Raga̱jma̱ libro ndrígóo Crónicas 23:1-21
23 Índo̱ niʼni juwan tsiguʼ, Jehoiadá ndiyáa tsiaki̱i̱ ga̱jma̱a̱ nimbánuminaʼ gajmíi̱n bi̱ kuya̱ edxu̱u̱ náa mbá cien, xóo muʼthá, ga̱jma̱a̱ Azarías a̱ʼdióo Jeroham, Ismael a̱ʼdióo Jehohanán, Azarías a̱ʼdióo Obed, Maaseya a̱ʼdióo Adaya ga̱jma̱a̱ Elisafat a̱ʼdióo Zicrí.
2 Nda̱wa̱á nigún náa mbá xúgíʼ Judá ga̱jma̱a̱ nigimbíin levitas bi̱ kúwá náa xúgíʼ xuajin dí rígá náa Judá, ga̱jma̱a̱ bi̱ kuya̱ edxu̱u̱ náa mámbá guʼwíin xa̱bu̱ bi̱ kúwá náa Israel. Índo̱ niguánú náa Jerusalén,
3 xúgíinʼ bi̱ nigimbíin nimbánúún gajmiún rey náa goʼwóo Dios bi̱ gajkhun. Nda̱wa̱á Jehoiadá, niʼthún:
“¡Gu̱ya̱a̱la! A̱ʼdióo rey maʼtáñajunʼ, xó má dí Jeobá nikudaminaʼ maʼni náa e̱ji̱i̱n David.
4 Rígi̱ dí gíʼmaa mu̱nila: Mawiʼtiin mbá ajtsú grupo ndxajkun ga̱jma̱a̱ levitas bi̱ nuñejunʼ sábado muguajún náa xkrugua,
5 bi̱ raga̱jma̱ grupo makuwá náa goʼwóo* rey, ga̱jma̱a̱ bi̱ maʼni ragajtsú grupo makuwá náa Xkrugoo guʼwá náa nduyamajkuíí Dios,* ga̱jma̱a̱ mbá xúgíinʼ xa̱bu̱ xuajin makuwá náa rexo̱o̱ goʼwóo Jeobá.
6 Xúniʼñáánʼ dí mato̱ʼo̱o̱ nimbáa náa goʼwóo Jeobá, i̱ndó ndxajkun ga̱jma̱a̱ levitas bi̱ kúwíin runi̱ ñajunʼ. Ikhiin ma̱ndoo matu̱ʼu̱u̱n numuu dí mikaʼwiin, ga̱jma̱a̱ mbá xúgíinʼ xa̱bu̱ xuajin munimbaníí ñajunʼ dí gíʼmaa muni̱ náa Jeobá.
7 Levitas muruguama̱ʼa̱a̱n rey, mámbáa gáyá aju̱u̱nʼ. Asndu tsáá xa̱bíi̱ bi̱ gáʼniminaʼ mato̱ʼo̱o̱ náa guʼwá mbaʼyóoʼ dí makhañúu. Gaʼgua gajmiála rey asndu náá má gáʼga”.*
8 Levitas ga̱jma̱a̱ mbá xúgíinʼ xa̱bu̱ Judá nini̱ ikháá kayuuʼ xó má niʼtáñajúúnʼ ndxajkun Jehoiadá. Mámbáa nigímbíin xa̱bi̱i̱, bi̱ nuñejunʼ mbiʼi sábado xúʼko̱ má bi̱ tsíñajunʼ dí mbiʼi sábado, numuu dí ndxajkun Jehoiadá tániñúúnʼ rí ndxajkun muniña̱a̱ʼ ñajunʼ dí nuni̱.
9 Ikhú ndxajkun Jehoiadá nixnún bi̱ kuya̱ edxu̱u̱ náa mbá cien, kudú,* escudo dí majkhaʼ* ga̱jma̱a̱ escudo rí dijndi dí nigiʼdoo David dí rígá náa goʼwóo Dios bi̱ gajkhun.
10 Niʼni dí muguajún xúgíinʼ xa̱bu̱, mámbáa niguajthun aju̱u̱nʼ, nigi̱ʼdi̱i̱ niguájun náa ñawún májánʼ asndu náa ñawún xti̱ʼ náa mijngii nutsikarámáʼ tsigijñaʼ, náa mijngii guʼwá, niruguama̱ʼa̱a̱n mbá kayuuʼ rey.
11 Ikhú niriya̱a̱ʼ a̱ʼdióo rey ga̱jma̱a̱ nigrigu corona edxu̱u̱ ma̱ngaa nixujxi̱ náa edxu̱u̱ rollo náa na̱ʼkha̱ Xtángoo. Nigíiʼ rey, Jehoiadá gajmíi̱n e̱ji̱i̱n nisngatra̱ma̱ʼ aceite náa edxu̱u̱. Ikhú nithi: “¡Gaguma mba̱a̱ rey!”.
