Raga̱jma̱ i̱yi̱i̱ʼ rí na̱jkha̱ inún Corintios 2:1-17
-
Pablo nandoo maʼni rí bi̱ corintios makuwá gagi (1-4)
-
Ndayóoʼ muni̱ mba̱a̱ a̱jkiu̱ún kuyáá ga̱jma̱a̱ muniña̱a̱nʼ mata̱nga̱a̱ bi̱ nikudaminaʼ aʼkhá (5-11)
-
Pablo xtáa náa Troas ga̱jma̱a̱ náa Macedonia (12, 13)
-
Rí najuiʼtáraʼa nindxu̱u̱ xóo índo̱ nagún mbaʼin xa̱bu̱ mu muniriya̱a̱ʼ ndxa̱a̱ rí niʼngu̱u̱n nidaaʼ (14-17)
-
“Na̱nguá nindxu̱xu bi̱ nagujua̱ ajngá rawuunʼ Dios” (17)
-
2 Numuu dí niraʼwi̱i̱ rí maxáʼgá gáyála mbu̱júu̱ʼ mu xákuwáanʼ gíná.
2 Á mu rí ikhúúnʼ ma̱ni̱ dí makuwáanʼla gíná, tsáá gáguanúu mu maʼni rí maʼdxuu a̱jkiu̱nʼ rá. I̱ndó bi̱ ikhúúnʼ ni̱ni̱ rí maxtáa gíná.
3 Niniraʼmáʼ dí niniraʼmáʼ má, mu índo̱ gáʼgá maʼdxuʼ ga̱jma̱á numala raʼkháa rí maxtáá gíná, numuu rí nda̱yo̱o̱ dí naʼni maxtáá gagi ikhúúnʼ rúʼko̱ naʼni dí mangáanʼ makuwáanʼla gagi.
4 Asndu nimbi̱ya̱ʼ índo̱ niniraʼmáʼ i̱yi̱i̱ʼ numuu rí nixtáá gíná ga̱jma̱a̱ nixmiéjunʼ wéñuuʼ. Mú na̱nguá ni̱ni̱ mu makuwáanʼla gíná, ni̱ni̱ mu mbuya̱a̱ dí ra̱ʼkhá tháán eyoʼ ka̱ya̱la.
5 Á mu mbáa niʼni dí marigá gamiéjunʼ, na̱nguá niʼni rí maxmiéjunʼ ikhúún, i̱ndó niʼni rí maxmiéjuanla xúgiáanʼ (mú na̱nguá eyoʼ gátha wéñuuʼ ga̱jma̱a̱ numuu rígi̱).
6 Niʼngo̱o̱ má rí xa̱bu̱ buʼko̱ nixpriguíí xúgíinʼ.
7 Rí xúgi̱ gíʼmaa mu̱ni̱ mba̱a̱ a̱jkia̱la kuya̱a̱ ga̱jma̱a̱ gu̱ni̱i̱ a̱jkiu̱u̱n, mu xúʼko̱ xáxtáa gínáa wéñuuʼ rí maku̱mu̱u̱ rí asndu nánguá eʼngo̱o̱ itháan.
8 Ikha jngóo na̱tala* rí gaʼndala ku̱ya̱a̱.
9 Ma̱ngaa niniraʼmáʼ ga̱jma̱a̱ numuu rígi̱: Mu mba̱yo̱o̱ á mu musngajmá dí munimbala xúgíʼ.
10 Á mu ikháanʼ nu̱ni̱ mba̱a̱ a̱jkia̱la kuya̱a̱ mbáa xa̱bu̱, mangúún na̱ni̱ mba̱a̱ a̱jkiu̱nʼ ka̱yo̱o̱. Xúgíʼ náa rí ni̱ni̱ mba̱a̱ a̱jkiu̱nʼ (á mu ndiyóoʼ rí ma̱ni̱ mba̱a̱ a̱jkiu̱nʼ) nindxu̱u̱ mu makuwáanʼ májánʼ náa inuu Cristo,
11 mu xúʼko̱ Gixa̱a̱* xáʼni nduwáánʼlú numuu rí nduʼyáá má dí nandoo maʼni.
12 Rí xúgi̱, índo̱ ni̱jkhánú náa Troas mu mataráʼa ajngáa rí májánʼ ga̱jma̱a̱ numuu Cristo, dí asndu nimbaʼtoo mbá xkrugua mu ma̱ni̱ ñajuunʼ Tátá,
13 táxtáá* tsímáá numuu rí na̱nguá nixkamaa ndxájuʼ Tito. Ikha jngóo nitangáwuun ga̱jma̱a̱ ni̱jkhá náa Macedonia.
14 ¡Nuxna̱a̱lú núma̱aʼ Dios! Dí ikhaa naxnúlú má xúʼko̱ ikha náa najkualú gajmiúlú Cristo, nindxu̱u̱ xóo índo̱ nagún mbaʼin xa̱bu̱* mu muniriya̱a̱ʼ ndxa̱a̱ rí niʼngu̱u̱n nidaaʼ. Ku̱ma̱ ndrígóo Dios nindxu̱u̱ rí mitsaanʼ ndataun ga̱jma̱a̱ dí ikhaa najmuu ñajunʼ ndrígúlú mu maʼni rí xa̱bu̱ muñeñún asndu náá.
15 Ikháanʼlu bi̱ nuʼthá ga̱jma̱a̱ numuu Cristo ni̱ndxu̱lú xóo mbá rí mitsaanʼ ndataun náa Dios rí na̱jkha̱nú xu̱u̱ʼ náa bi̱ makáwíin ga̱jma̱a̱ náa bi̱ makhañún.
16 Náa bi̱ iwáá bugi̱ na̱ʼkha̱ ndajtsúnʼ xu̱u̱ʼ rí makhañún numuu rí na̱jkha̱ kagui̱i̱n makhañún, mú náa bi̱ timbíin nindxu̱u̱ xu̱u̱ʼ rí ndataun náa makuwá numuu rí na̱jkha̱ kagu̱u̱n náa makuwá. Tsáá ejmañuu maʼni rígi̱ rá.
17 Ikháanʼ, na̱nguá nindxu̱xu bi̱ nagujua̱ ajngá rawuunʼ Dios, xó má eni̱ mbaʼin xa̱bu̱. Ikháanʼ kixúʼmáanʼxu náa Dios mu mutaxu̱ rí gajkhun ga̱jma̱a̱ numuu Dios ma̱ngaa Cristo.
Mbaʼa nota
^ Náa ajngáa griego naʼthí, “consejo”.
^ Náa ajngáa griego naʼthí, “xi̱ʼ ndrígóʼ”.
^ O “procesión”.
