Raga̱jma̱ libro ndrígóo Crónicas 6:1-42
6 Ikhú Salomón niʼthí: “Jeobá niʼthí dí ikhaa maxtáa náa majñu̱u̱ʼ du̱u̱n skuniʼ.
2 Dí xúgi̱, ikhúún ni̱ni̱ mbá guʼwá mitsaanʼ* náa maraxtaa, mbá rí mbajyúuʼ náa maraxtaa asndu kámuu”.
3 Nda̱wa̱á rey nitangayi̱i̱ ga̱jma̱a̱ nigíʼdúu niʼni tsajkurámíinʼ mbá xúgíinʼ xa̱bu̱ Israel bi̱ guájun ikhí.
4 Niʼthí: “Gaguma mba̱a̱ Jeobá, Dios ndrígóo Israel, bi̱ niʼnimbánuu ga̱jma̱a̱ ñawúunʼ dí nikudaminaʼ náa anu̱ʼ* David:
5 ‹Asndu nákha mbiʼi dí xuajñunʼ niríya̱a̱ʼ náa ku̱ba̱ʼ ndrígóo Egipto, na̱nguá niraʼwi̱i̱ nimbá xuajin dí rígá náa mbá xúgíʼ xuajin majkhaʼ* ndrígóo Israel mu maʼni mbá guʼwá náa maguma mba̱a̱ mbiʼyuʼ. Ni má táraʼwi̱i̱ mbáa xa̱bu̱ bi̱ mbayá edxu̱u̱ náa xuajñunʼ Israel.
6 Mú dí xúgi̱, niraʼwi̱i̱ Jerusalén mu marigá mbiʼyuʼ ikhí. Ga̱jma̱a̱ niraʼwi̱i̱ David mu maʼtáñajúúnʼ xa̱bu̱ xuajñunʼ Israel›.
7 Náa a̱jkiu̱u̱n anu̱ʼ David nigájnuu dí maʼni mbá guʼwá náa marigá mbiʼyuu Jeobá, Dios ndrígóo Israel.
8 Mú Jeobá niʼthúu̱n anu̱ʼ David: ‹Nigájnuu náa a̱jkia̱a̱nʼ dí matani̱ mbá guʼwá náa maguma mba̱a̱ mbiʼyuʼ, májánʼ má nindxu̱u̱ dí xúʼko̱ kaʼnii nindaaʼ matani̱.
9 Mú raʼkháa ikháán gátani̱ guʼwá. A̱ʼdiáaʼ* bi̱ gáraʼdaa ikhaa gáʼni guʼwá náa maguma mba̱a̱ mbiʼyuʼ›.
10 Jeobá niʼnimbánuu dí nikudaminaʼ, numuu dí ikhúún niriʼkuriya̱a̱ʼ anu̱ʼ David ga̱jma̱a̱ niʼgúnʼ náa xílí* dí nutañajunʼ náa Israel, xó má nikudaminaʼ Jeobá. Ma̱ngaa ni̱ni̱ mbá guʼwá náa marigá mbiʼyuu Jeobá, Dios ndrígóo Israel,
11 ga̱jma̱a̱ ikhí nikuʼdáaʼ Arca* náa kajti dí Jeobá nimbánuu gajmíi̱n xa̱bu̱ xuajin Israel”.
12 Ikhú niwi̱ji̱ náa inuu dí nakarámáʼ tsigijñaʼ náa inuu Jeobá, náa inún mbá xúgíinʼ xa̱bu̱ Israel ga̱jma̱a̱ nikujxi̱ ñawúunʼ.
13 (Salomón niʼni ga̱jma̱a̱ cobre náa mafrigu, ga̱jma̱a̱ nigíʼ náa ta̱pho̱o̱ rexo̱o̱ guʼwá náa nduyamajkuíí Dios, gíʼdoo a̱jma̱ metro* dí mbaʼ, a̱jma̱ metro dí ma̱ja̱nʼ ga̱jma̱a̱ mbá metro* dí mitsídánʼ ga̱jma̱a̱ ikhaa nitsimuu ikhí). Nismbáti̱go̱o̱ náa inún mbá xúgíinʼ xa̱bu̱ Israel, nikujxi̱ ñawúunʼ mekhuíí,
14 ga̱jma̱a̱ niʼthí: “Tátá Jeobá, Dios ndrígóo Israel. Ndawa̱a̱ nimbáa Dios xóo ikháán rijma̱a̱ náa mekhuíí ni má mbayííʼ náa ku̱ba̱ʼ. Ikháán natanimbaníí dí nataxúdaminaʼ ga̱jma̱a̱ natasngájmún dí nandaaʼ xtañún* xa̱bia̱a̱ʼ, bi̱ jngruigu̱u̱n náa kamba̱a̱ʼ ga̱jma̱a̱ xúgíʼ a̱jkiu̱ún.
