Raga̱jma̱ i̱yi̱i̱ʼ rí niʼnirámáʼ Juan 1:1-13
1 Ikhúúnʼ bi̱ ni̱ndxu̱ʼ xa̱bu̱ nikhi̱i̱,* naniraʼmáʼ náa inaaʼ ikháán a̱ʼgú nikhi̱i̱ bi̱ niwaxtaʼwíín ma̱ngaa náa inún ejña̱a̱nʼ bi̱ nandoʼ ka̱ñu̱u̱n wéñuuʼ, raʼkháa i̱ndó ikhúúnʼ ma̱ngaa xúgíinʼ bi̱ niguánú niniʼnuuʼ rí gajkhun,
2 ga̱jma̱a̱ numuu gajkhun dí rígá náa ikháanʼlu, ma̱ngaa marigá náa ikháanʼlu asndu kámuu.
3 Anu̱lú Dios bi̱ xtáa mekhuíí ga̱jma̱a̱ Jesucristo bi̱ nindxu̱u̱ A̱ʼdióo, musngajmulú rí májánʼ wéñuuʼ a̱jkiu̱ún, rí nagáwíin a̱jkiu̱ún ga̱jma̱a̱ muni̱ rí makuwáánʼlu tsímáá, ikhiin muxnulú kiʼsngáa rí gajkhun ga̱jma̱a̱ maʼndúún kuyulú.
4 Nidxu’ wéñuuʼ índo̱ nidxawuun rí tikhuun ejña̱a̱nʼ jngruigu̱u̱n má xúʼko̱ náa rí gajkhun, xó má kiʼtáñajunʼ rí nindrigú náa Anu̱lú.
5 Rí xúgi̱ a̱ʼgú nikhi̱i̱ naniraʼmáʼ náa inaaʼ mu manda̱ʼa̱a̱ʼ rí matanimbáníí kiʼtáñajunʼ rígi̱ rí na̱nguá nindxu̱u̱ nuxi̱ʼ, dí kuaʼdáá má asndu nákha ginii, dí gíʼmaa maʼndulú kuʼyamijná má xúʼko̱.
6 Rígi̱ rí eyoo gáʼthúu̱n ngajua: Rí majngruigulú má xúʼko̱ xó má naʼthí náa kiʼtáñajunʼ ndrígóo. Xó má kiʼtáñajunʼ rí nidxawíínla nákha ginii, ikhaa nindxu̱u̱ rígi̱: Rí gajngruigala má xúʼko̱ náa ngajua.
7 Numuu rí náa numbaaʼ nikujmiin mbaʼin wéñuuʼ bi̱ nuninduwaʼ, bi̱ tsénimbu̱ún rí Jesucristo ni̱ʼkha̱ xóo xa̱bu̱ numbaaʼ.* Bugi̱ nindxu̱u̱ bi̱ naʼninduwaʼ ga̱jma̱a̱ bi̱ tsíyoo gáʼyoo Cristo.*
8 Guñewa̱a̱nla rí nu̱ni̱, mu xúʼko̱ xúni̱mbátiga rí niʼngulú niʼdaaʼ náa niñejunʼ, mu xúʼko̱ mundrígúu kájxi̱ rí maguma tsajkurámaanʼlú.
9 Nimbáa bi̱ tséʼnimbánuu kiʼsngáa ndrígóo Cristo ga̱jma̱a̱ naʼsngáa mbá dí rakáʼyoo, na̱nguá xtáa náa Dios. Mú bi̱ naʼnimbánuu kiʼsngáa rígi̱, xtáa ga̱jma̱a̱ Anu̱lú ma̱ngaa A̱ʼdióo.
10 Á mu mbáa na̱ʼkha̱ gáʼyala ga̱jma̱a̱ tséʼsngála kiʼsngáa rígi̱, xúrajxi̱i̱ ni má xúndríguíi náa guʼwála.
11 Numuu rí bi̱ narajxi̱i̱ ma̱ngaa nagiʼdoo aʼkhúun náa dí ra̱májánʼ eʼni.
12 Maski ajndu gúʼdoo mbaʼa rí ma̱tala, mú tsíyóʼ gániraʼmáʼ náa inuu i̱yi̱i̱ʼ ga̱jma̱a̱ yatsíínʼ, nagúʼthu̱u̱n rí maʼgá mínu̱u̱ʼ gáyala mu muʼtámíjná, mu xúʼko̱ makuwáanʼla itháan gagi.
13 Nurajxi̱ín e̱ji̱i̱n ndxájuaaʼ bi̱ ma̱ngaa niwaxtaʼwíi.
