Raga̱jma̱ libro ndrígóo Crónicas 9:1-31
9 Reina bi̱ xtáa náa Saba* niʼdxawuun ga̱jma̱a̱ numuu Salomón, ikha jngóo ni̱ʼkha̱ gáʼyoo Salomón náa Jerusalén, mu mbaʼyoo á mu gajkhun ga̱jma̱a̱ mu maʼniuu graxe̱ dí gakhi̱i̱. Ni̱ʼkha̱nú gajmíi̱n mbaʼin xa̱bi̱i̱ gajmiún camello bi̱ kuda aceite rí ndataun, ma̱ngaa ra̱ʼkhá tháán mbaʼa oro ga̱jma̱a̱ itsí rí mitsaanʼ.* Nixnáxi̱minaʼ náa inuu Salomón ga̱jma̱a̱ niʼthúu̱n mbá xúgíʼ rí e̱ʼkha̱ gáʼthúu̱n.
2 Salomón niriʼña̱a̱ mbá xúgíʼ dí nirajxu̱u̱, tárígá nimbá dí gakhi̱i̱* ndiʼyoo Salomón, nijmaa niriʼña̱a̱ mbá xúgíʼ.
3 Índo̱ reina bi̱ na̱ʼkha̱ náa Saba ndiʼyoo xúgíʼ rí najmañuu Salomón, guʼwá dí niʼni,
4 ganitsu dí trámáʼ náa mésóo, xóo tri̱gi̱i̱n xa̱bi̱i̱, ñajunʼ dí nuni̱ bi̱ nudra̱ma̱ʼ ganitsu ga̱jma̱a̱ xtíin kiejunʼ rí kugíʼ, xóo eni̱ copero ga̱jma̱a̱ xtíin kiejunʼ rí kugíʼ, índo̱ ndiʼyoo tsigijñaʼ dí nakarámáʼ rí ikhaa naxnájxi̱ nángí eʼni náa goʼwóo Jeobá, ni̱jkha̱ a̱jkiu̱u̱n índo̱ ndiʼyoo.
5 Ikha jngóo niʼthúu̱n rey: “Gajkhun mbá xúgíʼ rí nidxawuun náa xuajñunʼ ga̱jma̱a̱ numuu rí naʼnga̱a̱ʼ natani̱, ga̱jma̱a̱ dí ra̱ʼkhá tháán ejmañaaʼ.
6 Mú ikhúún na̱nguá nini̱mbo̱ʼ rí nithi, asndu índo̱ ni̱ʼkhá ndi̱yo̱o̱ ga̱jma̱a̱ iduʼ, mú asndu tséʼni mbá ta̱pha̱ rí nithu̱nʼ, nújngoo ejmañaaʼ ki xóo rí nidxuun.
7 ¡Gagi kúwá xa̱bia̱a̱ʼ ga̱jma̱a̱ xa̱bu̱ xuajñanʼ, bi̱ kúwá má xúʼko̱ ga̱jma̱á nindxa̱a̱ʼ nudxawíín rí najmañaaʼ!
8 Gaguma mba̱a̱ Jeobá Dios ndrígáaʼ bi̱ nanigu̱u̱ʼ rí natani̱, nigíinʼ náa xílí* rí nutañajunʼ mu mani̱ndxa̱a̱ʼ rey náa Jeobá Dios ndrígáaʼ, numuu rí Dios ndrígáaʼ nandoo kaʼyoo Israel ga̱jma̱a̱ nandoo dí marigá asndu kámuu, nigíinʼ xóo rey mu maratañájunʼ májánʼ ga̱jma̱a̱ jmbu”.
9 Ikhú nixnúu rey mbá 4,104 kilo* oro ga̱jma̱a̱ ra̱ʼkhá tháán mba̱ji̱nʼ aceite rí ndataun ga̱jma̱a̱ itsí rí mitsaanʼ. Nimbáa táʼkha̱ kagu̱u̱ xúʼko̱ mba̱ji̱nʼ aceite rí ndataun nda̱wa̱á, ki xóo dí ni̱ʼkha̱ kagu̱u̱ reina bi̱ na̱ʼkha̱ náa Saba, rí nixnúu rey Salomón.