15 Nitanimbaníí dí nitaxúdaminaʼ náa xa̱bia̱a̱ʼ David bi̱ nindxu̱u̱ anu̱ʼ.* Nitaxúdaminaʼ ga̱jma̱a̱ rawaanʼ, dí xúgi̱ nitanimbaníí ga̱jma̱a̱ ñawáanʼ.
16 Dí xúgi̱ rá, Tátá Jeobá, Dios ndrígóo Israel, atanimbaníí dí nitaxúdaminaʼ náa xa̱bia̱a̱ʼ David, bi̱ nindxu̱u̱ anu̱ʼ, índo̱ niratháán: ‹Á mu ejña̱a̱nʼ najngrui̱gu̱u̱n xó má eʼthí xtángoo ndrígóʼ, xó má nijngrui̱ga̱a̱ʼ ikháán náa kambo̱ʼ, maxtáa má xúʼko̱ náa inuʼ mbáa bi̱ na̱ʼkha̱ náa ikháán bi̱ magi̱ʼi̱ náa xílí rí nutañajunʼ náa Israel›.
17 Dí xúgi̱, Jeobá, Dios ndrígóo Israel, gambanúu dí nitaxúdaminaʼ náa xa̱bia̱a̱ʼ David.
18 Lá maxtáa Dios náa tsu̱du̱u̱ ku̱ba̱ʼ gajmíi̱n xa̱bu̱ numbaaʼ ráʼ. Asndu mekhu dí itháán mitsídánʼ tséʼngo̱o̱ maraxtaa ikháán, ¡iwáála náa guʼwá dí ikhúún ni̱ni̱ rá!
19 Dí xúgi̱, atadxawíín dí naʼtájkháan ga̱jma̱a̱ dí na̱nda̱ʼa̱a̱ʼ xa̱bia̱a̱ʼ bugi̱. Tátá Jeobá, Dios ndrígóʼ, atadxawíín dí nanda̱ʼa̱a̱ʼ matambáyíí ga̱jma̱a̱ dí naʼtájkháan xa̱bia̱a̱ʼ bugi̱ náa inaaʼ.
20 Atiejxi̱i̱ mbiʼíí mbruʼun guʼwá rígi̱, náa dí ikháán niratá marigá mbiʼyaaʼ mu matadxawíín dí naʼtájkháan xa̱bia̱a̱ʼ náa guʼwá rígi̱.
21 Atadxawíín dí nanda̱ʼa̱a̱ʼ xa̱bia̱a̱ʼ bugi̱ dí matambáyíí ga̱jma̱a̱ dí nanda̱ʼa̱a̱ʼ xuajñanʼ Israel náa jmbuu guʼwá rígi̱. Atadxawún asndu mekhuíí náa xtaa. Atadxawún ga̱jma̱a̱ atani̱ mba̱a̱ a̱jkia̱a̱nʼ xtayuxuʼ.
22 Á mu dí mbáa xa̱bu̱ nakiéʼkúun ga̱jma̱a̱ i̱mba̱a̱, nutsudaa dí maxná ajngóo,* á mu dí tséʼnimbánuu mamínuuʼ, á mu dí nda̱wa̱á dí nixná ajngóo nato̱ʼo̱o̱ ga̱jma̱a̱ nawi̱ji̱ náa inuu dí nakarámáʼ tsigijñaʼ dí rígá náa guʼwá rígi̱,
23 atadxawíín asndu mekhuíí ga̱jma̱a̱ atanimbaníí numún xa̱bia̱a̱ʼ: Aratá dí gíʼdoo aʼkhúun xa̱bu̱ ra̱májáanʼ ga̱jma̱a̱ atani̱ dí ra̱májánʼ dí naʼni matanga̱a̱ náa edxu̱u̱, aratá dí ragíʼdoo aʼkhúun xa̱bu̱ májáanʼ ga̱jma̱a̱ atani̱ numa̱a̱ xó má dí naʼni.
