Raga̱jma̱ libro ndrígóo Crónicas 34:1-33
34 Josías gíʼdoo migiñuʼ tsiguuʼ índo̱ ni̱jkha̱nú ninindxu̱u̱ rey, niʼtáñajunʼ mbá 31 tsiguʼ náa Jerusalén.
2 Ikhaa niʼni dí májánʼ náa iduu Jeobá, niʼni xó má niʼni wajin xiʼñúuʼ David. Tágájnuriyo̱o̱ʼ náa ñawún májánʼ ni má náa ñawún xti̱ʼ.
3 Índo̱ niʼni 8 tsiguʼ dí xtáa raʼtáñajunʼ, índo̱ kaʼníí nindxu̱u̱ dxámá nigíʼdúu ndiyáaʼ Dios ndrígóo wajin xiʼñúuʼ David, ga̱jma̱a̱ índo̱ naʼni má 12 tsiguʼ dí xtáa raʼtáñajunʼ nigíʼdúu niʼni kaʼwi̱i̱ Judá ga̱jma̱a̱ Jerusalén, niʼni gámbáa náa rí mitsídánʼ, poste rí mitsúʼkháan,* xándú bi̱ nigumawíin, ma̱ngaa i̱ʼwáʼ xtiʼkhuu dí niguma ga̱jma̱a̱ ajua̱nʼ.*
4 Ma̱ngaa náa inuu nini̱ gámbáa náa nuxnajxi̱ tsigijñaʼ ndrígu̱ún Baal. Ga̱jma̱a̱ náa nutsikarámáʼ rí ndataun dí trámáʼ náa tsu̱du̱u̱ dí najuixnájxi̱ tsigijñaʼ. Nijkumigu̱u̱ poste rí mitsúʼkháan, xándú bi̱ nigumawíin, xtiʼkhuu dí niguma ga̱jma̱a̱ ajua̱nʼ. Nijkumigu̱u̱ asndu niʼni̱i̱ i̱ndó idiuuʼ, ga̱jma̱a̱ idiuuʼ rúʼko̱ nixpángaa náa iñá wajñúúnʼ bi̱ nuxnajxi̱ tsigijñaʼ rúʼko̱.
5 Ga̱jma̱a̱ nitsikhá i̱tsu̱ún ndxajkun náa nuxnajxi̱ tsigijñaʼ. Xúʼko̱ kaʼnii niʼni kaʼwi̱i̱ Judá ga̱jma̱a̱ Jerusalén.
6 Xuajin náa kúwá bi̱ naguwáʼ náa Manasés, Efraín, Simeón ga̱jma̱a̱ Neftalí, náa niguma gámbáa dí rígá mbájndi ikhí,
7 niʼni gámbáa náa nuxnajxi̱ tsigijñaʼ ma̱ngaa nijkumigu̱u̱ poste rí mitsúʼkháan ga̱jma̱a̱ xándú bi̱ nigumawíin, nijkumigu̱u̱ rí asndu niʼni̱i̱ i̱ndó idiuuʼ, niʼni gámbáa mbá xúgíʼ náa nakarámáʼ rí ndataun dí rígá náa mbá xúgíʼ ku̱ba̱ʼ Israel, nda̱wa̱á nitanga̱a̱ náa Jerusalén.
8 Índo̱ naʼni má 18 tsiguʼ dí xtáa raʼtáñajunʼ, nda̱wa̱á dí niguámbóo niʼni kaʼwi̱i̱ náa mbá xúgíʼ xuajin ga̱jma̱a̱ náa guʼwá rí nduyamajkuíí Dios, nikuʼmaa Safán a̱ʼdióo Azalías, Maaseya bi̱ kayá edxu̱u̱ náa xuajin ga̱jma̱a̱ Joá a̱ʼdióo Joacaz bi̱ naʼnirámáʼ dí naʼni rey, nikuʼmiin dí muni̱ májáanʼ goʼwóo Jeobá Dios ndrígóo.
9 Ikhiin nigún gúyáá Hilquías ndxajkun bi̱ phú kayá edxu̱u̱, nixnáá mbújkha̱a̱ dí niguwáʼ kudúún náa goʼwóo Dios, mbújkha̱a̱ dí levitas bi̱ wájun náa xkrugua nigimbóó, dí nixna bi̱ naguwáʼ náa Manasés, Efraín ga̱jma̱a̱ eʼwíinʼ xa̱bu̱ Israel, xó má dí nixna xa̱bu̱ Judá, bi̱ naguwáʼ náa Benjamín ga̱jma̱a̱ xa̱bu̱ Jerusalén.
10 Ikhú ikhiin nixnún bi̱ nduyáá xóo ejkha̱ ñajunʼ náa goʼwóo Jeobá. Ga̱jma̱a̱ bi̱ nuñejunʼ náa goʼwóo Jeobá nijmún mu muni̱ májáanʼ guʼwá.
