Raga̱jma̱ libro ndrígóo Crónicas 7:1-22
7 Índo̱ Salomón niguámbóo niʼtájkháan, nigajtaa aguʼ mekhuíí ni̱ʼkhu̱ tsigijñaʼ dí nakarámáʼ ga̱jma̱a̱ i̱ʼwáʼ tsigijñaʼ, aguʼ rí naxpíbiʼ ndrígóo Jeobá nijnííʼ náa guʼwá.
2 Ndxajkun na̱nguá nindoo matu̱ʼu̱u̱n náa goʼwóo Jeobá, numuu dí agiuuʼ Jeobá nijnííʼ náa goʼwóo Jeobá.
3 Xúgíinʼ xa̱bu̱ xuajin Israel kúwá ruyáá índo̱ nigajtaa aguʼ ga̱jma̱a̱ índo̱ aguʼ rí naxpíbiʼ ndrígóo Jeobá nikujmaa náa guʼwá. Nismbati̱gu̱u̱n asndu mbayííʼ náa tsu̱du̱u̱ itsí, nigíʼ inún ga̱jma̱a̱ ni̱xna̱a̱ núma̱aʼ Jeobá, “numuu dí ikhaa nindxu̱u̱ májáanʼ, dí nandoo kaʼyulú* ndajyúuʼ asndu kámuu”.
4 Rey gajmíi̱n mbá xúgíinʼ xa̱bu̱ xuajin nixnajxi̱ tsigijñaʼ gamajkhu náa inuu Jeobá.
5 Rey Salomón nixnájxi̱i̱n xóo tsigijñaʼ mbá 22,000 xedi̱ ga̱jma̱a̱ mbá 120,000 mugu̱. Xúʼko̱ kaʼnii niʼni dí rey gajmíi̱n mbá xúgíinʼ xa̱bu̱ xuajin nini̱ ndxo̱o̱ goʼwóo Dios bi̱ gajkhun.
6 Ndxajkun guájun má náa kaʼñún, xúʼko̱ má levitas mangiin, kuda ajua̱nʼ dí nuni̱ ga̱jma̱a̱ ajmúú náa Jeobá. (Rey David niʼni ajua̱nʼ rígi̱ mu majmuu maxnáa núma̱aʼ Jeobá, ma̱ngaa mu majmuu maʼni ajmúú ga̱jma̱a̱,* “numuu dí nandoo kaʼyulú ndajyúuʼ asndu kámuu”). Ndxajkun nundiyííʼ xígu trompeta náa inún levitas, índo̱ mbá xúgíinʼ israelitas guájun.
7 Salomón niʼni kaʼwi̱i̱ ta̱pho̱o̱ rexo̱o̱ guʼwá dí gíʼ náa inuu goʼwóo Jeobá, ndiyóoʼ dí maxnájxi̱ ikhí tsigijñaʼ dí nakarámáʼ ga̱jma̱a̱ xtangoo tsigijñaʼ dí tsímáá.* Numuu dí náa nakarámáʼ tsigijñaʼ dí niguma ga̱jma̱a̱ cobre dí niʼni Salomón táʼngo̱o̱ mixnájxi̱ tsigijñaʼ dí nakarámáʼ, tsigijñaʼ dí tsígáʼ ga̱jma̱a̱ xtangún xujkhúʼ.
8 Mbiʼi rúʼko̱, Salomón niʼni ndxa̱a̱ mbá juwan mbiʼi gajmíi̱n mbá xúgíinʼ xa̱bu̱ Israel, ra̱ʼkhá tháán mbaʼin xa̱bu̱ bi̱ naguwáʼ mitsínguánʼ, xóo náa Lebó-Hamat* ga̱jma̱a̱ náa mata* ndrígóo Egipto.
9 Mú índo̱ niʼni migiñuʼ mbiʼi,* nini̱ mbá ndxa̱a̱ kiejuunʼ, numuu dí mbá juwan mbiʼi nini̱ ndxo̱o̱ náa nakarámáʼ tsigijñaʼ ga̱jma̱a̱ mbá juwan mbiʼi nini̱ ndxa̱a̱.
10 Mbiʼi 23 dí maʼni juwan igu̱nʼ, nikuʼmiin xa̱bu̱ magúun náa guʼwún. Asndu nadxún nigúun, numuu rí ndiyáá xóo Jeobá nisngájmuu dí májáanʼ a̱jkiu̱u̱n kaʼyoo David, Salomón ga̱jma̱a̱ xuajñuu Israel.
11 Xígi̱ kaʼnii Salomón niguámbóo niʼni goʼwóo Jeobá ga̱jma̱a̱ goʼwóo* rey, nigájnuu májánʼ awan dí niríya̱ʼ Salomón mu maʼni goʼwóo Jeobá ga̱jma̱a̱ goʼwóo má ikhaa.
12 Mbruʼun nisngájmaminaʼ Jeobá náa Salomón ga̱jma̱a̱ niʼthúu̱n: “Nidxawuun rí niratájkáan, niraʼwi̱i̱ guʼwá rígi̱ mu mani̱ndxu̱u̱ mbá guʼwá náa majuixnájxi̱ tsigijñaʼ.