24 Á mu dí xa̱bu̱ xuajñaanʼ Israel tséʼngu̱u̱n gúni̱ gajmiún xa̱bu̱ sia̱nʼ ga̱jma̱a̱ numuu dí nakiéʼkúún má xúʼko̱ náa ikháán, mú á mu natangiín, nuni̱ mba̱a̱ mbiʼyaaʼ, nutajkháan ga̱jma̱a̱ nunda̱ʼa̱a̱ʼ dí matambáñún náa guʼwá rígi̱,
25 ikhú atadxawún asndu mekhuíí, atani̱ mba̱a̱ a̱jkia̱a̱nʼ xtayáá dí nikiéʼkhúún xa̱bu̱ xuajñanʼ Israel ga̱jma̱a̱ aya̱a̱ʼ xtiin náa ku̱ba̱ʼ dí niraxnún ikhiin ga̱jma̱a̱ dí niraxnún wajin xiʼñúúnʼ.
26 Índo̱ mekhu gágúgoo ga̱jma̱a̱ ni xáxnúu ruʼwa, numuu dí nakiéʼkúún má xúʼko̱ náa ikháán, mú á mu nutajkháan náa jmbuu guʼwá rígi̱, nuni̱ mba̱a̱ mbiʼyaaʼ ga̱jma̱a̱ nuniña̱a̱nʼ aʼkhá dí nuni̱, numuu dí ikháán nitani̱ dí muxruigumíjná,
27 ikhú atadxawún asndu mekhuíí ga̱jma̱a̱ atani̱ mba̱a̱ a̱jkia̱a̱nʼ aʼkhá dí nuni̱ xa̱bia̱a̱ʼ, aʼkhúun xuajñanʼ Israel, numuu dí ikháán matasngajmún kamba̱a̱ májánʼ náa gíʼmaa majngruigu̱u̱n, atani̱ dí maxnúu ruʼwa náa tsu̱du̱u̱ ku̱ba̱ʼ dí niraxnáá xuajñanʼ maʼni mbayuuʼ.
28 Á mu dí náa mbaaʼ Israel narígá ewiʼ, nandii, naxnúu giñánʼ mijkha, na̱ʼkha̱ e̱wi, natu̱ʼu̱u̱n tsíʼbu,* o xa̱bu̱ sia̱nʼ nuruguamaʼáan náa mbá xuajin dí rígá náa mbaaʼ o á mu narígá i̱mba̱ gamiéjunʼ o nandii,
29 tséʼniuu má xóo gáʼtájkáan, dí gánda̱ʼa̱a̱ʼ mbáa xa̱bu̱ o mbá xúgíinʼ xa̱bu̱ xuajñanʼ Israel índo̱ gúxuʼwíi ñawúúnʼ náa jmbuu guʼwá rígi̱ (numuu rí mámbáa ndaʼyoo xóo emínuuʼ ga̱jma̱a̱ xóo egawuunʼ),
30 ikhú atadxawíín asndu mekhuíí, asndu náa xtaa, atani̱ mba̱a̱ a̱jkia̱a̱nʼ xtañún, atani̱ numa̱a̱ mámbáa xó má dí naʼni, numuu dí ikháán natatsinuuʼ a̱jkiu̱ún (mbáwíín ikháán natatsinuuʼ májánʼ a̱jkiu̱u̱n mámbáa xa̱bu̱),
31 mu xúʼko̱ mamiñún kuyaaʼ índo̱ gájngruigu̱u̱n náa kamba̱a̱ʼ náa mbá xúgíʼ mbiʼi dí gákúwá náa ku̱ba̱ʼ dí niraxnún wajin xiʼñúxu.
32 Ma̱ngaa ga̱jma̱a̱ numuu xa̱bu̱ na̱ʼkha̱á bi̱ na̱nguá xtáa náa xuajñanʼ Israel, bi̱ na̱ʼkha̱ náa xuajin tsínguáʼ ga̱jma̱a̱ numuu mbiʼyaaʼ, ma̱ngaa ga̱jma̱a̱ tsiaki̱i̱ dí gíʼdoo ñawáanʼ, na̱ʼkha̱ ga̱jma̱a̱ naʼtájkáan náa guʼwá rígi̱,
33 atadxawíín asndu mekhuíí, asndu náa xtaa, atani̱ xúgíʼ dí gánda̱ʼa̱a̱ʼ xa̱bu̱ na̱ʼkha̱á, mu xúʼko̱ xúgíʼ xuajin dí rígá náa tsu̱du̱u̱ ku̱ba̱ʼ muniʼnuuʼ mbiʼyaaʼ, mamiñún kuyaaʼ xó má eʼni xuajñanʼ Israel ga̱jma̱a̱ mbuyáá dí mbiʼyaaʼ nigri̱ga̱a̱ náa guʼwá dí ni̱ni̱.
