Raga̱jma̱ libro ndrígóo Crónicas 32:1-33
32 Nda̱wa̱á dí xúgíʼ rígi̱ ga̱jma̱a̱ dí ikhaa niwi̱ji̱ jmbu, Senaquerib rey ndrígóo Asiria ni̱ʼkha̱ mu mato̱ʼo̱o̱ Judá. Nirúguamaʼáanʼ xuajin dí kúgumaʼá, nindoo mato̱ʼo̱o̱ ga̱jma̱a̱ tsiaki̱i̱ ma̱ngaa magruigúu.
2 Índo̱ Ezequías ndiʼyoo dí ni̱ʼkha̱ Senaquerib ga̱jma̱a̱ nandoo maxmína̱ʼ gajmíi̱n xa̱bu̱ Jerusalén,
3 nirajxu̱u̱n príncipes ndrígio̱o̱ ga̱jma̱a̱ soldádiu̱u̱, nirugoo iduu iyaʼ dí rígá náa rexo̱o̱ xuajin ga̱jma̱a̱ ikhiin nimbayíí.
4 Nigimbíin mbaʼin xa̱bu̱, nigi̱ʼdi̱i̱ niruguáá xúgíʼ iduu iyaʼ ga̱jma̱a̱ iyaʼ dí nanújngoo náa ku̱ba̱ʼ rúʼko̱. Nithi: “Náá numuu muniʼñááʼ dí reyes bi̱ kúwá náa Asiria muxkamaa iyaʼ índo̱ gáguwáʼ rá.”
5 Ga̱jma̱a̱ xúgíʼ a̱jkiu̱u̱n niʼni májáanʼ xtájtsí dí niguma gámbáa ga̱jma̱a̱ nitsuajun torre ikhí. Niʼni i̱mba̱ xtájtsí náa rexo̱o̱ xtájtsí. Ma̱ngaa niʼni májáanʼ Bíjní* dí rígá náa Xuajñuu David, niʼni mbaʼa ajua̱nʼ dí nuxmijná ga̱jma̱a̱, ma̱ngaa escudos.
6 Ikhú nigruigi̱i̱n bi̱ mutañajúúnʼ soldado náa xuajin, nigímbíin náa xua̱ dí rígá náa xkrugoo xuajin, niʼthún ajngáa rígi̱ mu maxnún tsiaki̱i̱:*
7 “Gakhi̱i̱ a̱jkia̱la gúni̱ ga̱jma̱a̱ xámiñalaʼ. Xámíñalaʼ ni má xáguáʼáanʼla ku̱ya̱a̱ rey ndrígóo Asiria, xámíñalaʼ ku̱ñu̱u̱n xa̱bu̱ mbaʼin bi̱ xtáa gajmíi̱n, numuu dí itháan má mbaʼin kuwáánʼ gajmiúlú ikháánʼ ki xóo bi̱ xtáa gajmíi̱n ikhaa.
8 Xa̱bu̱ numba̱á xtáa gajmíi̱n ikhaa,* mú ikháánʼlú kuwáánʼ gajmiúlú Jeobá Dios ndrígúluʼ mu mambáyúlú, ma̱ngaa maxmína̱ʼ ga̱jma̱a̱ numulú”. Ajngáa dí niʼthí Ezequías rey ndrígóo Judá nixnún tsiaki̱i̱ xa̱bu̱ xuajin.
9 Nda̱wa̱á Senaquerib rey ndrígóo Asiria, bi̱ xtáa náa Lakís gajmíi̱n mbá xúgíinʼ soldádiu̱u̱, nikuʼmiin xa̱bi̱i̱ náa Jerusalén náa Ezequías rey bi̱ xtáa náa Judá ga̱jma̱a̱ náa mbá xúgíinʼ xa̱bu̱ Judá bi̱ kúwá náa Jerusalén, mu maʼthúún:
10 “Rígi̱ dí naʼthí Senaquerib rey ndrígóo Asiria: ‹Tsáá eku̱ma̱la ku̱ya̱a̱ dí maguanála náa Jerusalén índo̱ kúguamáʼáan rá.
11 Lá tséya̱a̱ dí índo̱ Ezequías naʼtála “Jeobá Dios ndrígulú maʼni káwáanʼ náa ñawúunʼ rey ndrígóo Asiria”, xtáa raʼni nduwáanʼla, nandoo dí magudíaanʼ ga̱jma̱a̱ ewiʼ ma̱ngaa dí makándawala ráʼ.
12 Lá raʼkháa ikhaa má Ezequías bugi̱ bi̱ niʼni gámbáa náa rí mitsídánʼ ga̱jma̱a̱ náa nuxnajxí tsigijñaʼ náa inuu Dios ndrígala,* ga̱jma̱a̱ nda̱wa̱á niʼthún xa̱bu̱ Judá ga̱jma̱a̱ Jerusalén “Gíʼmaa musmbatíga̱la náa inuu mbóó rí najuixnájxi̱ tsigijñaʼ ga̱jma̱a̱ gi̱i̱ gíʼmaa murkuní tsigijñaʼ ráʼ.”
