Raga̱jma̱ libro ndrígóo Crónicas 3:1-17
3 Ikhú Salomón nigíʼdu̱u̱ niʼni goʼwóo Jeobá náa Jerusalén, náa kúbá Moria, náa Jeobá nisngájmaminaʼ náa David bi̱ ninindxu̱u̱ anu̱u̱,* náa mbaaʼ rí David niʼni mújúunʼ náa mbayuuʼ Ornán xa̱bu̱ jebuseo.
2 Nigíʼdu̱u̱ niʼni guʼwá índo̱ niʼni raga̱jma̱ mbiʼi dí maʼni raga̱jma̱ igu̱nʼ, índo̱ naʼni má a̱jkhu̱ tsiguʼ rí naʼtáñajunʼ.
3 Rajkhúu guʼwá dí nigíʼ Salomón mu maʼni goʼwóo Dios bi̱ gajkhun, gíʼdoo 27 metro* dí mbaʼ, mijna gu̱wa̱ʼ metro* dí ma̱ja̱nʼ, xó má awan rí najmaa nákhá ginii.*
4 Náa inuu corredor ma̱ja̱nʼ ikháá má xóo ma̱ja̱nʼ guʼwá, gíʼdoo mijna gu̱wa̱ʼ metro ga̱jma̱a̱ dí mitsídánʼ gíʼdoo 120,* nixtájmuu mbawíí oro náa awúu̱n.
5 Nisngujma ixi̱ enebro náa mbá xúgíʼ guʼwá, nda̱wa̱á nixtájmuu oro dí itháan májánʼ ga̱jma̱a̱ ikhú niʼniwíi xtiʼkhuu ixi̱ ida ga̱jma̱a̱ cadena.
6 Ma̱ngaa niguma itsí rí mitsaanʼ* náa guʼwá ga̱jma̱a̱ nijmuu oro dí na̱ʼkha̱ náa Parvaim.
7 Nixtájmuu oro náa guʼwá, náa ixi̱ mbi̱jua̱ rí jngútámáʼ, náa riejun, náa pared ga̱jma̱a̱ náa xkrugua. Ga̱jma̱a̱ niʼniwíin querubines náa pared ndrígóo guʼwá.
8 Nda̱wa̱á, niʼni cuarto* náa rí phú Mikaʼwu dí mbaʼ ikháá má dí ma̱ja̱nʼ guʼwá, gíʼdoo mijna gu̱wa̱ʼ metro,* ga̱jma̱a̱ dí ma̱ja̱nʼ ikháá má rí mijna gu̱wa̱ʼ metro gíʼdoo. Nijmuu mbá 20,520 kilo* oro dí itháan májánʼ mu maxtájmuu náa xúgíʼ guʼwá.
9 Oro dí niguma ga̱jma̱a̱ clavo miki̱wu̱n 50 siclos* ga̱jma̱a̱ nixtájmuu oro náa mbá xúgíʼ cuarto dí rígá rijma̱a̱.
10 Ikhú náa cuarto* rí phú Mikaʼwu niʼnii a̱jmi̱i̱n querubines ga̱jma̱a̱ nixtájmiin oro.
11 Dí mbaʼ xpíjpiúún querubines gíʼdoo mijna gu̱wa̱ʼ metro,* bi̱ timbáa querubín gíʼdoo itháan rí a̱jma̱ metro* dí mbaʼ xpíjpiúu ga̱jma̱a̱ nartumuu náa pared ndrígóo guʼwá. Ga̱jma̱a̱ i̱mba̱ xpíjpiúu gíʼdoo itháan rí a̱jma̱ metro, xpíjpiúu rúʼko̱ ndawa̱a̱ ga̱jma̱a̱ xpíjpiúu imba̱a̱ querubín.
12 I̱mba̱ xpíjpiúu imba̱a̱ querubín gíʼdoo itháan rí a̱jma̱ metro dí mbaʼ ga̱jma̱a̱ nartumuu náa pared ndrígóo guʼwá. Ga̱jma̱a̱ imbo̱o̱ xpíjpiúu gíʼdoo itháan rí a̱jma̱ metro dí mbaʼ, xpíjpiúu rúʼko̱ ndawa̱a̱ ga̱jma̱a̱ xpíjpiúu bi̱ timbáa querubín.
13 Xpíjpiúún querubines dí juáʼwii naʼni mbá mijna gu̱wa̱ʼ metro.* Querubines guájun ga̱jma̱a̱ nuni̱ inún náa awúu̱n.*
14 Ma̱ngaa niʼni mbá cortina ga̱jma̱a̱ gúmá azul, mugu̱ miʼñuu, gúmá maña xngeʼdi ga̱jma̱a̱ xtíin dí májánʼ. Ma̱ngaa ikhí niʼxmíjma xtiʼkúún querubines.
15 Náa inuu guʼwá nitsuajun a̱jma̱ rajkhúu dí naʼni 15 metro* dí mbi̱jua̱ ga̱jma̱a̱ dí trámáʼ náa edxu̱u̱ rajkhúu dí guájun naʼni itháan rí a̱jma̱ metro* dí mbi̱jua̱.
16 Ma̱ngaa niʼni cadena dí xóo collar kaʼnii ga̱jma̱a̱ nijngrigú náa rajkhúu dí guájun, ga̱jma̱a̱ niʼni mbá 100 granada dí nijgrígú náa cadena.
17 Nitsuajun rajkhúu náa inuu guʼwá rí nduyamajkuíí Dios, mbá nitsiji náa ñawún májánʼ* ga̱jma̱a̱ i̱mba̱ nitsiji náa ñawún xti̱ʼ,* dí nitsiji náa ñawún májánʼ nixná mbiʼyuu Jakín* ga̱jma̱a̱ dí nitsiji náa ñawún xti̱ʼ nixná mbiʼyuu Boaz.*
Mbaʼa nota
^ O “tátée”.
^ Náa ajngáa hebreo naʼthí, “20 gúʼxúʼ”.
^ Nakujmaa rí xa̱bu̱ Israel nijmún mixtiʼkhu enii awan gúʼxúʼ xó má mbiʼi dí nikúwá. Atayáá glosario, guʼxáaʼ.
^ Tséjuiʼyáá xóo awan nixtagiéwan ga̱jma̱a̱.
^ O “nagui̱i̱”.
^ Náa ajngáa hebreo naʼthí, “guʼwá”.
^ Náa ajngáa hebreo naʼthí, “20 gúʼxúʼ”.
^ Náa ajngáa hebreo naʼthí, “guʼwá”.
^ Náa ajngáa hebreo naʼthí, “20 gúʼxúʼ”.
^ Náa ajngáa hebreo naʼthí, “witsu gúʼxúʼ”.
^ Náa ajngáa hebreo naʼthí, “20 gúʼxúʼ”.
^ Xóo muʼthá, náa rí Mikaʼwu.
^ Náa ajngáa hebreo naʼthí, “35 gúʼxúʼ”.
^ Náa ajngáa hebreo naʼthí, “witsu gúʼxúʼ”.
^ O “xígií náa sur”.
^ O “xígií náa norte”.
^ Rí nandoo gáʼthúu̱n, ‹ikhaa [xóo muʼthá, Jeobá] gáʼni rí mawi̱ji̱ gújkhúʼ›.
^ Mbáa nandoo gáʼthúu̱n ‹ga̱jma̱a̱ tsiaki̱i̱›.
