Raga̱jma̱ i̱yi̱i̱ʼ rí na̱jkha̱ inún Corintios 5:1-21
5 Numuu rí nduʼyáá dí guʼwúlú dí rígá gi̱i̱ mambáa, rí nindxu̱u̱ guʼwá xtíin, mú mundrígúu mbá guʼwá rí Dios niʼni dí mbajyúuʼ kámuu mekhuíí, mbá guʼwá dí raʼkháa mbáa xa̱bu̱ú niʼni.
2 Gajkhun má rí kuwáánʼ gíná náa guʼwá rígi̱, ikha jngóo ra̱ʼkhá tháán eyulú mundrígúu guʼwá rí na̱ʼkha̱ mekhuíí dí nindxu̱u̱ xóo mbá xtíin dí muʼgíʼ,
3 numuu rí índo̱ muʼgíʼ xóo mbá xtíin, xáʼni matsaʼtsáánʼ.
4 Bi̱ kuwáanʼlu náa guʼwá rígi̱ numíniiʼ ga̱jma̱a̱ kuwáanʼlu gíná raʼkháa mu nandulú muríya̱a̱ʼ guʼwá rígi̱ xóo mbá xtíin dí kuʼgíʼ, numuu rí nandulú mundrígúu mbá guʼwá dí rígá mekhuíí numuu rí nakháñulú maxtiʼkhu̱u̱ ga̱jma̱a̱ dí makuwáanʼlu kámuu.
5 Dios nindxu̱u̱ bi̱ niʼniratánʼlú ga̱jma̱a̱ numuu rígi̱, nixnúlú espíritu santo* ndrígóo, rígi̱ nindxu̱u̱ mbá tsinaʼ dí maxnúlú rí wíji̱ ma̱ʼkha̱.
6 Ikháanʼ nduʼyáá májánʼ dí rígi̱ gárígá índo̱ kuaʼdáá xóó xuyulú, makuwáánʼ mitsínguánʼ náa Tátá;
7 numuu dí najngruigulú ga̱jma̱a̱ fe raʼkháa rí nduʼyáá.
8 Mú nduʼyáá májánʼ dí rígi̱ gárígá ga̱jma̱a̱ nandulú makuwa̱a̱nʼ mitsínguánʼ náa xuyulú mu makuwa̱a̱nʼ gajmiúlú Tátá.
9 Ikha jngóo tséʼniuu á mu kuwa̱a̱nʼ gajmiúlú ikhaa, o kuwa̱a̱nʼ mitsínguánʼ náa ikhaa, nandulú dí ikhaa magruiguáanʼ.
10 Numuu rí xúgiáánʼ muxnaxímíjná índo̱ manda̱ʼa̱a̱ cuenta Cristo mu xúʼko̱ mámbáa magruígúu xóo rí májánʼ o ra̱májánʼ dí niʼni nákha nixtáa xóo xa̱bu̱ numbaaʼ.
11 Gajkhun má rí nduʼyáá xú káʼnii nindxu̱u̱ gamíi ndrígóo Tátá, nu̱ʼni̱ mu xúʼko̱ munimbu̱ún xa̱bu̱, mú Dios naniniáanʼxu májánʼ ga̱jma̱a̱ nagúʼthu̱u̱n rí ku̱ma̱ ndrígála maniniáanʼxu májánʼ.
12 Na̱nguá kúwáanʼxu ru̱ta̱ rí májánʼ enixu mbu̱júu̱ʼ náa ikháanʼla, i̱ndó nu̱nixu̱ rí ikháanʼla mu̱ni̱ mbaʼumíjna̱ ga̱jma̱a̱ numuxu, mu xúʼko̱ ma̱ndoo muriʼñún bi̱ nuni̱ mbaʼumíjna̱ rí nduyáá dí mbájníí raʼkháa rí gíwánʼ náa a̱jkiu̱ún.*
13 Á mu rígá mbá rí nini̱xu dí ni̱ndxu̱xu xóo skágunʼ náa Dios ga̱jma̱a̱ á mu nindxa̱ʼwa̱míjna̱xu májánʼ mambáyala má ikháanʼ.
14 Ngajua ndrígóo Cristo natsudáanʼlú, numuu dí rígi̱ ni̱jkua̱nú ndiʼyáá rí mbáa xa̱bu̱ nikháñuu ga̱jma̱a̱ numún xúgíinʼ; numuu dí xúgíinʼ má nikháñúún.
15 Ikhaa nikháñuu ga̱jma̱a̱ numún xúgíinʼ, mu bi̱ kúwá nduya ní xákúwá xóo eñún ikhiin, makuwá ga̱jma̱a̱ numuu bi̱ nikháñun ma̱ngaa bi̱ nitujxi̱i̱.*
16 Ikha jngóo asndu nákha xúgi̱ ga̱jma̱a̱ nda̱wa̱á, ikháanʼlu na̱nguá eʼyáá nimbáa xóo endxa̱ʼwáminaʼ mbáa xa̱bu̱.* Á mu tikuáanʼ ndiʼyáá Cristo xóo mbáa xa̱bu̱,* dí xúgi̱ nánguá eʼyáá xúʼko̱.
17 Ikha jngóo, á mu mbáa xtáa mbóó ga̱jma̱a̱ Cristo, nindxu̱u̱ nuxi̱i̱ʼ xa̱bu̱ bi̱ Dios niʼnii. Xúgíʼ rí wayuu ninújngoo. ¡Gu̱ya̱a̱! Rí xúgi̱ ni̱jkha̱nú nirígá dí nuxi̱ʼ.
18 Mú xúgíʼ dí rígá na̱ʼkha̱ náa Dios, bi̱ niʼni rí mambajxíiʼ gajmiúlú ikhaa ga̱jma̱a̱ numuu Cristo, ikhaa nixnúlú ñajunʼ dí mumbáñúún eʼwíinʼ rí mambajxíín gajmiún ikhaa.
19 Xóo muʼthá ga̱jma̱a̱ numuu Cristo, Dios nimbájxi̱i̱ gajmíi̱n xa̱bu̱ numbaaʼ dí ajndu táʼyoo aʼkhúún, ikháanʼxu nixná ngawuxuʼ ajngáa rúʼko̱ rí muthu̱u̱nxu xa̱bu̱ dí mambajxíín gajmiún ikhaa.
20 Ikha jngóo Dios nikunguáanʼxu* xóo xtiʼkhuu Cristo, rí asndu xóo xtáa raʼthún xa̱bu̱ ga̱jma̱a̱ numuxu. Rí nagúwáʼxu xóo xtiʼkhuu Cristo, nutakáñala: “Gambáxíiʼla gajmiála Dios”.
21 Cristo na̱nguá niʼni aʼkhá, Dios nixnájxi̱i̱ xóo tsigijñaʼ ga̱jma̱a̱ numuu aʼkhá ndrígúlú, mu xúʼko̱ ga̱jma̱a̱ numuu ikhaa muguaʼnú manindxu̱lú jmbii náa Dios.
Mbaʼa nota
^ O “ámiuún”.
^ O “nigabi̱i̱”, “ndiʼya̱a̱”.
^ Náa ajngáa griego naʼthí, “xóo xuwiʼ”.
^ Náa ajngáa griego naʼthí, “xóo xuwiʼ”.
^ Náa ajngáa griego naʼthí, “mbáa xa̱bu̱ bi̱ kaxúnguaanʼ náa mbáa xa̱bu̱ ñajunʼ o náa mbá país”.