13 Lá tséya̱a̱ dí wajin xiʼñúnʼ ga̱jma̱a̱ ikhúún niniu̱u̱xu̱ i̱ʼwáʼ xuajin dí rígá náa ku̱ba̱ʼ rígi̱ ráʼ. Lá dioses ndrígu̱ún xa̱bu̱ xuajin buʼko̱ niʼngu̱u̱n nini̱ kríya̱a̱ʼ mbañúúnʼ náa ñawúnxu ráʼ.
14 Tsáa lá bi̱ mbá xúgíinʼ dioses bi̱ kúwá náa xuajin rúʼko̱ bi̱ wajin xiʼñúnʼ nini̱ gámbíin, niʼngu̱u̱n nini̱ kríya̱a̱ʼ xuajñún náa ñawúnʼ rá. Lá nakumalaʼ dí Dios ndrígala maʼni káwáanʼ náa ñawúnʼ ráʼ.
15 ¡Xúniʼñámíjná dí maʼni nduwáanʼla ga̱jma̱a̱ maʼni jngawáanʼ Ezequías! Xúnimbala ku̱ya̱a̱. Á mu dí nimbáa dios ndrígóo xuajin o xa̱bu̱ ñajunʼ táʼngo̱o̱ gáʼni kríya̱a̱ʼ xuajñuu náa ñawúnʼ ga̱jma̱a̱ náa ñawúúnʼ wajin xiʼñúnʼ, ¡iwáála Dios ndrígala ikháanʼ maʼngo̱o̱ maʼni káwáanʼ náa ñawúnʼ rá!›”.
16 Xa̱bi̱i̱ nithi má xúʼko̱ dí raʼkhí ga̱jma̱a̱ numuu Jeobá, Dios bi̱ gajkhun, ma̱ngaa nithi dí raʼkhí ga̱jma̱a̱ numuu Ezequías bi̱ nindxu̱u̱ xa̱bi̱i̱.
17 Ma̱ngaa niʼnirámáʼ i̱yi̱i̱ʼ mu matsíjmaa Jeobá, Dios ndrígóo Israel, ga̱jma̱a̱ mu maʼthí dí raʼkhí ga̱jma̱a̱ numuu. Niʼthí: “Xó má dioses ndrígu̱ún i̱ʼwáʼ xuajin táʼngu̱u̱n gúni̱ kríya̱a̱ʼ xuajñún náa ñawúnʼ, xúʼko̱ má Dios ndrígóo Ezequías xáʼngo̱o̱ gáʼni kríya̱a̱ʼ xuajñuu náa ñawúnʼ”.
18 Nitsijmiin má xúʼko̱ náa ajngún judíos xa̱bu̱ Jerusalén bi̱ draʼmíin náa xtájtsí, mu maʼni mamiñún ga̱jma̱a̱ maʼni maguíʼiin, mu xúʼko̱ mato̱ʼo̱o̱ náa xuajin.
19 Nithi dí raʼkhí ga̱jma̱a̱ numuu Dios ndrígu̱ún xa̱bu̱ Jerusalén, xó má nithi ga̱jma̱a̱ numún dioses ndrígu̱ún i̱ʼwáʼ xuajin dí nirígá náa ku̱ba̱ʼ rúʼko̱ bi̱ niniwíin xa̱bu̱ú.
20 Mú rey Ezequías ga̱jma̱a̱ profeta* Isaías a̱ʼdióo Amoz nitajkháan ga̱jma̱a̱ numuu rígi̱, ninda̱ʼa̱ asndu mekhuíí dí mixtambáñún.
21 Ikhú Jeobá nikuʼmaa mbáa ángel bi̱ nigudíin mbá xúgíinʼ soldado bi̱ xkujiinʼ, bi̱ kuya̱ edxu̱u̱ ga̱jma̱a̱ bi̱ nitañajunʼ náa nigriguíin xa̱bi̱i̱ rey bi̱ xtáa náa Asiria, bi̱ nitanga̱a̱ ga̱jma̱a̱ ma̱jti̱ʼ náa ku̱bo̱o̱ʼ. Nda̱wa̱á nito̱ʼo̱o̱ náa guʼwá rí nduyamajkuíí dios ndrígóo náa tikhuun e̱ji̱i̱n nixíyáa ga̱jma̱a̱ espada.
22 Xígi̱ kaʼnii Jeobá niʼni kríya̱a̱ʼ Ezequías gajmíi̱n xa̱bu̱ Jerusalén náa ñawúunʼ Senaquerib rey ndrígóo Asiria ga̱jma̱a̱ náa ñawúúnʼ eʼwíinʼ, niʼni dí marigá tsímáá* náa mbájndi kúwá.
