Raga̱jma̱ libro ndrígóo Crónicas 29:1-36
29 Ezequías ni̱jkha̱nú ninindxu̱u̱ rey índo̱ gíʼdoo 25 tsiguuʼ ga̱jma̱a̱ niʼtáñajunʼ mbá 29 tsiguʼ náa Jerusalén. Ru̱dúu̱* nigumbiʼyuu Abías, wáxióo* Zacarías.
2 Ikhaa niʼni rí májánʼ náa iduu Jeobá, xó má niʼni wajin xiʼñúuʼ David.
3 Timbá gu̱nʼ rí timbá tsiguʼ dí naʼtáñajunʼ, nirmbáʼtoo xkrugoo goʼwóo Jeobá ga̱jma̱a̱ niʼni májáanʼ.
4 Nda̱wa̱á ni̱ʼkha̱ kagui̱i̱n ndxajkun ga̱jma̱a̱ levitas, nigímbíin náa xua̱ dí rígá xígií náa nagájnuu a̱jkha̱ʼ.*
5 Niʼthún: “Gudxawunʼla, levitas. Dí xúgi̱ gu̱ni̱ kaʼwumijnáaʼla ga̱jma̱a̱ gu̱ni̱ kaʼwi̱i̱ goʼwóo Jeobá, Dios ndrígu̱ún wajin xiʼñála, ga̱jma̱a̱ gu̱ni̱ gámbáa dí tsaga náa dí mikaʼwu.
6 Numuu dí anu̱lú táguájun jmbu ga̱jma̱a̱ nini̱ dí ra̱májánʼ náa iduu Jeobá Dios ndrígúlú. Niniña̱a̱nʼ ga̱jma̱a̱ táʼndún gúyáá goʼwóo Jeobá ma̱ngaa táʼndún gúyáá ikhaa.
7 Nirugua̱a̱ xkrugoo corredor ga̱jma̱a̱ nindijuíiʼ lámparas. Niniña̱a̱nʼ rutsika rí ndataun ga̱jma̱a̱ niniña̱a̱nʼ ruxnajxi̱ tsigijñaʼ gamajkhu dí nakarámáʼ náa Dios ndrígóo Israel náa rí mikaʼwu.
8 Jeobá nikiʼnáa kaʼñún xa̱bu̱ Judá ga̱jma̱a̱ xa̱bu̱ Jerusalén, ikha jngóo niʼni rí mani̱ndxu̱ún mbá rí naʼni mamiñún eʼwíinʼ, naʼni maʼniún tsiánguá ga̱jma̱a̱ naʼni dí mutsijma, xó má dí ikháanʼ nandoo ndu̱ya̱a̱la.
9 Ikha jngóo wajin xiʼñúlú nikháñún ga̱jma̱a̱ espada, ga̱jma̱a̱ ni̱jkha̱ kiʼdiin e̱jñu̱lúʼ jiámá ga̱jma̱a̱ wa̱ʼxa̱ʼ* mangiin gu̱ʼyu̱lú.
10 Dí xúgi̱ náa a̱jkiu̱nʼ nagájnuu dí mambanúʼ ga̱jmu̱ʼ Jeobá, Dios ndrígóo Israel, mu xúʼko̱ maniñuuʼ rakásnga̱ñu̱u̱ʼ kaʼyulú.
11 E̱ji̱nʼ, raʼkháa mbiʼi dí mbuʼyáa jxu̱lú xúgi̱, numuu dí Jeobá niraʼwáanla muguajún náa inuu, mu mu̱ni̱ ñajuunʼ ga̱jma̱a̱ murkuní tsigijñaʼ ndrígóo”.
12 Ikhú levitas nigi̱ʼdi̱i̱ niñejunʼ. Bi̱ naguwáʼ náa cohatitas: Máhat a̱ʼdióo Amasái ga̱jma̱a̱ Joel a̱ʼdióo Azarías, bi̱ naguwáʼ náa meraritas: Quis a̱ʼdióo Abdí ga̱jma̱a̱ Azarías a̱ʼdióo Jehalelel, bi̱ naguwáʼ náa guersonitas: Joá a̱ʼdióo Zimá ga̱jma̱a̱ Edén a̱ʼdióo Joá,
13 bi̱ naguwáʼ náa e̱ji̱i̱n Elizafán: Simrí ga̱jma̱a̱ Jeuel, bi̱ naguwáʼ náa e̱ji̱i̱n Asaf: Zacarías ga̱jma̱a̱ Matanías,
14 bi̱ naguwáʼ náa e̱ji̱i̱n Hemán: Jehiel ga̱jma̱a̱ Simeí, bi̱ naguwáʼ náa e̱ji̱i̱n Jedutún: Semaya ga̱jma̱a̱ Uziel.
15 Nigimbíin a̱ngiu̱ún, nini̱ kaʼwumijnáa xó má nikuʼmiin muni̱ rey, xó má eʼthí náa ajngóo Jeobá, niguwáʼ gúni̱ kaʼwi̱i̱ goʼwóo Jeobá.
