Raga̱jma̱ libro ndrígóo Crónicas 21:1-20
21 Ikhú Jehosafat ndiyáa jxu̱u̱ʼ gajmíi̱n wajin xiʼñúuʼ, nijuiʼdi̱i̱ gajmíi̱n ikhiin náa Xuajñuu David, ga̱jma̱a̱ a̱ʼdióo bi̱ mbiʼyuu Jehoram ni̱jkha̱nú ninindxu̱u̱ nuxi̱i̱ʼ rey.
2 A̱ngui̱i̱n Jehoram, e̱ji̱i̱n Jehosafat, ninindxu̱ún, Azarías, Jehiel, Zacarías, Azarías, Miguel ga̱jma̱a̱ Sefatías, xúgíinʼ ikhiin ninindxu̱ún e̱ji̱i̱n Jehosafat rey ndrígóo Israel.
3 Anu̱ún* nixnún mbaʼa regalo dí niguma ga̱jma̱a̱ plata ma̱ngaa dí niguma ga̱jma̱a̱ oro, xúʼko̱ má mbaʼa dí gíʼdoo numuu, ma̱ngaa xuajin dí kúgumaʼá dí rígá náa Judá, mú dí naʼtáñajunʼ nixnúu Jehoram, numuu dí ikhaa nindxu̱u̱ a̱ʼdá giʼnii.
4 Índo̱ Jehoram nigruigúu dí naʼtáñajunʼ anu̱u̱, nigudíin mbá xúgíinʼ a̱ngui̱i̱n ga̱jma̱a̱ espada, ma̱ngaa tikhuun príncipes bi̱ kúwá náa Israel mu maguanúu ga̱jma̱a̱ dí naʼtáñajunʼ.
5 Jehoram gíʼdoo 32 tsiguuʼ índo̱ ni̱jkha̱nú ninindxu̱u̱ rey, niʼtáñajunʼ mbá migiñuʼ tsiguʼ náa Jerusalén.
6 Niʼni ikháá má xóo nini̱ reyes bi̱ nikúwá náa Israel, xó má nini̱ bi̱ nikúwá náa goʼwóo Acab, numuu rí ndiyáa wáxióo* Acab. Niʼni dí ra̱májánʼ náa iduu Jeobá.
7 Mú Jeobá na̱nguá nindoo gáʼni gámbíin bi̱ kúwá náa goʼwóo David ga̱jma̱a̱ numuu dí nimbánuu ga̱jma̱a̱ David, numuu dí nixná ajngóo dí marigá má xúʼko̱ mbá lámpara náa ikhaa, ma̱ngaa náa e̱ji̱i̱n asndu kámuu.
8 Nákha mbiʼi dí niʼtáñajunʼ Jehoram, xa̱bu̱ Edom nixujximíjna̱ náa inún xa̱bu̱ Judá, ga̱jma̱a̱ nithi dí nandiún mbáa rey.
9 Ikha jngóo Jehoram nikidaa ikhí gajmíi̱n bi̱ nutañajúúnʼ soldado ndrígóo ga̱jma̱a̱ mbá xúgíʼ cárriu̱u̱. Nitu̱jxu̱u̱ mbruʼun ga̱jma̱a̱ niʼngo̱o̱ niʼni gajmíi̱n xa̱bu̱ Edom bi̱ niruguama̱ʼa̱a̱n ikhaa gajmíi̱n bi̱ nutañajúúnʼ bi̱ nagún kudúún carros.
10 Mú dí nikujximínáʼ Edom náa Judá xúʼko̱ má eni̱ asndu dí mbiʼi xúgi̱. Ma̱ngaa nákha mbiʼi rúʼko̱ Libná nikujximínáʼ, numuu dí ikhaa niniñuuʼ Jeobá Dios ndrígu̱ún wajin xiʼñúuʼ.
11 Ikhaa ma̱ngaa niʼni rí mitsídánʼ náa kúbá Judá mu maʼni dí xa̱bu̱ Jerusalén xáguájun jmbu índo̱ ndiyamajkhún eʼwíinʼ dioses, niʼni dí matsígu̱u̱nʼ xa̱bu̱ Judá.
