Raga̱jma̱ libro ndrígóo Crónicas 24:1-27
24 Jehoás gíʼdoo juwan tsiguuʼ índo̱ ni̱jkha̱nú ninindxu̱u̱ rey ga̱jma̱a̱ niʼtáñajunʼ mbá 40 tsiguʼ náa Jerusalén. Ru̱dúu̱* nigumbiʼyuu Zibíah bi̱ na̱ʼkha̱ náa Beer-Seba.
2 Jehoás niʼni dí májánʼ náa iduu Jeobá náa mbá xúgíʼ mbiʼi dí nixtáa ndxajkun Jehoiadá.
3 Jehoiadá ndiñíinʼ a̱jmi̱i̱n gu̱ʼwi̱i̱ Jehoás, ni̱jkha̱nú nigiʼdiin e̱ji̱i̱n jiámá ga̱jma̱a̱ wa̱ʼxa̱ʼ.*
4 Nda̱wa̱á, Jehoás nigájnuu náa a̱jkiu̱u̱n dí maʼni májáanʼ goʼwóo Jeobá.
5 Ikhú nigímbíin mbá xúgíinʼ ndxajkun ga̱jma̱a̱ levitas, niʼthún: “Aʼguala náa xuajin dí rígá náa Judá ga̱jma̱a̱ gugímbóó mbújkha̱a̱ dí muxna xúgíinʼ xa̱bu̱ Israel mu maguma májáanʼ ga̱jma̱a̱ goʼwóo Dios ndrígala mámbá tsiguʼ, gu̱ni̱ mbá nacha̱”. Mú levitas na̱nguá nini̱ nacha̱.
6 Ikha jngóo rey nindxaʼóo Jehoiadá ndxajkun bi̱ kayá edxu̱u̱, niʼthúu̱n: “Náá numuu rí tsétani̱ dí levitas maguwáʼ kudúún náa Judá ga̱jma̱a̱ náa Jerusalén rí makhánáá Dios dí nindxu̱u̱ mitsúʼkháan xó má niʼtáñajunʼ Moisés, xa̱bi̱i̱ Jeobá, rí makhánáá Dios dí nindxu̱u̱ mitsúʼkháan dí muxna xa̱bu̱ Israel bi̱ gágimbíin mu majmaa náa guʼwá xtíin dí nimbánuu rá.
7 E̱ji̱i̱n Atalía, a̱ʼgú xkawiiʼ buʼko̱, nitu̱ʼu̱u̱n ga̱jma̱a̱ tsiaki̱i̱ náa goʼwóo Dios bi̱ gajkhun, nijmún mbá xúgíʼ rí kaʼwu dí rígá náa goʼwóo Jeobá mu mbuyamajkún Baal”.
8 Ikhú nini̱ xó má niʼthún rey, nini̱ mbá caja ga̱jma̱a̱ nigrigu náa kidxuuʼ goʼwóo Jeobá.
9 Nda̱wa̱á dí rúʼko̱, nithúún mbá xúgíinʼ xa̱bu̱ Judá ga̱jma̱a̱ xa̱bu̱ Jerusalén dí ndayóoʼ maguwáʼ kudúún dí makhánáá Jeobá dí nindxu̱u̱ mitsúʼkháan, dí Moisés xa̱bi̱i̱ Dios bi̱ gajkhun nigíʼ awan muni̱ xa̱bu̱ Israel náa ku̱ba̱ʼ mijxooʼ.*
10 Mbá xúgíinʼ xa̱bu̱ xuajin ga̱jma̱a̱ príncipes ra̱ʼkhá tháán nidxúún. Niguwáʼ kudúún mbújkha̱a̱, nidri̱ya̱ʼ náa caja dí asndu nijtííʼ.*
11 Índo̱ levitas niguwáa̱nʼ ku̱ñu̱u̱n caja mu muxnajxi̱i̱ náa rey ndiyáá dí kajtííʼ mbújkha̱a̱, ikhú secretario ndrígóo rey ga̱jma̱a̱ bi̱ nambáyúu ndxajkun bi̱ kayá edxu̱u̱ nurawíi mbújkha̱a̱ náa caja ga̱jma̱a̱ natangiín nugri̱gu̱u̱ má náa grígu. Xígi̱ kaʼnii eni̱ xúgíʼ mbiʼi, ra̱ʼkhá tháán mba̱a̱ mbújkha̱a̱ nigimbóó.