16 Ikhú ndxajkun nitu̱ʼu̱u̱n náa goʼwóo Jeobá ga̱jma̱a̱ nini̱ kaʼwi̱i̱, nirawíi xúgíʼ rí tsaga dí nixkamaa náa guʼwá rí nduyamajkuíí Jeobá, nigúun gúsnguti̱ga̱ náa rexo̱o̱ goʼwóo Jeobá. Ikhí levitas nirawíi ga̱jma̱a̱ nigún kudúún náa mata Cedrón.
17 Xígi̱ kaʼnii nigi̱ʼdi̱i̱ nini̱ kaʼwi̱i̱ náa timbá mbiʼi dí timbá gu̱nʼ, ga̱jma̱a̱ índo̱ niʼni migiñuʼ mbiʼi niguánú asndu náa corredor ndrígóo Jeobá. Nini̱ kaʼwi̱i̱ goʼwóo Jeobá mbá migiñuʼ mbiʼi, niguámbúun índo̱ niʼni 16 mbiʼi rí timbá gu̱nʼ.
18 Nda̱wa̱á nitu̱ʼu̱u̱n náa xtáa rey Ezequías ga̱jma̱a̱ nitháán: “Ni̱ni̱ kaʼwi̱i̱xu mbá xúgíʼ goʼwóo Jeobá, náa najuixnájxi̱ tsigijñaʼ dí nakarámáʼ ga̱jma̱a̱ xúgíʼ dí najmaa, ma̱ngaa mesa náa nusngutámáʼ pan dí karngujxi̱* ga̱jma̱a̱ xúgíʼ dí najmaa.
19 Ni̱ni̱ májáanʼxu̱ ga̱jma̱a̱ ni̱ni̱ kaʼwi̱i̱xu xúgíʼ rí najmaa dí rey Acaz nigruigúu índo̱ niʼtáñajunʼ, índo̱ na̱nguá niwi̱ji̱ jmbu, dí xúgi̱ rígá náa inuu dí najuixnájxi̱ tsigijñaʼ náa inuu Jeobá”.
20 Miʼcha̱ nitu̱jxu̱u̱ rey Ezequías ga̱jma̱a̱ nigímbíin príncipes bi̱ kúwá náa xuajin, nitsimún náa goʼwóo Jeobá.
21 Nigún kudiin juwiin xedi̱, juwiin mugu̱ e̱jmba̱a̱, juwiin mugu̱ ga̱jma̱a̱ juwiin chivátu* mu mixnájxi̱i̱n xóo tsigijñaʼ ga̱jma̱a̱ numuu aʼkhá ga̱jma̱a̱ numuu rí nutañajunʼ, numuu guʼwá ma̱ngaa ga̱jma̱a̱ numuu Judá. Niʼthún ndxajkun bi̱ naguwáʼ náa Aarón dí muxnajxi̱i̱n náa najuixnájxi̱ tsigijñaʼ náa inuu Jeobá.
22 Ikhú niradíin xedi̱, ga̱jma̱a̱ ndxajkun ndiya̱ eʼdiún nixtijyááʼ ga̱jma̱a̱ náa najuixnájxi̱ tsigijñaʼ, nda̱wa̱á niradíin mugu̱ e̱jmba̱a̱ ga̱jma̱a̱ nixtijyááʼ eʼdiún náa najuixnájxi̱ tsigijñaʼ, ma̱ngaa niradíin mugu̱ ga̱jma̱a̱ nixtijyááʼ eʼdiún náa najuixnájxi̱ tsigijñaʼ.
23 Nda̱wa̱á nigún kudiin chivátu náa rey ga̱jma̱a̱ náa xa̱bu̱ bi̱ nigimbíin mu mixnájxi̱i̱n xóo tsigijñaʼ ga̱jma̱a̱ numuu aʼkhá, ikhiin nixkrami̱i̱n.
24 Ikhú ndxajkun niradíin ga̱jma̱a̱ nijmún eʼdiún náa najuixnájxi̱ tsigijñaʼ mu muxnajxi̱ mbá tsigijñaʼ ga̱jma̱a̱ numuu aʼkhá, mu majngudi̱i̱ aʼkhúún mbá xúgíinʼ xa̱bu̱ Israel, numuu dí rey niʼthí dí tsigijñaʼ dí nakarámáʼ ma̱ngaa tsigijñaʼ ga̱jma̱a̱ numuu aʼkhá mbaʼyóoʼ dí mixnájxi̱ ga̱jma̱a̱ numún xúgíinʼ xa̱bu̱ Israel.
25 Ikha jngóo niʼni dí levitas muguajún náa goʼwóo Jeobá kudúún címbalos, ajua̱nʼ dí gíʼdoo cuérdóo ga̱jma̱a̱ arpa, xó má niʼtáñajunʼ maguma David, Gad xa̱bu̱ bi̱ ndaʼyoo rí nawasngájmáá* ga̱jma̱a̱ numuu rey, ma̱ngaa profeta* Natán, numuu dí kiʼtáñajunʼ rúʼko̱ nixná Jeobá náa profetas ndrígóo.
