Raga̱jma̱ libro ndrígóo Crónicas 2:1-18
-
Nugimbóó rí majmúún náa muni̱ guʼwá náa mbuyamajkuíí Dios (1-18)
2 Salomón niʼtáñajunʼ rí maguma mbá guʼwá náa marigá mbiʼyuu Jeobá ga̱jma̱a̱ mbá guʼwá náa maʼtáñajunʼ.
2 Salomón nigiʼdiin mbá 70,000 bi̱ nurangoo ga̱jma̱a̱ mbá 80,000 bi̱ nixui̱ʼta̱ itsí náa kúbá, ma̱ngaa mbá 3,600 bi̱ nigruigi̱i̱n mu mbuyáá xóo nuñajunʼ xa̱bu̱.
3 Ma̱ngaa Salomón nikuʼma ajngáa rígi̱ náa Hiram, rey ndrígóo Tiro: “Atani̱ ga̱jma̱a̱ numuʼ ikháá má xóo nitani̱ ga̱jma̱a̱ numuu anu̱ʼ* David, índo̱ nitaxúʼma ixi̱ cedro mu maʼni ga̱jma̱a̱ mbá guʼwá náa maxtáa.
4 Ma̱ni̱ mbá guʼwá náa marigá mbiʼyuu Jeobá Dios ndrígóʼ rí maʼni goʼwóo, náa matsikarámáʼ rí ndataun náa inuu ikhaa, ma̱ngaa marigá má xúʼko̱ pan dí karngujxi̱* ga̱jma̱a̱ náa mixnájxi̱ tsigijñaʼ dí mikarámáʼ miʼcha̱ ga̱jma̱a̱ wakíʼ, mbiʼi sábado, índo̱ nagi̱ʼi̱ gu̱nʼ rudiiʼ ga̱jma̱a̱ mbiʼi rí naguma ndxo̱o̱ Jeobá Dios ndrígulú, rígi̱ dí gíʼmaa muni̱ xa̱bu̱ Israel asndu kámuu.
5 Ma̱ni̱ mbá guʼwá rí mba̱a̱ numuu rí Dios ndrígulú gíʼdoo itháan numuu ki xóo xúgíinʼ eʼwíinʼ dioses.
6 Tsáá gáʼngo̱o̱ gáʼni mbá guʼwá náa maxtáa xá. Asndu mekhu dí itháán mitsídánʼ tséʼngo̱o̱ maxtáa. Ikha jngóo tsáá nindxu̱ʼ ikhúún rí ma̱ni̱ mbóoʼ guʼwá náa maxtáa xá. Káaʼ majmúún ma̱ni̱ mbá guʼwá náa murkuní tsigijñaʼ náa inuu ikhaa.
7 Ataxúʼmaa mbáa xa̱bu̱ bi̱ najmañuu nañajunʼ ga̱jma̱a̱ oro, plata, cobre, hierro, mugu̱ rí miʼñuu, gúmá rí maña̱ʼ xngeʼdi ga̱jma̱a̱ gúmá azul, bi̱ naʼniwíi xtiʼkhuu ga̱jma̱a̱ itsí. Ikhaa maxtáa rañajunʼ náa Judá ga̱jma̱a̱ náa Jerusalén gajmíi̱n xa̱bi̱ʼ bi̱ najmañún, bi̱ anu̱ʼ David nixníin.
8 Ataxunguanʼ ixi̱ dí rígá náa Líbano, xóo ixi̱ cedro, enebro, ga̱jma̱a̱ sándalo, numuu rí nda̱yo̱o̱ dí xa̱bia̱a̱ʼ najmañún nurujtu ixi̱ dí rígá náa Líbano. Xa̱bi̱ʼ muñajunʼ mbóó gajmiún xa̱bia̱a̱ʼ,
9 mu xúʼko̱ murawíi mbaʼa ixi̱, numuu rí guʼwá rí ma̱ni̱ mani̱ndxu̱u̱ mba̱a̱ wéñuuʼ.
