Raga̱jma̱ libro ndrígóo Crónicas 31:1-21
31 Índo̱ niguámbá mbá xúgíʼ rígi̱, xúgíinʼ israelitas bi̱ nikúwá ikhí, nigún náa xúgíʼ xuajin dí rígá náa Judá, ga̱jma̱a̱ nini̱ gámbáa itsí rí mitsúʼkháan, nini̱ gámbáa poste rí mitsúʼkháan,* ma̱ngaa nini̱ gámbáa náa rí mitsídánʼ ga̱jma̱a̱ náa rí nuxnajxi̱ tsigijñaʼ dí rígá náa mbá xúgíʼ Judá ga̱jma̱a̱ náa Benjamín, ma̱ngaa xúʼko̱ má dí rígá náa Efraín ga̱jma̱a̱ náa Manasés asndu índo̱ niguámbúun nini̱ gámbáa mbá xúgíʼ. Nda̱wa̱á xúgíinʼ israelitas nitangiín náa xuajñún, mámbáa nitanga̱a̱ náa mbayuuʼ.
2 Ikhú Ezequías nigruigi̱i̱n ndxajkun xó má grupo náa kúwá, ga̱jma̱a̱ levitas xó má grupo náa kúwá, mámbáa ndxajkun ga̱jma̱a̱ levita nixnúu ñajunʼ rí maʼni mu muxnajxi̱ tsigijñaʼ dí nakarámáʼ, ga̱jma̱a̱ tsigijñaʼ dí tsímáá,* mu muni̱ ñajunʼ, mu muxna̱a̱ núma̱aʼ ma̱ngaa mu muni̱ ajmúú náa xkrugoo rexo̱o̱* goʼwóo Jeobá.
3 Nijuixnájxi̱ mbá nguáthá dí gíʼdoo rey xóo tsigijñaʼ dí nakarámáʼ, ma̱ngaa xóo tsigijñaʼ dí nakarámáʼ miʼcha̱ ga̱jma̱a̱ wakíʼ, xúʼko̱ má tsigijñaʼ dí nakarámáʼ mbiʼi sábado, índo̱ nagi̱ʼi̱ gu̱nʼ rudiiʼ, ga̱jma̱a̱ índo̱ narígá ndxa̱a̱, xó má kiʼnirámáʼ náa Xtángoo ndrígóo Jeobá.
4 Ga̱jma̱a̱ niʼtáñajúúnʼ mbá xúgíinʼ xa̱bu̱ bi̱ kúwá náa Jerusalén dí muxnún ndxajkun ga̱jma̱a̱ levitas dí kaʼñún mudrigú mu xúʼko̱ ikhiin ma̱ndoo munimbaníí kájxi̱ xtángoo ndrígóo Jeobá.
5 Índo̱ nikuʼma maguma rígi̱, israelitas nixna trigo ga̱jma̱a̱ i̱ʼwáʼ dí najma̱a̱ ginii, vino nuxi̱ʼ, aceite, jyááʼ ga̱jma̱a̱ xúgíʼ dí najma̱a̱ náa mbañúúnʼ, mámbá nguéjma̱* niguwáʼ kudúún.
6 Xa̱bu̱ Israel ga̱jma̱a̱ xa̱bu̱ Judá bi̱ kúwá náa xuajin dí rígá náa Judá, mangiin niguwáʼ kudiin mámbá nguéjmi̱i̱n xedi̱ ga̱jma̱a̱ mugu̱, ma̱ngaa mámbá nguéjma̱ dí mikaʼwu dí niguma kaʼwi̱i̱ makhánáá Jeobá Dios ndrígu̱ún, niguwáʼ kudúún xúgíʼ ga̱jma̱a̱ mbaʼa ru̱tsu̱u̱ nisngutiga̱.
7 Nigi̱ʼdi̱i̱ nisngutiga̱ ru̱tsu̱u̱ dí niguwáʼ kudúún índo̱ naʼni ajtsú igu̱nʼ ga̱jma̱a̱ niguámbúun índo̱ naʼni juwan igu̱nʼ.
8 Índo̱ Ezequías gajmíi̱n príncipes niguwáʼ ndiyáá mbaʼa ru̱tsu̱u̱ dí tri̱ga̱, nini̱ mba̱a̱ Jeobá ga̱jma̱a̱ nini̱ tsajkurámiinʼ xa̱bu̱ xuajñuu Israel.
9 Ezequías nirajxu̱u̱n ndxajkun ga̱jma̱a̱ levitas ga̱jma̱a̱ numuu ru̱tsu̱u̱ dí tri̱ga̱.
10 Ga̱jma̱a̱ Azarías ndxajkun bi̱ kayá edxu̱u̱ náa goʼwóo Sadoc niʼthúu̱n: “Asndu nákhá nigi̱ʼdi̱i̱ niguwáʼ kudúún rí guáʼdáá náa goʼwóo Jeobá, xa̱bu̱ kúwá ruphiʼtsu asndu nagiʼmún ga̱jma̱a̱ asndu napídu̱únʼ numuu dí Jeobá naʼni tsajkurámíinʼ xa̱bu̱ xuajñuu, ga̱jma̱a̱ mbá xúgíʼ rígi̱ rí napídu̱únʼ”.
11 Ikhú Ezequías niʼthúún rí muni̱ májáánʼ cuarto náa mixtagijxi̱i̱* dí marigá náa goʼwóo Jeobá, ga̱jma̱a̱ ikhiin nini̱ májáánʼ.
