Raga̱jma̱ i̱yi̱i̱ʼ rí na̱jkha̱ inún Corintios 4:1-18
4 Kuaʼdáá ñajunʼ rígi̱ numuu rí Dios nigáwíinʼ a̱jkiu̱u̱n kaʼyulú, ikhaa numuu rúʼko̱ dí tsékanájkulú.
2 Mú niniʼñáʼlú dí nindxu̱u̱ ma̱jti̱ʼ, dí naguma ngu̱ʼwa̱á ga̱jma̱a̱ tséʼni nduwaʼ o tsiriʼkuíí ajngá rawuunʼ Dios. Rí phú nu̱ʼni̱ nusngajmún xa̱bu̱ dí naʼthí náa ajngá rawuunʼ Dios ga̱jma̱a̱ índo̱ nuʼnimíjna̱ musngajmáá Dios dí kuwa̱a̱nʼ ru̱ʼni̱ dí jmbu, mu xúʼko̱ mu̱ʼni̱ dí magida̱ʼ náa edxu̱ún xa̱bu̱.
3 Á mu ajngáa májánʼ rí na̱jkua̱ kuʼyúlú kúgoo ga̱jma̱a̱ mbá xtíin, xúʼko̱ má kúgoo náa bi̱ makhañún,
4 bi̱ tsénimbu̱ún, dios bi̱ xtáa náa numbaaʼ rígi̱* nirugoo ku̱ma̱ ndrígu̱ún mu xúʼko̱ xámbiʼi agiuuʼ ajngáa rí májánʼ ga̱jma̱a̱ numuu Cristo náa ikhiin, bi̱ nindxu̱u̱ xó má Dios.
5 Numuu dí tséʼtáráʼa ga̱jma̱a̱ numulú, nuʼtáráʼa ga̱jma̱a̱ numuu Jesucristo rí ikhaa nindxu̱u̱ Tátá ga̱jma̱a̱ dí ikháanʼ ni̱ndxu̱xu ñumbáá ndrígiála ga̱jma̱a̱ numuu Jesús.
6 Numuu rí Dios nindxu̱u̱ bi̱ niʼthí: “Gambiʼi aguʼ náa mikrína”. Ikhaa niʼni mambiʼi aguʼ náa a̱jkiu̱lú* ga̱jma̱a̱ inuu Cristo ma̱ngaa mbá ku̱ma̱ mba̱a̱ ndrígóo Dios.
7 Mú kuaʼdáá rí gíʼdoo wéñuuʼ numuu náa daan* ku̱ba̱ʼ, mu tsiakii dí itháan mba̱a̱ ki xóo dí gíʼdoo mbáa xa̱bu̱ ma̱ʼkha̱ náa Dios raʼkháa náa ikháanʼ.
8 Nuxujmbirigáanʼ mú raʼkháa rí asndu xándoo gúbayimíjna̱ maski asndu tséʼyáá dí mu̱ʼni̱, mú tséxtuguaráʼáanʼlú;
9 nuni̱ gínáánʼlú mú tséguanáti̱gu̱lú; nuni̱ magandríguáanʼlú mú tsénimbátigáanʼlú.
10 Nángi eʼni nuraʼníí dí gamíi makañúlú xó má Jesús, mu makuwa̱a̱nʼ xó má nixtáa Jesús.
11 Numuu rí ikháanʼlú nákhá xóó kuwa̱a̱nʼ, nángi eʼni nuraʼníí dí gamíi makañúlú ga̱jma̱a̱ numuu Jesús, mu makuwáanʼ xó má nixtáa Jesús.
12 Maski ajndu ikháanʼxu nángi eʼni nuraʼníí dí gamíi makañúxu, mu ikháanʼ ma̱ndoo makuwa̱a̱nʼ.
13 Numuu rí kuaʼdáá ikháá má fe* xó má dí nigumaraʼmáʼ: “Nigúʼdoo fe ikha jngóo ni̱tha̱”. Ikháánʼlú mangáanʼ kuaʼdáá fe ikha jngóo nuʼthá,
14 numuu dí nduʼyáá rí bi̱ nikujxi̱i̱* Jesús makuxáanʼ mangáánʼ mu makuwáánʼ gajmiúlú Jesús ga̱jma̱a̱ maʼga̱a̱ kaguáanʼlú mbóó jndu’ náa inuu Jesús.
15 Xúgíʼ rígi̱ nindxu̱u̱ mu mambáyala má ikháanʼ, mu maʼni itháan mba̱a̱ rí májánʼ wéñuuʼ a̱jkiu̱u̱n Dios maski ajndu rakáʼyala, rígi̱ naʼni itháan mba̱a̱ índo̱ mbaʼin xa̱bu̱ nuxna̱a̱ núma̱a̱ʼ mu muni̱ mba̱a̱ Dios.
16 Ikha jngóo tsékanájkulú. Maski ajndu xóo xa̱bu̱ ni̱ndxu̱lú dí mbájníí na̱jkha̱ rámbáa, mú a̱jkiu̱lú ga̱jma̱a̱ ngáñulú na̱jkha̱ raʼni itháan nuxi̱ʼ.
17 Numuu rí maski ajndu gamiéjunʼ dí kuaʼdáálú tséjyúuʼ wéñuuʼ ga̱jma̱a̱ ragákíi, gamiéjunʼ rígi̱ naʼni dí muʼda̱a̱ʼlú mbá dí tsímbríguii ga̱jma̱a̱ nimbá, ma̱ngaa marigá kámuu,
18 ikha jngóo kuwáánʼ ruyejxi̱ má xúʼko̱ mú raʼkháa náa rí nakujmaa, nindxu̱u̱ náa rí tsékujmaa. Numuu dí nakujmaa nindxu̱u̱ mbá xngaa, mú rí tsékujmaa nindxu̱u̱ kámuu.
Mbaʼa nota
^ O “ámiulu”.
^ O “rayaʼ”.
^ Náa ajngáa griego naʼthí, “espíritu”.
^ O “niʼnigabi̱i̱”, “niʼni mbaʼya̱a̱”.