11 Nixnún mbújkha̱a̱ bi̱ nuñejunʼ ga̱jma̱a̱ ixi̱, mangiin ñumbáá mu mutsi̱ ga̱jma̱a̱ itsí dí niwiʼtá má, ma̱ngaa mu mutsi̱ ixi̱ dí majuaʼdóoʼ náa ixi̱ mbi̱jua̱ dí jngútámáʼ náa guʼwá dí reyes bi̱ kúwá náa Judá niniña̱a̱nʼ dí maʼga rachúu.
12 Xa̱bu̱ nini̱ májánʼ ñajunʼ ndrígu̱ún. Nindrigi̱i̱n levitas bugi̱ mu mbuya̱ edxu̱u̱ náa ikhiin, Jáhat ga̱jma̱a̱ Abdías bi̱ naguwáʼ náa meraritas, Zacarías ga̱jma̱a̱ Mesulam bi̱ naguwáʼ náa cohatitas, ikhiin mbuyáá xóo ejkha̱ ñajunʼ. Levitas bi̱ najmañún nudi̱i̱,
13 ikhiin nutañajúúnʼ bi̱ kúwá ruñajunʼ* ga̱jma̱a̱ nduyáá xóo ejkha̱ xúgíʼ enii ñajunʼ dí naguma, tikhuun levitas nindxu̱ún secretarios, guáʼdáá mbá ñajunʼ ga̱jma̱a̱ naguájun náa xkrugua.
14 Índo̱ kúwá rurawíi mbújkha̱a̱ dí niguwáʼ kudúún náa goʼwóo Jeobá, ndxajkun Hilquías nixka̱ma̱a̱ libro náa na̱ʼkha̱ Xtángoo ndrígóo Jeobá, dí Moisés nixnún.*
15 Ikha jngóo Hilquías niʼthúu̱n secretario Safán: “Nixka̱ma̱a̱ náa goʼwóo Jeobá mbá libro náa na̱ʼkha̱ Xtángoo”. Ikhú Hilquías nixnúu libro Safán.
16 Ga̱jma̱a̱ Safán ni̱jkha̱a̱ kayóo libro náa rey, niʼthúu̱n: “Xa̱bia̱a̱ʼ kúwá runi̱ xúgíʼ ñajunʼ dí nijuiʼthúún muni̱.
17 Nirawíi mbújkha̱a̱ náa goʼwóo Jeobá, nixnún bi̱ nduyáá xóo ejkha̱ ñajunʼ ga̱jma̱a̱ bi̱ kúwá ruñajunʼ”.
18 Secretario Safán xóó niʼthúu̱n rey: “Ndxajkun Hilquías nixnúʼ mbá libro”. Ikhú Safán nigíʼdu̱u̱ niguxnuu náa inuu rey.
19 Índo̱ rey niʼdxawun ajngáa dí na̱ʼkha̱ náa Xtángoo, nixkuʼtu xtíñuu.
20 Ikhú rey niʼtáñajuunʼ maʼni rígi̱ Hilquías, Ahicam a̱ʼdióo Safán, Abdón a̱ʼdióo Miqueas, secretario Safán ga̱jma̱a̱ Asaya, bi̱ nindxu̱u̱ xa̱bi̱i̱ rey:
21 “Aʼguala gúra̱jxi̱i̱ Jeobá ga̱jma̱a̱ numuʼ, ma̱ngaa ga̱jma̱a̱ numún xa̱bu̱ bi̱ xóó naguanún náa Israel ga̱jma̱a̱ náa Judá, gura̱jxi̱i̱ ga̱jma̱a̱ numuu dí naʼthí náa libro rígi̱ dí nixka̱ma̱a̱la, numuu dí ra̱ʼkhá tháán mbaji̱ʼ dí nakásngañu̱u̱ʼ Jeobá gáxídirámuuʼ náa ikháánʼlú, numuu dí wajin xiʼñúlú na̱nguá ninimbu̱u̱n ajngóo Jeobá, na̱nguá ninimbaníí mbá xúgíʼ dí nigumaraʼmáʼ náa libro rígi̱”.
22 Ikha jngóo Hilquías gajmíi̱n eʼwíinʼ bi̱ nikuʼmiin rey nigún gúyáá profetisa* Huldá. Ikhaa nindxu̱u̱ a̱ʼgiu̱u̱ Salum, a̱ʼdióo Ticvá, a̱ʼdióo Harhás, bi̱ nagujxi̱i̱ xtíin. Ikhaa xtáa náa xuajin nuxi̱ʼ dí rígá náa Jerusalén, ikhí nitamijná gajmiún.
23 Huldá niʼthún: “Rígi̱ dí naʼthí Jeobá, Dios ndrígóo Israel: ‹Gutha̱a̱n xa̱bu̱ bi̱ nikuʼmáanʼla maguwa̱ʼ gúyoʼ:
24 “Rígi̱ dí naʼthí Jeobá: ‹Makuʼmá mbá gamiéjunʼ náa xuajin rígi̱ ga̱jma̱a̱ náa xa̱bu̱ bi̱ kúwá ikhí, xúgíʼ dí ra̱májánʼ dí maguáʼníí dí kiʼniraʼmáʼ náa libro dí niguxnuu rey ndrígóo Judá.
