Raga̱jma̱ libro ndrígóo Crónicas 19:1-11
19 Ikhú Jehosafat rey Judá nitanga̱a̱ tsímáá náa goʼwóo* náa Jerusalén.
2 Jehú a̱ʼdióo Hananí, xa̱bu̱ bi̱ ndaʼyoo rí nawasngájmáá,* nigájnuu gátsijnuu rey Jehosafat ga̱jma̱a̱ niʼthúu̱n: “Lá naku̱ma̱a̱ʼ dí májánʼ rí matambáñún bi̱ ra̱míjíinʼ ga̱jma̱a̱ maʼndaaʼ xtañún bi̱ nawiñu̱u̱ʼ kuyáá Jeobá ráʼ. Ikha jngóo Jeobá nakiʼnáa kaʼyaaʼ.
3 Mú nikujmaa dí rígá dí májánʼ náa ikháán, numuu dí nitani̱ gámbáa náa xuajin poste rí mitsúʼkháan* ga̱jma̱a̱ nitani̱ ratháá a̱jkia̱a̱nʼ mu mataʼyáaʼ Dios bi̱ gajkhun”.
4 Jehosafat nixtáa má xúʼko̱ náa Jerusalén ga̱jma̱a̱ mbu̱júu̱ nigájnuu mu maʼga náa mámbá xuajin, nigíʼdu̱u̱ náa Beer-Seba asndu náa kúbá Efraín, mu mambáñún xa̱bu̱ matangi̱ín náa Jeobá, Dios ndrígu̱ún wajin xiʼñúúnʼ.
5 Nigruigi̱i̱n bi̱ munimbaníí xkujndu náa mbá xúgíʼ xuajin ga̱jma̱a̱ náa mámbá xuajin dí kúgumaʼá dí rígá náa Judá.
6 Ga̱jma̱a̱ niʼthúún bi̱ nunimbaníí xkujndu: “Gu̱ya̱a̱ májánʼ ndiéjunʼ eni̱la, numuu dí tsénimbaníí ga̱jma̱a̱ numuu mbáa xa̱bu̱ú, nuni̱la ga̱jma̱a̱ numuu Jeobá. Ikhaa xtáa ga̱jma̱á nindxa̱la índo̱ nunimbaníí xkujndu.
7 Ikha jngóo gamiñála ku̱ya̱a̱ Jeobá. Tsu̱ma̱á gúnila, numuu dí Jeobá Dios ndrígulú tsénigu̱u̱ʼ maguma dí ra̱májánʼ, dí mura̱ʼwi̱i̱nla xa̱bu̱ ni má dí mundrígula regalo”.
8 Ma̱ngaa náa Jerusalén, Jehosafat niraʼwíin tikhuun levitas, ndxajkun ga̱jma̱a̱ tikhuun bi̱ kuya̱ edxu̱u̱ náa mámbá guʼwíin xa̱bu̱ bi̱ kúwá náa Israel, mu munimbaníí xkujndu náa inuu Jeobá ga̱jma̱a̱ mu munimbaníí numún xa̱bu̱ Jerusalén.
9 Ga̱jma̱a̱ niʼthúún: “Rígi̱ dí gíʼmaa mu̱nila, gamiñála kuya̱a̱ Jeobá, gu̱ni̱ dí jmbu ga̱jma̱a̱ gaʼni kañiiʼ a̱jkia̱la:
10 Índo̱ a̱ngia̱la bi̱ kúwá náa i̱ʼwáʼ xuajin, gúxruigamíjna̱ ga̱jma̱a̱ numuu rí mbáa nixíyáa mbáa xa̱bu̱, o mbá xkujndu ga̱jma̱a̱ numuu xtángoo, kiʼtáñajunʼ, ikha, o rí na̱tha̱ maguma, ikháanʼ gíʼmaa muthu̱u̱n ikhiin mu xáguánú maguaʼdáá aʼkhúún náa inuu Jeobá, á mu tsénila, ikhaa makiʼnáa kaʼyala, ga̱jma̱a̱ makiʼnáa kaʼñún a̱ngia̱la. Rígi̱ dí gíʼmaa mu̱ni̱la ikháanʼ mu xáʼguanú maguaʼdáá aʼkhála.
11 Gi̱i̱ xtáa Amarías ndxajkun bi̱ kayá edxu̱u̱, ikhaa maʼtála ndiéjunʼ gúnila ikháanʼ náa xúgíʼ ñajunʼ dí maguma náa Jeobá. Zebadías a̱ʼdióo Ismael mbayá edxu̱u̱ náa goʼwóo Judá, ikhaa maʼthí xúgíʼ dí maguma ga̱jma̱a̱ numuu rey. Ga̱jma̱a̱ levitas mbuya̱ edxu̱u̱ náa ikháanʼla. Gakhi̱i̱ a̱jkia̱la gúni̱ ga̱jma̱a̱ guñajunʼ, Jeobá gáxtáa gajmíi̱n bi̱ nuni̱ rí májánʼ”.
