Raga̱jma̱ libro ndrígóo Crónicas 35:1-27
35 Josías niʼniriya̱a̱ʼ ndxa̱a̱ Pascua náa Jeobá náa Jerusalén, niradíin xujkhúʼ bi̱ mixnájxi̱i̱n xóo tsigijñaʼ náa Pascua mbiʼi 14 dí timbá gu̱nʼ.
2 Nigruigi̱i̱n ndxajkun mu munimbaníí ñajunʼ dí kaʼñún muni̱, ga̱jma̱a̱ niʼthún dí munimbaníí ñajunʼ ndrígu̱ún náa goʼwóo Jeobá.
3 Ikhú niʼthún levitas bi̱ nuxnún ikha xúgíinʼ xa̱bu̱ Israel, bi̱ nindxu̱ún kaʼwiin náa Jeobá: “Guxuʼdáaʼ Arca* dí kaʼwu náa guʼwá rí Salomón a̱ʼdióo David, rey ndrígóo Israel niʼni. Ni xáʼyóoʼ muʼgua kuyala ga̱jma̱a̱ xpajpala. Dí xúgi̱ gu̱ni̱ ñajuunʼ Jeobá Dios ndrígala ga̱jma̱a̱ gu̱ni̱ ñajuunʼ xuajñuu Israel.
4 Guniratamijnála xó má bi̱ naguwáʼ náa guʼwún ana̱la, xó má náa grupo kuwáanʼla, ga̱jma̱a̱ xó má niʼnirámáʼ David rey ndrígóo Israel ga̱jma̱a̱ a̱ʼdióo Salomón.
5 Guguajúnla náa rí mikaʼwu, xó má bi̱ naguwáʼ náa guʼwún anu̱ún a̱ngia̱la, eʼwíinʼ xa̱bu̱ xuajin,* náa ikhiin gíʼmaa dí marigá mbá grupo bi̱ naguwáʼ náa guʼwún anu̱ún bi̱ nindxu̱ún levitas.
6 Guradíin xujkhúʼ bi̱ mixnájxi̱i̱n xóo tsigijñaʼ náa Pascua, gu̱ni̱ kaʼwumijnáa ga̱jma̱a̱ gu̱ni̱ ratháá dí majmúún a̱ngia̱la, mu xúʼko̱ munimbaníí ajngóo Jeobá dí niʼthí Moisés”.
7 Josías nixníin mugu̱, e̱jín múgú ga̱jma̱a̱ e̱jín tsújtuunʼ náa mbá xúgíinʼ xa̱bu̱ xuajin bi̱ nigimbíin mu mixnájxi̱i̱n xóo tsigijñaʼ náa Pascua, mbá 30,000 dí mbá xúgíinʼ, ma̱ngaa mbá 3,000 xedi̱. Mbá xúgíʼ rígi̱ nindxu̱u̱ dí gíʼdoo rey.
8 Ma̱ngaa príncipes ndrígóo nixna ga̱jma̱a̱ xúgíʼ a̱jkiu̱ún dí majmúún xa̱bu̱ xuajin, ga̱jma̱a̱ dí majmúún ndxajkun ma̱ngaa levitas. Hilquías, Zacarías ga̱jma̱a̱ Jehiel bi̱ kuya̱ edxu̱u̱ náa goʼwóo Dios bi̱ gajkhun, nixniún ndxajkun mbá 2,600 xujkhúʼ mu mixnájxi̱i̱n xóo tsigijñaʼ náa Pascua ga̱jma̱a̱ mbá 300 xedi̱.
9 Conanías gajmíi̱n a̱ngui̱i̱n, bi̱ mbiʼyuu Semaya ga̱jma̱a̱ Netanel gajmiún Hasabías, Jeiel ga̱jma̱a̱ Jozabad, bi̱ kuya̱ edxu̱u̱ náa levitas, nixniún levitas mbá 5,000 xujkhúʼ bi̱ muxnajxi̱i̱n xóo tsigijñaʼ náa Pascua ga̱jma̱a̱ mbá 500 xedi̱.
10 Nirígá xawii xúgíʼ mu majmaa náa ñajunʼ, ndxajkun nini̱ ñajunʼ dí kaʼñún muni̱ ga̱jma̱a̱ levitas nigúun náa grupo ndrígu̱ún, xó má niʼtáñajúúnʼ muni̱ rey.
