Raga̱jma̱ libro ndrígóo Crónicas 5:1-14
5 Salomón niguámbóo niʼni xúgíʼ ñajunʼ rí ndiyóoʼ maguma náa goʼwóo Jeobá. Ikhú ni̱ʼkha̱a̱ kagu̱u̱ xúgíʼ dí anu̱u̱* David niʼni ka̱ʼwi̱i̱, ga̱jma̱a̱ nigujxi̱i̱ plata, oro ga̱jma̱a̱ i̱ʼwáʼ rí najmaa náa cuarto dí kajti rí gíʼdoo numuu náa goʼwóo Dios bi̱ gajkhun.
2 Nákha mbiʼi rúʼko̱, Salomón nigímbíin bi̱ kuya̱ edxu̱u̱ náa Israel: Mbá xúgíinʼ bi̱ kuya̱ edxu̱u̱ náa xuajin majkhaʼ* ga̱jma̱a̱ bi̱ kuya̱ edxu̱u̱ náa mámbá guʼwíin xa̱bu̱ xuajin Israel. Niguwáʼ náa Jerusalén mu magúun kuñu̱u̱n arca* dí nimbánuu ndrígóo Jeobá asndu náa Xuajñuu David, xóo muʼthá, Sion.
3 Xúgíinʼ xa̱bu̱ Israel nigimbíin náa inuu rey índo̱ xtáa rarígá ndxa̱a̱,* dí maʼni juwan igu̱nʼ.
4 Ikha jngóo xúgíinʼ bi̱ kuya̱ edxu̱u̱ náa Israel niguwáʼ, ga̱jma̱a̱ levitas nixujxi̱ Arca.
5 Nigún kuñu̱u̱n Arca, guʼwá xtíin náa nagimbíi̱n ga̱jma̱a̱ mbá xúgíʼ rí najmaa dí mikaʼwu dí rígá náa guʼwá xtíin. Nigún kudúún ndxajkun ga̱jma̱a̱ levitas.*
6 Rey Salomón gajmíi̱n mbá xúgíinʼ xa̱bu̱ Israel, bi̱ nijuiʼthúún dí magimbíin gajmíi̱n, kúwá náa inuu Arca. Mugu̱ ga̱jma̱a̱ xedi̱ bi̱ kúwá majuixnájxi̱i̱n, ra̱ʼkhá tháán mbaʼin dí asndu tséʼngo̱o̱ magixnii.
7 Ikhú ndxajkun nigún kuñu̱u̱n arca dí nimbánuu ndrígóo Jeobá náa cuarto dí gídáʼ itháan awúún náa guʼwá, náa rí phú Mikaʼwu, náa agoo xpíjpiúún querubines.
8 Xpíjpiúún querubines juáʼwíi náa rígá Arca, ikha jngóo querubines nuruguáá Arca ga̱jma̱a̱ ixu̱u̱ asndu rijma̱a̱.
9 Ra̱ʼkhá tháán mbi̱jua̱ ixu̱u̱ rí inuu nakujmaa asndu náa cuarto dí Mikaʼwu, náa inuu cuarto dí gídáʼ itháan awúún, mú tsékujmaa asndu rexa̱a̱. Ikhí rígá asndu dí mbiʼi xúgi̱.
10 Nda̱a̱ i̱mba̱ náa Arca i̱ndó a̱jma̱ itsí wajpa dí Moisés nigruiʼyáʼ náa Horeb, índo̱ Jeobá nimbánuminaʼ ga̱jma̱a̱ xuajñuu Israel mbiʼi dí nigájnuu náa Egipto.
11 Índo̱ ndxajkun nigájni̱ín náa dí mikaʼwu, (numuu dí xúgíinʼ ndxajkun bi̱ kúwá ikhí nini̱ kaʼwumijnáa tséʼniuu má náa grupo kúwíin),
12 xúgíinʼ levitas bi̱ nuni̱ ajmúú bi̱ naxnún ikha Asaf, Hemán, Jedutún, gajmiún e̱jñu̱ún mangiin a̱ngiu̱ún bi̱ kugíʼ xtíin paska rí májánʼ kuda címbalos, ajua̱nʼ dí gíʼdoo cuérdóo ga̱jma̱a̱ arpas, guájun náa níjniúu dí nakarámáʼ tsigijñaʼ xígií náa nagájnuu a̱jkha̱ʼ* gajmiún mbá 120 ndxajkun bi̱ nundiyíí trompetas.
13 Bi̱ nudi̱i̱ trompetas ga̱jma̱a̱ bi̱ nuni̱ ajmúú kúwá runi̱ mba̱a̱ ga̱jma̱a̱ nuxna̱a̱ núma̱a̱ Jeobá mbá miʼtsúú xúgíinʼ. Aʼwóo trompetas, címbalos ga̱jma̱a̱ i̱ʼwáʼ ajua̱nʼ nawáán gakhi̱i̱ índo̱ kúwá runi̱ mba̱a̱ Jeobá, “numuu dí ikhaa nindxu̱u̱ májáanʼ, dí nandoo kaʼyulú ndajyúuʼ asndu kámuu”.* Ikhú du̱u̱n nijnííʼ náa guʼwá, náa goʼwóo Jeobá.
14 Ndxajkun na̱nguá nindoo maguanún muñejunʼ ikhí ga̱jma̱a̱ numuu du̱u̱n, numuu dí agiuuʼ Jeobá nijnííʼ náa goʼwóo Dios bi̱ gajkhun.
