Raga̱jma̱ i̱yi̱i̱ʼ rí na̱jkha̱ inún Corintios 6:1-18
6 Xóo bi̱ nuñajunʼ gajmiúlú Dios, natakháñala rí xánindxu̱u̱ ndíí dí nundrígúla rí májánʼ wéñuuʼ a̱jkiu̱u̱n Dios maski ajndu rakáʼyala.*
2 Numuu rí Dios naʼthí: “Nidxawaanʼ índo̱ niratákáñuʼ ga̱jma̱a̱ nimbáyaaʼ índo̱ nitando̱ʼo̱ʼ rí ma̱ni̱kríña̱a̱nʼ”. ¡Mbiʼi rúʼko̱ nindxu̱u̱ xúgi̱! ¡Xúgi nindxu̱u̱ mbiʼi rí ma̱ni̱kríña̱a̱nʼ!
3 Na̱nguá kuwáánʼ ru̱ʼni̱ nimbá dí maʼni majngrádiinʼ eʼwíinʼ, mu xúʼko̱ xáxkamaa dí ra̱májánʼ náa ñajunʼ dí nu̱ʼni̱.
4 Rí phú nuʼnilú, nusngajmá dí phú ni̱ndxu̱lú xa̱bi̱i̱ Dios náa xúgíʼ dí nuʼnilú: Naʼngulú nuraʼníí mbaʼa gamiéjunʼ, tsingíná, mbiʼi rí ndayúlú, xkujndu,
5 nixnulú, nixuda̱a̱nʼlú guʼwá e̱jua̱nʼ, nixuximíjna̱ xa̱bu̱, nitsudáanʼlu mu̱ʼni̱ ñajunʼ gakhi̱i̱, túʼnuʼ, nguáná túpiʼtsu;
6 kuwáanʼlú kaʼwu, nuʼnilú xó má nijmañulú, naʼngo̱o̱ a̱jkiu̱lú, májánʼ a̱jkiu̱lú, nuniʼñámíjná rí maxnúlú ikha espíritu santo,* nusngajmá rí kuaʼdáá ngajua dí raʼkháa a̱jma̱ inuu,
7 nuʼtálú dí gajkhun, nakumulú kuʼyáá tsiakiyu̱u̱ Dios, nurajtuunlú ajua̱nʼ dí nindxu̱u̱ májánʼ náa ñawún mújúnlu* ga̱jma̱a̱ náa ñawún xtiyulú;*
8 índo̱ nduyamajkulú o nguáná na̱nguá, nguáná índo̱ nuthi rí májánʼ ga̱jma̱a̱ numulú ga̱jma̱a̱ nguáná nuthi dí xkawiʼ ga̱jma̱a̱ numulú. Nduyulú xóo mbáa bi̱ naʼni nduwaʼ, maski ajndu nuʼthúún rí gajkhun;
9 nuni̱ rí asndu xóo tséniʼniáanʼlú maski ajndu nuniʼniáanʼlú májánʼ; nduyulú xóo mbáa bi̱ nikháñuu* maski ajndu kuwáánʼ mbiʼyulú; nuni̱ gínáánʼlú mú tséradiáanʼlú;
10 nduyulú rí kuwáánʼ gíná maski ajndu kuwáanʼlú gagi; nduyulú xóo xa̱bu̱ migínáa, mú nu̱ʼni̱ rí eʼwíinʼ maguaʼdáá; nduyulú xóo rí na̱nguá kuaʼdáá nditháan maski ajndu kuaʼdáá xúgíʼ.
11 A̱ngui̱nʼ bi̱ kúwá náa Corinto, nitaxu mbájmbu ga̱jma̱a̱ nirmbáʼtáá a̱jkiu̱xu* náa ikháanʼla.
12 Ikháanʼxu nusngajmá rí nanduxu ku̱ya̱la wéñuuʼ, mú ikháanʼ na̱nguá esngajmá dí nandala kuyuxu.
13 Ikha jngóo na̱tala xóo e̱ji̱nʼ, gusngajmá ikháá má ngajua ga̱jma̱a̱ gurmbáʼtáá a̱jkia̱la.
14 Xúdala yoko gajmiála mbáa bi̱ tséʼni ñajuunʼ Dios, numuu dí rúʼko̱ gáʼni dí mani̱ndxu̱u̱ mixtiʼkhu dí mu̱da. Xú káʼnii gáruwaminaʼ dí májánʼ ga̱jma̱a̱ dí ra̱májánʼ rá.* Xú káʼnii gáruwaminaʼ aguʼ ga̱jma̱a̱ dí mikrína rá.
15 Xú káʼnii gándoo gambájxu̱u̱ Cristo ga̱jma̱a̱ Gixa̱a̱* rá. O xú káʼnii embríguminaʼ mbáa bi̱ naʼni ñajuunʼ Dios ga̱jma̱a̱ mbáa bi̱ tséʼni ñajuunʼ Dios rá.
16 Xú káʼnii embríguminaʼ goʼwóo Dios ga̱jma̱a̱ xándú rá. Numuu rí ikháanʼ ni̱ndxu̱lú goʼwóo Dios bi̱ ndaʼya. Xó má niʼthí Dios: “Ikhúúnʼ maxtáá ga̱jma̱á nindxa̱la ga̱jma̱a̱ majngruigoʼ náa majñala, mani̱ndxu̱ʼ Dios ndrígála ga̱jma̱a̱ ikháanʼ mani̱ndxa̱la xuajñunʼ”.
17 Jeobá* naʼthí: “Ikha jngóo agajnáaʼla náa majñúnʼ ikhiin ga̱jma̱a̱ guniwájímíjná, xúrugua̱ nditháan rí mitsaga”, “ga̱jma̱a̱ ikhúúnʼ magruíguáanʼla”.
18 “Jeobá* bi̱ gíʼdoo xúgíʼ tsiakii naʼthí: ‹Ikhúúnʼ mani̱ndxu̱ʼ ana̱la ga̱jma̱a̱ ikháanʼ mani̱ndxa̱la e̱ji̱nʼ jiámá ga̱jma̱a̱ wa̱ʼxa̱ʼ›”.
Mbaʼa nota
^ Mbáa rí muxmíjná ga̱jma̱a̱.
^ Mbáa mu mumbáyumíjná ga̱jma̱a̱.
^ O “xóo rí kaʼyoo dí makañúlú”.
^ O “ámiuxu̱”.
^ Náa ajngáa griego naʼthí, “dí nanújngorámuuʼ xtángoo”, xóo muʼthá bi̱ nawiñu̱u̱nʼ kuyáá xtángoo ndrígóo Dios.
^ Náa ajngáa hebreo naʼthí “Belial”, dí nandoo gáʼthúu̱n nda̱a̱ dí ejmaa mbá kayuuʼ.
