Raga̱jma̱ libro ndrígóo Crónicas 30:1-27
-
Ezequías naʼni ndxa̱a̱ Pascua (1-27)
30 Ezequías nikuʼmiin bi̱ magún kuñu̱u̱n ajngáa náa mbá xúgíʼ Israel ga̱jma̱a̱ náa Judá, ma̱ngaa asndu niʼnirámáʼ i̱yi̱i̱ʼ dí maʼga inún bi̱ naguwáʼ náa Efraín ga̱jma̱a̱ náa Manasés, mu maguwáʼ náa Jerusalén náa goʼwóo Jeobá muniriya̱a̱ʼ Pascua náa Jeobá, Dios ndrígóo Israel.
2 Rey gajmíi̱n príncipes ndrígio̱o̱ ma̱ngaa mbá xúgíinʼ xa̱bu̱ bi̱ nigimbíin náa Jerusalén niraʼwi̱i̱ dí muniriya̱a̱ʼ Pascua índo̱ niʼni a̱jma̱ igu̱nʼ,
3 na̱nguá nindoo muniriya̱a̱ʼ ndxa̱a̱ mbiʼi dí kaʼyoo, numuu dí na̱nguá nini̱ kaʼwumijnáa mbaʼin ndxajkun ni má xa̱bu̱ xuajin na̱nguá nigimbíin náa Jerusalén.
4 Dí nixtaʼwíí maguma ndiʼyoo dí májánʼ nindxu̱u̱ rey, xúʼko̱ má ndiyáá mangiin xa̱bu̱ bi̱ nigimbíin.
5 Ikha jngóo niraʼwi̱i̱ dí muthún mbá xúgíinʼ xa̱bu̱ Israel, nigi̱ʼdi̱i̱ náa Beer-Seba asndu náa Dan, mu xúʼko̱ xa̱bu̱ maguwáʼ náa Jerusalén muniriya̱a̱ʼ ndxa̱a̱ Pascua náa Jeobá, Dios ndrígóo Israel, numuu dí xa̱bu̱ Israel na̱nguá niniri̱ya̱a̱ʼ ndxa̱a̱ xó má naʼthí náa kiʼniraʼmáʼ.
6 Ikhú bi̱ nagún ku̱ñu̱u̱n ajngáa* nini̱ xó má niʼtáñajúúnʼ rey, nigún náa mbá xúgíʼ Israel ga̱jma̱a̱ náa Judá, nigún kudúún i̱yi̱i̱ʼ dí niʼnirámáʼ rey gajmíi̱n príncipes ndrígio̱o̱ náa naʼthí: “Xa̱bu̱ Israel, gutangáanʼla náa Jeobá, Dios ndrígóo Abrahán, Isaac ga̱jma̱a̱ Israel, mu xúʼko̱ ikhaa matanga̱a̱ náa xa̱bu̱ bi̱ xóó naguanún bi̱ nikáwíin náa ñawúúnʼ reyes Asiria.
7 Xúni̱ xó má nini̱ wajin xiʼñála, ni má xóo a̱ngia̱la, bi̱ táguájun jmbu náa Jeobá, Dios ndrígu̱ún wajin xiʼñúúnʼ, ikha jngóo ikhaa niʼni dí mani̱ndxu̱ún mbá dí naʼni mamiñún eʼwíinʼ, xó má ikháanʼla kuwáanʼ ru̱ya̱a̱.
8 Xúni̱ gujkhuʼ a̱jkia̱la xó má nini̱ wajin xiʼñála. Gu̱nimba̱la ku̱ya̱a̱ Jeobá ga̱jma̱a̱ aguwaʼ náa goʼwóo, dí ikhaa niʼni kaʼwi̱i̱ asndu kámuu, gu̱ni̱ ñajuunʼ Jeobá Dios ndrígala, xúʼko̱ ikhaa maniñuuʼ rakásnga̱ñu̱u̱ʼ kaʼyala.
