Raga̱jma̱ libro ndrígóo Crónicas 20:1-37
20 Nda̱wa̱á moabitas, ammonitas, gajmiún tikhuun ammonim,* niguwáʼ gúxmijná gajmiún Jehosafat.
2 Ikha jngóo nitháán Jehosafat: “Ra̱ʼkhá tháán mbaʼin xa̱bu̱ eguwáʼ mataxmíjná gajmiáanʼ, naguwáʼ náa mbaaʼ dí rígá xígií náa lamáa* asndu náa Edom, dí xúgi̱ kúwá náa Hazazón-Tamar, xóo muʼthá, En-Guedí”.
3 Ikhú Jehosafat nimíñuu ga̱jma̱a̱ ndiyáaʼ Jeobá. Niʼtáñajúúnʼ mbá xúgíinʼ xa̱bu̱ Judá dí xúpiʼtsu.
4 Ikhú xa̱bu̱ Judá nigimbíin mu murajxi̱i̱ Jeobá, niguwáʼ náa mbá xúgíʼ xuajin dí rígá náa Judá mu murajxi̱i̱ Jeobá.
5 Ikhú Jehosafat niwi̱ji̱ náa tapu̱ún xa̱bu̱ bi̱ nigimbíin bi̱ naguwáʼ náa Judá ga̱jma̱a̱ náa Jerusalén náa goʼwóo Jeobá, náa inuu rexo̱o̱ guʼwá dí nuxi̱ʼ,
6 niʼthí:
“Tátá, Jeobá, Dios ndrígu̱ún wajin xiʼñúxu, lá raʼkháa ikháán nindxa̱a̱ʼ Dios bi̱ xtáa mekhuíí ráʼ. Lá raʼkháa ikháán eratañajúúnʼ mbá xúgíinʼ xa̱bu̱ ñajunʼ bi̱ kúwá náa xuajin ráʼ. Náa ñawáanʼ rígá tsiaki̱i̱, nimbáa xáʼngo̱o̱ matani̱ ga̱jma̱a̱ʼ.
7 Dios ndrígúxu̱, lá ragájkhun dí ikháán nitaxkawíin xa̱bu̱ bi̱ kúwá náa ku̱ba̱ʼ rígi̱, náa inún xa̱bu̱ xuajñaanʼ Israel ga̱jma̱a̱ ikhú niraxnún mbá kayuuʼ ku̱ba̱ʼ rígi̱ bi̱ naguwáʼ náa Abrahán bi̱ nimbájxa̱a̱ʼ ga̱jma̱a̱ʼ ráʼ.
8 Nikúwá ikhí ga̱jma̱a̱ nini̱ mbá náa mbuyamajkuíí mbiʼyaaʼ. Nithi:
9 ‹Á mu numíníiʼxu, ga̱jma̱a̱ numuu espada, tsémbánuu májánʼ numuxu, mbá nandii o ewiʼ, muguájunxu náa guʼwá rígi̱ náa inaaʼ ikháán (numuu dí mbiʼyaaʼ rígá náa guʼwá rígi̱) índo̱ kuwáanʼxu̱ ngíná muʼguáxu̱ náa ikháán mu matambáyuxuʼ, ikháán matadxawíín ga̱jma̱a̱ matani̱ káwáanʼxu̱›.
10 Dí xúgi̱, kúwá gi̱i̱ xa̱bu̱ Ammón, Moab ga̱jma̱a̱ bi̱ naguwáʼ náa kúbá Seír. Índo̱ xa̱bu̱ Israel nigájni̱ín náa ku̱ba̱ʼ ndrígóo Egipto, ikháán na̱nguá nitatsíñánʼ dí ikhiin matu̱ʼu̱u̱n náa ku̱bu̱únʼ, nitsíngu̱u̱nʼ ga̱jma̱a̱ túni̱ gámbáa.
11 Dí xúgi̱ ikhiin nuniuxu dí ra̱májánʼ dí ikháanʼxu̱ niniu̱u̱n dí májánʼ, niguwáʼ mu murawáanʼxu náa mbaaʼ dí ikháán niraxnúxu̱ʼ mu maʼni mbayuxu.
12 Dios ndrígúxu̱, lá xátani̱ dí mumíniiʼ xáʼ. Numuu dí ikháanʼ xáʼnguxuʼ gúni̱ gajmiúxu xa̱bu̱ bi̱ ra̱ʼkhá tháán mbaʼin bugi̱ bi̱ naguwáʼ muxmijná gajmiúxu, tséya̱a̱ ndiéjunʼ gúnixu̱, mú iduxu nayejxi̱ má xúʼko̱ náa ikháán numuu dí ndu̱ya̱a̱xu dí matambáyuxuʼ”.
13 Mbá xúgíinʼ xa̱bu̱ Judá wájun náa inuu Jeobá, gajmiún guʼñu̱ún mangiin e̱jñu̱ún ga̱jma̱a̱ asndu e̱ji̱n bi̱ itháan majkhiinʼ.
