Raga̱jma̱ libro ndrígóo Crónicas 8:1-18
8 Mbá 20 tsiguʼ ndijyúuʼ Salomón mu maʼni goʼwóo Jeobá ga̱jma̱a̱ goʼwóo ikhaa,
2 Salomón niʼni májáanʼ xuajin rí nixnúu Hiram ga̱jma̱a̱ niniñuuʼ rí israelitas* makuwá ikhí.
3 Ma̱ngaa Salomón ni̱jkha̱ Hamat-Zobá ga̱jma̱a̱ niʼngo̱o̱ nirígúu.
4 Ikhú niʼni májáanʼ xuajin Tamor, náa ku̱ba̱ʼ mijxooʼ* ga̱jma̱a̱ xúgíʼ xuajin náa nagujxi̱i̱ dí gíʼdoo rí niʼni náa Hamat.
5 Ma̱ngaa niʼni xuajin Bet-Horón Alta ga̱jma̱a̱ Bet-Horón Baja xuajin rígi̱ kúgumaʼá ga̱jma̱a̱ xtájtsí dí mitsídánʼ, gíʼdoo xkrugua ga̱jma̱a̱ juáda jngaa ixi̱ mbi̱jua̱,
6 ga̱jma̱a̱ xuajin Baalat xúʼko̱ má náa xúgíʼ xuajin náa nagujxi̱i̱ dí gíʼdoo Salomón, náa xuajin dí rígá cárriu̱u̱, náa xuajin rí kúwíin xa̱bu̱ bi̱ nudrúwíin wáyú ga̱jma̱a̱ xúgíʼ rí nindoo maʼni Salomón náa Jerusalén, náa Líbano ga̱jma̱a̱ náa xúgíʼ xuajin dí ikhaa naʼtáñajunʼ.
7 Mú xúgíinʼ xa̱bu̱ bi̱ niguanún xóo hititas, amorreos, perizitas, heveos, jebuseos bi̱ na̱nguá nindxu̱ún xa̱bu̱ Israel,
8 Salomón nigruaʼmáʼ mbiʼñún bi̱ naguwáʼ náa ikhiin bi̱ xóó naguanún náa xuajin, bi̱ israelitas táʼngu̱u̱n gúni̱ gámbíin, mu xúʼko̱ muñajunʼ gakhi̱i̱ ga̱jma̱a̱ xúʼko̱ kúwíin asndu rí mbiʼi xúgi̱.
9 Mú Salomón táʼni dí israelitas mani̱ndxu̱ún ñumbáá náa ñajunʼ ndrígóo, numuu rí ikhiin nindxu̱ún soldádiu̱u̱, bi̱ kuya̱ edxu̱u̱ náa soldado ga̱jma̱a̱ bi̱ kuya̱ edxu̱u̱ náa bi̱ nagún kudúún carro, ma̱ngaa nudrúwíin wáyú.
10 Kúwá mbá 250 bi̱ kuya̱ edxu̱u̱ náa bi̱ nuxna ikha náa ñajunʼ ndrígóo rey Salomón, ma̱ngaa bi̱ nuthúún xa̱bu̱ xóo muñajunʼ.
11 Salomón ma̱ngaa niríya̱a̱ʼ wáxióo* faraón náa Xuajñuu David mu maʼga̱a̱ kayáa náa guʼwá rí ikhaa má niʼni, niʼthí: “Maski ajndu nindxu̱u̱ a̱ʼgiu̱ʼ, mú xándoo maxtáa náa goʼwóo rey David bi̱ xtáa náa Israel, numuu rí xuajin náa ni̱ʼkha̱ Arca* ndrígóo Jeobá nindxu̱u̱ kaʼwu”.
12 Ikhú Salomón nixnájxi̱ tsigijñaʼ gamajkhu dí mikarámáʼ náa inuu Jeobá, náa nakarámáʼ tsigijñaʼ ndrígóo Jeobá rí ikhaa má niʼni náa inuu corredor.
13 Xúgíʼ mbiʼi naxnájxi̱ tsigijñaʼ xó má eʼthí náa kiʼtáñajunʼ ndrígóo Moisés dí mbiʼi sábado, índo̱ nagi̱ʼi̱ gu̱nʼ rudiiʼ ga̱jma̱a̱ náa ajtsú ndxa̱a̱ dí narígá mbá tsiguʼ: Ndxo̱o̱ Pan dí ragíʼdoo Levadura,* Ndxo̱o̱ Xmáná* ga̱jma̱a̱ Ndxo̱o̱ guʼwá xtúguá.*
14 Ma̱ngaa nigruigi̱i̱n mámbá grupo ndxajkun mu muni̱ ñajunʼ xóo awan dí nigruiga̱ David bi̱ nindxu̱u̱ anu̱u̱,* ma̱ngaa nigruigi̱i̱n levitas mu muni̱ ñajunʼ náa muni̱ mba̱a̱ Dios ga̱jma̱a̱ mumbañún ndxajkun xó má ñajunʼ rí nuni̱ mámbá mbiʼi, ma̱ngaa nigruigi̱i̱n mámbá grupo bi̱ nuñewa̱a̱n xkrugua, xó má niʼtáñajúúnʼ David xa̱bi̱i̱ Dios bi̱ gajkhun.
15 Túni̱ gaʼdu̱u̱n dí rey niʼtáñajúúnʼ muni̱ ndxajkun ga̱jma̱a̱ levitas, xó má niʼtáñajúúnʼ muni̱ náa naxtagijxi̱i̱ xúgíʼ rí gíʼdoo.
16 Kuduun niʼni xúgíʼ ñajunʼ Salomón asndu nákhá mbiʼi rí nigíʼ rajkhúu goʼwóo Jeobá, asndu índo̱ niguámbóo raʼni. Xúʼko̱ kaʼnii niguámbóo raʼni goʼwóo Jeobá.
17 Ikhú Salomón ni̱jkha̱ náa Ezión-Guéber ga̱jma̱a̱ náa Elot, náa rawuunʼ lamáa,* náa ku̱ba̱ʼ ndrígóo Edom.
18 Hiram nikuʼma barco ga̱jma̱a̱ nikuʼmiin xa̱bi̱i̱ bi̱ najmañún nagún kudúún barco náa Salomón. Nigún gajmiún xa̱bi̱i̱ Salomón náa Ofir ga̱jma̱a̱ ikhí niguwáa̱nʼ kudúún 15,390 kilo* oro ga̱jma̱a̱ nixnajxi̱i̱ rey Salomón.
Mbaʼa nota
^ Náa ajngáa hebreo naʼthí, “e̱ji̱i̱n Israel”.
^ O “desierto”.
^ O “a̱ʼdée dxáʼgú”.
^ O “E̱jna̱”.
^ Rígi̱ ma̱ngaa najmaʼnuuʼ xóo ndxa̱a̱ rí naxtagijxi̱i̱ rí nijuiʼdu. O “Pentecostés”.
^ O “tátée”.
^ O “mar”.