9 Á mu ikháanʼ natangáanʼla náa Jeobá, bi̱ nigún kudiin a̱ngia̱la ga̱jma̱a̱ e̱jña̱la magáwíinʼ a̱jkiu̱ún kuñúún ga̱jma̱a̱ muniñu̱u̱nʼ matangi̱ín náa ku̱ba̱ʼ rígi̱, numuu dí Jeobá Dios ndrígala nagáwíinʼ a̱jkiu̱u̱n, ma̱ngaa naʼni mba̱a̱ a̱jkiu̱u̱n, á mu dí ikháanʼla natangáanʼ náa ikhaa, maʼndoo kaʼyala”.*
10 Ikha jngóo bi̱ nagún ku̱ñu̱u̱n ajngáa* nigún náa mámbá xuajin, náa mbá xúgíʼ ku̱bu̱únʼ bi̱ naguwáʼ náa Efraín ga̱jma̱a̱ náa Manasés, ma̱ngaa nigún asndu náa Zabulón, mú xa̱bu̱ nunduʼwajmiin ga̱jma̱a̱ nutsijmiin.
11 Mú tikhuun xa̱bu̱ bi̱ naguwáʼ náa Aser, Manasés ga̱jma̱a̱ náa Zabulón nixruigúmíjná ga̱jma̱a̱ nigún náa Jerusalén.
12 Ñawúunʼ Dios bi̱ gajkhun ma̱ngaa nirígá náa Judá mu magímbi̱ín* munimbaníí rí niʼtáñajúúnʼ muni̱ rey ga̱jma̱a̱ príncipes xó má eʼthí náa ajngóo Jeobá.
13 Ra̱ʼkhá tháán mbaʼin xa̱bu̱ nigimbíin náa Jerusalén mu muniriya̱a̱ʼ Ndxo̱o̱ Pan dí ragíʼdoo Levadura* dí maʼni a̱jma̱ igu̱nʼ. Ra̱ʼkhá tháán mbaʼin nigimbíin.
14 Nigi̱ʼdi̱i̱ nini̱ gámbáa náa najuixnájxi̱ tsigijñaʼ dí rígá náa Jerusalén, ga̱jma̱a̱ nini̱ gámbáa mbá xúgíʼ náa nakarámáʼ rí ndataun, nda̱wa̱á nidaʼ náa mata Cedrón.
15 Índo̱ niʼni mbiʼi 14 dí maʼni a̱jma̱ igu̱nʼ niradíin xujkhúʼ bi̱ nuxnaxi̱i̱n xóo tsigijñaʼ náa Pascua. Ndxajkun ga̱jma̱a̱ levitas niti̱ñu̱u̱nʼ, ikha jngóo nini̱ kaʼwumijnáa ga̱jma̱a̱ niguwáʼ kudúún tsigijñaʼ dí nakarámáʼ náa goʼwóo Jeobá.
16 Nuni̱ ñajunʼ dí kaʼñún muni̱ tsejtsi mbiʼi, xó má eʼthí náa Xtángoo ndrígóo Moisés, xa̱bi̱i̱ Dios bi̱ gajkhun, ikhú ndxajkun nuxtijyáá eʼdi dí naguwáʼ kudúún levitas.
17 Náa xa̱bu̱ bi̱ nigimbíin kúwá mbaʼin bi̱ na̱nguá nini̱ kaʼwumijnáa, levitas kajkuáa ñawúúnʼ dí muradíin xujkhúʼ bi̱ majuixnájxi̱i̱n xóo tsigijñaʼ náa Pascua ga̱jma̱a̱ numún mbá xúgíinʼ bi̱ na̱nguá kaʼwiin, mu xúʼko̱ makuwá kaʼwiin náa iduu Jeobá.
18 Numuu dí mbaʼin xa̱bu̱ xuajin na̱nguá nini̱ kaʼwumijnáa, mú itháan bi̱ naguwáʼ náa Efraín, Manasés, Isacar ga̱jma̱a̱ Zabulón, maski ajndu xúʼko̱ nipiʼtsu náa Pascua, ninújngurámúúnʼ dí naʼthí náa kiʼniraʼmáʼ. Mú Ezequías niʼtájkháan ga̱jma̱a̱ numún. Niʼthí: “Jeobá, bi̱ májáanʼ a̱jkiu̱u̱n gáʼni̱ mba̱a̱ a̱jkiu̱u̱n kaʼñún
19 mbá xúgíinʼ bi̱ niniratáá a̱jkiu̱ún mu mbuyáaʼ Dios bi̱ gajkhun, Jeobá, Dios ndrígu̱ún wajin xiʼñúúnʼ, maski ajndu na̱nguá nini̱ kaʼwumijnáa xó má eʼthí náa xtángoo dí makuwá kaʼwu”.
