Raga̱jma̱ libro ndrígóo Crónicas 22:1-12
22 Xa̱bu̱ Jerusalén nigíiʼ Ocozías a̱ʼdióo Jehoram bi̱ gi̱ʼta̱ mu mani̱ndxu̱u̱ rey xóo xtiʼkhuu anu̱u̱,* numuu dí mbá grupo kuʼwáʼ niguwáʼ náa gríguiin gajmiún árabes niradíin mbá xúgíinʼ e̱ji̱i̱n rey bi̱ giʼnuu. Ikha jngóo Ocozías a̱ʼdióo Jehoram nigíʼdúu niʼtáñajunʼ xóo rey náa Judá.
2 Ocozías gíʼdoo 22 tsiguuʼ índo̱ ni̱jkha̱nú ninindxu̱u̱ rey, niʼtáñajunʼ mbá tsiguʼ náa Jerusalén. Ru̱dúu̱* nigumbiʼyuu Atalía, a̱ʼdá xíñíiʼ* Omrí.
3 Ikhaa ma̱ngaa niʼni xó má nini̱ bi̱ nikúwá náa goʼwóo Acab, numuu dí ru̱dúu̱ naʼthúu̱n maʼni dí ra̱májánʼ.
4 Niʼni dí ra̱májánʼ náa iduu Jeobá, xó má nini̱ bi̱ nikúwá náa goʼwóo Acab, numuu dí ikhiin niguánú ninindxu̱ún bi̱ nixnáá consejo índo̱ nikháñúu anu̱u̱, rúʼko̱ ni̱jkha̱ kayáa magíʼnuu gamiéjunʼ.
5 Ga̱jma̱a̱ numuu dí niʼdxawuun consejo dí nixnáá, ikhaa ni̱jkha̱ ga̱jma̱a̱ Jehoram a̱ʼdióo Acab rey ndrígóo Israel mu maxmína̱ʼ ga̱jma̱a̱ Hazael rey bi̱ xtáa náa Siria náa Ramot-Galaad, náa bi̱ kuda xkamídá nini̱ gawíínʼ Jehoram.
6 Jehoram nitanga̱a̱ náa Jezreel mu maʼni̱i̱ náa dí nini̱ gawíínʼ xa̱bu̱ sirios náa Ramá, índo̱ ni̱jkha̱ gáxmína̱ʼ ga̱jma̱a̱ rey Hazael bi̱ xtáa náa Siria.
Numuu dí Jehoram a̱ʼdióo Acab nigawúunʼ,* Ocozías* a̱ʼdióo Jehoram, rey bi̱ xtáa náa Judá, nigajtaa gáʼyoo náa Jezreel.
7 Mú índo̱ Jehoram ni̱jkha̱ gáʼyoo, Dios niʼni dí Ocozías magíʼnuu mbá gamiéjunʼ. Índo̱ ni̱jkha̱nú ikhí nigájnuu ga̱jma̱a̱ Jehoram mu magún gútsijníí Jehú a̱ʼdá xíñíiʼ* Nimsí, bi̱ Jeobá niraʼwíi mu maʼni gámbíin bi̱ kúwá náa goʼwóo Acab.
8 Índo̱ Jehú nigíʼdúu maʼni gámbíin bi̱ kúwá náa goʼwóo Acab, nixkamiin príncipes bi̱ kúwá náa Judá ga̱jma̱a̱ e̱jñu̱ún a̱ngui̱i̱n Ocozías, xa̱bi̱i̱* Ocozías, nigudíin.
9 Nda̱wa̱á ndiyáaʼ Ocozías. Nirtuwiin náa Samaria náa nirkaʼwuminaʼ, niguwáa̱nʼ kuya̱a̱ náa Jehú ga̱jma̱a̱ ikhí nixiyáa. Nda̱wa̱á nidi̱i̱, numuu dí nithi: “Nindxu̱u̱ a̱ʼdá xíñíiʼ Jehosafat, bi̱ ndiyáaʼ Jeobá ga̱jma̱a̱ xúgíʼ a̱jkiu̱u̱n”. Ndawa̱a̱ nimbáa náa goʼwóo Ocozías bi̱ magruigúu dí naʼtáñajunʼ.
10 Índo̱ Atalía ru̱dúu̱ Ocozías ndiʼyoo rí nikháñuu a̱ʼdióo, ikhú niʼni gámbíin mbá xúgíinʼ bi̱ naguwáʼ* náa goʼwóoʼ Judá.
11 Mú Jehosabeat wáxióo* rey, ni̱jkha̱ kayáa ngu̱ʼwa̱á Jehoás a̱ʼdióo Ocozías ga̱jma̱a̱ niʼni wájíiʼ náa eʼwíinʼ e̱ji̱i̱n rey bi̱ muradíin. Nirkaʼwii ga̱jma̱a̱ a̱ʼgu̱ bi̱ nañewu̱u̱n náa cuarto dí nunuʼ. Jehosabeat wáxióo rey Jehoram (nindxu̱u̱ a̱ʼgiu̱u̱ ndxajkun Jehoiadá ga̱jma̱a̱ ndxájuu Ocozías) niʼngo̱o̱ niʼni dí xáxkamaa Atalía ga̱jma̱a̱ na̱nguá nixíyáa.
12 Jehoás nixtáa ngo̱ʼo̱o̱ gajmíi̱n ikhiin náa goʼwóo Dios bi̱ gajkhun mbá majun tsiguʼ, índo̱ Atalía xtáa raʼtáñajunʼ náa xuajin.
Mbaʼa nota
^ O “tátée”.
^ O “nánée”.
^ Náa ajngáa hebreo naʼthí, “wáxióo”.
^ O “naʼniuu nandii”.
^ Náa tikhuu i̱yi̱i̱ʼ dí nigurámáʼ náa ajngáa hebreo naʼthí, “Azarías”.
^ Náa ajngáa hebreo naʼthí, “a̱ʼdióo”.
^ O “bi̱ numbayíí”.
^ Náa ajngáa hebreo naʼthí, “mbá xúgíinʼ bi̱ kaʼñúún mutañajunʼ”.
^ O “a̱ʼdée dxáʼgú”.