12 Niguwáʼ kudúún má xúʼko̱ rí guáʼdáá mu muxna, mámbá nguéjma̱ ga̱jma̱a̱ dí mikaʼwu. Conanías xa̱bu̱ levita nigíiʼ mu mañewu̱u̱n xúgíʼ rígi̱, ga̱jma̱a̱ ndxájuu bi̱ mbiʼyuu Simeí nindxu̱u̱ bi̱ maʼni raga̱jmi̱i̱n nda̱wa̱á dí ikhaa.
13 Jehiel, Azazías, Náhat, Asahel, Jerimot, Jozabad, Eliel, Ismakías, Máhat ga̱jma̱a̱ Benaya nindxu̱ún bi̱ numbayíí Conanías ga̱jma̱a̱ ndxájuu Simeí, xó má niʼtáñajúúnʼ muni̱ rey Ezequías ga̱jma̱a̱ Azarías nindxu̱u̱ bi̱ nañewu̱u̱n goʼwóo Dios bi̱ gajkhun.
14 Coré a̱ʼdióo Imná, levita bi̱ wíji̱ náa xkrugua xígií náa nagájnuu a̱jkha̱ʼ,* kajkuáa ñawúunʼ dí mañewu̱u̱n tsigijñaʼ dí nuxna ga̱jma̱a̱ xúgíʼ a̱jkiu̱ún náa Dios bi̱ gajkhun, ga̱jma̱a̱ ikhaa naxpiʼtáa dí naguwáʼ kudúún muxnáá Jeobá, ga̱jma̱a̱ dí mikaʼwu.
15 Ikhaa naxnúu ikha Edén, Miniamín, Jesúa, Semaya, Amarías ga̱jma̱a̱ Secanías, bi̱ kúwá náa xuajin dí kúwá ndxajkun, kajkuáa ñawúúnʼ ñajunʼ dí guáʼdáá xa̱bu̱ bi̱ kaʼnii maku̱ma̱a̱ʼ xtañún, dí murui̱ʼta̱a̱ makánún a̱ngiu̱ún bi̱ kúwá náa grupo ndrígu̱ún xó má bi̱ mbaʼin ga̱jma̱a̱ bi̱ nguéjmi̱i̱n.
16 Ga̱jma̱a̱ rígi̱ na̱nguá nindxu̱u̱ dí nuxna xa̱bekha bi̱ trámáʼ mbiʼñún xó má bi̱ niguwáʼ rágúu̱nʼ rakúwá bi̱ guáʼdáá itháan dí ajtsú tsigúúnʼ, bi̱ naguwáʼ xúgíʼ mbiʼi mu muni̱ ñajunʼ náa goʼwóo Jeobá, ga̱jma̱a̱ mu munimbaníí ñajunʼ dí kaʼñún grupo ndrígu̱ún.
17 Ndxajkun nigumaraʼmáʼ mbiʼñún xó má bi̱ niguwáʼ rakúwá bi̱ kúwá náa guʼwún anu̱ún, ga̱jma̱a̱ xúʼko̱ má levitas bi̱ guáʼdáá itháan rí 20 tsigúúnʼ, xó má ñajunʼ dí gíʼmaa muni̱ bi̱ kúwá náa grupo ndrígu̱ún.
18 Náa nigumarámáʼ mbiʼñún, ma̱ngaa nitrámáʼ mbiʼñún guʼñu̱ún, e̱jñu̱ún jiámá ga̱jma̱a̱ wa̱ʼxa̱ʼ,* ma̱ngaa asndu bi̱ itháan majkhiinʼ ga̱jma̱a̱ mbá xúgíinʼ bi̱ nagimbíi̱n náa ikhiin. Numuu dí ikhiin mikaʼwiin má xúʼko̱, xó má gíʼmaa maʼni ga̱jma̱a̱ numuu ñajunʼ dí kajkuáa ñawúúnʼ.
19 Ga̱jma̱a̱ bi̱ naguwáʼ náa Aarón, ndxajkun bi̱ kúwá náa mbaaʼ dí rígá ra̱jxa̱ dí rígá náa mbájndi rawuunʼ xuajñún. Ma̱ngaa náa mbá xúgíʼ xuajin kúwá xa̱bekha bi̱ nixtaʼwíin ga̱jma̱a̱ mbiʼñún mu muxnáá mámbáa xa̱bu̱ bi̱ xtáa náa majñu̱únʼ ndxajkun ga̱jma̱a̱ mbá xúgíinʼ bi̱ trámáʼ mbiʼñún xó má niguwáʼ rágúu̱nʼ rakúwá, bi̱ nindxu̱ún levitas.
20 Ezequías niʼni xúgíʼ rígi̱ náa Judá, niʼni má xúʼko̱ dí májánʼ, dí jmbu ga̱jma̱a̱ niwi̱ji̱ jmbu má xúʼko̱ náa Jeobá Dios ndrígóo.
21 Ga̱jma̱a̱ mbá xúgíʼ dí niʼni mu mbayáaʼ Dios ndrígóo, tséʼniuu má á mu ñajunʼ dí naguma náa goʼwóo Dios bi̱ gajkhun o ga̱jma̱a̱ numuu Xtángoo o kiʼtáñajunʼ, niʼni ga̱jma̱a̱ xúgíʼ a̱jkiu̱u̱n ga̱jma̱a̱ nigájnuu májánʼ dí niʼni.
Mbaʼa nota
^ Náa ajngáa hebreo naʼthí, “náa gríguiin”.
^ O “náa nupiʼtsu”.
^ O “este”.
^ O “i̱jín go̱ʼo̱”.