10 Xa̱bi̱i̱ Hiram ga̱jma̱a̱ xa̱bi̱i̱ Salomón niguwáʼ kudúún oro dí rígá náa Ofir, ma̱ngaa niguwáʼ kudúún ixi̱ dí mbiʼyuu sándalo ga̱jma̱a̱ xúʼko̱ má itsí rí mitsaanʼ.
11 Rey nijmuu ixi̱ sándalo mu maʼni escalera náa goʼwóo Jeobá ga̱jma̱a̱ náa goʼwóo rey. Ma̱ngaa nijmuu mu maʼni arpa ga̱jma̱a̱ i̱ʼwáʼ dí gíʼdoo cuérdóo dí najmún bi̱ nuni̱ ajmúú. Nímba̱a̱ ndawa̱a̱ tsáa ndiʼyoo ixi̱ xóo rúʼko̱ náa ku̱ba̱ʼ Judá nda̱wa̱á.
12 Rey Salomón ma̱ngaa nixnúu reina bi̱ na̱ʼkha̱ náa Saba, xúgíʼ dí ikhaa nindoo ga̱jma̱a̱ dí ikhaa nindo̱ʼo̱o̱. Itháan mbaʼa nixnúu ki xóo rí ikhaa ni̱ʼkha̱ kagu̱u̱ náa rey. Nda̱wa̱á reina ni̱jkha̱a̱ xuajñuu gajmíi̱n xa̱bi̱i̱.
13 Mbá 23,000 kilo* ki̱wu̱n oro dí nagruigú rey Salomón mámbá tsiguʼ,
14 wájíʼ dí nuni̱ numa xa̱bu̱ bi̱ najnguʼwún bi̱ nugujua̱, ga̱jma̱a̱ rí nudaʼ bi̱ nugujua̱. Ma̱ngaa xúgíʼ dí nuni̱ numa reyes ndrígu̱ún árabes, ga̱jma̱a̱ xa̱bu̱ ñajunʼ bi̱ kúwá náa xuajin bi̱ naguwáʼ kudúún oro ga̱jma̱a̱ plata náa Salomón.
15 Rey Salomón niʼni 200 escudo mba̱ʼu̱ dí kanda̱wo̱o̱ʼ oro, (mámbá escudo gíʼdoo 600 siclos* oro dí kanda̱wo̱o̱ʼ)
16 ga̱jma̱a̱ 300 escudo dí majkhaʼ rí kanda̱wo̱o̱ʼ oro, (mámbá escudo gíʼdoo ajtsú mina* dí oro). Ikhú rey nigrua̱ʼa̱a̱ náa Guʼwá Xaxi̱ dí rígá náa Líbano.
17 Ma̱ngaa rey niʼni mbá xílí mba̱a̱ dí marfil,* ga̱jma̱a̱ nixtájmuu mbawíí oro.
18 Ma̱ngaa rígá mbá majun escalón dí natsimuu náa gíʼ xílí, ga̱jma̱a̱ náa frúwan rajkhúu niguma ga̱jma̱a̱ oro. Náa mámbá ñawúunʼ xílí wíji̱ mbáa león.
19 Mámbáa león wíji̱ náa mámbá níjniúu escalón, 12 dí mbá xúgíinʼ. Nimbáa xa̱bu̱ ñajunʼ ragíʼdoo dí xígi̱ kaʼnii.
20 Mbá xúgíʼ copa rí najmuu rey Salomón niguma ga̱jma̱a̱ oro, ga̱jma̱a̱ mbá xúgíʼ dí najmaa náa Guʼwá Xaxi̱ dí rígá náa Líbano niguma ga̱jma̱a̱ mbawíí oro. Nda̱a̱ nimbá rí niguma ga̱jma̱a̱ plata, numuu rí nákhá mbiʼi dí nixtáa Salomón ragíʼdoo numuu plata eyáá.
21 Barcos ndrígóo rey na̱jkha̱ náa Tarsis gajmíi̱n xa̱bi̱i̱ Hiram, mu magún kudúún barco mu muñajunʼ gajmiún xa̱bi̱i̱ Salomón. Mámbá tsajtsú tsiguʼ barco rí na̱ʼkha̱ náa Tarsis na̱ʼkha̱ kagu̱u̱ oro, plata, marfil, mono ga̱jma̱a̱ pavo real.
