Raga̱jma̱ libro ndrígóo Crónicas 33:1-25
33 Manasés gíʼdoo 12 tsiguuʼ índo̱ ni̱jkha̱nú ninindxu̱u̱ rey ga̱jma̱a̱ niʼtáñajunʼ mbá 55 tsiguʼ náa Jerusalén.
2 Ikhaa niʼni dí ra̱májánʼ náa iduu Jeobá, ndiʼyaridoo dí xkawiʼ dí nuni̱ xa̱bu̱ bi̱ Jeobá nixkawíin náa inún xa̱bu̱ Israel.
3 Niʼni májáanʼ xúgíʼ náa rí mitsídánʼ náa rí Ezequías bi̱ ninindxu̱u̱ anu̱u̱* niʼni gámbáa, niʼni náa rí mikarámáʼ tsigijñaʼ náa Baal ga̱jma̱a̱ poste rí mitsúʼkháan.* Nismbáti̱go̱o̱ inuu xúgíʼ dí rígá mekhuíí ga̱jma̱a̱ niʼni ñajuunʼ.
4 Ma̱ngaa niʼni náa mikarámáʼ tsigijñaʼ náa goʼwóo Jeobá náa rí Jeobá niʼthí “Marigá mbiʼyuʼ náa Jerusalén asndu kámuu”.
5 Ma̱ngaa niʼni náa mikarámáʼ tsigijñaʼ náa inuu xúgíʼ dí rígá mekhuíí náa mbá nájma̱ rexo̱o̱ goʼwóo Jeobá.
6 Ga̱jma̱a̱ nixnájxi̱i̱n e̱ji̱i̱n náa aguʼ náa mata A̱ʼdióo Hinón, niʼni magia, niʼni xawan, nirajxi̱ numuu, nigruigi̱i̱n bi̱ nurajxu̱u̱n wajinʼ ga̱jma̱a̱ bi̱ murajxi̱ numún xa̱bu̱. Niʼni mbaʼa dí ra̱májánʼ náa iduu Jeobá mu maʼni dí makásngañu̱u̱ʼ.
7 Ma̱ngaa nikudaaʼ xándú bi̱ nigumaa ga̱jma̱a̱ itsí náa goʼwóo Dios bi̱ gajkhun, náa guʼwá rí Dios niʼthúu̱n David ga̱jma̱a̱ a̱ʼdióo Salomón: “Náa guʼwá rígi̱ ma̱ngaa náa Jerusalén, náa dí ikhúún niraʼwi̱i̱ dí náa mbá xúgíʼ xuajin majkhaʼ* ndrígóo Israel ma̱ni̱ dí marigá mbiʼyuʼ asndu kámuu.
8 Nditháan xátangu̱ún ma̱ni̱ dí rajkúún xa̱bu̱ Israel matsíngu̱u̱nʼ náa xuajin dí nixnu̱u̱n wajin xiʼñúúnʼ, á mu ikhiin nunimbu̱ún ga̱jma̱a̱ tsu̱máá xúgíʼ rí ikhúún nitañajúúnʼ, xúgíʼ Xtángoo, ikha ga̱jma̱a̱ dí na̱tha̱ maguma dí nixnún Moisés”.
9 Manasés niʼni dí magajnúriñu̱u̱ʼ xa̱bu̱ Judá ga̱jma̱a̱ xa̱bu̱ Jerusalén, índo̱ niʼni rí muni̱ itháán dí ra̱májánʼ ki xóo rí nini̱ xa̱bu̱ xuajin bi̱ Jeobá niʼni gámbíin náa inún israelitas.
10 Jeobá niʼthúu̱n Manasés ga̱jma̱a̱ niʼthún xa̱bu̱ xuajin, mú ikhiin túdxawíín.
11 Ikha jngóo Jeobá niʼni dí bi̱ nutañajúúnʼ soldado ndrígio̱o̱ rey bi̱ xtáa náa Asiria magún gúxmijná gajmiún. Niruʼwa̱a̱ Manasés ga̱jma̱a̱ ajua̱nʼ, ga̱jma̱a̱ a̱jma̱ cadenas dí cobre nigún kuya̱a̱ náa Babilonia.
12 Índo̱ nixtáa ramínúuʼ, niʼtákáñuu Jeobá Dios ndrígóo, nixtáa rakruíguminaʼ náa inuu Dios ndrígu̱ún wajin xiʼñúuʼ.
13 Niʼtájkáan má xúʼko̱ ga̱jma̱a̱ Dios nigáwíinʼ a̱jkiu̱u̱n kaʼyoo dí xúʼko̱ niʼtájkáan, niʼdxawuun rí ninda̱ʼa̱ ga̱jma̱a̱ niʼni dí matanga̱a̱ maʼtáñajunʼ náa Jerusalén. Ikhú Manasés ni̱jkha̱nú ndiʼyoo dí Jeobá nindxu̱u̱ Dios bi̱ gajkhun.