23 Nda̱wa̱á dí nirígá rígi̱, mbaʼin nigún kudúún regalos náa Jerusalén mu muxnáá Jeobá ga̱jma̱a̱ nigún kudúún rí gíʼdoo numuu náa Ezequías rey ndrígóo Judá, bi̱ ra̱ʼkhá tháán ndiyamajkuíí xa̱bu̱ xuajin bi̱ kúwá mbájndi.
24 Nákha mbiʼi rúʼko̱, Ezequías niʼniuu nandii ga̱jma̱a̱ inu makhañúu. Niʼtákáñuu Jeobá ga̱jma̱a̱ ikhaa niriʼñuu, ma̱ngaa nixnúu mbá tsinaʼ rí mbaʼyoo.
25 Mú Ezequías támajkuu dí májánʼ nigumaa. A̱jkiu̱u̱n niʼnimbamínáʼ, niʼni dí Dios makiʼnáa kaʼyoo ikhaa, makiʼnáa kaʼñún xa̱bu̱ Judá ga̱jma̱a̱ xa̱bu̱ Jerusalén.
26 Mú Ezequías nikruíguminaʼ índo̱ a̱jkiu̱u̱n niʼnimbamínáʼ, xó má ikhaa gajmíi̱n mbá xúgíinʼ xa̱bu̱ Jerusalén, Jeobá tákiʼnáa kaʼñúún náa xúgíʼ mbiʼi dí nixtáa Ezequías.
27 Ezequías ni̱jkha̱nú nigiʼdoo mbújkha̱a̱ ga̱jma̱a̱ nikhánáá gamajkhu, niʼni náa mixtagijxi̱i̱ plata, oro, itsí mitsaanʼ,* aceite rí ndataun, escudos ga̱jma̱a̱ mbá xúgíʼ rí gíʼdoo numuu.
28 Ma̱ngaa niʼni náa mixtagijxi̱i̱ trigo, vino nuxi̱ʼ, aceite, ga̱jma̱a̱ niʼni cuarto náa makuwá mixtiʼkuiin xujkiúu, ma̱ngaa niʼni gúláa náa makuwá mugu̱.
29 Nigiʼdoo xuajin mba̱ʼu̱, nigiʼdiin mbaʼin xujkhúʼ, mugu̱ ga̱jma̱a̱ xedi̱, numuu dí Dios niʼni dí ra̱ʼkhá tháán magiʼdoo.
30 Ezequías nirugoo iyaʼ dí na̱ʼkha̱ xígií rijma̱a̱ dí na̱ʼkha̱ náa Guihon nixnúu maʼga kawáá, xígií náa narámaaʼ a̱jkha̱ʼ* náa Xuajñuu David. Xúgíʼ dí niʼni Ezequías nigájnuu májánʼ.
31 Mú índo̱ bi̱ nagún ku̱ñu̱u̱n ajngún príncipes bi̱ kúwá náa Babilonia nigún gúyáá murajxi̱i̱ tsinaʼ dí nirígá náa xuajin, Dios bi̱ gajkhun niniñuuʼ mbáwíí mu xúʼko̱ mbaʼyoo ndiéjunʼ gáʼni ga̱jma̱a̱ mbaʼyoo xúgíʼ dí rígá náa a̱jkiu̱u̱n.
32 Dí naʼthí xóó itháan ga̱jma̱a̱ numuu Ezequías, ngajua rí tsétumuu dí nisngájma,* kiʼniraʼmáʼ náa mbá xúgíʼ dí niwasngájmáá* profeta Isaías, a̱ʼdióo Amoz, náa Libro dí naʼthí ga̱jma̱a̱ numún Reyes bi̱ nikúwá náa Judá ga̱jma̱a̱ náa Israel.
33 Nda̱wa̱á, Ezequías ndiyáa jxu̱u̱ʼ gajmíi̱n wajin xiʼñúuʼ, nidi̱i̱ náa juímuu náa nijuiʼdi̱ín e̱ji̱i̱n David. Índo̱ nikháñuu, mbá xúgíinʼ xa̱bu̱ Judá ga̱jma̱a̱ xa̱bu̱ Jerusalén nixnáá gamajkhu. Ga̱jma̱a̱ Manasés bi̱ nindxu̱u̱ a̱ʼdióo ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ O “Montículo”. Náa ajngáa hebreo ajngáa rígi̱ nandoo gáʼthúu̱n ‹nigumamajtííʼ›.
^ Náa ajngáa hebreo naʼthí, “niʼthúu̱n a̱jkiu̱ún ikhiin”.
^ Náa ajngáa hebreo naʼthí, “náa ikhaa rígá tsiaki̱i̱ ndrígu̱ún xa̱bu̱ú”.
^ Náa ajngáa hebreo naʼthí, “náa rí mitsídánʼ ga̱jma̱a̱ náa najuixnájxi̱ tsigijñaʼ náa ikhaa”.
^ O “gaʼyee, bi̱ naʼthí dí marigá”.
^ O “niʼni dí mbayáa jxu̱u̱ʼ”.
^ O “nagui̱i̱”.
^ O “oeste”.
^ O “visión”.
