Raga̱jma̱ libro ndrígóo Crónicas 4:1-22
4 Ikhú niʼni náa mikarámáʼ tsigijñaʼ dí niguma ga̱jma̱a̱ cobre, mbá mijna gu̱wa̱ʼ metro* dí mbaʼ, mbá mijna gu̱wa̱ʼ metro dí ma̱ja̱nʼ ga̱jma̱a̱ dí mitsídánʼ mbá a̱jkhu̱ metro.*
2 Ikhú niʼni náa na̱jnu̱ʼ iyaʼ dí mbiʼyuu Lamáa* dí niguma ga̱jma̱a̱ ajua̱nʼ rí nijuiyaʼ. Nindxu̱u̱ dijndi, náa rawuunʼ ga̱jma̱a̱ náa i̱mba̱ rawuunʼ naʼni a̱jkhu̱ metro,* ga̱jma̱a̱ itháan rí a̱jma̱ metro* dí mitsídánʼ, ndayóoʼ mbá ñuñuu dí 13 metro* mu mixtagiéwan ga̱jma̱a̱ náa dí mbá nawa̱a̱.
3 Náa agoo rawuunʼ náa mbájndi kiʼniwíi ra̱ʼkha̱. Gu̱wa̱ʼ ra̱ʼkha̱ náa mbá gúʼxúʼ ga̱jma̱a̱ xúʼko̱ tima náa mbájndi Lamáa, xa̱ʼ tima ra̱ʼkha̱ dí a̱jma̱ tseniʼ.
4 Mbá 12 xedi̱ kuda, ajtsíin bi̱ nuyejxi̱ xígií náa norte, ajtsíin bi̱ nuyejxi̱ xígií náa narámaaʼ a̱jkha̱ʼ,* ajtsíin bi̱ nuyejxi̱ xígií náa sur ga̱jma̱a̱ ajtsíin bi̱ nuyejxi̱ xígií náa nagájnuu a̱jkha̱ʼ.* Náa tsu̱du̱ún grígu Lamáa ga̱jma̱a̱ ikhiin guájun skidiʼ náa ta̱pha̱.
5 Dí mi̱du̱ Lamáa naʼni xóo juwan centímetros,* ga̱jma̱a̱ xóo copa kaʼnii dí rawuunʼ, xóo ri̱ʼi̱ lirio kaʼnii. Na̱jnu̱ʼ mbá 66 mil litro* iyaʼ.
6 Ma̱ngaa niʼni mbá gu̱wa̱ʼ pájxua̱a̱, mbá witsu nigruaʼmáʼ náa ñawún májánʼ ga̱jma̱a̱ mbá witsu nigruaʼmáʼ náa ñawún xti̱ʼ. Ikhí nujñáa ga̱jma̱a̱ nuxumajyaʼ mbá xúgíʼ dí najmún náa nuxnajxi̱ tsigijñaʼ dí nakarámáʼ. Mú Lamáa najmún ndxajkun mu mujñáa rajkúún ga̱jma̱a̱ ñawúúnʼ.
7 Ma̱ngaa niʼni mbá gu̱wa̱ʼ candelabro dí oro, xó má nijuiʼtháán maʼni, nigruaʼmáʼ náa guʼwá rí nduyamajkuíí Dios, mbá witsu náa ñawún májánʼ ga̱jma̱a̱ mbá witsu náa ñawún xti̱ʼ.
8 Ma̱ngaa niʼni mbá gu̱wa̱ʼ mesa, nikudaaʼ náa guʼwá rí nduyamajkuíí Dios, mbá witsu náa ñawún májánʼ ga̱jma̱a̱ mbá witsu náa ñawún xti̱ʼ, ga̱jma̱a̱ niʼni mbá 100 xua̱a̱ dí oro.
9 Niʼni rexo̱o̱ guʼwá náa jngruigu̱u̱n ndxajkun ga̱jma̱a̱ náa rexo̱o̱ dí mba̱a̱, ma̱ngaa náa xkrugoo guʼwá dí mba̱a̱ ga̱jma̱a̱ nixtájmuu mbawíí cobre náa xúgíʼ xkrugua rígi̱.