22 Rey Salomón itháan gíʼdoo ga̱jma̱a̱ itháan ejmañuu ki xóo xúgíinʼ reyes bi̱ kúwá náa xúgíʼ tsu̱du̱u̱ ku̱ba̱ʼ.
23 Reyes bi̱ kúwíin náa xúgíʼ tsu̱du̱u̱ ku̱ba̱ʼ nandún magún gúyáá* Salomón mu mudxawíín rí najmañuu rí Dios nigíwánʼ náa a̱jkiu̱u̱n.
24 Xúgíinʼ naguwáʼ kudúún regalo, dí naguma ga̱jma̱a̱ plata, dí naguma ga̱jma̱a̱ oro, xtíin, ajua̱nʼ dí nuxmijná ga̱jma̱a̱, aceite rí ndataun, wáyú ga̱jma̱a̱ mula. Tsiguʼ tsiguʼ naguwáʼ.
25 Ga̱jma̱a̱ náa guʼwún xujkiúu Salomón rígá mbá 4,000 náa makuwíin wáyíi̱, gíʼdoo carros ga̱jma̱a̱ mbá 12,000 wáyú,* guájun eʼni náa xuajin dí gíʼdoo cárriu̱u̱ náa Jerusalén, mijngii náa xtáa rey.
26 Ga̱jma̱a̱ niʼtáñajúúnʼ mbá xúgíinʼ xa̱bu̱ ñajunʼ bi̱ nikúwá, nagi̱ʼdu̱u̱ náa mañu Éufrates asndu náa ku̱bu̱únʼ filisteos, ga̱jma̱a̱ nartumuu asndu náa ndawaa Egipto.
27 Rey niʼni dí náa Jerusalén marigá wéñuuʼ plata rí asndu xóo itsí, ga̱jma̱a̱ ixi̱ cedro marigá mbaʼa xóo sicómoros dí rígá náa Sefelá.
28 Ma̱ngaa, wáyú bi̱ gíʼdiin Salomón na̱ʼkha̱ kiʼdiin náa Egipto ga̱jma̱a̱ náa xúgíʼ xuajin dí rígá.
29 Dí naʼthí xóó itháan ga̱jma̱a̱ numuu Salomón, xúgíʼ dí niʼni kiʼniraʼmáʼ náa i̱yi̱i̱ʼ dí niʼthí profeta* Natán, náa dí niʼtáriyaʼ Ahíya xa̱bu̱ silonita, ga̱jma̱a̱ náa nigumarámáʼ xúgíʼ dí niwasngájmáá Idó, xa̱bu̱ bi̱ ndaʼyoo rí nawasngájmáá,* náa naʼthí ga̱jma̱a̱ numuu Jeroboán a̱ʼdióo Nebat.
30 Salomón niʼtáñajunʼ mbá 40 tsiguʼ náa Jerusalén náa mbá xúgíʼ Israel.
31 Ikhú Salomón ndiyáa jxu̱u̱ʼ gajmíi̱n wajin xiʼñúuʼ, nijuiʼdi̱i̱ náa Xuajñuu David bi̱ nindxu̱u̱ anu̱u̱,* ga̱jma̱a̱ Rehoboam bi̱ nindxu̱u̱ a̱ʼdióo ni̱jkha̱nú ninindxu̱u̱ nuxi̱i̱ʼ rey.
Mbaʼa nota
^ O “Seba”.
^ O “nagui̱i̱”.
^ Náa ajngáa hebreo naʼthí, “nda̱a̱ nimbá rí ngo̱ʼo̱o̱”.
^ O “trono”.
^ Náa ajngáa hebreo naʼthí, “666 talentos”.
^ Mina dí naʼthí náa Escrituras Hebreas naʼni 570 gramo.
^ Rígi̱ na̱ʼkha̱ náa iñúúnʼ dí miʼxá elefante ga̱jma̱a̱ eʼwíinʼ xujkhúʼ.
^ Náa ajngáa hebreo naʼthí, “nduyáʼ mbuyáá inuu”.
^ O “bi̱ nudrúwíin wáyú”.
^ O “gaʼyee, bi̱ naʼthí dí marigá”.
^ O “visión”.
^ O “tátée”.