12 Nda̱wa̱á ni̱ʼkha̱nú náa inuu mbá ajngáa dí niʼnirámáʼ profeta* Elías, dí naʼthí: “Rígi̱ dí naʼthí Jeobá, Dios ndrígóo wajin xiʼñáaʼ David: ‹Ikháán na̱nguá nitani̱ xó má niʼni ana̱a̱ʼ Jehosafat ni má xóo niʼni Asá rey Judá.
13 Ikháán natani̱ xó má eni̱ reyes bi̱ kúwá náa Israel, natani̱ dí xa̱bu̱ Judá ga̱jma̱a̱ xa̱bu̱ Jerusalén xáguájun jmbu índo̱ nduyamajkhún eʼwíinʼ dioses xó má nini̱ bi̱ nikúwá náa goʼwóo Acab. Asndu niradíin a̱ngia̱a̱nʼ bi̱ kúwá náa goʼwóo ana̱a̱ʼ bi̱ itháan míjíinʼ ki xóo ikháán.
14 Ikha jngóo Jeobá maʼni dí mamínuuʼ xuajñaanʼ, e̱jña̱a̱ʼ, gu̱ʼya̱a̱ʼ ga̱jma̱a̱ xúgíʼ dí xtaʼdáá.
15 Ma̱ngaa matamíniiʼ ga̱jma̱a̱ mbaʼa nandii, asndu mbá nandii dí maraʼdáá náa chámbáaʼ, dí maʼga raʼniaaʼ itháan gakhi̱i̱ mámbá mbiʼi asndu magajnúu chámbáaʼ gáʼni nandii rúʼko̱›”.
16 Ikhú Jeobá niʼni dí filisteos* ga̱jma̱a̱ árabes bi̱ kúwá mijngii náa kúwá etíopes muxmijná gajmiún Jehoram.
17 Ikha jngóo nitu̱ʼu̱u̱n ga̱jma̱a̱ tsiaki̱i̱ nixmijná gajmiún xa̱bu̱ Judá. Nigún kudúún mbá xúgíʼ dí nixkamaa náa goʼwóo* rey, nigún kudiin e̱ji̱i̱n ga̱jma̱a̱ gu̱ʼwi̱i̱, mbawíí a̱ʼdióo bi̱ gi̱ʼtha̱á bi̱ mbiʼyuu Jehoacaz* niguanúu.
18 Nda̱wa̱á, Jeobá niʼni dí mamínuuʼ Jehoram ga̱jma̱a̱ mbá nandii rí nándáa thanuu náa chámbóo.
19 Nguáthá mba̱yu̱u̱ʼ nda̱wa̱á, índo̱ niʼni a̱jma̱ tsiguʼ kañiiʼ, nigájnuu chámbóo niʼni nandii rúʼko̱, ra̱ʼkhá tháán nimínuuʼ niʼni nandii rúʼko̱ asndu nikháñuu. Ga̱jma̱a̱ xa̱bu̱ xuajñuu túgíʼ mbá aguʼ xó má nigíʼ índo̱ nikháñún wajin xiʼñúuʼ.
20 Gíʼdoo 32 tsiguuʼ índo̱ ni̱jkha̱nú ninindxu̱u̱ rey, niʼtáñajunʼ mbá migiñuʼ tsiguʼ náa Jerusalén. Índo̱ nikháñúu nimbáa táxtáa ngíná. Nidi̱i̱ náa Xuajñuu David, mú na̱nguá nidi̱i̱ náa nijuiʼdi̱ín reyes.
Mbaʼa nota
^ O “tátiu̱ún”.
^ O “a̱ʼdée dxáʼgú”.
^ O “gaʼyee, bi̱ naʼthí dí marigá”.
^ Náa ajngáa hebreo naʼthí, “espíritu ndrígu̱ún filisteos”.
^ O “náa naʼtáñajunʼ”.
^ Ma̱ngaa mbiʼyuu Ocozías.