12 Ikhú rey ga̱jma̱a̱ Jehoiadá nuxnún mbújkha̱a̱ bi̱ nduyáá xóo ejkha̱ ñajunʼ náa goʼwóo Jeobá, ikhiin nuriji̱i̱n bi̱ nuxui̱ʼta̱ itsí ga̱jma̱a̱ ñumbáá muni̱ májáanʼ goʼwóo Jeobá, mangiin bi̱ nuñejunʼ ga̱jma̱a̱ hierro ma̱ngaa cobre mu muni̱ májáanʼ goʼwóo Jeobá.
13 Bi̱ nduyáá xóo maguma ñajunʼ, nigi̱ʼdi̱i̱ niñejunʼ, ikhiin nixna ikha mu maguma májáanʼ má xúʼko̱ guʼwá. Nini̱ májáanʼ goʼwóo Dios bi̱ gajkhun xó má nákha ginii, nini̱i̱ májánʼ.
14 Índo̱ niguámbu̱u̱n niñejunʼ, niguwáánʼ kudúún mbújkha̱a̱ dí nipíduunʼ náa rey ga̱jma̱a̱ náa Jehoiadá, nijmún mu muni̱ ga̱jma̱a̱ dí majmaa náa goʼwóo Jeobá: Mbá xúgíʼ dí majmaa náa ñajunʼ ga̱jma̱a̱ dí majmaa náa majuixnájxi̱ tsigijñaʼ, xó má copas ga̱jma̱a̱ i̱ʼwáʼ dí niguma ga̱jma̱a̱ oro ma̱ngaa plata. Náa mbá xúgíʼ mbiʼi dí nixtáa Jehoiadá, nijuixnájxi̱ má xúʼko̱ tsigijñaʼ dí nakarámáʼ náa goʼwóo Jeobá.
15 Nikhi̱i̱ Jehoiadá nikháñúu, nixtáa mba̱yu̱u̱ʼ ga̱jma̱a̱ gagi:* Gíʼdoo 130 tsiguuʼ índo̱ nikháñúu.
16 Nidi̱i̱ náa Xuajñuu David náa nijuiʼdi̱ín reyes, numuu dí ikhaa niʼni dí májánʼ náa Israel, ma̱ngaa ga̱jma̱a̱ numuu dí niʼni náa Dios bi̱ gajkhun ga̱jma̱a̱ náa goʼwóo.
17 Nda̱wa̱á dí nikháñúu Jehoiadá, niguwáʼ príncipes bi̱ kúwá náa Judá nismbati̱gu̱u̱n náa inuu rey, ga̱jma̱a̱ rey niʼdxawún.
18 Niniña̱a̱nʼ goʼwóo Jeobá, Dios ndrígu̱ún wajin xiʼñúúnʼ, nigi̱ʼdi̱i̱ ndiyamajkuíí postes rí mitsúʼkháan* ga̱jma̱a̱ xándú, aʼkhá dí nuxudamíjna̱ niʼni dí Dios makásngañu̱u̱ʼ kaʼñún xa̱bu̱ Judá ga̱jma̱a̱ xa̱bu̱ Jerusalén.
19 Ikhaa nakuʼmiin má xúʼko̱ profetas mu mumbañún matangi̱ín náa Jeobá. Nutamuʼúún, mú ikhiin tsíñún gúdxawíín.
20 Espíritu ndrígóo Dios nirígá* náa Zacarías a̱ʼdióo ndxajkun Jehoiadá. Ikhaa nifrigu náa dí itháan mitsídánʼ náa kúwá xa̱bu̱ xuajin, niʼthún: “Rígi̱ dí naʼthí Dios bi̱ gajkhun: ‹Náá numuu dí tsénimbala kiʼtáñajunʼ ndrígóo Jeobá rá. ¡Nda̱a̱ dí gákánala dí xúʼko̱ e̱ni̱! Ikháanʼ niniʼñáánʼ Jeobá, ikha jngóo ma̱ngaa maniñala›”.