10 Ma̱ngaa nigíʼ Lamáa náa níjñú mújúunʼ guʼwá, náa ta̱pha̱ rí nagájnuu a̱jkha̱ʼ ga̱jma̱a̱ náa sur.*
11 Hiram ma̱ngaa niʼni cubeta, pala ga̱jma̱a̱ xua̱a̱.
Xígi̱ kaʼnii Hiram niguámbóo niʼni xúgíʼ ñajunʼ náa goʼwóo Dios bi̱ gajkhun dí niʼthúu̱n rey Salomón maʼni:
12 A̱jma̱ rajkhúu dí guájun ga̱jma̱a̱ a̱jma̱ dí trámáʼ edxu̱u̱ dí xóo xua̱a̱ kaʼnii, ma̱ngaa a̱jma̱ dí amuuʼ rí kúgoo ga̱jma̱a̱ dí trámáʼ náa edxu̱u̱ rajkhúu dí wájun.
13 Mbá 400 granadas dí tima náa mbá nájma̱ dí amuuʼ, a̱jma̱ tseniʼ granadas tima náa mámbá dí amuuʼ dí narugoo mbá nájma dí trámáʼ edxu̱u̱ rajkhúu dí xóo xua̱a̱ kaʼnii.
14 Gu̱wa̱ʼ carritos ga̱jma̱a̱ mbá gu̱wa̱ʼ pájxua̱a̱ dí trámáʼ tsu̱du̱u̱.
15 Lamáa ga̱jma̱a̱ mbá 12 xedi̱ bi̱ juádáʼ agoo.
16 Cubeta, pala, tenedor ga̱jma̱a̱ xúgíʼ rí majmaa dí Hiram-Abiv niʼni ga̱jma̱a̱ cobre dí xngiyaʼ mu majmuu rey Salomón náa goʼwóo Jeobá.
17 Rey nikuʼmiin dí murkuiyaʼ mbá xúgíʼ náa molde mi̱du̱ dí niguma ga̱jma̱a̱ ku̱ba̱ʼ, náa mbaaʼ Jordán náa majñu̱u̱ʼ Sucot ga̱jma̱a̱ Zeredá.
18 Salomón niʼni mbaʼa wéñuuʼ dí majmaa, na̱nguá nijuiʼyáá nguáthá ki̱wu̱n cobre.
19 Salomón niʼni mbá xúgíʼ dí majmaa náa goʼwóo Dios bi̱ gajkhun: Xóo náa mikarámáʼ rí ndataun dí niguma ga̱jma̱a̱ oro, mesa náa majngutaʼmáʼ pan dí mixnájxi̱,
20 candelabro ga̱jma̱a̱ lámpara dí niguma ga̱jma̱a̱ mbawíí oro, mu mambiʼi má xúʼko̱ náa inuu cuarto dí rígá itháán awúún xó má awan dí rígá,
21 ri̱ʼi̱, lámpara ga̱jma̱a̱ pinza* dí niguma ga̱jma̱a̱ mbawíí oro,
22 dí najuíyuuʼ ga̱jma̱a̱ aguʼ, xua̱a̱, copa, ga̱jma̱a̱ náa nagi̱wa̱nʼ chámbuʼ dí mbawíí oro, ga̱jma̱a̱ náa riejuun guʼwá, xó má xkrugoo cuarto dí rígá awúún, náa rí phú Mikaʼwu, xúʼko̱ má xkrugoo guʼwá náa rí nduyamajkuíí Dios ma̱ngaa niguma ga̱jma̱a̱ oro.
Mbaʼa nota
^ Náa ajngáa hebreo naʼthí, “gu̱wa̱ʼ gúʼxúʼ”.
^ O “Mar”.
^ Náa ajngáa hebreo naʼthí, “gu̱wa̱ʼ gúʼxúʼ”.
^ Náa ajngáa hebreo naʼthí, “witsu gúʼxúʼ”.
^ Náa ajngáa hebreo naʼthí, “30 gúʼxúʼ”.
^ O “oeste”.
^ O “este”.
^ O “sureste”.