10 Ikhúún má gáyóo xóo gúphiʼtsu xa̱bia̱a̱ʼ bi̱ nurujtu ixi̱: 4 millones 400 mil litro* trigo, 4 millones 400 mil litro* cebada, 4 millones 400 mil litro* vino ga̱jma̱a̱ 4 millones 400 mil litro* aceite”.
11 Ikhú Hiram rey ndrígóo Tiro, niʼnirámáʼ ajngáa rígi̱ náa inuu Salomón: “Jeobá nigíinʼ xóo rey náa xuajñuu numuu rí nandoo kaʼyoo xuajñuu”.
12 Hiram ma̱ngaa niʼthí: “Gaguma mba̱a̱ Jeobá, Dios ndrígóo Israel, bi̱ niʼni mekhu ga̱jma̱a̱ ku̱ba̱ʼ numuu dí nixniúu rey David mbáa ada̱ bi̱ najmañuu, bi̱ nandxa̱ʼwáminaʼ májánʼ ga̱jma̱a̱ nakro̱ʼo̱o̱, bi̱ maʼni mbá goʼwóo Jeobá ga̱jma̱a̱ mbá guʼwá náa maʼtáñajunʼ ikhaa.
13 Nakuʼnguáanʼ Hiram-Abí, mbáa xa̱bu̱ bi̱ najmañuu nañajunʼ májánʼ.
14 Nindxu̱u̱ a̱ʼdióo mbáa a̱ʼgú danita, mú anu̱u̱ na̱ʼkha̱ náa Tiro, najmañuu nañajunʼ ga̱jma̱a̱ oro, plata, cobre, hierro, itsí, ixi̱, mugu̱ rí miʼñuu, gúmá azul, xtíin rí májánʼ ga̱jma̱a̱ gúmá rí maña̱ʼ xngeʼdi. Ikhaa najmañuu naʼni asndu ndiéjunʼ má ñajunʼ ga̱jma̱a̱ asndu xú káʼnii má xtiʼkhuu rí najuixnáá maʼni. Mañajunʼ gajmíi̱n xa̱bia̱a̱ʼ bi̱ najmañún nuñajunʼ májánʼ xó má xa̱bi̱i̱ tátioʼ David bi̱ nindxu̱u̱ ana̱a̱ʼ.
15 Dí xúgi̱, tátioʼ gakunguanʼ trigo, cebada, aceite ga̱jma̱a̱ vino náa xa̱bi̱i̱ rí niʼthí maxná.
16 Ikháanʼ murujtuxu̱ ixi̱ dí rígá náa Líbano asndu nguáthá má gáʼyóoʼ, muruʼwa̱a̱xu ixi̱ mu maʼga kruámuuʼ náa inuu lamáa asndu makidáanʼ kudúxu náa Jope ga̱jma̱a̱ ikháán matatsima̱a̱ʼ xtaaʼ náa Jerusalén”.
17 Ikhú Salomón niʼni mbá censo náa xúgíinʼ xa̱bekha bi̱ naguwaáʼ bi̱ kúwá náa ku̱ba̱ʼ ndrígóo Israel, ikháá má xóo niʼni David bi̱ nindxu̱u̱ anu̱u̱, 153,600 rí mbá xúgíinʼ.
18 Nigruigi̱i̱n mbá 70,000 bi̱ nurangoo ga̱jma̱a̱ mbá 80,000 bi̱ nuxui̱ʼta̱ itsí náa kúbá, ma̱ngaa mbá 3,600 bi̱ nigruigi̱i̱n mu mbuyáá xóo ejkha̱ ñajunʼ, mu mugiʼmiin xa̱bu̱ muñajunʼ.
Mbaʼa nota
^ O “táteʼ”.
^ Xóo muʼthá, pan dí najuixnájxi̱.
^ Náa ajngáa hebreo naʼthí, “20,000 coros”.
^ Náa ajngáa hebreo naʼthí, “20,000 batos”.