21 Mú niri̱ya̱ʼ awan dí muni̱i̱, nixiyáa ga̱jma̱a̱ itsí náa rexo̱o̱ goʼwóo Jeobá xó má niʼtáñajúúnʼ muni̱ rey.
22 Rey Jehoás na̱nguá nirmáʼáan a̱jkiu̱u̱n xú káʼnii Jehoiadá nindoo kaʼyoo,* anu̱u̱* ikhaa,* nixíyáa a̱ʼdióo, bi̱ niʼthí ajngáa rígi̱ índo̱ na̱jkha̱ rakáñuu: “Jeobá gáʼyoo ga̱jma̱a̱ manda̱ʼa̱a̱ cuenta”.
23 Índo̱ ndayáa tsiguʼ, soldado sirios nigún gúxmijná gajmiún Jehoás. Nitu̱ʼu̱u̱n náa Judá ga̱jma̱a̱ náa Jerusalén, nda̱wa̱á niradíin mbá xúgíinʼ príncipes bi̱ kúwá náa xuajin ga̱jma̱a̱ nixuʼma xúgíʼ dí niguanáa náa rey bi̱ xtáa náa Damasco.
24 Maski ajndu soldado sirios bi̱ nitu̱ʼu̱u̱n náa xuajñún na̱nguá mbaʼin, mú Jeobá nixnájxi̱i̱n soldado bi̱ mbaʼin bugi̱ náa ñawúúnʼ, numuu dí xa̱bu̱ xuajin niniña̱a̱nʼ Jeobá, Dios ndrígu̱ún wajin xiʼñúúnʼ, ikhiin* ninimbaníí dí nijuiʼthá magíʼnuu Jehoás.
25 Índo̱ nigúun, ra̱ʼkhá tháán nini̱ kámbi̱yi̱i̱ʼ, xa̱bi̱i̱ má niri̱ya̱ʼ awan dí muni̱i̱, numuu dí nigudíin e̱ji̱i̱n* ndxajkun Jehoiadá. Náa xia̱wuu má kaʼmáaʼ nixiyáa. Xúʼko̱ nikháñúu ga̱jma̱a̱ nidi̱i̱ náa Xuajñuu David, mú raʼkháa náa nijuiʼdi̱ín reyes.
26 Bugi̱ ninindxu̱ún bi̱ niri̱ya̱ʼ awan dí muni̱i̱: Zabad a̱ʼdióo Simeat xa̱bu̱ ammonita ga̱jma̱a̱ Jehozabad a̱ʼdióo Simrit xa̱bu̱ moabita.
27 Xúgíʼ dí naʼthí ga̱jma̱a̱ numún e̱ji̱i̱n, dí nijuiʼthá magíʼnuu, ma̱ngaa xóo niguma májáanʼ* goʼwóo Dios bi̱ gajkhun, kiʼniraʼmáʼ náa Libro dí naʼthí ga̱jma̱a̱ numún Reyes, ga̱jma̱a̱ a̱ʼdióo bi̱ mbiʼyuu Amasías ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ O “nánée”.
^ O “i̱jín go̱ʼo̱”.
^ O “desierto”.
^ O mbáa “asndu índo̱ xúgíinʼ nixna”.
^ Náa ajngáa hebreo naʼthí, “nikhi̱i̱ ga̱jma̱a̱ mba̱yu̱u̱ʼ nixtáa”.
^ Náa ajngáa hebreo naʼthí, “niruguarámaaʼ”.
^ O “tátée”.
^ Xóo muʼthá, anu̱u̱ Zacarías.
^ Xóo muʼthá, sirios.
^ O “a̱ʼdióo”. Náa ajngáa hebreo naʼthí ga̱jma̱a̱ numún mbaʼin mu masngájma dí Zacarías gíʼdoo numuu, bi̱ nindxu̱u̱ profeta ga̱jma̱a̱ ndxajkun.
^ Náa ajngáa hebreo naʼthí, “niguma”.