11 Niradíin xujkhúʼ bi̱ mixnájxi̱i̱n náa Pascua, índo̱ levitas kúwá ruriʼíí xtún xujkhúʼ, ndxajkun nuxtijyááʼ ga̱jma̱a̱ eʼdi dí ikhiin nuxnún.
12 Ikhú nini̱ májáánʼ mbá xúgíʼ tsigijñaʼ dí nakarámáʼ mu muxnún mbá xúgíinʼ xa̱bu̱ xuajin, bi̱ kúwá náa mámbá grupo xó má bi̱ naguwáʼ náa guʼwún anu̱ún, mu xúʼko̱ ikhiin ma̱ndoo muxnajxi̱ náa Jeobá xó má kiʼniraʼmáʼ náa libro ndrígóo Moisés, xúʼko̱ má nini̱ gajmiún xedi̱ ma̱ngaa.
13 Nixu̱mbu̱ʼ tsigijñaʼ dí najuixnájxi̱ índo̱ naʼni Pascua, xó má naguʼwún nuni̱, ga̱jma̱a̱ tsigijñaʼ dí mikaʼwu ndiji̱i̱ náa daan, náa daan rí ndujíi̱ ga̱jma̱a̱ yaʼduun o náa sartén, nda̱wa̱á mbá nacha̱ nigún kudúún náa xa̱bu̱ xuajin.
14 Ikhú levitas nini̱ májáánʼ ganitsu dí naʼphu̱ índo̱ naʼni Pascua mu mu̱phu̱ ikhiin ga̱jma̱a̱ mu mu̱phu̱ ndxajkun, numuu dí ndxajkun bi̱ naguwáʼ náa Aarón nikúwá ruxnajxi̱ tsigijñaʼ dí nakarámáʼ ga̱jma̱a̱ xtangún xujkhúʼ asndu índo̱ niʼni wakíʼ. Ikha jngóo levitas nini̱ májáánʼ ganitsu mu mu̱phu̱ ikhiin, ga̱jma̱a̱ mu mu̱phu̱ ndxajkun bi̱ naguwáʼ náa Aarón.
15 E̱ji̱i̱n Asaf bi̱ nuni̱ ajmúú, nikúwá runi̱ má xúʼko̱ ñajunʼ dí kaʼñún muni̱ xó má niʼtáñajúúnʼ David, Asaf, Hemán ga̱jma̱a̱ Jedutún, xa̱bu̱ bi̱ ndaʼyoo dí nawasngájmáá* ga̱jma̱a̱ numuu rey, ga̱jma̱a̱ bi̱ nuñewa̱a̱n xkrugua wájun náa mixtiʼkhu xkrugua. Táʼyóoʼ dí muniña̱a̱nʼ ñajunʼ dí kúwá runi̱, numuu dí a̱ngiu̱ún bi̱ nindxu̱ún levitas nini̱ májáánʼ dí mu̱phu̱.
16 Ikha jngóo mbiʼi rúʼko̱, nirígá xawii mbá xúgíʼ ñajuunʼ Jeobá mu magumari̱ya̱a̱ʼ Pascua, ga̱jma̱a̱ mu muxnajxi̱ tsigijñaʼ dí nakarámáʼ náa najuixnájxi̱ tsigijñaʼ ndrígóo Jeobá, xó má niʼtáñajúúnʼ muni̱ rey Josías.
17 Israelitas bi̱ nikúwá ikhí mbiʼi rúʼko̱ niniri̱ya̱a̱ʼ ndxa̱a̱ Pascua, ga̱jma̱a̱ niniri̱ya̱a̱ʼ Ndxo̱o̱ Pan dí ragíʼdoo Levadura* mbá juwan mbiʼi.
18 Nditháan tágumari̱ya̱a̱ʼ ndxa̱a̱ Pascua náa Israel xóo rúʼko̱ asndu nákha mbiʼi dí nixtáa profeta* Samuel, ga̱jma̱a̱ nimbáa dí eʼwíinʼ reyes bi̱ nikúwá náa Israel túniri̱ya̱a̱ʼ mbá ndxa̱a̱ Pascua xóo dí niʼniriya̱a̱ʼ Josías gajmíi̱n ndxajkun, levitas, mbá xúgíinʼ xa̱bu̱ Judá ga̱jma̱a̱ xa̱bu̱ Israel bi̱ nikúwá ikhí, xó má xa̱bu̱ Jerusalén.