26 Ikha jngóo levitas wájun ikhí kuda ajua̱nʼ dí niʼni David, ga̱jma̱a̱ ndxajkun kuda trompeta.
27 Ikhú Ezequías niʼtáñajunʼ dí mixnájxi̱ tsigijñaʼ dí nakarámáʼ. Índo̱ nigi̱ʼdu̱u̱ nijuixnájxi̱ tsigijñaʼ dí nakarámáʼ nigi̱ʼdu̱u̱ niwáán ajmúú ndrígóo Jeobá, ga̱jma̱a̱ trompeta xó má ewán ajua̱nʼ dí niʼni David, rey ndrígóo Israel.
28 Mbá xúgíinʼ xa̱bu̱ bi̱ nigimbíin nismbati̱gu̱u̱n índo̱ xtáa rawáán ajmúú ga̱jma̱a̱ índo̱ nawáán trompeta. Niwáán má xúʼko̱ asndu índo̱ niguámbá nijuixnájxi̱ tsigijñaʼ dí nakarámáʼ.
29 Núkhu má índo̱ niguámbá nijuixnájxi̱ tsigijñaʼ, rey gajmíi̱n mbá xúgíinʼ xa̱bu̱ bi̱ xtáa gajmíi̱n niguáʼnduti̱ga̱ ga̱jma̱a̱ nismbati̱gu̱u̱n.
30 Rey Ezequías gajmíi̱n príncipes nithúún levitas dí muni̱ mba̱a̱ Jeobá ga̱jma̱a̱ ajngóo David ma̱ngaa Asaf, xa̱bu̱ bi̱ ndaʼyoo rí nawasngájmáá. Ikha jngóo nini̱ mba̱a̱ ga̱jma̱a̱ gagi, niguáʼnduti̱ga̱ ga̱jma̱a̱ nismbati̱gu̱u̱n.
31 Ikhú Ezequías niʼthí: “Xúgi̱ dí ikháanʼ nixtaʼwáanʼla mu̱ni̱ ñajuunʼ Jeobá, aguwaʼ náa goʼwóo Jeobá ga̱jma̱a̱ aguwaʼ kudala tsigijñaʼ ga̱jma̱a̱ i̱ʼwáʼ tsigijñaʼ dí nuxnáa núma̱aʼ”. Ikha jngóo mbá xúgíinʼ bi̱ nigimbíin nigíʼdi̱i̱ niguwáʼ kudúún tsigijñaʼ ga̱jma̱a̱ i̱ʼwáʼ tsigijñaʼ dí nuxnáa núma̱aʼ, mbá xúgíinʼ bi̱ nagájnuu náa a̱jkiu̱ún niguwáʼ kudúún tsigijñaʼ dí nakarámáʼ.
32 Xígi̱ kaʼnii mbaʼa tsigijñaʼ rí nakarámáʼ dí niguwáʼ kudúún bi̱ nigimbíin, naʼni 70 xedi̱, 100 mugu̱ e̱jmba̱a̱, 200 mugu̱, niguwáʼ kudúún xúgíʼ tsigijñaʼ rígi̱ mu mikarámáʼ náa inuu Jeobá,
33 ga̱jma̱a̱ tsigijñaʼ dí kaʼwu, naʼni 600 xedi̱ ga̱jma̱a̱ 3,000 mugu̱.
34 Mú ndawi̱i̱n mbaʼin ndxajkun bi̱ murawíi xtún xujkhúʼ mu mixnájxi̱i̱n xóo tsigijñaʼ dí nakarámáʼ. Ikha jngóo nimbañúún levitas bi̱ nindxu̱ún a̱ngiu̱ún, nimbañúún asndu índo̱ niguámbá ñajunʼ ga̱jma̱a̱ asndu índo̱ ndxajkun niguámbu̱u̱n nini̱ kaʼwumijnáa, numuu dí levitas itháan má nixmiéjúúnʼ rí muni̱ kaʼwumijnáa ki xóo ndxajkun.
35 Ma̱ngaa ra̱ʼkhá tháán nirígá tsigijñaʼ dí nakarámáʼ, xóo xtangoo tsigijñaʼ dí tsímáá* ga̱jma̱a̱ tsigijñaʼ dí nagadirámuuʼ dí majmaa náa tsigijñaʼ dí nakarámáʼ. Xúʼko̱ kaʼnii nigi̱ʼdu̱u̱ niguma mbu̱júu̱ ñajunʼ náa goʼwóo Jeobá.
36 Ezequías gajmíi̱n mbá xúgíinʼ xa̱bu̱ xuajin ra̱ʼkhá tháán nidxúún, numuu rí Dios bi̱ gajkhun niʼni dí muni̱ rígi̱ xa̱bu̱ xuajin, numuu dí mbá nacha̱á nirígá xúgíʼ rígi̱.
Mbaʼa nota
^ O “nánée”.
^ O “a̱ʼdée dxáʼgú”.
^ O “este”.
^ O “i̱jín go̱ʼo̱”.
^ Xóo muʼthá, pan dí najuixnájxi̱.
^ O “tsu̱jtu e̱jmba̱a̱”.
^ O “visión”.
^ O “gaʼyee, bi̱ naʼthí dí marigá”.
