Raga̱jma̱ libro ndrígóo Crónicas 28:1-27
28 Acaz gíʼdoo 20 tsiguuʼ índo̱ ni̱jkha̱nú ninindxu̱u̱ rey, niʼtáñajunʼ mbá 16 tsiguʼ náa Jerusalén. Na̱nguá niʼni dí májánʼ náa iduu Jeobá, xó má niʼni wajin xiʼñúuʼ David.
2 Ikhaa niʼni xó má nini̱ reyes bi̱ nikúwá náa Israel, niʼniwíi xtiʼkúún Baal ga̱jma̱a̱ ajua̱nʼ.*
3 Ma̱ngaa nirkúní tsigijñaʼ náa mata* A̱ʼdióo Hinón,* nixnájxi̱i̱n e̱ji̱i̱n náa aguʼ, ndiʼyaridoo xúgíʼ dí xkawiʼ xóo nini̱ xa̱bu̱ bi̱ Jeobá nixkawíin náa inún israelitas.
4 Ma̱ngaa naxnájxi̱ tsigijñaʼ ga̱jma̱a̱ narkúní náa rí mitsídánʼ, náa bíjní, náa mbá xúgíʼ agoo ixi̱ mba̱ʼu̱ rí maxaʼ.
5 Ikha jngóo, Jeobá Dios ndrígóo nixnájxi̱i̱ náa ñawúunʼ rey ndrígóo Siria bi̱ niʼngo̱o̱ niʼni ga̱jma̱a̱, ma̱ngaa ni̱jkha̱ kagui̱i̱n mbaʼin xa̱bu̱ náa Damasco. Ga̱jma̱a̱ nijuixnájxi̱i̱ náa ñawúunʼ rey ndrígóo Israel, bi̱ ra̱ʼkhá tháán mbaʼin nigudíin.
6 Kááʼ mbóó mbiʼi Pécah a̱ʼdióo Remalías nigudíin náa Judá mbá 120,000 xa̱bekha, xúgíinʼ ikhiin nindxu̱ún xa̱bekha bi̱ tsémiñún, nigíʼníí xígi̱ kaʼnii numuu dí niniña̱a̱nʼ Jeobá, Dios ndrígu̱ún wajin xiʼñúúnʼ.
7 Zicrí mbáa soldado efraimita, nixíyáa Maaseya a̱ʼdióo rey, ma̱ngaa nixíyáa Azricam bi̱ nañewu̱u̱n guʼwá náa nutañajunʼ, ga̱jma̱a̱ Elcaná bi̱ maʼni raga̱jmi̱i̱n xa̱bu̱ ñajunʼ bi̱ xtáa náa rey.
8 Israelitas nigún kudiin mbá 200,000 a̱ngiu̱ún, gu̱ʼu̱, jiámá ga̱jma̱a̱ wa̱ʼxa̱ʼ,* ra̱ʼkhá tháán mba̱a̱ dí niguanáa ga̱jma̱a̱ nigúun kudúún náa Samaria.
9 Mú mbáa profeta* ndrígóo Jeobá bi̱ mbiʼyuu Oded xtáa ikhí, nigájnuu gátsijnún soldado bi̱ niguwáánʼ Samaria. Niʼthún: “¡Ndu̱ya̱a̱la ráʼ! Jeobá, Dios ndrígu̱ún wajin xiʼñála, nikásnga̱ñu̱u̱nʼ kaʼñún xa̱bu̱ Judá, ikha jngóo nixnájxi̱i̱n náa ñawánla, ga̱jma̱a̱ ikháanʼ niradíin snga̱ñalaʼ dí ni̱jkha̱núu asndu mekhuíí.
10 Dí xúgi̱, ikháanʼla nandala dí xa̱bu̱ Judá ga̱jma̱a̱ xa̱bu̱ Jerusalén mani̱ndxu̱ún xa̱bia̱la. Lá raʼkháa mangáanʼ kuaʼdáá aʼkhála náa Jeobá Dios ndrígala ráʼ.
11 Gudxawunʼla ga̱jma̱a̱ guʼgua̱a̱ʼ kudiin a̱ngia̱la bi̱ niguwaʼ kudiin, numuu dí Jeobá nakásngañu̱u̱ʼ kaʼyala”.
12 Ikhú tikhuun bi̱ nutañajúúnʼ efraimitas, Azarías a̱ʼdióo Jehohanán, Berekías a̱ʼdióo Mesilemot, Jehizquías a̱ʼdióo Salum ga̱jma̱a̱ Amasá a̱ʼdióo Hadlái, nigiʼdu̱u̱n gajmiún bi̱ niguwáánʼ náa nigún gúxmijná.
13 Nithúún: “Xáguwa̱a̱ʼ kudiin gi̱i̱, numuu dí rúʼko̱ maʼni dí muguáʼdáá aʼkhúlú náa Jeobá. Ikháanʼ nandala dí mbajoo aʼkhá ndrígúlú ga̱jma̱a̱ dí nakiéʼkulu, numuu dí mba̱a̱ má dí nakiéʼkulu, ga̱jma̱a̱ Dios ra̱ʼkhá tháán ekásnga̱ñu̱u̱ʼ kaʼyoo Israel”.
14 Ikha jngóo soldado nixnajxi̱ín náa príncipes ga̱jma̱a̱ náa xa̱bu̱ bi̱ nigimbíin bi̱ nigún kudiin, ma̱ngaa dí nigún kudúún.
