Raga̱jma̱ libro ndrígóo Crónicas 26:1-23
26 Ikhú xúgíinʼ xa̱bu̱ xuajin Judá nigi̱i̱ʼ rey Uzías nákhá ikhaa gíʼdoo 16 tsiguuʼ, mu maʼtáñajunʼ xtiʼkhuu anu̱u̱,* Amasías.
2 Ikhaa niʼni̱i̱ xuajin Elot, ga̱jma̱a̱ nirtanga̱a̱ xuajin Judá, nda̱wa̱á dí rey* ndiyáa jxu̱u̱ʼ gajmíi̱n wajin xiʼñúuʼ.
3 Uzías gíʼdoo 16 tsiguuʼ índo̱ ni̱jkha̱nú ninindxu̱u̱ rey ga̱jma̱a̱ niʼtáñajunʼ mbá 52 tsiguʼ náa Jerusalén. Ru̱dúu̱* nigumbiʼyuu Jecolías bi̱ na̱ʼkha̱ náa Jerusalén.
4 Ikhaa niʼni dí májánʼ náa iduu Jeobá, xó má niʼni anu̱u̱ Amasías.
5 Ndiyáaʼ Dios náa mbá xúgíʼ mbiʼi dí nixtáa Zacarías, bi̱ nimbáyúu mu mamiñúu kaʼyoo Dios bi̱ gajkhun. Índo̱ ikhaa ndiyáaʼ Jeobá, Dios bi̱ gajkhun niʼni magajnúu májánʼ dí naʼni.
6 Ni̱jkha̱ gáxmína̱ʼ gajmíi̱n filisteos ga̱jma̱a̱ niʼngo̱o̱ ninújngoo náa xtájtsí ndrígóo xuajin Gat, Jabné ga̱jma̱a̱ Asdod. Nda̱wa̱á niʼni xuajin náa mbaaʼ dí rígá náa Asdod ga̱jma̱a̱ náa mbañúúnʼ filisteos.
7 Dios bi̱ gajkhun nimbáyúu má xúʼko̱ índo̱ nixmínaʼ gajmíi̱n filisteos, árabes bi̱ kúwá náa Gurbaal mangiin meunim.
8 Ammonitas nigi̱ʼdi̱i̱ nini̱ numa náa inuu Uzías. Ikhaa ni̱jkha̱nú nigiʼdoo tsiaki̱i̱ ga̱jma̱a̱ niwán ri̱go̱o̱ numuu asndu náa Egipto.
9 Uzías ma̱ngaa niʼni torre náa Jerusalén náa mijngii Xkrugua dí rígá náa Esquina,* ga̱jma̱a̱ náa mijngii Xkrugua dí gíʼ xígií náa Mata,* náa mijngii rígá dí wájun kagu̱u̱ xtájtsí, niʼni dí maguajún jxa̱ʼ.
10 Ma̱ngaa niʼni torre náa ku̱ba̱ʼ mijxooʼ* ga̱jma̱a̱ niʼndii* mbaʼa iñáʼ (numuu dí gíʼdiin mbaʼin xedi̱) xúʼko̱ má niʼni náa Sefelá ga̱jma̱a̱ náa xkua̱. Gíʼdiin bi̱ nudu ga̱jma̱a̱ bi̱ nuñejunʼ náa kiʼdu ixi̱ uva, náa kúbá ga̱jma̱a̱ náa Carmelo, numuu dí ikhaa nanigu̱u̱ʼ maʼdu.
11 Uzías nigiʼdiin soldado bi̱ nikúwá xawii muxmijná. Nagájnún mámbá grupo mu magún gúxmijná. Hananías mbáa bi̱ nindxu̱u̱ príncipe náa rey niʼtáñajuunʼ secretario Jeiel ga̱jma̱a̱ Maaseya bi̱ kayá edxu̱u̱ náa bi̱ nuñewa̱a̱n, dí muraxnii ga̱jma̱a̱ mudra̱ma̱ʼ mbiʼñún.
12 Dí mbá xúgíinʼ bi̱ kuya̱ edxu̱u̱ náa mámbá guʼwíin xa̱bu̱ bi̱ nutañajúúnʼ soldado xkujiinʼ bugi̱, nindxu̱ún mbá 2,600.
13 Soldado bi̱ nutañajúúnʼ nindxu̱ún mbá 307,500 xa̱bekha bi̱ kúwá xawii magún gúxmijná, rey gíʼdiin soldado bi̱ xkujiinʼ bugi̱ mu muni̱ gajmiún xa̱bu̱ sia̱nʼ.