19 Ndxa̱a̱ Pascua rígi̱ nigumariya̱a̱ʼ índo̱ naʼni má 18 tsiguʼ dí naʼtáñajunʼ Josías.
20 Nda̱wa̱á dí nijngoo rígi̱, índo̱ Josías niguámbóo niʼni májáanʼ guʼwá náa nduyamajkuíí Dios, Nekó rey ndrígóo Egipto nitsimuu gáxmína̱ʼ náa Carquemis, náa mijngii Éufrates. Ikhú Josías nigájnuu gáxmína̱ʼ ga̱jma̱a̱.
21 Ikha jngóo, ikhaa nikuʼmiin bi̱ magún kuñu̱u̱n ajngáa mu muthán Josías: “Rey ndrígóo Judá, dí eyaaʼ ikháán etaxúdaminaʼ náa rígi̱. Xúgi̱ tséjkhá maxmína̱ʼ ga̱jma̱á nindxa̱a̱ʼ, na̱jkhá gáxmína̱ʼ ga̱jmu̱ʼ i̱mba̱ guʼwá, ga̱jma̱a̱ Dios naʼthí dí gíʼmaa maʼcho̱ʼ. Mu nda̱a̱ dí gágíʼnaaʼ, xáriejún jthi̱i̱n Dios bi̱ xtáa ga̱jma̱á nindxu̱ʼ. Numuu dí á mu natani̱ ikhaa maxíña̱a̱n”.
22 Mú Josías tándoo gátanga̱a̱, ikhaa nigíʼ i̱mba̱ xtíñuu ni̱jkha̱ gáxmína̱ʼ ga̱jma̱a̱. Táʼdxawun ajngáa dí niʼthí Nekó dí na̱ʼkha̱ náa Dios, ni̱jkha̱ gáxmína̱ʼ ga̱jma̱a̱ náa xkua̱ Meguidó.
23 Bi̱ kuda xkamídá nixnáá rey Josías, ga̱jma̱a̱ ikhaa niʼthún xa̱bi̱i̱: “Guríñu̱u̱nla gi̱i̱ numuu dí nini̱ gawúnʼ”.
24 Ikhú xa̱bi̱i̱ niriya̱a̱ʼ náa carro, ga̱jma̱a̱ nixuda̱a̱ʼ náa i̱mba̱ cárriu̱u̱ dí nuxmijná ga̱jma̱a̱, niguwáánʼ kuya̱a̱ náa Jerusalén. Xígi̱ kaʼnii nikháñuu ga̱jma̱a̱ nidi̱i̱ náa nijuiʼdi̱ín wajin xiʼñúuʼ. Mbá xúgíinʼ xa̱bu̱ Judá ga̱jma̱a̱ xa̱bu̱ Jerusalén nikúwá ngíná ga̱jma̱a̱ numuu Josías.
25 Jeremías niʼni mbá ajmúú ngíná ga̱jma̱a̱ numuu Josías, asndu dí mbiʼi xúgi̱ xúgíinʼ xa̱bekha ga̱jma̱a̱ gu̱ʼu̱ nuni̱ má xúʼko̱ ajmúú ga̱jma̱a̱ numuu Josías índo̱ nuni̱ ajmúú dí ngíná. Nixtaʼwíí dí náa Israel gíʼmaa maguma ajmúú ngíná rígi̱, ga̱jma̱a̱ kiʼniraʼmáʼ náa ajmúú dí ngíná.
26 Dí naʼthí xóó itháan ga̱jma̱a̱ numuu Josías, xóo nisngájma ngajua rí tsétumuu* índo̱ niʼnimbo̱o̱ dí kiʼniraʼmáʼ náa Xtángoo ndrígóo Jeobá,
27 ga̱jma̱a̱ mbá xúgíʼ dí niʼni, mbá xúgíʼ kiʼniraʼmáʼ náa Libro dí naʼthí ga̱jma̱a̱ numún Reyes bi̱ nikúwá náa Israel ga̱jma̱a̱ náa Judá.
Mbaʼa nota
^ O “E̱jna̱”.
^ Náa ajngáa hebreo naʼthí, “e̱jñu̱ún xa̱bu̱ xuajin”.
^ O “visión”.
^ O “gaʼyee, bi̱ naʼthí dí marigá”.