13 Índo̱ gárugoo mekhu ga̱jma̱a̱ ni xáxnúu ruʼwa, ma̱ngaa índo̱ gátañájúúnʼ tsíʼbu* dí mu̱phu̱ mbá xúgíʼ iná maxaʼ dí rígá náa xuajin, ga̱jma̱a̱ á mu xúʼko̱ gákúʼmá mbá nandii náa xuajin,
14 á mu xuajñunʼ dí kayá mbiʼyuʼ, nakruíguminaʼ, naʼtájkháan, ndayáʼ mbaʼyoo inuʼ ga̱jma̱a̱ naniñuuʼ raʼni dí ra̱májánʼ, ikhú madxawun asndu mekhuíí, ma̱ni̱ mba̱a̱ a̱jkiu̱nʼ ka̱yo̱o̱ aʼkhá dí nikudaminaʼ ga̱jma̱a̱ ma̱ni̱ májáanʼ ku̱bo̱o̱ʼ.
15 Dí xúgi̱, iduʼ mambáʼtoo má xúʼko̱ ga̱jma̱a̱ cháʼwunʼ mu madxawun dí gútajkáan náa guʼwá rígi̱.
16 Dí xúgi̱ niraʼwi̱i̱ ga̱jma̱a̱ ni̱ni̱ kaʼwi̱i̱ guʼwá rígi̱ rí nitani̱ mu mbiʼyuʼ marigá asndu kámuu ikhí, iduʼ ga̱jma̱a̱ a̱jkiu̱nʼ marigá asndu kámuu ikhí.
17 Á mu najngrui̱ga̱a̱ʼ náa kambo̱ʼ xó má niʼni ana̱a̱ʼ* David, ma̱ngaa natani̱ xúgíʼ rí natañájuanʼ, natatsimba̱a̱ʼ xtángoo ndrígóʼ ga̱jma̱a̱ dí na̱tha̱ maguma,
18 ikhúún maʼgíʼ xília̱a̱ʼ* náa maratañájunʼ, xó má nikuʼdáminaʼ náa ana̱a̱ʼ David índo̱ ni̱thu̱u̱n ‹Maxtáa má xúʼko̱ mbáa bi̱ na̱ʼkha̱ náa ikháán bi̱ magi̱ʼi̱ náa xílí rí nutañajunʼ náa Israel›.
19 Mú á mu ikháanʼla nuniʼñáánʼ ruyamajkhuʼ ga̱jma̱a̱ tsénimbáníí kiʼtáñajunʼ ndrígóʼ dí ni̱xna̱la, nduyamajkhún eʼwíinʼ dioses ga̱jma̱a̱ nusmbatígala̱ inún,
20 ikhú maríya jngayii Israel náa ku̱ba̱ʼ dí ni̱xnu̱u̱ ga̱jma̱a̱ mayejxíngaa náa inuʼ guʼwá rí ni̱ni̱ kaʼwi̱i̱ náa marigá mbiʼyuʼ, maʼga̱nú mani̱ndxu̱u̱ mbá rí xámajkhún* kuyáá, ga̱jma̱a̱ mutsijmaa xa̱bu̱ bi̱ kúwíin náa xúgíʼ xuajin.
21 Ga̱jma̱a̱ guʼwá rígi̱, i̱ndó idiuuʼ gáwanáa. Xúgíinʼ bi̱ gánújngún ikhí maʼniún tsiánguá índo̱ gúyejxi̱i̱ ga̱jma̱a̱ murajxi̱: ‹Náá numuu rí Jeobá niʼniuu xígi̱ kaʼnii ku̱ba̱ʼ ga̱jma̱a̱ guʼwá rígi̱ rá.›
22 Ikhú muthi: ‹Numuu rí niniña̱a̱nʼ Jeobá, Dios ndrígu̱ún wajin xiʼñúúnʼ bi̱ niguwíin náa ku̱ba̱ʼ ndrígóo Egipto. Nigún kidxúúnʼ eʼwíinʼ dioses, nismbati̱gu̱u̱n náa inún ga̱jma̱a̱ ndiyamajkhún. Ikha jngóo ikhaa ni̱ʼkha̱ kagu̱u̱ xúgíʼ gamiéjunʼ rígi̱ náa ikhiin›”.
Mbaʼa nota
^ Mbáa gi̱i̱ naʼthí ga̱jma̱a̱ numún levitas.
^ O “índo̱ nadxu̱ʼ mata̱ʼa̱a̱ʼ náa Hamat”.
^ O “bóo”.
^ Mbá mbiʼi nda̱wa̱á dí nijngoo ndxa̱a̱ o mbiʼi 15.
^ O “náa naʼtáñajunʼ”.
^ O “tátiáaʼ”.
^ O “trono ndrígáaʼ”.
^ Náa ajngáa hebreo naʼthí, “mbá proverbio”.