25 Ga̱jma̱a̱ numuu dí nini̱ñu̱nʼ, ma̱ngaa dí nurkuní tsigijñaʼ ndrígu̱ún náa eʼwíinʼ dioses mu muni̱ dí makásnga̱ñu̱ʼ ga̱jma̱a̱ xúgíʼ dí nuni̱, maxidirámuuʼ dí nakásngañu̱ʼ náa xuajin rígi̱ ga̱jma̱a̱ xájuíyuuʼ›”.
26 Mú guta̱a̱nla rey ndrígóo Judá, bi̱ nikuʼmáanʼla murajxi̱i̱ Jeobá: “Rígi̱ dí naʼthí Jeobá, Dios ndrígóo Israel: ‹Ga̱jma̱a̱ numuu ajngáa dí nitadxawíín,
27 dí magíʼnuu xuajin rígi̱ ga̱jma̱a̱ xa̱bu̱ bi̱ kúwá ikhí, numuu dí a̱jkia̱a̱nʼ niʼni gua̱ba̱ʼ ga̱jma̱a̱ nitaxruíguminaʼ náa inuʼ ikhúún bi̱ nindxu̱ʼ Dios, ma̱ngaa dí nitaxkuʼtu xtíñaaʼ ga̱jma̱a̱ dí nitambi̱ya̱ʼ náa inuʼ, ikhúún ma̱ngaa nidxawaanʼ, eʼthí Jeobá.
28 Ikha jngóo maʼgáaʼ ka̱ña̱a̱n náa nijuiʼdi̱ín wajin xiʼñáaʼ,* tsímáá gájuiʼdi̱ín, xáta̱ya̱a̱ xúgíʼ gamiéjunʼ dí ma̱ʼkhá ka̱yo̱ʼ náa xuajin rígi̱ ga̱jma̱a̱ náa xa̱bu̱ bi̱ kúwá ikhí›”›”.
Ikhú nigúun gútháán rígi̱ rey.
29 Ikha jngóo rey nikuʼma dí magimbíin xúgíinʼ bi̱ kuya̱ edxu̱u̱ náa Judá ga̱jma̱a̱ náa Jerusalén.
30 Nda̱wa̱á, rey nitsimuu náa goʼwóo Jeobá gajmíi̱n mbá xúgíinʼ xa̱bu̱ Judá, xa̱bu̱ Jerusalén, ndxajkun ga̱jma̱a̱ levitas, mbá xúgíinʼ xa̱bu̱ xuajin, e̱ji̱n ga̱jma̱a̱ xabuanii, niguxnuu náa inún ajngáa dí na̱ʼkha̱ náa libro dí nimbánuu dí nixkama̱a̱ náa goʼwóo Jeobá.
31 Rey niwi̱ji̱, nimbánuminaʼ ga̱jma̱a̱ Jeobá náa rí nixná ajngóo dí maʼni ñajuunʼ Jeobá, rí maʼnimbo̱o̱ kaʼyoo ga̱jma̱a̱ xúgíʼ a̱jkiu̱u̱n ga̱jma̱a̱ xúgíʼ xóo nindxu̱u̱,* kiʼtáñajunʼ ndrígóo ga̱jma̱a̱ rí naʼni marmáʼáan a̱jkiu̱u̱n, ma̱ngaa ikha ndrígóo, maʼnimbánuu ga̱jma̱a̱ ajngáa xó má kiʼniraʼmáʼ náa rí nimbánuu dí naʼthí náa libro.
32 Ma̱ngaa niʼthún mbá xúgíinʼ xa̱bu̱ bi̱ kúwá náa Jerusalén ga̱jma̱a̱ bi̱ naguwáʼ náa Benjamín dí muxna ajngún munimbaníí. Xa̱bu̱ Jerusalén nini̱ xó má nimbánúún gajmiún Dios ndrígu̱ún wajin xiʼñúúnʼ.
33 Ikhú Josías niʼni gámbáa xúgíʼ rí tsaga* dí rígá náa mbá xúgíʼ ku̱bu̱únʼ israelitas, niʼni dí mbá xúgíinʼ xa̱bu̱ Israel mbuyamajkuíí Jeobá Dios ndrígóo. Náa mbá xúgíʼ mbiʼi dí nixtáa Josías, xa̱bu̱ tágájnuriñu̱u̱nʼ náa Jeobá, Dios ndrígu̱ún wajin xiʼñúúnʼ.
Mbaʼa nota
^ O “ajua̱nʼ dí nurkuiya̱ʼ”.
^ O “bi̱ kúwá rurangoo”.
^ Náa ajngáa hebreo naʼthí, “nixnún ga̱jma̱a̱ ñawúunʼ”.
^ O “gaʼyee, bi̱ naʼthí dí marigá”.
^ Ajngáa rígi̱ najmún mu muthi índo̱ nakáñulú.
^ O “xúgíinʼ xándú”.