15 Ikhú xa̱bekha bi̱ nixtaʼwíin ga̱jma̱a̱ mbiʼñún nigúun kudiin bi̱ ni̱jkha̱ kiʼdiin, nirawíi xtíin náa dí ni̱jkha̱ kiʼda nixnún mugúwúúnʼ bi̱ tsaʼtsiinʼ. Nixnún dí mugíʼ ma̱ngaa nixnún raxtá,* dí mu̱phu̱, dí muwa̱a̱n, aceite dí muxtajmamijnáa. Bi̱ néʼngu̱u̱n nixnún dí mudrúwíin búrru, nigúun kudiin a̱ngiu̱ún náa Jericó, xuajin náa rígá palmeras. Nda̱wa̱á nitangiín Samaria.
16 Nákha mbiʼi rúʼko̱, rey Acaz nindu̱ʼu̱u̱n reyes bi̱ kúwá náa Asiria dí mumbayíí.
17 Mbu̱júu̱ má edomitas nitu̱ʼu̱u̱n náa Judá ga̱jma̱a̱ nini̱ gámbáa, ma̱ngaa nigún kudiin xa̱bu̱.
18 Ga̱jma̱a̱ filisteos nitu̱ʼu̱u̱n náa xuajin dí rígá náa Sefelá, náa Négueb xuajin dí rígá náa Judá, náa Bet-Semes, Ayalón, Guederot, Socó ga̱jma̱a̱ náa xuajin dí rígá mijngii, Timná ga̱jma̱a̱ náa xuajin dí rígá mijngii, Guimzó ga̱jma̱a̱ náa xuajin dí rígá mijngii, nikúwá ikhí.
19 Jeobá niʼni majti̱i̱nʼ xa̱bu̱ Judá ga̱jma̱a̱ numuu aʼkhúun Acaz rey ndrígóo Israel, numuu dí niniñuuʼ dí xa̱bu̱ Judá muni̱ dí ra̱májánʼ, rúʼko̱ niʼni dí ikhiin xáguájun jmbu náa Jeobá.
20 Tilgat-Pilnéser rey ndrígóo Asiria na̱nguá nimbáyúu, rí phú niʼni, nixmínaʼ ga̱jma̱a̱ ma̱ngaa niʼni dí mamínuuʼ.
21 Acaz niguwíi xúgíʼ dí rígá náa goʼwóo Jeobá, náa goʼwóo* rey ga̱jma̱a̱ náa guʼwún príncipes mu maxnúu regalo rey ndrígóo Asiria, mú rúʼko̱ nda̱a̱ dí niyambáá.
22 Índo̱ rey Acaz nixtáa ramínúuʼ, niʼni itháan dí ra̱májánʼ náa Jeobá.
23 Nigíʼdúu nixnájxi̱ tsigijñaʼ náa dioses ndrígu̱ún xa̱bu̱ Damasco bi̱ táʼngo̱o̱ gáxmína̱ʼ gajmíi̱n. Niʼthí: “Numuu dí dioses ndrígu̱ún reyes bi̱ kúwá náa Siria numbañún, ikhúún ma̱ngaa maxnajxí tsigijñaʼ náa ikhiin mu mumbayúʼ”. Mú xándú buʼko̱ nini̱ dí ikhaa gajmíi̱n xa̱bu̱ Israel maguáʼníí gamiéjunʼ.
24 Ma̱ngaa Acaz nigímbóó mbá xúgíʼ dí najmaa náa goʼwóo Dios bi̱ gajkhun, nda̱wa̱á nijkumigu̱u̱ dí najmaa náa goʼwóo Dios bi̱ gajkhun, nirugua̱a̱ xkrugoo goʼwóo Jeobá, ma̱ngaa niʼni náa majuixnájxi̱ tsigijñaʼ náa mbájndi rawuunʼ Jerusalén.
25 Náa mbá xúgíʼ xuajin dí rígá náa Judá niʼni dí mitsídánʼ mu ikhí murkuní tsigijñaʼ náa eʼwíinʼ dioses, niʼni dí makásngañu̱u̱ʼ Jeobá, Dios ndrígu̱ún wajin xiʼñúuʼ.
26 Dí naʼthí xóó itháan ga̱jma̱a̱ numuu, xúgíʼ dí niʼni, kiʼniraʼmáʼ mbá xúgíʼ náa Libro dí naʼthí ga̱jma̱a̱ numún Reyes bi̱ nikúwá náa Judá ga̱jma̱a̱ náa Israel.
27 Ikhú Acaz ndiyáa jxu̱u̱ʼ gajmíi̱n wajin xiʼñúuʼ ga̱jma̱a̱ nidi̱i̱ náa xuajin, náa Jerusalén, mú na̱nguá nidi̱i̱ náa najuiʼdi̱ín reyes bi̱ nikúwá náa Israel. Ga̱jma̱a̱ Ezequías bi̱ nindxu̱u̱ a̱ʼdióo ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ O “ajua̱nʼ dí nurkuiya̱ʼ”.
^ O “bóo”.
^ O “i̱jín go̱ʼo̱”.
^ O “gaʼyee, bi̱ naʼthí dí marigá”.
^ O “cháda”.
^ O “náa naʼtáñajunʼ”.