14 Náa taphu̱ún xa̱bu̱ bi̱ nigimbíin, ikhí Jahaziel a̱ʼdióo Zacarías, a̱ʼdióo Benaya, a̱ʼdióo Jeiel, a̱ʼdióo Matanías mbáa levita bi̱ na̱ʼkha̱ náa e̱ji̱i̱n Asaf nigruigú espíritu ndrígóo Jeobá.
15 Ikhaa niʼthí: “¡Gudxawíínla mbá xúgiáanʼ xa̱bu̱ Judá ga̱jma̱a̱ xa̱bu̱ Jerusalén, ga̱jma̱a̱ ikháán rey Jehosafat! Rígi̱ dí naʼtála Jeobá: ‹Xámiñalaʼ ni má xáguáʼáanʼla náa inún xa̱bu̱ bi̱ mbaʼin bugi̱, numuu dí raʼkháa ikháanʼla gúxmijná, Dios gáxmína̱ʼ.
16 Aguajtaa gúxmijná gajmiála gájtsíí. Ikhiin matsimún náa kamba̱a̱ Ziz, ga̱jma̱a̱ ikháanʼla muxkamiin náa nartumuu mata,* náa ridoo ku̱ba̱ʼ mijxooʼ* Jeruel.
17 Ikháanʼla xáʼyóoʼ muxmijná. Guguajún náa kaʼyoo ga̱jma̱a̱ wíí gúguajún, gu̱ya̱a̱ xú kaʼnii Jeobá gáʼni káwáanʼla. Xa̱bu̱ Judá ga̱jma̱a̱ Jerusalén, xámiñalaʼ ni má xáguáʼáanʼla. Guʼguala gájtsíí gúxmijná gajmiála, Jeobá maxtáa ga̱jma̱á nindxa̱la›”.
18 Núkhu má Jehosafat nismbáti̱go̱o̱ asndu mbayííʼ, xúʼko̱ má nini̱ xa̱bu̱ Judá ga̱jma̱a̱ xa̱bu̱ Jerusalén nismbati̱gu̱u̱n náa inuu Jeobá mu mbuyamajkuíí Jeobá.
19 Ikhú levitas bi̱ naguwáʼ náa cohatitas ga̱jma̱a̱ coreítas, nitujxu̱u̱n mu muni̱ mba̱a̱ Jeobá Dios ndrígóo Israel ga̱jma̱a̱ aʼwá gakhi̱i̱.
20 Miʼcha̱ niguájxu̱u̱n dí i̱mba̱ néjtsuu, nigún náa ku̱ba̱ʼ mijxooʼ Tecoa. Índo̱ kúwá ragájnún, Jehosafat niwi̱ji̱ ga̱jma̱a̱ niʼthí: “¡Gudxawunʼla xa̱bu̱ Judá ga̱jma̱a̱ xa̱bu̱ Jerusalén! Guguaʼdáá fe náa Jeobá Dios ndrígala mu xúʼko̱ maguajúnla gújkhúʼ.* Guguaʼdáá fe náa profetas* ndrígio̱o̱, mu xúʼko̱ magajnúu májánʼ dí gúni̱”.
21 Nda̱wa̱á dí nirajxu̱u̱n xa̱bu̱, niraʼwíin xa̱bekha bi̱ muni̱ ajmúú náa inuu Jeobá, nini̱ mba̱a̱ índo̱ nigíʼ xtíin dí mikaʼwu ga̱jma̱a̱ nigún náa inún xa̱bekha bi̱ kuda ajua̱nʼ dí nuxmijná ga̱jma̱a̱, nithi: “Guxna̱a̱ núma̱aʼ Jeobá, numuu dí nandoo kaʼyulú* ndajyúuʼ asndu kámuu”.
22 Índo̱ nigíʼdi̱i̱ nini̱ ajmúú ga̱jma̱a̱ gagi, nda̱a̱ tsu̱ma̱ Jeobá niʼni dí xa̱bu̱ Ammón, Moab ga̱jma̱a̱ xa̱bu̱ bi̱ naguwáʼ náa kúbá Seír muradímíjná kaníkiin, bi̱ kúwá ruxmijná gajmiún xa̱bu̱ Judá.
23 Ammonitas ga̱jma̱a̱ moabitas nitangiín kudiin xa̱bu̱ bi̱ naguwáʼ náa kúbá Seír mu muradíin ga̱jma̱a̱ muni̱ gámbíin mbá kayuuʼ, índo̱ niguámbu̱u̱n niradíin xa̱bu̱ bi̱ naguwáʼ náa Seír, ikhú niradímíjná kaníkiin.
24 Índo̱ xa̱bu̱ Judá niguánú náa torre náa dí nuyejngoo dí rígá náa ku̱ba̱ʼ mijxooʼ niyejxi̱ náa gíi̱nʼ mbaʼin, ndiyáá dí jngútigi̱i̱n nikháñún, nimbáa tákríya̱a̱ʼ mbá xúgíinʼ nikháñún.