14 Nda̱wa̱á dí nirígá rúʼko̱, ikhaa niʼni xtájtsí náa rexo̱o̱ Xuajñuu David, xígií náa narámaaʼ a̱jkha̱ʼ* náa Guihon, náa mata* asndu náa Xkrugoo E̱gi̱ʼ.* Niʼni dí maxnúu xngaa asndu náa Ofel, ga̱jma̱a̱ mitsídánʼ niʼni. Ma̱ngaa nigruigi̱i̱n bi̱ mutañajúúnʼ soldado náa mbá xúgíʼ xuajin dí kúgumaʼá dí rígá náa Judá.
15 Ma̱ngaa niguwíin náa goʼwóo Jeobá dioses bi̱ ragájkhun ga̱jma̱a̱ xándú bi̱ nigumaa ga̱jma̱a̱ itsí, xúʼko̱ má niʼni ga̱jma̱a̱ náa najuixnájxi̱ tsigijñaʼ dí ikhaa niʼni náa kúbá náa rígá goʼwóo Jeobá ga̱jma̱a̱ náa Jerusalén, nikuʼma dí muxidíí náa rexo̱o̱ xuajin.
16 Ma̱ngaa niʼni mújúunʼ náa mixnájxi̱ tsigijñaʼ náa inuu Jeobá, ikhí nigíʼdu̱u̱ nixnájxi̱ tsigijñaʼ dí tsímáá* ga̱jma̱a̱ tsigijñaʼ dí maxnáa núma̱aʼ, ga̱jma̱a̱ niʼthún xa̱bu̱ Judá dí mbuyamajkuíí Jeobá, Dios ndrígóo Israel.
17 Mú xa̱bu̱ xuajin kaʼníí nuxnajxi̱ tsigijñaʼ náa rí mitsídánʼ, maski má i̱ndó náa inuu Jeobá Dios ndrígu̱ún exnajxi̱.
18 Dí naʼthí xóó itháan ga̱jma̱a̱ numuu Manasés, xóo niʼtákáñuu Dios ndrígóo ga̱jma̱a̱ ajngún xa̱bu̱ bi̱ nduyáá rí nawasngájmún* dí nitháán ga̱jma̱a̱ numuu mbiʼyuu Jeobá, Dios ndrígóo Israel, mbá xúgíʼ kiʼniraʼmáʼ náa naʼthí ga̱jma̱a̱ numún reyes bi̱ nikúwá náa Israel.
19 Ma̱ngaa xóo niʼtájkáan ga̱jma̱a̱ xóo nikhánáá dí ninda̱ʼa̱, xúgíʼ aʼkhá dí niʼni ga̱jma̱a̱ xóo táwi̱ji̱ jmbu, mbá xúgíʼ mbaaʼ náa niʼni rí mitsídánʼ nákha xóó tsékruíguminaʼ, ma̱ngaa xóo nitsuajun poste rí mitsúʼkháan ga̱jma̱a̱ xándú bi̱ nigumiin, mbá xúgíʼ kiʼniraʼmáʼ náa ajngáa rí nithi xa̱bu̱ bi̱ nduyáá rí nawasngájmún.
20 Ikhú Manasés ndiyáa jxu̱u̱ʼ gajmíi̱n wajin xiʼñúuʼ, nidi̱i̱ náa mijngii goʼwóo, ga̱jma̱a̱ Amón bi̱ nindxu̱u̱ a̱ʼdióo ni̱jkha̱nú ninindxu̱u̱ nuxi̱i̱ʼ rey.
21 Amón gíʼdoo 22 tsiguuʼ índo̱ ni̱jkha̱nú ninindxu̱u̱ rey ga̱jma̱a̱ niʼtáñajunʼ a̱jma̱ tsiguʼ náa Jerusalén.
22 Ikhaa niʼni dí ra̱májánʼ náa iduu Jeobá xó má niʼni Manasés bi̱ nindxu̱u̱ anu̱u̱. Amón nixnájxi̱ tsigijñaʼ náa inún xúgíinʼ xándú bi̱ niʼnii anu̱u̱ Manasés ga̱jma̱a̱ ndiʼyamajkhún.
23 Mú tákruíguminaʼ náa inuu Jeobá, xó má niʼni anu̱u̱ Manasés, Amón niʼni má xúʼko̱ dí raʼkhí dí niʼni magiʼdoo itháan aʼkhúun.
24 Nda̱wa̱á kayuuʼ xa̱bi̱i̱ niri̱ya̱ʼ awan dí muni̱i̱ ga̱jma̱a̱ nixiyáa má náa goʼwóo.
25 Mú xa̱bu̱ xuajin niradíin xúgíinʼ bi̱ niri̱ya̱ʼ awan dí muni̱i̱ rey Amón ga̱jma̱a̱ nigíiʼ Josías bi̱ nindxu̱u̱ a̱ʼdióo mu mani̱ndxu̱u̱ nuxi̱i̱ʼ rey.
Mbaʼa nota
^ O “tátée”.
^ O “tribu”.
^ O “oeste”.
^ O “bóo”.
^ O “Puerta del Pescado”.
^ O “visión”.