14 Uzías nixnún mbá xúgíinʼ soldado, escudos, kudú,* cascos, ajua̱nʼ dí nañewu̱u̱n tsu̱xtu̱ún, xkamídá ga̱jma̱a̱ itsí dí nudaʼ ga̱jma̱a̱ xkrájtsí.
15 Ma̱ngaa náa Jerusalén niʼni ajua̱nʼ dí muxmijná ga̱jma̱a̱ dí nini̱ ingenieros, nidra̱ma̱ʼ náa torre ga̱jma̱a̱ náa esquiniu̱u̱ xtájtsí, nuda̱ʼ ga̱jma̱a̱ flechas ma̱ngaa itsí mba̱ʼu̱. Xúʼko̱ niʼni dí numuu mawárígo̱o̱ asndu náá, numuu dí ra̱ʼkhá tháán nimbayíí ga̱jma̱a̱ nigiʼdoo tsiaki̱i̱.
16 Mú índo̱ ni̱jkha̱nú nigiʼdoo tsiaki̱i̱ niʼnimbamínáʼ, ikhaa má ndiyáʼ gamiéjunʼ dí magíʼnuu, tánindxu̱u̱ jmbii náa Jeobá Dios ndrígóo, numuu dí nito̱ʼo̱o̱ náa guʼwá rí nduyamajkuíí Jeobá mu matsikhá rí ndataun.
17 Ndxajkun Azarías gajmíi̱n i̱mbá 80 ndxajkiun Jeobá bi̱ tsémiñún nitu̱ʼu̱u̱n mbá nacha̱ náa kidxuuʼ.
18 Nigiʼdu̱u̱n gajmiún rey Uzías ga̱jma̱a̱ nitháán: “¡Uzías, ikháán rakáʼyaaʼ matatsika rí ndataun náa inuu Jeobá! I̱ndó ndxajkun ma̱ndoo mutsi̱kha rí ndataun, numuu dí ikhiin naguwáʼ náa Aarón, bi̱ niguma kaʼwi̱i̱n. Agajnáaʼ, táriejún jmbu, ikha jngóo xátadrígu nimbá gamajkhu náa Jeobá Dios numuu dí xígi̱ nitani̱”.
19 Mú índo̱ Uzías kayá náa nakarámáʼ rí ndataun, nikásngañu̱u̱ʼ. Índo̱ ikhaa xtáa ragi̱ʼdu̱u̱ gajmíi̱n ndxajkun nikráʼáan nandii lepra* náa xkídooʼ, náa inún ndxajkun náa goʼwóo Jeobá náa níjniúu dí nakarámáʼ dí ndataun.
20 Índo̱ Azarías ndxajkun bi̱ kayá edxu̱u̱ ga̱jma̱a̱ mbá xúgíinʼ ndxajkun niyejxi̱i̱, ¡ndiyáá dí nikráʼáan nandii lepra náa xkídooʼ! Ikhú mbá nacha̱ niri̱ya̱a̱ʼ, ga̱jma̱a̱ ikhaa mbá nacha̱ má nigájnáa, numuu dí Jeobá niʼni gawúunʼ.
21 Rey Uzías nigiʼdoo nandii lepra asndu mbiʼi rí nikháñuu. Nixtáa náa mbá guʼwá wajíiʼ xó má mbáa bi̱ gíʼdoo nandii lepra, numuu dí nixkriya̱a̱ʼ náa goʼwóo Jeobá. A̱ʼdióo Jotán ni̱jkuáa ñawúunʼ dí mañewu̱u̱n guʼwá* ga̱jma̱a̱ naʼnimbánuu numún xa̱bu̱ xuajin.
22 Dí naʼthí xóó itháan ga̱jma̱a̱ numuu Uzías, xúgíʼ rí niʼni, niʼnirámáʼ profeta* Isaías a̱ʼdióo Amoz.
23 Ikhú Uzías ndiyáa jxu̱u̱ʼ gajmíi̱n wajin xiʼñúuʼ ga̱jma̱a̱ nidi̱i̱ náa nijuiʼdi̱ín wajin xiʼñúuʼ, mú náa mbaaʼ dí kaʼñún reyes, numuu dí nithi: “Nindxu̱u̱ mbáa bi̱ gíʼdoo nandii lepra”. Ikhú Jotán bi̱ nindxu̱u̱ a̱ʼdióo ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ O “tátée”.
^ Xóo muʼthá, anu̱u̱ Amasías.
^ O “nánée”.
^ O “Puerta de la Esquina”.
^ O “Puerta del Valle”.
^ O “desierto”.
^ O “niʼni iñúu”. Mbáa náa itsí.
^ O “lanza”.
^ O “náa naʼtáñajunʼ”.
^ O “gaʼyee, bi̱ naʼthí dí marigá”.