20 Jeobá niʼdxawuun Ezequías, niʼni mba̱a̱ a̱jkiu̱u̱n* kaʼñún xa̱bu̱ xuajin.
21 Ikha jngóo israelitas bi̱ nikúwá náa Jerusalén asndu nadxún niniri̱ya̱a̱ʼ Ndxo̱o̱ Pan dí ragíʼdoo Levadura mbá juwan mbiʼi. Levitas gajmiún ndxajkun nuni̱ mba̱a̱ Jeobá mámbá mbiʼi, nudi̱i̱ gakhi̱i̱ ajua̱nʼ náa Jeobá.
22 Ezequías niʼthún ga̱jma̱a̱ nixnún tsiaki̱i̱ mbá xúgíinʼ levitas bi̱ nundxa̱ʼwa̱a̱ májánʼ edxu̱ún xóo muni̱ ñajuunʼ Jeobá. Nikúwíin ruphiʼtsu mbá juwan mbiʼi náa ndxa̱a̱, nixnajxi̱ tsigijñaʼ dí tsímáá* ga̱jma̱a̱ ni̱xna̱a̱ núma̱aʼ Jeobá, Dios ndrígu̱ún wajin xiʼñúúnʼ.
23 Ikhú mbá xúgíinʼ bi̱ nigimbíin niraʼwi̱i̱ dí muni̱ ndxa̱a̱ i̱mbá juwan mbiʼi, ikha jngóo asndu nadxún nini̱ ndxa̱a̱ i̱mbá juwan mbiʼi.
24 Ezequías rey ndrígóo Judá nixníin mbá 1,000 xedi̱ ga̱jma̱a̱ mbá 7,000 mugu̱ náa bi̱ nigimbíin. Ma̱ngaa príncipes nixniin mbá 1,000 xedi̱ ga̱jma̱a̱ mbá 10,000 mugu̱ náa bi̱ nigimbíin, ga̱jma̱a̱ ra̱ʼkhá tháán mbaʼin ndxajkun kúwá runi̱ kaʼwumijnáa.
25 Mbá xúgíinʼ bi̱ nigimbíin bi̱ niguwáʼ náa Judá, ndxajkun, levitas, ga̱jma̱a̱ mbá xúgíinʼ bi̱ niguwáʼ náa Israel, xa̱bu̱ naguwaáʼ bi̱ kúwá náa ku̱ba̱ʼ Israel ga̱jma̱a̱ bi̱ kúwá náa Judá, ra̱ʼkhá tháán nidxúún.
26 Ra̱ʼkhá tháán nirígá gagi náa Jerusalén, numuu dí asndu nákha mbiʼi dí nixtáa Salomón a̱ʼdióo David, rey ndrígóo Israel, na̱nguá nirígá mbá dí xúʼko̱ kaʼnii náa Jerusalén.
27 Nda̱wa̱á ndxajkun bi̱ nindxu̱ún levitas niguájun ga̱jma̱a̱ nini̱ tsajkurámíinʼ xa̱bu̱ xuajin, Dios niʼdxawún ga̱jma̱a̱ dí nitajkháan ni̱jkha̱nú asndu mekhuíí náa xtáa, náa rí nindxu̱u̱ mikaʼwu.
Mbaʼa nota
^ Náa ajngáa hebreo naʼthí, “bi̱ nagáñún”.
^ Náa ajngáa hebreo naʼthí, “xáyéngaa inuu náa ikháanʼla”.
^ Náa ajngáa hebreo naʼthí, “bi̱ nagáñún”.
^ Náa ajngáa hebreo naʼthí, “maxnún mbóó a̱jkiu̱ún”.
^ Náa ajngáa hebreo naʼthí, “niʼni thanún”.
