Raga̱jma̱ i̱yi̱i̱ʼ rí na̱jkha̱ inún Corintios 10:1-18
10 Ikhúúnʼ Pablo na̱tala rí mudxawunʼ ga̱jma̱a̱ rí májánʼ a̱jkiu̱u̱n Cristo ma̱ngaa rí guabaʼ a̱jkiu̱u̱n,* ikhúúnʼ ni̱ndxu̱ʼ mbáa xa̱bu̱ bi̱ nda̱a̱ numuu índo̱ xtáá ga̱jma̱á nindxa̱la, mú tsímíñúʼ índo̱ xtáá mbáwún.
2 Gúʼthu̱u̱n rí índo̱ gáʼgánú ñuʼú, bi̱ nundxaʼwamíjna̱ rí nuʼniñámijnaxu maxnúxu ikha rí nugíʼ xa̱bu̱ numbaaʼ, niriʼkumijnáa má, mu xúʼko̱ xáxprígún gakhi̱i̱ wéñuuʼ.
3 Maski ajndu kuwáanʼlu xóo xa̱bu̱ numbaaʼ,* na̱nguá exmíjnálú xóo eni̱ xa̱bu̱ numbaaʼ.*
4 Ajua̱nʼ dí nuxmíjná ga̱jma̱a̱ tséʼkha̱ náa xa̱bu̱ numbaaʼ, numuu rí Dios naʼni rí magiʼdoo tsiakii mu maʼni gámbáa mbá dí nindxu̱u̱ xóo mbá muro rí wíji̱ májánʼ.
5 Kuwáanʼ ru̱ʼni̱ gámbáa rí nundxa̱ʼwa̱míjna̱ xa̱bu̱ ga̱jma̱a̱ xúgíʼ dí narikhoo dí nakuximínáʼ náa ku̱ma̱ ndrígóo Dios. Kuwa̱a̱nʼ rurajtuun xúgíʼ ku̱ma̱ xó má nurtuwiin mbáa mu maʼnimbo̱o̱ kaʼyoo Cristo.
6 Kuwáanʼlú xawii mu̱ʼni̱ mumíniiʼ xúgíinʼ bi̱ tsénimbu̱ún índo̱ ikháanʼla gúnimbala kájxi̱.
7 Ikháanʼla i̱ndó ndu̱ya̱a̱ xóo kiaxu̱u̱n xa̱bu̱. Á mu mbáa ndaʼyoo májánʼ dí kaʼyoo náa Cristo, gandxa̱ʼwáminaʼ ga̱jma̱a̱ numuu rígi̱: Xó má ikhaa kaʼyoo náa Cristo, xúʼko̱ má mangáanʼxu.
8 Maski ajndu ma̱ndoo manimbamínáʼ ga̱jma̱a̱ numuu ñajunʼ dí nirajkuáa ñawúnxu Tátá mu mu̱ni̱ mba̱a̱ fe ndrígála raʼkháa mu mu̱ni̱ gámbáaxu, xátiyuʼ nditháan.
9 Mú tsíyóʼ maku̱ma̱la dí nandoʼ manimiñála ga̱jma̱a̱ i̱yi̱i̱ʼ dí nakuʼmá.
10 Tikhuun nuthi: “I̱yi̱i̱ʼ ndrígóo gakhi̱i̱ nindxu̱u̱ ga̱jma̱a̱ gíʼdoo tsiakii, mú índo̱ xtáa ga̱jma̱á ni̱ndxu̱lú asndu xóo tséjmaa ga̱jma̱a̱ dí naʼthí xóo ragíʼdoo numuu”.
11 Bi̱ gáʼthí rúʼko̱, gaʼyoo rí nutaxu náa i̱yi̱i̱ʼ índo̱ ndawanʼxu ikhí rúʼko̱ má gúnixu ma̱ngaa índo̱ gákuwáanʼxu ikhí.
12 Numuu rí tséʼngo̱o̱ a̱jkiu̱xu rí mu̱ni̱ mbrígumijnáxu gajmiúxu tikhuun bi̱ nuni̱ mbaʼumíjna̱ ni má tsénixu xóo eni̱ ikhiin. Mú índo̱ ikhiin nuni̱ mbrígumijná ga̱jma̱a̱ awan rí ikhiin má nigíʼ, nusngajma dí tsíkru̱ʼu̱u̱n.
13 Ikháanʼxu á mu nu̱ni̱ mbaʼumíjna̱xu, mu̱ni̱ mbaʼumíjna̱xu náa dí kaʼyuxu, i̱ndó nu̱ni̱ mbaʼumíjna̱xu ga̱jma̱a̱ dí niʼngo̱o̱ nini̱xu náa ñajunʼ rí Dios nixnúxu ga̱jma̱a̱ ikháanʼ mangáanʼla nindxa̱la ñajunʼ rí ikhaa nixnúxu.
14 Ikháanʼ tsénujngurámúxu náa ñajunʼ dí Dios nixnúxu, índo̱ ni̱jkuánuxu náa ikháanʼla, numuu dí náa ñajunʼ rí nijuixnúxu ikhí kuwáanʼ mangáanʼ. Ikháanʼxu gináanʼ ni̱jkuá gúyala mu muta̱la ga̱jma̱a̱ numuu ajngáa rí májánʼ ga̱jma̱a̱ numuu Cristo.
15 Na̱nguá eni̱mbawumíjnaxu̱ ga̱jma̱a̱ ñajunʼ ndrígu̱ún eʼwíinʼ, i̱ndó náa ñajunʼ dí nixnúxu Dios. Nuguáʼti̱i̱nxu rí maʼga raʼni itháan gújkhúʼ fe ndrígála, rí nini̱xu maga̱ja̱a̱ náa nitaráʼaxu. Ikhú ma̱ndoo muni̱xu xóó itháan.
16 Ma̱ndoo mutaráʼaxu ajngáa rí májánʼ náa i̱ʼwáʼ xuajen dí tri̱ga̱ mitsínguánʼ náa kuwáanʼla ikháanʼ, mú tsíyuxú mu̱ni̱ mbaʼumíjna̱xu náa ñajunʼ dí nini̱ eʼwíinʼ.
17 “Bi̱ naʼnimbamínáʼ, gaʼnimbamínaʼ ga̱jma̱a̱ numuu Jeobá”.*
18 Itháan májánʼ dí Jeobá* gágruiguíi mbáa xa̱bu̱ bi̱ ndaʼyoo rí naʼni rí májánʼ, raʼkháa xa̱bu̱ú gáʼthí rí naʼni dí májánʼ.
Mbaʼa nota
^ O “ámiu̱u̱n”.
^ Náa ajngáa griego naʼthí, “náa xuwiʼ”.
^ Náa ajngáa griego naʼthí, “xóo náa xuwiʼ”.