12 Índo̱ Atalía niʼdxawuun dí nagáñún xa̱bu̱ ga̱jma̱a̱ nagún runi̱ mba̱a̱ rey, ikhú mbá nacha̱ ni̱jkha̱ gáʼñúún xa̱bu̱ bi̱ kúwá náa goʼwóo Jeobá.
13 Índo̱ ndiʼyoo dí wíji̱ rey náa mijngii rajkhúu guʼwá. Príncipes ga̱jma̱a̱ bi̱ nundiyííʼ trompeta wájun gajmiún rey, mbá xúgíinʼ xa̱bu̱ xuajin kúwá gagi ga̱jma̱a̱ nundiyííʼ trompeta. Bi̱ nuni̱ ajmúú ga̱jma̱a̱ ajua̱nʼ kúwá ruxnún ikha bi̱ nuni̱ ajmúú. Ikhú mbá nacha̱ Atalía nixkuʼtu xtíñuu ga̱jma̱a̱ nindxa̱ʼwá: “¡Nininduwúnla! ¡Nininduwúnla!”.
14 Mú ndxajkun Jehoiadá niʼni dí magajnún bi̱ kuya̱ edxu̱u̱ náa mbá cien, bi̱ nutañajúúnʼ soldado, ga̱jma̱a̱ niʼthún: “¡Guríya̱a̱la náa kuajún, á mu mbáa na̱jkha̱ kidxuuʼ, guxíyáala ga̱jma̱a̱ espada!”. Numuu rí ndxajkun niʼthí: “Xúxíyáa náa goʼwóo Jeobá”.
15 Ikha jngóo nirugua̱a̱, ga̱jma̱a̱ índo̱ niguáʼnú náa xkrugún wáyú dí rígá náa goʼwóo rey, ikhí nixiyáa.
16 Ikhú Jehoiadá nimbánuminaʼ ga̱jma̱a̱ Dios ma̱ngaa xúgíinʼ xa̱bu̱ xuajin ga̱jma̱a̱ rey, náa rí nixudamíjna̱ dí mani̱ndxu̱ún má xúʼko̱ xuajñuu Jeobá.
17 Nda̱wa̱á dí rúʼko̱, xúgíinʼ xa̱bu̱ xuajin nigún náa guʼwá rí nduyamajkuíí Baal. Nini̱ gámbáa náa nutsikarámáʼ tsigijñaʼ ma̱ngaa nini̱ gámbíin xándú bi̱ kúwá ikhí, ga̱jma̱a̱ náa inuu dí nutsikarámáʼ tsigijñaʼ, nixiyáa Matán, ndxajkiun Baal.
18 Ikhú Jehoiadá nixnún ndxajkun ga̱jma̱a̱ levitas dí muñewa̱a̱n goʼwóo Jeobá, bi̱ David nigruigi̱i̱n náa mámbá grupo mu muñejunʼ náa goʼwóo Jeobá, muxnajxi̱ tsigijñaʼ gamajkhu dí nakarámáʼ náa inuu Jeobá xó má kiʼnirámáʼ náa Xtángoo ndrígóo Moisés, muni̱ ga̱jma̱a̱ gagi ma̱ngaa ga̱jma̱a̱ ajmúú, xó má nikuʼmiin muni̱ David.
19 Ma̱ngaa nixnún muguajún náa xkrugoo goʼwóo Jeobá, mu xúʼko̱ xúniña̱a̱n mato̱ʼo̱o̱ nimbáa bi̱ na̱nguá kaʼwii.
20 Nda̱wa̱á nigímbíin bi̱ kuya̱ edxu̱u̱ náa mbá cien, bi̱ guáʼdáá numún, xa̱bu̱ ñajunʼ bi̱ kúwá náa xuajin ga̱jma̱a̱ mbá xúgíinʼ xa̱bu̱ xuajin, ni̱jkha̱ kayáa rey ma̱ngaa nigajtaa ga̱jma̱a̱ asndu náa goʼwóo Jeobá. Ikhú ninújngún náa xkrugua dí mba̱a̱ mu magún náa goʼwóo rey ga̱jma̱a̱ nigíiʼ rey náa xíliu̱u̱* dí maʼtáñajunʼ.
21 Xúgíinʼ xa̱bu̱ xuajin ra̱ʼkhá tháán nidxúún ga̱jma̱a̱ nirígá dí tsímáá náa xuajin, numuu dí nixiyáa Atalía ga̱jma̱a̱ espada.
Mbaʼa nota
^ O “náa naʼtáñajunʼ”.
^ O “Puerta del Fundamento”.
^ Náa ajngáa hebreo naʼthí, “índo̱ nagájnuu ga̱jma̱a̱ índo̱ nato̱ʼo̱o̱”.
^ O “lanza”.
^ Nindxu̱u̱ escudo majkhaʼ dí najmún bi̱ kuda xkamídá.
^ O “trono”.