25 Ikhú Jehosafat gajmíi̱n xa̱bi̱i̱ nigúun kudúún dí niguanáa. Nixka̱ma̱a̱ mbaʼa dí guáʼdáá xa̱bu̱, xóo xtíin ga̱jma̱a̱ i̱ʼwáʼ dí gíʼdoo numuu dí nida̱a̱ʼ náa jngútigi̱i̱n bi̱ nikháñún ga̱jma̱a̱ ikhú nigíʼdi̱i̱ nirawí káñúnʼ, ra̱ʼkhá tháán mbaʼa dí asndu nánguá niʼngu̱u̱n gúda. Mbaʼa wéñuuʼ rí niguanáa dí asndu ndijñúúnʼ ajtsú mbiʼi mu magúun kudúún.
26 Índo̱ niʼni a̱jkhu̱ mbiʼi nigimbíin náa mata Beracá, náa nini̱ mba̱a̱* Jeobá. Ikha jngóo náa mbaaʼ rúʼko̱ nixna mbiʼíí mata Beracá,* xúʼko̱ mbiʼyuu asndu dí mbiʼi xúgi̱.
27 Ikhú mbá xúgíinʼ xa̱bu̱ Judá ga̱jma̱a̱ xa̱bu̱ Jerusalén, ginii frígu ra̱jkha̱a̱ Jehosafat, asndu nadxún nitangiín náa Jerusalén, Jeobá niʼni dí maʼdxúún numuu dí ikhaa niʼni dí maʼngu̱u̱n muni̱ gajmiún xa̱bu̱ sia̱nʼ.
28 Niguánúu náa Jerusalén kuda ajua̱nʼ dí gíʼdoo cuérdóo, xóo arpas ga̱jma̱a̱ trompetas, nigún náa goʼwóo Jeobá.
29 Índo̱ mbá xúgíinʼ xa̱bu̱ ñajunʼ bi̱ kúwá náa i̱ʼwáʼ xuajin nidxawíín dí Jeobá nixmínaʼ gajmíi̱n xa̱bu̱ sia̱nʼ ndrígiu̱ún israelitas, ikhú ra̱ʼkhá tháán nimíñúún kuyáá Dios.
30 Xúʼko̱ niʼni dí marigá tsímáá índo̱ niʼtáñajunʼ Jehosafat, ga̱jma̱a̱ Dios ndrígóo niʼni dí marigá tsímáá* náa mbájndi xtáa.
31 Jehosafat niʼtáñajunʼ má xúʼko̱ náa Judá. Gíʼdoo 35 tsiguuʼ índo̱ ni̱jkha̱nú ninindxu̱u̱ rey, niʼtáñajunʼ mbá 25 tsiguʼ náa Jerusalén. Ru̱dúu̱* nigumbiʼyuu Azubá wáxióo* Silhí.
32 Ikhaa niʼni xó má niʼni anu̱u̱* Asá, nditháan tágájnuriyo̱o̱ʼ. Niʼni dí májánʼ náa iduu Jeobá.
33 Mú táguma gámbáa náa rí mitsídánʼ ga̱jma̱a̱ xa̱bu̱ xuajin xóó na̱nguá kúwá xawii* mbuyamajkuíí Dios ndrígu̱ún wajin xiʼñúúnʼ.
34 Dí naʼthí xóó itháan ga̱jma̱a̱ numuu Jehosafat, xúgíʼ dí niʼni kiʼniraʼmáʼ náa ajngáa dí niʼnirámáʼ Jehú a̱ʼdióo Hananí, dí na̱ʼkha̱ náa Libro dí naʼthí ga̱jma̱a̱ numún Reyes bi̱ nikúwá náa Israel.
35 Nda̱wa̱á, Jehosafat rey Judá niñajunʼ mbóó ga̱jma̱a̱ Ocozías rey Israel, bi̱ naʼni dí ra̱májánʼ.
36 Niñajunʼ mbóó mu muni̱ barcos dí maʼga náa Tarsis, nini̱ barcos náa Ezión-Guéber.
37 Eliezer a̱ʼdióo Dodavahu bi̱ na̱ʼkha̱ náa Maresá niʼtáriyaʼ dí magíʼnuu Jehosafat: “Ga̱jma̱a̱ numuu dí nitiejunʼ mbóó ga̱jma̱a̱ʼ Ocozías, Jeobá maʼni gámbóo ñajunʼ dí nitani̱”. Ikha jngóo niguma gámbáa barcos, nánguá ni̱jkha̱ náa Tarsis.
Mbaʼa nota
^ O mbáa “meunitas”.
^ Nakujmaa dí nindxu̱u̱ mar Muerto.
^ O “bóo”.
^ O “desierto”.
^ O “maʼngala”.
^ O “gaʼyee, bi̱ nuthi dí marigá”.
^ Náa ajngáa hebreo naʼthí, “nithi dí májánʼ ga̱jma̱a̱ numuu”.
^ Rí nandoo gáʼthúu̱n ‹dí naguma tsajkurámááʼ›.
^ Náa ajngáa hebreo naʼthí, “mbayáa jxu̱u̱ʼ”.
^ O “nánée”.
^ O “a̱ʼdée dxáʼgú”.
^ O “tátée”.
^ Náa ajngáa hebreo naʼthí, “na̱nguá niniratáá a̱jkiu̱ún”.