34 Á mu xa̱bu̱ xuajñanʼ nagún gúxmijná gajmiún xa̱bu̱ sia̱nʼ ndrígu̱ún náa kamba̱a̱ dí nitaxúʼmiin ga̱jma̱a̱ nutakáñáaʼ náa jmbuu xuajin dí nitraʼwíí ga̱jma̱a̱ náa jmbuu guʼwá dí ni̱ni̱ mu maguma mba̱a̱ mbiʼyaaʼ,
35 ikhú atadxawíín asndu mekhuíí dí gútajkáan, dí gúnda̱ʼa̱a̱ʼ ga̱jma̱a̱ ataniu̱u̱n dí májánʼ.
36 Á mu dí nakiéʼkúún náa ikháán (numuu dí ndawa̱a̱ nimbáa bi̱ tsékiéʼkúun) ga̱jma̱a̱ ikháán nakhásngaña̱a̱nʼ xtañún, naraxnájxi̱i̱n náa xa̱bu̱ sia̱nʼ ga̱jma̱a̱ ikhiin nagún kudiin náa i̱mba̱ xuajin tséʼniuu á mu mitsínguánʼ o mijngii,
37 ga̱jma̱a̱ ikhiin nugíiʼ a̱jkiu̱ún índo̱ kúwá náa xuajin dí ni̱jkha̱ kiʼdiin, natangiín náa ikháán ga̱jma̱a̱ nunda̱ʼa̱a̱ʼ dí matambáñún asndu náa xuajin rí kúwá náa ni̱jkha̱ kiʼdiin, ga̱jma̱a̱ nuthanʼ ‹Nixuʼdámíjna̱xu̱ aʼkhá, nikiéʼkuxuʼ, nini̱xu dí raʼkhí kayuuʼ›,
38 á mu natangiín náa ikháán ga̱jma̱a̱ xúgíʼ a̱jkiu̱ún, ga̱jma̱a̱ xúgíʼ xóo nindxu̱ún* náa xuajin dí ni̱jkha̱ kiʼdiin, nutakáñaaʼ náa jmbuu ku̱ba̱ʼ dí niraxnún wajin xiʼñúúnʼ ga̱jma̱a̱ náa xuajin dí ikháán nitraʼwíí, ma̱ngaa náa guʼwá dí ikhúún ni̱ni̱ mu maguma mba̱a̱ mbiʼyaaʼ,
39 ikhú atadxawíín asndu mekhuíí, asndu náa xtaa, dí nutajkháan ga̱jma̱a̱ dí nunda̱ʼa̱a̱ʼ matambáñún, ataniu̱u̱n dí májánʼ, atani̱ mba̱a̱ a̱jkia̱a̱nʼ xtayáá xuajñanʼ dí nikiéʼkúun náa ikháán.
40 Dí xúgi̱, Dios ndrígóʼ, atiejxi̱ má xúʼko̱ ga̱jma̱a̱ araxnátíʼñaminaʼ matadxawíín dí gútajkáan náa guʼwá rígi̱.
41 Dí xúgi̱, Jeobá Dios, atatsimaaʼ náa ndayáa jxa̱a̱ʼ, ikháán ga̱jma̱a̱ʼ Arca dí nindxu̱u̱ tsiaki̱i̱ ndrígáaʼ. Ndxajkun ndrígáaʼ, Jeobá Dios, gusngajma dí ikháán na̱dxa̱ʼ jcháaʼ dí maguma kríya̱a̱ʼ xuajñanʼ,* ga̱jma̱a̱ bi̱ naguájun jmbu náa ikháán gaʼdxún ga̱jma̱a̱ numuu dí májánʼ a̱jkia̱a̱nʼ.
42 Jeobá Dios, xátsíngua̱a̱nʼ náa bi̱ nitraʼwíi. Garmáʼáan a̱jkia̱a̱nʼ ngajua rí tsétumuu rí nitasngájmáá xa̱bia̱a̱ʼ David”.
Mbaʼa nota
^ O “nagui̱i̱”.
^ O “táteʼ”.
^ O “tribu”.
^ Náa ajngáa hebreo naʼthí, “a̱ʼdiáaʼ bi̱ magajnúu náa tsu̱da̱a̱ʼ”.
^ O “trono”.
^ O “E̱jna̱”.
^ Náa ajngáa hebreo naʼthí, “ajtsú gúʼxúʼ”.
^ O “táteʼ”.
^ O “dí maʼni majuiʼtasríguíi”. Xóo muʼthá, dí gákudaminaʼ ma̱ndoo maʼni dí majuiʼtasríguíi o mamínuuʼ á mu dí naʼni nduwaʼ o tséʼnimbánuu.
^ Náa ajngáa hebreo naʼthí, “ndxajkun gagúwúnʼ xtíñún dí maguma káwíin”.
