu̱n: ‹Ikhúún gáni ndúwaaʼ›. Ikhú Jeobá nirajxu̱u̱: ‹Xú káʼnii gátani̱ rá.›
21 Niriʼñuu: ‹Maʼgá ga̱jma̱a̱ martajxi̱mínáʼ mbáa espíritu minduwaaʼ náa rawúúnʼ mbá xúgíinʼ profeta ndrígóo›. Ikhú Dios niʼthúu̱n: ‹Maʼnga̱a̱ʼ matani̱ nduwaaʼ, ayuʼ, magajnúu má májánʼ, ayuʼ gátani̱ nduwaaʼ›.
22 Ikha jngóo Jeobá nigídáʼ mbá espíritu minduwaaʼ náa rawúúnʼ xúgíinʼ profeta ndrígáaʼ. Mú Jeobá niʼthí dí matagíʼníí mbá gamiéjunʼ”.
23 Sedequías a̱ʼdióo Kenaaná nikuʼmaminaʼ náa Micaya, nixnúu inuu ga̱jma̱a̱ niʼthúu̱n: “Espíritu ndrígóo Jeobá niniñuʼ ikhúún dí muʼtámíjná tha̱án, náá ni̱jkha̱ xá.”
24 Micaya niʼthúu̱n: “Ma̱ta̱ya̱a̱ má mbiʼi dí gáta̱ʼa̱a̱ʼ náa cuarto dí rígá itháan awúún mu matarkaʼwuminaʼ”.
25 Ikhú rey ndrígóo Israel niʼthí: “Aʼguala kuya̱a̱ Micaya ga̱jma̱a̱ guxnajxíi náa Amón, bi̱ kayá edxu̱u̱ náa xuajin ga̱jma̱a̱ náa Joás a̱ʼdióo rey.
26 Gu̱tu̱u̱nla: ‹Rígi̱ dí naʼthí rey: “Guxuʼdáaʼla guʼwá e̱jua̱nʼ xa̱bu̱ bugi̱, chíʼgíiʼ* pan ga̱jma̱a̱ chíʼgíiʼ iyaʼ gúxna̱a̱ asndu índo̱ gátangu̱ún rí niʼngo̱ʼ náa maʼgá gáxmína̱ʼ”›”.*
27 Mú Micaya niʼthí: “Á mu natanga̱án rí niʼnga̱a̱ʼ* Jeobá táʼtáminaʼ ga̱jma̱á nindxu̱ʼ”. Ga̱jma̱a̱ niʼthí xóó: “Mbá xúgiáanʼ ikháanʼla, gu̱ya̱a̱la rígi̱”.
28 Ikhú rey ndrígóo Israel ga̱jma̱a̱ Jehosafat, rey ndrígóo Judá, nitsimún náa Ramot-Galaad.
29 Rey ndrígóo Israel niʼthúu̱n Jehosafat: “Ikhúún maʼgíʼ i̱mba̱ xtíin, mu mato̱ʼo̱ʼ náa nuxmijná. Mú ikháán atagíʼ má xtíñaaʼ rí kiejunʼ”. Ikha jngóo rey ndrígóo Israel nigíʼ i̱mba̱ xtíñuu ga̱jma̱a̱ nito̱ʼo̱o̱ náa nuxmijná.
30 Rey ndrígóo Siria niʼtáñajúúnʼ bi̱ nutañajúúnʼ bi̱ nagún kudúún carro: “Xúxmíjná gajmiála nimbáa, ni má bi̱ chíʼgíiʼ, ni má bi̱ mba̱a̱, i̱ndó guxmíjná gajmiála rey ndrígóo Israel”.
31 Índo̱ bi̱ nutañajúúnʼ bi̱ nagún kudúún carro ndiyáá Jehosafat, nithi: “Ikhaa buʼko̱ rey ndrígóo Israel”. Ikha jngóo nigún mu muxmijná gajmiún. Jehosafat ninda̱ʼa̱ rí mixtambáyíí ga̱jma̱a̱ Jeobá nimbáyúu. Dios niʼni rí mbá nacha̱ muni̱ tsíngumi̱jna̱ náa ikhaa.
32 Índo̱ bi̱ nutañajúúnʼ bi̱ nagún kudúún carro ndiyáá dí raʼkháa rey ndrígóo Israel, mbá nacha̱ niniña̱a̱nʼ ragún ruxkáá.
33 Mú mbáa xa̱bu̱, mbaʼ nida̱áʼ flecha ga̱jma̱a̱ xkamídoo, nixnúu rey ndrígóo Israel náa na̱nguá kúgoo ga̱jma̱a̱ ajua̱nʼ rí nañewu̱u̱n tsuxto̱o̱. Ikhú rey niʼthúu̱n bi̱ na̱jkha̱ kayóo cárriu̱u̱: “Atanga̱án ga̱jma̱a̱ atríñu̱únʼ náa nuxmijná* numuu dí nini̱ kambíyu̱ʼ”.
34 Ra̱ʼkhá tháán gakhi̱i̱ nixmijná mbá kañiiʼ mbiʼi rúʼko̱. Ndiyóoʼ dí murajtuwiin rey ndrígóo Israel, juáʼan náa awúu̱n carro, mu xúʼko̱ xúgíinʼ sirios mbuyáá asndu índo̱ niʼni wakíʼ ga̱jma̱a̱ nikháñuu índo̱ nirámaaʼ a̱jkha̱ʼ.
Mbaʼa nota
^ O “niʼngo̱o̱ niʼni dí”.
^ O “atani̱ mbá rí májánʼ”.
^ O “gaʼyee, bi̱ nuthi dí marigá”.
^ O “trono”.
^ Náa ajngáa hebreo naʼthí, “espíritu”.
^ O “lajuíin”.
^ Náa ajngáa hebreo naʼthí, “gátangu̱ún tsímáá”.
^ Náa ajngáa hebreo naʼthí, “natanga̱án tsímáá”.
^ Náa ajngáa hebreo naʼthí, “náa gríguiin”.
